ოპოზიცინერი დეპუტატი აკაკი ბობოხიძე მიიჩნევს, რომ დროა, უმრავლესობამ ღარიბაშვილის ხელისუფლების გაშვებაზე და ახალი პასუხისმგებლიანი მთავრობის არჩევაზე იფიქროს. კანონმდებელის პოზიციით, ღარიბაშვილს პოლიტიკური პასუხისმგებლობა არ აქვს, საქართველოს კი პოლიტიკური უნარჩვევების მქონე ხელისუფლება სჭირდება, რადგან ქვეყანაში სპეციფიკური მდგომარეობაა და ხალხი ტექნიკური მთავრობის იმედად ვერ იქნება.

დაიშლება თუ არა კოალიცია და როგორ ემზადებიან, 15 ნოემბერს დაგეგმილი აქციისთვის „ნაციონალები“, ამის გარკვევის მიზნით, for.ge აკაკი ბობოხიძეს ესაუბრა:

15 ნოემბრის აქციის პათოსი რა არის?

- იმის მიუხედავად, რომ რუსეთი მთელ მსოფლიოსთან დაპირისპირებულია, ის ბედავს საქართველოს მიმართ შეტევაზე გადმოვიდეს. როგორც ჩანს, რუსეთს შეთანხმებულად, ან ნებსით, ან ხელისუფლების უნიათობის გამო, გარანტიები აქვს იმის, რომ ქართული მხარე მას საკუთარ ქმედებებზე ადეკვატურ პასუხს არ მოსთხოვს. ახალმა ხელისუფლებამ ყველაფერი გააკეთა იმისთვის, რომ საქართველო-რუსეთის ურთიერთობები საერთაშორისო მსჯელობის საგანი არ გამხდარიყო. სამწუხაროდ, ახალმა მთავრობამ ისიც „მოახერხა“, რომ მოსკოვს სანქციები მხოლოდ უკრაინის გამო დაუწესეს და საქართველოს ხსენება არსად არ არის. ხვალ და ზეგ, რუსეთისთვის სანქციების გადახედვის საკითხი რომ დადგება, საქართველოსთან მიმართებაში, რაც არ უნდა მოხდეს, ეს სანქციების მოხსნაზე აღარ იმოქმედებს. პირველ რიგში, მოსახლეობამ ხელისუფლებას და შემდეგ საერთაშორისო თანამეგობრობას უნდა გააგებინოს, რომ საქართველო ტერიტორიების ანექსიას არ შეეგუება.

თუმცა, ხელისუფლება აცხადებს, რომ პროცესში ჩართულია საერთაშრისო თანამეგობრობა და ამასთანავე, მმართველი გუნდი რუსეთის მიმართ აგრესიული პოლიტიკის წარმოებას დაიწყებს...

- ის მატარებელი გავუშვით, რა დროსაც რუსეთს სანქციები დაადეს. რუსეთს ევროსაბჭოსა და ევროკავშირში ლობისტები გამოუჩნდა, სანქციების გადახედვასა და შერბილებაზე საუბრობენ. რუსეთის გეგმის საპასუხოდ, ქართულმა მხარემ მაქსიმუმ, რეზოლუციებს მიღებას შეიძლება მიაღწიოს, რაც ჩვენი ქვეყნისთვის განვლილი ეტაპია. სამწუხაროდ, როცა „ნაციონალური მოძრაობის“ მთავრობა აქტიურობდა, მაშინ მსოფლიო მზად არ იყო რუსეთთან სანქციების რეჟიმით ელაპარაკა. რაც შეეხება აგრესიულ პოლიტიკას, ამაში რას გულისხმობენ? - კბილების დაკრეჭას? სხვა აგრესიული პოლიტიკა ჩვენ არ გვინახავს.

ხელისუფლებას რას სთავაზობთ - ომი დაიწყოს?

- ომი არ უნდა დაიწყოს, მაგრამ ჩვენ გვეუბნებიან, აგრესიული პოლიტიკა გქონდათ და და რუსეთს ლანძღავდითო. რუსეთს არ ვლანძღავდით, მაგრამ პროცესებს თავის სახელს ვარქმევდით. მტერს კი არ უნდა აგინო, რაციონალური პოლიტიკა უნდა აწარმოო და ის გააკეთო, რაც ქვეყანას სჭირდება.

რუსეთის გეგმის საპასუხოდ, რა უნდა გააკეთოს ხელისუფლებამ?

- კი არ უნდა გააკეთოს, უნდა გაეკეთებინა. თავის დროზე, ქართული მხარე სანქციებს უნდა მიერთებოდა და დღის წესრიგში ქართული პრობლემებიც მოხვდებოდა. ხელისუფლებამ მთავარი აქცენტი კარასინ-აბაშიძის ფორმატზე გადაიტანა, რაც მიუღებელია. რუსეთთან პირდაპირ მოგებული ვერ გამოვალთ და ერთადერთი შანსი, რომ რუსული აგრესია შევაკავოთ, ეს არის პროცესებში მსოფლიო თანამეგობრობის ჩართვა. უმრავლესობამ, დროა, ღარიბაშვილის ხელისუფლების გაშვებაზე და ახალი პასუხისმგებლიანი მთავრობის არჩევაზე იფიქროს.

რას გულისხმობთ? ღარიბაშვილის ნაცვლად, ხელისუფლებაში ვინ უნდა მოვიდეს?

- ღარიბაშვილს პოლიტიკური პასუხისმგებლობა არ აქვს. არა იმიტომ, რომ მას არ უნდა, არამედ იმიტომ, რომ ის პოლიტიკაში შემთხვევით მოხვედრილი ადამიანია. რომ არა ბიძინა ივანიშვილი, ის პოლიტიკაში ჩართვასაც კი არ ეცდებოდა. წარმატებული ბიზნეს მენეჯერი იყო, იმას არ ნიშნავს, რომ წარმატებული პოლიტიკოსი ხარ. პოლიტიკური უნარჩვევების და პასუხისმგებლობის მქონე ხელისუფლება გვჭირდება, რადგან ქვეყანაში სპეციფიკური მდგომარეობაა და ტექნიკური მთავრობის იმედად ვერ ვიქნებით. ის, რომ საპარლამენტო რესპუბლიკა ვართ, ეს იმას არ ნიშნავს, რომ პოლიტიკიდან პრეზიდენტი უნდა მოტეხო. მთავრობაზე პასუხისმგებლობა პარლამენტს ეკისრება.

კოალიციის დაშლის საფრთხეს ხედავთ?

- სამწუხაროდ, ვერ ვხედავ, რადგან არცერთი პარტია მზად არ არის ივანიშვილის თბილ კალთას დღეს მოშორდნენ და ოპონირების რეჟიმი არჩიონ.

თუმცა, „რესპუბლიკური პარტიის“ წევრები კრიტიკული განცხადებებით გამოდიან. მათ შორის, ვახტანგ ხმალაძემ აღნიშნა, რომ მათი კოალიციიდან წასვლა შემდგომ პროცესებზეა დამოკიდებული...

- მათ განცხადებებში ვერანაირ სიმწვავეს ვერ ვხედავ. როგორც ჩანს, მათ განცხადებებში კოალიციაში მათი პარტიული გაძლიერება იგულისხმება. თავმოყვარე პარტიები კოალიციიდან გასულები უკვე იქნებოდნენ.

თქვენ ამბობთ, რომ „რესპუბლიკელებს“ სიტყვა არ ეთქმით და კოალიციაში ფესვების გადგმას ცდილობენ?

- ეთქმით, მაგრამ ამ სიტყვას თავიანთი პარტიული მდგომარეობის გასაუმჯობესებლად ხარჯავენ და არა ქვეყნის ინტერესებიდან გამომდინარე. „რესპუბლიკელები“ აფხაზეთთან მიმართებაში რაღაც მოდელებზე მუშაობდნენ და მათთვის ღარიბაშვილის მხრიდან აფხაზებისადმი შეთავაზებული ავტონომია სასაცილო უნდა იყოს. სამწუხაროდ, ღარიბაშვილი საქართველოს ისტორიას არ იცნობს, რადგან პროცესების მონაწილე არ იყო და თან, მაგ დროს პატარა იყო. შამბას სიტყვებს გავიხსენებ, რომ „მდინარეში ცურვას, ოკეანეში ცურვა გვირჩევნიაო“. აფხაზები პირდაპირ ამბობენ, რომ თუ მათ დამოუკიდებელი სტატუსი არ ექნებათ, მათ რუსეთის ფედერაციაში ყოფნა ურჩევნიათ.

თუმცა, პრემიერ-მინისტრმა ირაკლი ღარიბაშვილმა თქვა, რომ აფხაზებსა და ოსებს დამოუკიდებელი სტატუსი არცერთ შემთხვევაში არ ექნებათ...

- კიდევ კარგი, რომ პრემიერმა კიდევ უარესი რამ არ თქვა და ცარიელი ტერმინი - ავტონომია გამოიყენა. თვითგამორკვევასთან დაკავშირებით ღარიბაშვილის მიერ გამოყენებული ტერმინი „რესპუბლიკელებისთვის“, რომლებიც პოლიტიკოსობას ჩემულობენ, ტრაგედია უნდა ყოფილიყო.

აქცენტს „რესპუბლიკელებზე“ აკეთებთ, მაგრამ კოალიციაში „თავისუფალი-დემოკრატებიც“ შედიან, რომლის ლიდერის ირაკლი ალასანიას უწყებაში მაღალჩინოსნები დააკავეს. რასთან გვაქვს საქმე - კორუფციული საქმის გახსნასთან თუ შიდა სახელისუფლებო ბრძოლასთან?

- არსებობს ლეგენდა, რომ „თავისუფალი-დემოკრატები“ პროდასავლური ძალაა, მაგრამ ჯერჯერობით, ამ მიმართულებით არაფერი იგრძნობა, რადგან ისინი ჩვეულებრივი ჩინოვნიკების როლში გამოდიან და მათში ჯერ პოლიტიკოსს ვერ ვხედავ. ის, რაც უწყებაში ხდება, ეს ლაგამის ამოდების პოლიტიკაა.

ვისთვის, ალანიასთვის?

- ყველასთვის. ეს იქნება ალასანია თუ „რესპუბლიკელები“.

თქვენს მიერ დაგეგმილ აქციას რომ დავუბრუნდეთ, გამორიცხავთ, რომ თქვენს მიტინგს თქვენდამი რადიკალურად განწყობილი ადამიანები დაუპირისპირდნენ?

- მოსახლეობას ერთიანობის დემონსტრირებას ვთავაზობთ. რაც შეეხება იმას, თუ რას იზამს რუსების მეხუთე კოლონა, ეს ნაკლებად საინტერესოა, რადგან საბედნიეროდ, ისინი მცირე ჯგუფს წარმოადგენენ. პროვოკაციები გამორიცხული არ არის, მაგრამ თურმე, დასავლური ღირებულებების მქონე პარტიას მიტინგის გამართვა რომ სურს, ეს დესტაბილიზაციის მცდელობაა, ხოლო თბილისის მკვდარ ქალაქად გამოცხადება, მაგისტრალების გადაკეტვა და „გრუ“-ს რაზმების შემოსვლის მცდელობა რომ ჰქონდათ, ეს სტაბილურიობისთვის მოწყობილი მიტიგები იყო. მიტინგების ლომებს, 15 ნოემბრის აქციის ეშინიათ?

უმრავლესობა აცხადებს, რომ თქვენ არ დაგარბევენ და არც ფეკალურ მასებს გესვრიან, თუმცა, გირჩევენ, რუსთაველის გამზირზე ყოფნის დროს 7 ნოემბერისა და 26 მაისის დარბევა გაიხსენოთ..

- იგივე ადამიანები ამბობენ, რომ თურმე, პრემიერის სახლთან მიტინგი უნდა დარბეულიყო. თურმე, ვიღაცეები იმის მიუხედავად უნდა დაისაჯონ, მათ დანაშაული დაუმტკიცდებათ თუ არა. ადა მარშანიას ჰკითხეს, ბაჩო ახალაიას რა დანაშაული აქვსო და მან უპასუხა, ნაციონალების სახე იყოო. რას ჰქვია სახე იყო?

გჯერათ, რომ ახალაია უდანაშაულოა?

- რა მჯერა, ეს პირადი განცდაა. ნებისმიერ ადამიანს უნდა მოვეპყრათ არა იმის მიხედვით, თუ რა პოლიტიკური შეხედულებები აქვს, არამედ დანაშაულის გათვალისწინებით. ვიღაცას მიაჩნია, რომ ჩვენი მიტინგი დასარბევია. სამწუხაროდ, ჩვენ მიგვაჩნდა, რომ 26 მაისის აქცია იყო დასარბევი. მითუმეტეს, აქციის მონაწილეები მოლოტოვის კოქტეილებით იყვნენ შეირაღებულნი.

7 ნოემბერს, რა საგნებით იყვნენ ადამიანები შეიარაღებულნი, რომ დაარბიეთ?

- მიღებული გადაწყვეტილება პოლიტიკური თვალსაზრისით სწორად არ მიმაჩნია, მაგრამ კანონის მიხედვით, სწორი პოზიცია იყო, როცა კარვების აღება დაიწყეს.

კარვების აღებას თან ადამიანების სცემა ახლდა...

- მძიმე მიდგომების ხალხი ვიყავით, მაგრამ ესინი ხომ იყვნენ დემოკრატები და მებრძოლები და ხელისუფლებაში ყოფნის დროს, „ნაციონალური მოძრაობის“ წევრების დასჯას პირადი განწყობების საფუძველზე რომ ითხოვენ, განსხვავება რაა?