„რუსთავი 2“-ში დროებითი მმართველის დანიშვნამ კითხვები გააჩინა მათშიც, ვინც „რუსთავი 2“-ს ნაციონალების რუპორად აღიქვამდა. ზოგიერთი თვლის, რომ ხელისუფლებამ იჩქარა და სააპელაციო სასამართლოს გადაწყვეტილებამდე არხის მმართველის შეცვლა არ იყო საჭირო, რადგან ეს დასავლეთს ეჭვებს გაუმძაფრებდა. ზოგიერთებს კითხვები გაუჩნდათ თვით მოსამართლე ურთმელიძის მიმართ - რეალურად ვის თამაშს თამაშობს მოსამართლე - ხელისუფების თუ ნაციონალების? ვის აწყობს ასეთი სცენარით მოვლენების განვითარება?

ექსპერტი გია ხუხაშვილი For.ge-სთან საუბარში აცხადებს, რომ „რუსთავი 2“-ის ირგვლივ განწყობა არაერთგვაროვანია.

გრძელვადიან პერსპექტივაში „რუსთავი 2“-ის ირგვლივ განვითარებული პროცესები ხომ არ აღმოჩნდება ის შემთხვევა, როცა გამარჯვება დამარცხებაზე უარესია?!

- ყოველთვის მივესალმებოდი სამართლიანობის აღდგენას იმ ნაწილში, რომ ტელეკომპანიის წილები უნდა დაბრუნებოდა რეალურ მფლობელებს. მიმაჩნია, რომ დათო დვალი მყარი პრინციპების ადამიანია და ის არასოდეს არ დაუშვებს პოლიტიკურ კონიუნქტურაში ჩაჯდომას. ეს იყო ჩემი განწყობა, მაგრამ ის ფორმა, რაც დღეს დაფიქსირდა, ძალიან სერიოზული რისკების შემცველია. ფორმა მძიმე კითხვის ნიშნებს ბადებს და მე ვფიქრობ, დათო დვალიც ახლა მაინცდამაინც თავს კარგად არ გრძნობს. ამიტომ ვისურვებდი, ჩვეულებრივ მდორე პროცესში მიეღწია წარმატებისთვის და არა ფორსმაჟორში, ასეთი დაძაბულობის ფონზე.

რასაც ვაკვირდები, სიტუაცია ასეთია: ტელევიზიაში გვაქვს ორი მენეჯმენტი, ერთი დე ფაქტო მენეჯმენტი და მეორე - დე იურე მენეჯმენტი. ანუ, ერთს აქვს იურიდიული უფლებამოსილება, მაგრამ ვერ ახორციელებს ამ იურიდიულ უფლებამოსილებას, მეორე მხრივ კი, გვყავს ფაქტობრივი მენეჯმენტი, რომელსაც არ აქვს იურიდიული უფლებამოსილება. გამოდის, რომ სხვადასხვა მიზეზით, არც ერთი მენეჯმენტი არ არის ფუნქციონირებადი. ამიტომ დღეს გადამწყვეტი სიტყვა „რუსთავი 2“-ის კოლექტივის სიტყვაა. თუ ისინი მიიღებენ ახალ მენეჯმენტს და იმ თამაშის წესებს, რასაც მათ სთავაზობს დე იურე მენეჯმენტი, ამ შემთხვევაში, რისკები შეიძლება მეტ-ნაკლებად იყოს აცილებული. თუ „რუსთავი 2“-ის კოლექტივი არ იღებს ამ ყველაფერს, ეს ქმნის პოტენციურ საშიშროებას, რომ ტელევიზიამ გარკვეული პერიოდი მაინც შეწყვიტოს მაუწყებლობა, სხვა პროცესები დაიწყოს, რაც მარტო კოლექტივს კი არა, სიტყვის თავისუფლების ფუნდამენტურ ღირებულებას დააზიანებს. ამას ქვეყნის შიგნით და გარეთ გარკვეული რეაქციები მოჰყვება, ეს უკვე სერიoზული სახელმწიფო რისკების შემცველი პროცესი იქნება. ვიმეორებ, დღეს მთავარი სიტყვა უნდა თქვას „რუსთავი 2“-ის კოლექტივმა.

მაგრამ მთელი თავისი ისტორიის მანძილზე გახსოვთ, რომ „რუსთავი 2“-ელებს ეთქვათ გადამწყვეტი სიტყვა? დღესაც ისმის განცხადებები, რომ „რუსთავი 2“-მა საკუთარი თავი უნდა იხსნას ძალადობისგან, მაგრამ როგორ? მაშინ, როცა ამ ტელეკომპანიის ჟურნალისტების მიმართ სააკაშვილი შეურაცხმყოფელ სიტყვებს არ იშურებდა, ისინი მკვეთრ რეაქციას სააკაშვილის მიმართ მაინც არ გამოხატავდნენ.

- შეიძლება, ხმა არ ამოიღონ, მაგრამ შიდა ლაპარაკში გამოხატონ უკმაყოფილება. ერთია, შიდა სამზარეულო და მეორეა, რომ მათ აქვთ რაღაცის რწმენა. მე არ მჯერა შეთქმულების თეორიების, რომ ჟურნალისტები მძევლებად არიან აყვანილნი, ჟურნალისტები შიდა ტერორის ქვეშ არიან, მით უმეტეს, ამ სიტუაციაში. არც ის მჯერა, რომ ძალიან უნდათ ამ გადაწყვეტილების დათანხმება, მაგრამ ვერ ეთანხმებიან, რადგან ეშინიათ. ეს არადამაჯერებელია. თუ საფრთხე დადგა, რომ ახალი მენეჯმენტის მიერ ვერ მოხერხდა ჟურნალისტების დარწმუნება ნორმალურ ფუნქციონირებაზე, ამ შემთხვევაში, ვერ შესრულდება სასამართლო გადაწყვეტილების მთავარი მიზანი, სადაც ლაპარაკია ფინანსურ სტაბილურობაზე, ნორმალურ სარედაქციო პოლიტიკაზე. ვერ აღსრულდება ეს მიზანი, ანუ, ფაქტობრივად, მოსამართლე ურთმელიძის გადაწყვეტილება უკუღმა, თავდაყირა შესრულდება. ნაცვლად იმისა, რომ რაღაც გაჯანსაღდეს, მივიღებთ დახურულ ტელევიზიას, რაც ძალიან მძიმე იქნება.

რას ნიშნავს დავით უსუფაშვილის განცხადება, რომ დაუშვებელია, ქვეყნის პოლიტიკური ცხოვრება წარიმართოს სააკაშვილ-ხალვაშის სცენარით?! რა არის ეს სცენარი?

- მე არ მინდა ამ თემებში ღრმად შევიდე და ცეცხლზე ნავთი დავასხა, მით უმეტეს, ეს ჩემს კომპეტენციას სცილდება, თუმცა სასამართლო სისტემა, მთლიანობაში, როგორც საკონსტიტუციო, ასევე, საერთო სასამართლოები, პოლიტიკური პროცესის ნაწილი გახდა, ანუ გახდნენ პოლიტიკური მოთამაშეები. რაც მთავარია, გახდნენ სხვადასხვა დაპირისპირებულ ბანაკში მოთამაშეები, რაც სერიოზული ხიფათის შემცველია. ფაქტობრივად, ქვეყანაში ინსტიტუტების არსებობა დადგა საფრთხის ქვეშ. ეს არის მთელი ამ პროცესის შედეგი. ურთმელიძე მარტო მოსამართლე ხომ არ არის, ის არის მოქალაქეც, საკონსტიტუციომ როცა მიიღო რაღაც გადაწყვეტილება, ამან სიტუაცია დააწყნარა, ურთმელიძის გადაწყვეტილებამ კი თავიდან ააფეთქა სიტუაცია და არაპროგნოზირებადი გახადა მოვლენების განვითარება. შესაბამისად, მე არ მინდა მასზე, როგორც მოსამართლის პასუხისმგებლობაზე ვილაპარაკო, მაგრამ მასზე, როგორც მოქალაქის პასუხისმგებლობაზე ნამდვილად ვილაპარაკებ. მან, როგორც მოქალაქემ, დღეს უმძიმესი დარტყმა მიაყენა და შექმნა გარკვეული რისკები სახელმწიფოს მომავალი განვითარებისთვის.

თვითონ სააკაშვილ-ხალვაშის ტანდემი შეიძლება ერთად წარმოვიდგინოთ, რისკენ მიჰყავს მსჯელობა უსუფაშვილს?

- მე ამას ვერ წარმოვიდგენ. ბევრჯერ მითქვამს და ახლაც გავიმეორებ, ის პროცესი, რაც დღეს მიჰყავს ხალვაშს, მიუხედავად იმისა, რომ ის ნამდვილად დაზარალებული და გამწარებული ადამიანია, პირველი, ვისაც აზიანებს, ეს არის ხელისუფლება. სამწუხაროდ, მე ვხედავ, რომ ეს ხელისუფლებას არ ესმის.

სიმბოლოების თაობაზეც ითქვა, რომ 7 ნოემბერი ახლოვდება და, ეტყობა, სიმბოლოები უყვარს ბიძინასო. ხედავთ პარალელებს?

- დეჟავუ და მისტიკური მომენტები მეორე თემაა. სამწუხაროდ, დეჟავუს განცდა ახლაც არსებობს. თუმცა პარალელებს, პირადაპირ ანალოგიას ამას მაინც არ დავარქმევდი. ისე, რაღაც ნაწილში იკვეთება ეს ორი თემა, როგორც კალენდარულად, ასევე, შინაარსობrივად. თუმცა მაშინ, ჩემი აზრით, სულ სხვა პროცესი იყო. სხვათა შორის, ბედის მწარე ირონია კიდევ ის არის, რომ მაშინდელი მოძალადე დღეს არის დაზარალებული. ნიკა გვარამიას ვგულისხმობ.

სააპელაციომდე ნაჩქარევად გეჩვენებათ არხის მმართველის შეცვლა?
- რა თქმა უნდა, ურთმელიძემ თავიდან ააფეთქა სიტუაცია. როგორც მოქალაქემ, ქვეყანაში შექმნა სერიოზული რისკები.

არის საშიშროება, რომ „ცენზორი 2“ დაისვას „რუსთავი 2“-ში, დვალი-საყევარიშვილის სახით?
- რეზო საყევარიშვილი ჩემი მეგობარია და პერსონალური შეფასებებისგან თავს შევიკავებ.

ნიკა გვარამიამ განაცხადა, რომ სასამართლოს ეს გადაწყვეტილება სახელმწიფო გადატრიალების საფუძველია. გარდა ამისა, ნაციონალებს ალიბი გაუჩნდათ - ბარიკადების აღმართვა სწორი გადაწყვეტილება ყოფილა საკუთარი თავის დასაცავადო.

- გასაგებია, მაგრამ ჯერჯერობით მე არ შევალ ამ პოლემიკაში. ჯერ ქმედებები არ დაწყებულა და მინდა, კიდევ დაველოდო პროცესებს, დღეს და ხვალ რა მოხდება. არ მინდა, წინასწარი განცხადებებით გავხდე მხარე. თუმცა სახელმწიფოსთვის გრძელვადიან პესპექტივაში ეს ყველაფერი დამაზიანებელია. გრძელვადიანი ზიანი, ფაქტობრივად, გამოუსწორებელია, ამის შერბილება ჯერ კიდევ შეიძლება.

„რუსთავი 2“-ის გამო შეიძლება ორ პოლუსად გაიყოს საზოგადოება? ტელეკომპანიის სოლიდარობის მიზნით ხელოვანთა ნაწილი უკვე დაირაზმა, მათ შორის -ნინო სუხიშვილი და სხვები.

- სამწუხაროდ, ხელისუფლებაც და „ნაციონალური მოძრაობაც“ ყველაფერს აკეთებს, რომ ორ შეურიგებელ, ერთმანეთის მოძულე პოლუსად გაიყოს ეს ქვეყანა. სინამდვილეში, არც ხელისუფლება და არც „ნაციონალური მოძრაობა“ არ არიან უმრავლესობაში. მათი ჯამური ლეგიტიმაცია ამ საზოგადოებაში ძალზე დაბალია და ეს ორი პოლიტიკური ძალა ცდილობს, გახლიჩოს მთლიანად საზოგადოება, ბანაკებად დაალაგოს ეს ქვეყანა. არადა, სწორედ ჩვენ ვართ უმრავლესობაში და ჩვენ არც ერთ მათგანს არ ვეთანხმებით ამ პროცესში, ორივეს ვეუბნებით „არა“-ს. მე რომ ამ განცხადებას ვაკეთებ, მე უმრავლესობაში ვარ და ისინი არიან უმცირესობაში.