ოპოზიციონერი დეპუტატი გივი თარგამაძე „ნაციონალური მოძრაობის“ გეგმებზე საუბრისას, ყურადღებას ხალხთან დიალოგის დაწყებაზე ამახვილებს და ამბობს, რომ მისი პარტია, ახალი მიზნისთვის და წინსვლისთვის განკუთვნილი ფორმულის მიგნებას უნდა შეეცადოს.

რას პასუხობს გივი თარგამაძე პარლამენტის თავმჯდომარეს, დავით უსუფაშვილს The New York Time-ში გამოქვეყნებული სტატიის საპასუხოდ, ამას for.ge-ს ინტერვიუდან შეიტყობთ:

ბატონო გივი, პრემიერ-მინისტრმა „ნაციონალური მოძრაობა“ ადამიანის გატაცების მცდელობაში დაადანაშაულა. ირაკლი ღარიბაშვილმა საკმაოდ მძიმე ბრალი წაგიყენათ. რას უპახებთ მას?

- არაფერზე დაფუძნებული ბრალდება წაგვიყენეს. პრემიერის გამოსვლები უკვე შიზოფრენიას ემსგავსება. მას ჰგონია, რომ თითის ქნევა ვინმესთვის შთამბეჭდავია, მაგრამ იმას ვერ ხვდება, რომ თავისი უსუსურობის გამო კალაპოტიდან ამოვარდნილია. ამ ბრალდების საპასუხოდ პროკურორის პირველი რეაქცია ვნახეთ, რომელმაც პრემიერი ფაქტობრივად, ტყუილში ამხილა. ამას გარდა, ღარიბაშვილმა განაცხადა, რომ ადამიანის გატაცებაში ბრალდებული პირები უწყებიდან თავად გაყარა, რაც ტყუილია, რადგან როგორც ამ პირთა ოჯახის წევრები აცხადებენ, ისინი ალასანიას პარტიაში გადანაწილდნენ და მანამდე სამხედრო პოლიციაშიც მუშაობდნენ. თუ ეს დადასტურდება, მათ ციხიდან გამოუშვებენ კიდეც. როგორც ჩანს, მათთან თავად არიან ვალში. ასეთი დანაშაულის ჩამდენს ვერავის გავამართლებ. ისინი ჩვენს დროს პოლიციელებიც რომ ყოფილიყვნენ, ამ დანაშაულისთვის სათანადოდ დაისჯებოდნენ. პრემიერის მხრიდან ხელაღებით ასეთი ბრალდებების გაჟღერება იმაზე მეტყველებს, რომ მისი გონება ამდენი პრობლემის ერთდროულად მოგვარებას ვერ წვდება და ასეთი ფრაზებით ვითარების გადაფარვა სურს, რაც არ გამოუვა, რადგან თითოეული პრობლემა გამოწვეულია მათი უნიათობით და იმ უმძიმესი სიტუაციით, რომელიც ყველა მიმართულებაში შექნეს.

თქვენ ხელისუფლების უსუსურობაზე აპელირებთ, მაგრამ ამ საქმეზე სისხლის სამართლის 315-ე მუხლით, რაც ხელისუფლების ხელში ჩაგდების მცდელობას გულისხმობს, გამოძიება მიმდინარეობს. ყოველ შემთხვევაში ამის თაობაზე შს მინისტრის მოადგილემ, ლევან იზორიამ განაცხადა. საქმის ბოლომდე მიყვანას ელით?

- ალბათ, იზორია რაღაცას ჭიკაიძის ნაბოდვარიდან გამომდინარე გულისხმობდა, რომელმაც თქვა, რომ სისხლის სამართლის საქმეა აღძრული. როგორც გაირკვა, ამ საქმის თაობაზე მათი ხელისუფლებიდან არავინ არ იცოდა. არ ვიცი, ეს საქმე უცებ გამოაცხვეს თუ მანამდე იყო აღძრული. უპრეცედენტოა, რომ პოლიტიკური ორგანიზაციის წინააღმდეგ საქმეა აღძრული. ერთ დღეს ჭიკაიძეს გაეღვიძა და „თხამ ვენახი შეჭამა“-ს პრინციპით იხელმძღვანელა, ანუ, მას ამ საქმის აღძვრაზე დავალება „ჰაკიმ ფაშამ“ მისცა, რომელმაც ბრძანება თავის მხრივ ივანიშვილისგან მიიღო.

ფაქტია, რომ მთავარი პოლიტიკური ოპონენტის მიმართ პოლიტიკური დევნა მიმდინარეობს. ამიტომ არის, რომ ამის შესახებ მთელი მსოფლიო ლაპარაკობს და მიუთითებს. ამას ადასტურებს საბერძნეთის სასამართლოც, რომელმაც დათა ახალაიას ექსტრადირებაზე უარი თქვა. სტანდარტი ჩამოყალიბდა, რომ საქართველში ექსტრადირება არ შეიძლება, რადგან პოლიტიკური ოპონენტების მიმართ დევნა მიმდინარეობს. ეს ყველაფერი ქვეყანას დააზიანებს.

ის, რომ დათა ახალაიას ექსტრადირებაზე საბარძნეთის სასამართლომ უარი თქვა, ეს მის უდანაშაულობას არ ამტკიცებს. როგორც ბერძენმა მოსამართლემ განაცხადა, პროკურატურამ სათანადო მტკიცებულებები არ წარადგინა, რის გამოც ეს გადაწყვეტილება მიიღო...

- რაც დათა ახალაიას ოჯახის წვერების მიმართ ხორციელდება, ბაჩო ახალაიას ციხეში ყოფნით დაწყებული, მამამისის მიმართ სისხლის სამართლის დევნით დამთავრებული, ეს პოლიტიკური დევნა არ არის? როგორც ჩანს, პროკურატურა იქაც ისეთივე უსუსური აღმოჩნდა, როგორიც მისი ძმის საქმეების წარდგენის დროს იყო საქართველოში.

იმის გამო, რომ რიტორიკა პოლიტიკური დევნით ვერ შეგვაწყვეტინეს, ახლა ჩვენს მიერ ახალ-ახალ ბრალდებებს აჟღერებენ. ეს უკვე ორი წელია გრძელდება. ყველა ნორმალური ადამიანი ხედავს, რომ მათ მიერ გადადგმული ნაბიჯები მტრის ხატის შექმნას და საკუთარი უნიათობის გადაფარვას ემსახურება. როგორ შეიძლება, ადამიანის მოტაცება ვინმეს „შეტენო“?! პროკურატურის პირველივე განცხადებითანავე გაირკვა, რომ ეს ყველაფერი ტყუილი იყო.

თქვენ ამბობთ, რომ ეს ყველაფერი ტყუილი იყო, მაგრამ იქედან გამომდინარე, რომ „ნაციონალური მოძრაობის“ მიმართ საზოგადოების ნაწილი აგრესიულად არის განწყობილი, როგორ ფიქრობთ, ამ ბრალდებებს ხალხი არ იჯერებს?

- საზოგადოების ნაწილს „ნაციონალური მოძრაობა“ სძულს, მაგრამ ეს მასა დიდი არ არის. ხალხი გონიერია და მათთვის შეურცხმყოფელია, რომ სიცრუეში აცხოვრონ და მმართველობა მორიგ და მორიგ სიცრუეში გაატარებინონ. ამ პროცესს რესურსი აქვს, რომელიც თავის თავს ამოწურავს. საქართველოს ხელისუფლებას ქვეყანაში 13 ე.წ. ქურდის ჩამოსვლის ფაქტი დავუსახელე, მაგრამ მათი მხრიდან არანაირი რეაგირება არ მომხდარა. არსებობს მტკიცებულება, რომ ე.წ. კანონიერი ქურდი გიორგი ჯანელიძე საზღვარზე არ დაფიქსირებულა, მაგრამ მან ქვეყანა 14 ოქტომბერს დატოვა. ეს პირი ქარდავების დაჯგუფებაა, რომელსაც ხელისუფლება ციხეების კონტროლის მიზნით აძლიერებს.

იმის გამო, რომ ხშირად მსგავს ინფორმაციებს ავრცელებთ, თქვენ თეა წულუკიანმა „ქურდების მამა“ გიწოდათ...

- მათ ფაქტებს ვუსახელებ და რეაგირებას არ ახდენენ. თეა წულუკიანი მკვლელების მემორიალის ავტორია და მას კრიმინალ ავტორიტეტ ჯოხაძესთან სურათები აქვს გადაღებული. შეიძლება, ის ქურდების დედაა და მამა მე როგორ ვიქნები?

რაც შეეხება დავით უსუფაშვილის მიერ The New York Time-ში გამოქვეყნებულ სტატიას, სადაც ის ამბობს, რომ „შეურცხმყოფელია, ივანიშვილი სხვა ქვეყანას ემსახურება და საკუთარი სამშობლოს ღალატობს“. მის პათოსს იზიარებთ?

- თავის დროზე უსუფაშვილი ამბობდა, რომ 9 აპრილის შემდეგ კომპარტია არ დატოვა, რადგან მისი შიგნიდან რეფორმირების იმედი ჰქონდა. როგორც ჩანს, ახლა უსუფაშვილს კოალიციის შიგნიდან რეფორმირების იმედი აქვს, მაგრამ მას ეს იმედი მალე დაეკარგება. როცა ის ამბობს, რომ სააკაშვილს თავისავე წარსული დევნის, ის იმას არ ითვალისწინებს, რომ ის თავის ისტორიას ახლა ქმნის და წარსული მას დიდი ალბათობით შეავიწროვებს.

ვხედავთ, რომ ივანიშვილის მიერ არაფორმალური მმართველობის ქვეშ რუსეთთან პოზიციების დათმობა ხდება და არ ვიცი, სამშობლოს ღალატი ერთი კონკრეტული ქმედება უნდა იყოს თუ, ის რაც მოხდა. მის მიერ შერჩეულ მინისტრს ზაქარეიშვილს ვეუბნებოდით, რომ სეპარატისტების ხელისუფლებაში საკადრო ცვლილებები ანექსიის წინაპირობით მიმდინარეობდა, რაც არ დაგვიჯერა. ის იძახდა, რომ ცვლილებებს არაფერი კავშირი არ ჰქონდა ახლანდელ ვითარებასთან. ანექსია ხდება და კარასინი-აბაშიძის ფორმატი არის მავნებლური, რომელიც ჟენევის ფორმატს აკნინებს. აბაშიძე ჯაფარიძეს გადაბერებულს და მარაზმატიკს ეძახის. ორ წელიწადში ქვეყნის ასეთ ფორმაში ჩაგდება არის ღალატის ტოლფასი და შეურაცხმყოფელია ის, რომ საქართველოს არაფორმალურად ჭორვილელი რუსი ოლიგარქი მართავს.

თქვენ ივანიშვილის არაფორმალურ მმართველობაზე აქცენტირებთ, მაგრამ ამ შინაარსის მუხლი ევროსაბჭოში რეზოლუციიდანაც კი ამოიღეს. ევროპელებმა თქვენი ეს პოზიცია არ გაიზიარეს. რაში ამჩნევთ, არაფორმალურ მმართველობას?

- საკითხის მომხსენებლი ის ადამიანი იყო, რომელიც რუსების პოზიციას მხარს ღიად უჭერდა, მათ შორის საქართველოს მიმართაც. ის ასევე ივანიშვილის მიმართ სიმპატიებს გამოხატავდა, რაც საინტერესო თანხვედრაა. ივანიშვილი ღიად ამბობს, რომ მთავრობას რჩევებს და დავალებებს აძლევს. თვალებს ხომ ვერ დავიბრმავებთ, რომ ეს არის ოლიგარქიული მმართველობა?! ეს ოცნება ყველა ოლიგარქს ჰქონდა, მათ შორის ბადრი პატარკაციშვილს. მას სურდა საკუთარი ხელისუფლება მოეყვანა, ქვეყანა ემართა და კომფორტში ეცხოვრა. ეს პატარკაციშვილმა ვერ განახორციელა, ივანიშვილმა კი შეძლო.

კომფორტში თქვენი ლიდერიც ცხოვრობდა, რომელმაც სოციალურ ქსელში განაცხადა, რომ „ნაციონალურმა მოძრაობამ“ ხალხში ნდობის ამაღლებაზე უნდა იზრუნოს. როგორ წარმოგიდგენიათ ეს?

- მის პათოსს ვეთანხმები. ადამიანები, რომლებიც ჩვენზე არიან ნაწყენები და გულნატკენები ამ ტექსტში ბევრ რამეს დაინახავდნენ. სუიციდით დაინტერესებული ხალხი არ ვართ, რომ იგივე შეცდომების გამეორება მოვინდომოთ. ახალი მიზნისთვის და წინსვლისთვის განკუთვნილი ფორმულის მიგნებას უნდა შევეცადოთ. ჩვენი ყველაზე დიდი პრობლემა იყო შეწყვეტილი დიალოგი ხალხთან და ამ ნდობის საწყისი დიალოგის აღდგენა უნდა იყოს. საფუძველი სააკაშვილმაც დადო და მინდა მჯეროდეს, რომ საზოგადოებასთან ახალი ერის დაწყებას შევძლებთ.

ხალხთან დიალოგი რამდენად უსაფრთხო იქნება იმ ფონზე, როდესაც თქვენი პარტიის ოფისს კვერცხებს ესვრიან და თან ცოცხების თანხლებით საპროტესტო აქციებს გიმართავენ?

- მარგინალურ ჯგუფებს ვხედავთ, რომელთაც საკადრისი პასუხი მიიღეს. ესეთი ჯგუფები არ არის ძალიან ბევრი და ეს ხელს ვერ შეგვიშლის.