როგორც რუსული ინტერნეტგამოცემები იუწყებიან, დღეს მოსკოვის პუშკინის სახელობის სახვითი ხელოვნების სახელმწიფო მუზეუმში „მიმინოს“ სცენარის ავტორის, რეზო გაბრიძის ნამუშევრების გამოფენა გაიხსნება. გამოფენა სახელწოდებით „რეზო გაბრიაძე. ფერწერა, გრაფიკა, სკულპტურა“ სხვადასხვა სერიებიდან, სხვადასხვა პერიოდის 100 ნამუშევარს აერთიანებს. გამოფენაზე, ფერწერისა და გრაფიკის გარდა, მარიონეტების თეატრის ძველი თოჯინები გამოიფინება. ექსპოზიციის ხილვას პუშკინის მუზეუმის დამთვალიერებელი 18 ნოემბრამდე შეძლებს.
ქართველი მწერალი, სცენარისტი, რეჟისორი და მხატვარი რევაზ გაბრიაძე რუსულ პრესასთან საუბარში აღნიშნავს, რომ ძალიან გახარებულია ამ გამოფენით. როგორც ის ამბობს, პირველად ამ მუზეუმში ნახევარი საუკუნის წინ იმყოფებოდა, მაშინ წარმოდგენაც არ შეეძლო, რომ შეიძლებოდა ამ კედლებში ოდესმე მისი ნამუშევრებიც გამოფენილიყო.
საგამოფენო სივრცეში გაბრიაძის ყველა ექსპოზიციისთვის სპეციალური დამონტაჟდა განათება და სცენები.
რეზო გაბრიაძის გამოფენა მოსკოვში პუშკინის სახელობის სახვითი ხელოვნების სახელმწიფო მუზეუმის, ერთ-ერთი, პროექტის ფარგლებში იმართება. პროექტი იმ ხელოვანების მხატვრული ნამუშევრების საზოგადოებისთვის გაცნობას ითვალისწინებს, რომლებიც ცნობილნი გახდნენ არა სახვით ხელოვნებაში მოღვაწეობით, არამედ რომელიმე სხვა დარგში მიღწეული წარმატებებით. აღსანიშნავია რომ, რეზო გაბრიაძისთვის მხატვრობა არა მეორადი, არამედ პირველადი გატაცებაა. „მეორე ნამუშევრის“ საგამოფენო სერიის ფარგლებში ასევე მზადდება ჰერმან ჰესეს აკვარელის და სვიატოსლავ რიხტერის ფერწერის ექსპოზიციები.
პუშკინის სახელობის სახვითი ხელოვნების სახელმწიფო მუზეუმში ამ სერიით უკვე გამართულ გამოფენებს შორის არის სერგეი ეიზენშტეინის, ფრანკო ძეფირელის, იური ნორშტეინის, ტონინო გუერას გამოფენები.
გაბრიაძემ აღნიშნა, რომ ამჟამად მუშაობს თემაზე, რომელსაც პირობითად „შემოდგომა“ ეწოდება. „სიბერეს აქვს თავისი უპირატესობები და მეც მინდა ვიცხოვრო ღრმა სიბერემდე, რომელიც ტკბილი მოგონებებით იქნება სავსე“-ამბობს 86 წლის ხელოვანი.
აქვე გეტყვით, რომ 2დან 11 ნოემბრამდე რევაზ გაბრიაძის მარიონეტების თეატრი მართავს საგასტროლო ტურს მოსკოვში. რეჟისორის მიერ 1981 წელს დაარსებული მარიონეტების თეატრის დასი მოსკოვიდან რუსეთის რამდენიმე ქალაქში გაემართება: სანკტ-პეტერბურგში, ეკატერინბურგში, პერმში, ნოვოსიბირსკში, სამარასა და როსტოვში. ტურნეს ბოლოს კი დაგეგმილია რიგასა და კიევში გამგზავრება. „თეატრალური ხელოვნების სტუდიის“ სცენაზე დასი „რამონასა“ და „სტალინგრადს“ ითამაშებს.
