ხელისუფლების მხრიდან კონკრეტულ მედიასაშუალებებზე ზეწოლის შესახებ ინფორმაციას „სრულ აბსურდს“ უწოდებს პრემიერ-მინისტრი. მედიის გარშემო განვითარებულ პროცესებს გიორგი კვირიკაშვილი მთავრობის სხდომაზე გამოეხმაურა და აღნიშნა, რომ ხელისუფლების მხრიდან მედიასაშუალებებზე ზეწოლა გამორიცხულია, ისევე როგორც, გამორიცხულია საკუთარი ბიზნესი ვინმემ გამოიყენოს ხელისუფლების შანტაჟის იარაღად.

„მინდა, აუცილებლად გამოვეხმაურო იმ ძალიან არაჯანსაღ აჟიოტაჟს, რომელიც მედიასაშუალებებზე ე.წ. ზეწოლას ეხება. ჩვენი ხელისუფლების პირობებში ასეთი ტიპის ბრალდებები სრული აბსურდია. გამორიცხულია, ჩვენი ხელისუფლების პირობებში ასეთი რამ ხდებოდეს. მინდა, ყველას ვუთხრა, რომ ასევე გამორიცხულია, ჩვენი ხელისუფლების პირობებში საკუთარი ბიზნესი ვინმემ გამოიყენოს ხელისუფლების შანტაჟის იარაღად და ჩვენ დავრწმუნდით, რომ სწორედ ასეთ შემთხვევასთან გვაქვს საქმე.

მთელი გუშინდელი საღამო მიეძღვნა ამ თემატიკას. კიდევ ერთხელ მინდა ვთქვა, რომ ეს არის გამორიცხული. ხელისუფლება, რომელმაც მოიტანა ის, რომ პრაქტიკულად დღეები სჭირდება ახალი ტელევიზიის დარეგისტრირებას და ფუნქციონირების დაწყებას, ნამდვილად ვერ მივიღებთ ამ ბრალდებებს. იმ მონაპოვარს, რასაც თავისუფალი მედია ჰქვია, ჩვენს ხელისუფლებაში ვერავინ შეეხება. გამორიცხულია, ასეთი რამ ხდებოდეს, სრული პასუხისმგებლობით ვაცხადებ ამას“, - განაცხადა გიორგი კვირიკაშვილმა.

შეგახსენებთ, რომ გასულ კვირას გავრცელდა ინფორმაცია იმის შესახებ, რომ ეკონომიკის მინისტრი, დიმიტრი ქუმსიშვილი „TVპირველის“ წილების ხელისუფლების სასარგებლოდ დათმობასთან დაკავშირებით მოლაპარაკებას აწარმოებდა არხის დამფუძნებელთან. ჟურნალისტები ამბობენ, რომ გარიგება არ შედგა. თუმცა, მხარეები ამის შესახებ ღიად არ საუბრობენ, მათ შორის ხელისუფლების ზეწოლაზე. „TVპირველის“ შემდეგ ხელოვნურად შექმნილ ფინანსურ პრობლემებზე საუბრობს ტელეკომპანია „იბერია“. ისინი ამბობენ, რომ ტელევიზიის მთავარი დამფინანსებელი არის „ომეგა ჯგუფი“, რომელზეც ხელისუფლება ზეწოლას ახორციელებს, რაც ტელეკომპანიას ფინანსურ პრობლემებს უქმნის.

„პატრიოტების“ წევრი, დეპუტატი ნატო ჩხეიძე, რომლის მეუღლის საკუთრებაა „ომეგა ჯგუფი“ და ტელეკომპანია ამბობს, რომ მედიის საშუალებით შანტაჟის რაიმე მცდელობა აბსოლუტურად გამორიცხულია. ჩხეიძე ამბობს, რომ „იბერია“ დამოუკიდებელი და თავისუფალი ტელეკომპანიაა, რომელიც დღის მოვლენებს ფაქტებზე დაყრდნობით აშუქებს და მიმდინარე მოვლენების მიმართ თავიანთი დამოკიდებულება აქვთ. რაც შეეხება „ომეგა ჯგუფის“ გარშემო განვითარებულ მოვლენებს, ამბობს, რომ ამის შესახებ ინფორმაციას ფლობენ როგორც პარლამენტის დარგობრივ კომიტეტში, ასევე მთავრობასა და სასამართლოში.

„შანტაჟი ყველას მხრიდან დაუშვებელია. „იბერია“ და სხვა ტელეკომპანიები დამოუკიდებლები არიან და ისინი არანაირი პოლიტიკური თუ ეკონომიკური ზემოქმედებისთვის გამოყენებული არ არიან. მედიის საშუალებით შანტაჟის რაიმე მცდელობა აბსოლუტურად გამორიცხულია, მედიას თავისი საქმე აქვს, მთავრობას თავისი და პარლამენტს თავისი.

თუ ყველა თავის საქმეს კარგად გააკეთებს, ეს მხოლოდ ჩვენს მომავალს წაადგება. შეტევა ის იყო, რაც 2004 წელს განხორციელდა და გახსოვთ, „იბერიის“ მიმართ რა განხორციელდა. შეტევას იმას ვერ დავარქმევ, რაც შეიძლება ახლა ხდებოდეს. დღევანდელი ვითარება 2004 წლის ამბებისგან ძალიან განსხვავებულია“, - აღნიშნა ნატო ჩხეიძემ.

მიმდინარე პროცესებთან დაკავშირებით კითხვის ნიშნებს ხედავენ პრეზიდენტის ადმინისტრაციაში. როგორც ადმინისტრაციის უფროსი გიორგი აბაშიშვილი აცხადებს, პრეზიდენტი აკვირდება ტელეკომპანია „იბერიას“ ირგვლივ განვითარებულ მოვლენებს. აბაშიშვილი ამბობს, რომ განცხადება გაკეთდება მხოლოდ მას შემდეგ, რაც პრეზიდენტის ადმინისტრაციის წარმომადგენლები შეხვდებიან ტელეკომპანიის მფლობელს.

„რაც შეეხება ამ კონკრეტულ შემთხვევას, ბუნებრივია, არსებობს გარკვეული კითხვები, ჩვენ ყურადღებით ვაკვირდებით ამ პროცესს. მათ შორის პრეზიდენტის დავალებით გვექნება შეხვედრა ქალბატონ ნატოსთანაც და შესაბამისად შემდგომ დავაფიქსირებთ ამ საკითხზე პოზიციას, როცა უფრო მეტი ინფორმაცია გვექნება“, - განაცხადა გიორგი აბაშიშვილმა.

თავისუფალ მედიაზე ზეწოლა „ქართული ოცნების“ პოლიტიკის შემადგენელ ნაწილს უწოდებს „ევროპული საქართველოს“ წევრი სერგო რატიანი, რომლის განცხადებით ბოლო წლებში, თავისუფალ მედიაზე ზეწოლის არაერთი შემთხვევა დაფიქსირდა. ამის მაგალითად რატიანს „რუსთავი 2“-ის გარშემო მიმდინარე სასამართლო პროცესი მოჰყავს.

„ჩვენ ვხედავთ, რომ ბოლო წლების განმავლობაში, არაერთი შემთხვევაა, როდესაც თავისუფალ მედიაზე ხორციელდება ზეწოლა და მისი მოშლის, მონგრევის და დაქვემდებარების მცდელობაა. ვნახეთ, თუ რა მოუვიდა და დაემართა „მაესტროს“, ვხედავდით წინა კვირას შეტევას „ტვ პირველზე“, ვხედავთ, რომ „იბერიის“ მიმართაც დაიწყო იგივე პროცესები. ასევე, ამ წლების განმავლობაში არ ჩერდება შეტევა „რუსთავი 2“-ზე და ეს არ არის გამონაკლისი შემთხვევა. ამდენად, ჩვენ ვხედავთ, რომ ეს არის შემადგენელი ნაწილი „ქართული ოცნების“ პოლიტიკის“, - განაცხადა სერგო რატიანმა.

საკითხის ობიექტურ შესწავლას ითხოვს „ნაციონალური მოძრაობის“ წევრი რომან გოცირიძე, რომლის შეფასებით, საუბარი იმის შესახებ, რომ სიგარეტი ვერ გავყიდე და ტელევიზია დაიხურება, ესეც არაა სწორი. მისი თქმით, საკითხი ნეიტრალურად და ობიექტურად უნდა იყოს გამოკვლეული.

„საუბარი იმის შესახებ, რომ სიგარეტი ვერ გავყიდე და ტელევიზია დაიხურება, ესეც არაა სწორი. საჭიროა, ობიექტური შესწავლა. მედია დაცული უნდა იყოს სახელმწიფოს ზემოქმედებისგან. ზეწოლის ნიშნები მედიაზე ჩანს, თუნდაც „ტვ პირველზე“ რაც მოხდა. ნებიმიერი ასეთი ქმედება ხელისუფლების მხრიდან აღძრავს ეჭვებს, რადგან საზოგადოება ხელისუფლებას მედიასთან მიმართებაში არ ენდობა“, - აცხადებს რომან გოცირიძე.

ანალიტიკოსი დავით ზარდიაშვილი ამბობს, რომ გამაოგნებელია იმის მტკიცება, რომ ხელისუფლება ცდილობს ზეწოლას მედიაზე. მისი თქმით, ვერც ერთი ჟურნალისტი ვერ იტყვის, რომ მის სარედაქციო პოლიტიკაში რაიმე ფორმით და გზით ცდილობს ხელისუფლება ჩარევას. ამბობს, რომ მისთვის გაუგებარია რას ეფუძნება „TVპირველის“ და „იბერიას“ განცხადება.

„რუსთავი 2“-ს მაგალითზე რომ ავიღოთ, ზეწოლის ფაქტი რომ ყოფილიყო, სასამართლო პროცესი არ იქნებოდა. მილიონი გზა არსებობს იმისა გააჩუმონ „რუსთავი 2“. უმარავი მეთოდი გვაქვს ნანახი, იგივე ნაციონალების მმართველობის პერიოდში მედიაზე ზეწოლის სხვადასხვა საშუალებებს იყენებდნენ, მათ შორის ფინანსურს, პოლიტიკურს, ტერორის გზა და ამის მაგალითი იყო ტელეკომპანია „იმედი“. ზეწოლა ამას ჰქვია.

ჩემთვის გაუგებარია რას ეფუძნება „TVპირველის“ და „იბერიას“ განცხადება. რა საფუძველი აქვთ, როცა ამბობენ, რომ მათ სარედაქციო დამოუკიდებლობას საფრთხე ემუქრება. ეს ფაქტი პოლიტიკურ სოლიდარობას უფრო გავს, ვიდრე ზეწოლას. არ ჩანს ასეთი ფაქტი, რომ ხელისუფლებამ რაიმე ფორმით ხელი შეუშალოს სარედაქციო პოლიტიკის წარმათვას. ვისაც რასაც უნდა იმას ლაპარაკობს, არავინ იზღუდება. რა არის შეზღუდვა და რა ფორმა აქვს მას, ეს კინო ნანახი გვაქვს“, - ამბობს დავით ზარდიაშვილი.

როგორც მაყურებელი, პოლიტოლოგი რამაზ საყვარელიძე ეკრანიდან ვერ გრძობს, რომ ტელევიზია განიცდის ზეწოლას. ამბობს, რომ უახლესი წარსულიდან კარგად ახსოვს ზეწოლის ფაქტები და გრძნობდა კიდევაც, როდესაც გადაცემები და ტელევიზიები ქრებოდა. მისი თქმით, მსგავსი არაფერი ხდება.

„სამწუხაროდ, ხელისუფლებამ სალაპარაკო გაიხადა „საზოგადოებრივი მაუწყებლის“ საკითხი, სადაც აგრეთვე ზეწოლის მექანიზმზე ალაპარაკდა ოპოზიცია. რისთვის სჭირდებოდა ეს ხელისუფლებას, ჩემთვის სრულიად გაუგებარია. რაც შეეხება ოპოზიციის ბრალდებებს, სამწუხარო ფაქტია, რომ ოპოზიციამ ვერ მოახერხა იმ ავტორიტეტის მოპოვება საზოგადოებაში, რომ მისი განცხადება სარწმუნოდ იქნას მიღებული.

შეიძლება რაიმე მოლაპარაკება იყო, ან არა, მაგრამ ეკრანს არაფერი ეტყობა. ხშირად „რუსთავი 2“-ისგან, რომელიც ოფიციალურად ოპოზიციური ტელევიზია არის, ვერ გაარჩევ სხვა ტელევიზიებს. ზეწოლას დიდი ჭკუა არ სჭირდება და ასე რომ იყოს, რა თქმა უნდა, შედეგსაც ვიგრძნობდით. თვითონ ამ ოპოზიციის განცხადება არ არის სანდო. ეს ის ოპოზიციაა, რომლის ხელშიც ხდებოდა ზეწოლა მედიაზე და ეს ხდებოდა უხეში ფორმით. მათ არც ერთხელ ბოდიში არ მოუხდიათ. ეს ოპოზიცია დღეს, რომ ლაპარაკობს ზეწოლაზე, რასაკვირველია ნდობას ვერ აჩენს“, - აღნიშნა რამაზ საყვარელიძემ.