ხელისუფლება თვლის, რომ ევროსაბჭოს დოკუმენტში ბევრი პოზიტიური ჩანაწერია, თუმცა მათი ოპონენტები მხოლოდ კრიტიკულ მომენტზე აპელირებენ. დამტკიცებული რეზოლუციის ტექსტში მოხვდა თავდაცვის ყოფილ მინისტრ ბაჩო ახალაიასთვის აღკვეთის ღონისძიების შეცვლის საკითხი, ასევე მიხეილ სააკაშვილის სამართლებრივი დევნა. პარლამენტის ევროპასთან ინტეგრაციის კომიტეტის თავმჯდომარე, ვიქტორ დოლიძე მოუწოდებს ევროპარლამენტარებს, რომ ჩამოვიდნენ და ადგილზე გაეცნონ ვითარებას.
for.ge ვიქტორ დოლიძეს ესაუბრა.
ბატონო ვიქტორ, რეზოლუციაში ბაჩო ახალაიას და მიხეილ სააკაშვილის ამ კუთხით მოხსენიება არაა საქართველოს დელეგაციის კრახია?
- გპირდებით, რომ ნამდვილად აღარ გამოუვათ ის რასაც „ნაციონალური მოძრაობის“ წევრები ამბობენ. იმ რეზოლუციაში ბევრი კარგი რაღაცა წერია. მე შეიძლება პუნქტობრივად დავასახელო რასაც ვეთანხმები ან არ ვეთანხმები.
შეგიძლიათ დააკონკრეტოთ კარგი რა წერია ამ რეზოლუციაში რომელსაც თქვენ ეთანხემბით?
- თავისთავად კარგია, იგივე საპარლამენტო როლის გაძლიერება, დემოკრატიული რეფორმები, არჩევნების ჩატარება და ის კარგი პლაცდარმი, რომელიც არსებობს თუნდაც საპარლამენტო მუშაობაში ოპოზიციასა და ხელისუფლებას შორის თანამშრომლობის თვალსაზრისით. ბევრი კარგი წერია, მარტო ახალაიაზე და სააკაშვილზე აპელირებას რომ აკეთებენ „ნაცინალური მოძრაობის“ წევრები, ეს გასაგებია ჩემთვის. ჩვენ ძალიან სერიოზულად ვიღებთ ნებისმიერ რეზოლუციას, მითუმეტეს ამგავრი ფორუმის რეზოლუციას.
ჩვენ ევროსაბჭოს პასუხისმგებლობის წევრი ქვეყანა ვართ და, რა თქმა უნდა, ყველაფარი უნდა გავითვალისწინოთ. ამ შემთხვევაში, რაც შეიძლება დროულად ბოლომდე უნდა მივიყვანოთ, ეს არის ის გამოძიებები, რათა წერტილი დაესვას ამ საკითხს. ზოგადად, რომ გაიკითხოთ საქართველოს მოსახლეობაში ყველამ იცის სააკაშვილიც, ახალაიაც რას სჩადიოდნენ, რა და როგორ იყო, როგორ ქვეყანაში ვცხოვრობდით. სხვათა შორის, იმ რეზოლუციის მხარდამჭერებსაც ერთი წელი რომ ეცხოვრათ ახალაიას და სააკაშვილის იმ პერიოდის საქართველოში, ჩემი აზრით, ცოტა გაუჭირდებოდათ ამ რეზოლუციისთვის მხარის დაჭერა.
თქვენ აღნიშნეთ, რომ დროულად უნდა დასრულდეს ამ საქმის გამოძიება. როგორ ფიქრობთ, დროულად რომ დასრულებულიყო ამ საქმეების გამოძიება, რეზოლუცია ასეთი მწვავე იქნებოდა?
- გასაგებია, მაგრამ ისეთი ქირურგიული ჩარევით რასაც ისინი აკეთებდნენ, ჩვენ ვერ გავაკეთებთ. ადეიშვილი იჯდა ოთახში, დაურეკავდა მოსამართლეს და აძლევდა დავალებას - ამას სიკვდილი, იმას ჩამოხრჩობა, ასე წყვეტდნენ სამართალს. ჩვენ ამ გზით არ წავედით, ეს გაიგო საერთაშორისო თანამეგობრობამაც და შიგნით მთელმა მოსახლეობამ. ჩვენ გვინდა კანონის ფარგლებში ჩატარდეს გამოძიება, სადაც დაიდება უტყუარი მტკიცებულება და აქედან გამომდინარე, თავისუფალ სასამართლოს ექნება საშუალება, რომ გამოიტანოს სამართლიანი განაჩენი.
ზოგადად, როდესაც ჯერ სასამართლო განხილვა არ დასრულებულა, რამდენად კორექტულია ევროპელი მეგობრებისგან იმის მითითება, რომ ბაჩო ახალაია წინასწარი პატიმრობიდან უნდა იყოს გათავისუფლებული? ან, ერთი მხრივ, როდესაც სახელმწიფოს მიუთითებენ სამართლიანობაზე, მეორე მხრივ, ეს შენიშვნები ხომ არ აღიქმება სასამართლოს საქმიანობაში ჩარევად?
- რა თქმა უნდა. როგორც არასდროს ისე ვართ ღია, ვეუბნებით ამ ხალხს, რომ ჩამობრძანდით, დააკვირდით პროცესებს და თუ კი იქ რამე არაკანონიერს ნახავთ, ამის მერე გამოიტანეთ დასკვნა. თომას ჰამერბერგი იყო ჩამოსული და გააკეთა დასკვნა, ეუთოს სასამართლო მისია იყო ჩამოსული, აკვირდებოდა მოვლენებს და იმათაც თავისი დასკვნა დადეს. ასეთი განცხადების გაკეთებასაც ხომ რამე პრეზუმფცია უნდა ჰქონდეს. რომ ამბობ ახალაია უნდა გამოუშვა და დიდი ხანი არ უნდა იყოს საპატიმროშიო, ან, იგივე, სააკაშვილის ქონების დაყადაღება... ამას რის საფუძველზე ამბობ?!
მე ვერ ვიტყვი, ეს სწორია თუ არა, მე არ ვარ მოსამართლე. ხალხი, რომლებსაც არც კი უცხოვრიათ ამ რეალობაში და წინასწარ რაღაცა დასკვნები გამოაქვთ, ეს, ჩემი აზრით, არაა სწორი. ჩვენ გვინდა, რომ კორექტულები და კონსტრუქციულები ვიყოთ, ჩვენ გვინდა, რომ მათთან ვითანამშრომლოთ და ეს უფრო მნიშვნელოვანია. არ მინდა რაღაცა ისრები გადვისროლო ისეთი ავტორიტეტული საერთაშორისო ორგანიზაციის მიმართ, როგორიც არის ევროსაბჭო.
ჩვენ იქ ბევრი მეგობარი გვყავს, ვთანამშრომლობთ ქვეყნისთვის ისეთ მნიშვნელოვან საკითხებზე, როგორიც არის დეოკუპაცია, ქვეყნის ტერიტორიული მთლიანობა და ამიტომ, კიდევ ერთხელ მოვუწოდებ მათ, რომ ჩამობრძანდნენ, ადგილზე გაეცნონ ვითარებას და მერე გამოიტანონ დასკვნები, მითუმეტეს რეზოლუციაში რომ დებენ ხოლმე რაღაც აბსოლუტურად გაუაგებარ პასაჟებს.
„ასეთი დოკუმენტი საქართველოს ვერ დაეხმარება“, - ასეთი შეფასება გააკეთა ევროსაბჭოში მიღებულ რეზოლუციაზე, საქართველოს საკითხებზე მომხსენებელმა ბორის სილევიჩმა. არ თვლით, რომ საკმაოდ ხმამაღალი განცხადებაა?
- ბუნებრივა, მაგრამ მართალი გითხრათ ტრაგიკულს ვერაფერს ვერ ვხედავ მაგ დოკუმენტში. არ ვიცი, როგორ გითხრათ, ამგავრი პასაჟების ჩადება - ასეთი დოკუმენტი ვერ დაეხმარება საქართველოს - ცოტა რთულია. არაა სასიამოვნო, მაგრამ ჩვენ უნდა გავაგრძელოთ მუშაობა ყველგან, ევროსაბჭოში, ევროპარლამენტში, ეუთოს საპარლამენტო ასამბლეზე, ასევე აღმასრულებელ დონეზე და მაქსიმალურად დავარწმუნოთ ისინი რეალურად რაშია საქმე.
რითი ხსნით იმას, რომ ასეთი მხარდაჭერა ჰქონდა ამ რეზოლუციას ევროპარლამენტში?
- დეტალებში ჩასვლა ასე იოლი არაა. ის, რომ ვიწროპარტიული ინტერესებია და „სახალხო პარტია“ რომ „ნაციონალური მოძრაობის“ უნისონში მოქმედებს, აქ კითხვები არ არსებობს. მიუხედავად იმისა, რომ დიდ პატივს ვცემ იმ პარტიის წარმომადგენლებსაც, ძალიან ბევრ რაღაცაში გვერდში გვიდგანან, არსებობს რაღაცა კითხვის ნიშნები, რასაც პასუხი უნდა გაეცეს. ამიტომ, ამ მხრივ ვფიქრობ, რომ ხელისუფლებამაც უფრო დროულად უნდა ვიმუშაოთ და წერტილი დავუსვათ პროცესებს.
„სახალხო პარტიის“ მუშაობას გაუსვით ხაზი, მაგრამ აპელირება იმაზე, რომ „სახალხო პარტიამ“ იმუაშავა მსგავსი დოკუმენტის მიღებაზე, წამაგებიანი არაა ხელისუფლებისთვის? თუ კი, „სახალხო პარტიასთან“ იმუშავა „ნაციონალურმა მოძრაობამ“, რას აკეთებდა ხელიუსფლება, ჩვენი წარმომადგენლობა და საპარლამენტო დელეგაცია იმისათვის, რომ ასეთი შინაარსის დოკუმენტი არ ყოფილიყო მიღებული?
- ხელიუსფლებამ იმუშავა. მაგრამ, როგორც ჩვენ ვმუშაობთ, ისევე მუშაობდა „ნაციონალური მოძრაობაც“.
გამოდის, რომ წარმატებულად იმუშავა „ნაციონალურმა მოძრაობამ“?
- არა, ასე ნუ აღვიქვამთ ამას. კომპოზიციას თუ დააკვირდებით პარტიულ დონეზე, მაშინ ნახავთ, რომ ელემენტარულ არითმეტიკასთან გვაქვს საქმე. ერთადერთი, რაც ჩემი აზრით, არაა სწორი - შეიძლება შენ იმუშავო, რაღაცეები ჩააწერინო შენი ვიწროპარტიული ინტერესების გასატარებლად, მაგრამ სახელმწიფოებრივ ინტერესებს არ უნდა გადაუსვა ხაზი. „ნაციონალური მოძრაობა“ ხელისუფლებაში ყოფნის დროსაც იგივეს აკეთებდა და ახლაც იგივეს აკეთებენ. სტილი ვერ შეიცვალეს.
მათ რებრენდიგი ვერ გააკეთეს. დარწმუნებული ვარ, რომ 2016 წლის საპარლამენტო არჩევნები საბოლოოდ დაადასტურებს საზოგადოების განწყობას მათ მიმართ. ამიტომ, მე ამას ნაკლებ ყურადღებას ვაქცევ. ბვერი საქმე გვაქვს გასაკეთებელი და ჯობია, რომ ჩვენი საქმე ვააკეთოთ. თქვენ წარმოგიდგენიათ, რომ მთავარი მომხსენებელი რეზოლუციას მხარს არ უჭერს, მხარს არ უჭერს კომიტეტის თავმჯდომარე და ამ დროს, რეზოლუციის მხარდამჭერი ამდენი ხელი აიწია, ეს ხომ თავისთავად მეტყველებს ელემნატრულ არითმეტიკაზე - ვიწროპარტიული მხარდაჭერის თვალსაზრისით.
მაშინ რას ზეიმობს „ნაციონალური მოძრაობა“?
- იმას, რომ ახალაია და სააკაშვილი ჩაიწერა. ამ დროს ეს ქვეყნისთვის მაინც და მაინც კარგი რომ არაა, ეს მათ არ აინტერესებთ. მთავარია, ის ილუზიური განწობა, რომ ისინი კიდევ წარმოადგენენ სერიოზულ პარტიას და დაუბრუნდებიან ხელიუფლებას, აი ეს ახარებთ მათ, მეტი არაფერი. გახსოვთ მათი პრაგმატული ნაბიჯი, არა პიარზე და არა რიტორიკაზე დაფუძნებული? ასე იყვნენ ხელისუფლებაში და ასე დარჩნენ ახლაც. იმუშაონ, ეს არაა პრობლემა. ჩვენ, ჩვენს საქმეს გავაკეთებთ.
ამ საკითხის კომენტირებისას ზურაბ ჭიაბერაშვილი განმარტავს, რომ თედო ჯაფარიძის კომენტარი ზიანს აყენებს ქვეყნის ეროვნულ ინტერესებს. როგორ შეაფასებთ ამ განცხადებას?
- ჭიაბერაშვილის ხელისუფლებამ, მისმა და მისნაირების ხელისუფლებაში ყოფნამ, დიდხანია, საქართველოს ეროვნულ ინტერესებს ზიანი მიაყენა.
