2010 წლის აგვისტოში მომხდარი 17 მკვლელობიდან შსს-ს ოფიციალურ საიტზე police. ge- ზე არცერთი არაა დაფიქსირებული. 2011 წელს მომხდარი 11 მკვლელობიდან კი შსს-ს ოფიციალურ გვერდზე მხოლოდ ერთი ფაქტია დაფიქსირებული. არცერთხელ არ გამოქვეყნებულა საიტზე სტატისტიკა მომხდარი და გახსნილი მკვლელობების შესახებ. იმ დროს, შსს-ს საინფორმაციო-ანალიტიკური დეპარტამენტის უფროსი შოთა უტიაშვილი გახლდათ.

დღეს, თანამდებობიდან გადამდგარი შოთა უტიაშვილი შსს-ს უნდობლობას უცხადებს: „შსს ამტკიცებს, რომ 2014 წლის 5 თვეში, 2013 წლის 5 თვესთან შედარებით, დანაშაული შემცირდა. იმსახურებს თუ არა ნდობას შსს-ს ციფრები? ჩემი პასუხია – ეს სტატისტიკა ტოტალურად ფალსიფიცირებულია. ის ნდობას არ იმსახურებს“, - წერს უტიაშვილი თავის ანალიტიკურ წერილში.

შსს-ს ანალიტიკური დეპარტამენტის ყოფილი უფროსი შოთა უტიაშვილი მიიჩნევს, რომ ისეთი დანაშაული, რომელშიც ძიების შედეგად დადგინდება, რომ დანაშაული არ მოხდა, რა თქმა უნდა, არ უნდა აღირიცხოს. ასეთ მაგალითად უტიაშვილი ასახელებს თვითმკვლელობამდე მიყვანის მუხლით აღძრულ სისხლის სამართლის საქმეებს, როდესაც დგინდებოდა, რომ ადგილი ჰქონდა სუიციდს და, შესაბამისად, მაშინდელი შსს ამ დანაშაულს არ აღრიცხავდა, მიმდინარე წლიდან კი ასეთი საქმეები თავს იყრის „კრიმ ქეისში“, - აღნიშნავს ის.

ამავე წერილში და თავის განცხადებებში არც უტიაშვილი და არც საპარლამენტო უმცირესობის ის წევრები, რომლებიც შსს-ს ამჟამინდელ სტატისტიკას უნდობლობას უცხადებენ, არაფერს ამბობენ იმის შესახებ, თუ რომელ „კრიმ ქეისში“ იყრიდა თავს 2010-2011 წლებში უგზოუკვლოდ დაკარგულთა საქმეები...

ცნობისთვის, ოფიციალური ინფორმაციის თანახმად, 2010 წლიდან 2013 წლამდე 631 ადამიანია გაუჩინარებული. მათ შორის ყველაზე მეტი უგზო-უკვლოდ დაკარგული 2011 წელზე მოდის – 198 ადამიანი. ასე მაგალითად:

2008 წლის 27 აგვისტოს ზუგდიდში გაუჩინარდა სამხედრო კონტრდაზვერვის თანამშრომელი პაატა ქარდავა;

2008 წლის 16 აგვისტოს ქუთაისში გაუჩინარდა ხაიშის სატყეო მეურნეობის რეინჯერი, დავით ცინდელიანი.

2012 წლის 19 იანვარს, სოფელ ანაკლიაში გაუჩინარდა სასტუმრო „ანაკლიის“ თანამშრომელი გოგიტა აბულაძე;

2012 წლის 13 მაისს, ზუგდიდის მუნიციპალიტეტის სოფელ ორულში, რამაზ ლატარია, რომელიც საკუთარი სახლის ეზოდან დაიკარგა.

აქედან ორი უგზოუკვლოდ დაკარგულის საქმე (პაატა ქარდავასა და დავით ცინდელიანის), რომელზეც „გურია ნიუსი“ წლების განმავლობაში მუშაობდა, ამ წელს გაიხსნა. როგორც გაირკვა, ისინი მოკლეს. მათ მკვლელობაში კი ბრალი ტერაქტის ბრალდებით დაკავებულ, საქართველოს შინაგან საქმეთა სამინისტროს კონსტიტუციური უსაფრთხოების დეპარტამენტის აფხაზეთის მთავარი სამმართველოს ყოფილ უფროსს, რომან შამათავას წაუყენეს.

„ნაციონალური მოძრაობის“ განცხადებები, თითქოსდა გაუარესდა კრიმინალური ვითარება, პირდაპირ ვამბობ, არის ტყუილი და წმინდა წყლის პოლიტიკური განცხადებები, რომელიც ყოველგვარ რეალურ საფუძველსაა მოკლებული. მათი მიზანია ჩვენი სამინისტროს დისკრედიტაცია მოახდინონ. მინდა მოგახსენოთ, რომ ყველა მკვლელობა გახსნილია.

ასევე მინდა ვუთხრა საზოგადოებას და დავამშვიდო, არავითარი საფუძველი, ვიფიქროთ, რომ კრიმინოგენული მდგომარეობა გაუარესდა, არ არსებობს. ამისთვის მე მინდა სტატისტიკა მოვიხმო. კერძოდ, 2011 წლის აგვისტოში, სამწუხაროდ, ზუსტად იგივე რაოდენობა გვქონდა მკვლელობების, რაც ამა წლის აგვისტოში, კერძოდ, 11 მკვლელობა. აქედან გაიხსნა 10 საქმე, ხოლო 2014 მოხდა იგივე რაოდენობის მკვლელობა, აქედანაც გაიხსნა 10 მკვლელობა. დღეს, განსხვავებით „ნაციონალური მოძრაობის“ პერიოდისგან, ყველას საჯაროდ ხელი მიუწვდება სტატისტიკაზე და განსაკუთრებით, ნაციონალებს. ამიტომ დასხდნენ, დააფიქსირონ რაოდენობა ამ მკვლელობებისა და საზოგადოებას ელაპარაკონ კონკრეტული ფაქტებით და არა, ტყუილებით... ისინი ტყუილებით მეტად დაკარგავენ ნდობას საზოგადოებაში, ტყუილები ხომ მათი სტილია...“, -  ასეთ კომენტარს აკეთებს შს მინისტრის მოადგილე ლევან იზორია ოპონენტების ბრალდებებზე.

ორგანიზაცია „უფლებადამცველთა გაერთიანებამ“ 2009-2013 წლებში ჩადენილი დანაშაულის რაოდენობისა და მედიაში გაშუქებული ფაქტების თანაფარდობის შესახებ ანგარიში გამოაქვეყნა, რომლის მიხედვითაც ირკვევა:

1. 2010 წელს მომხდარი 395 ყაჩაღობიდან მედიაში გაშუქდა 49 ფაქტი, 180 მკვლელობიდან - 66 და 65 გაუპატიურებიდან -  1.

ანუ 2010 წელს მასმედიაში დანაშაულის (ყაჩაღობა, მკვლელობა, გაუპატიურება) გაშუქების ჯამური მაჩვენებელი 18%-ს შეადგენს.

2. 2011 წელს ჩადენილი 259 ყაჩაღობიდან მედიაში გაშუქდა 35 ფაქტი, 108 მკვლელობიდან -  74 და 64 გაუპატიურებიდან -  1.

ანუ 2011 წელს მასმედიაში დანაშაულის (ყაჩაღობა, მკვლელობა, გაუპატიურება) გაშუქების ჯამური მაჩვენებელი 26,4%-ს შეადგენს.

როგორც ექსპერტები აღნიშნავენ, 2011 წელს პროცენტული მაჩვენებლის ზრდა ახალი ოპოზიციური ძალის გამოჩენას და ახალი სააგენტოების გახსნას უკავშირდება.

3. 2009-2012 წლებში, შსს-ს ოფიციალურ ვებგვერდზე მომხდარი დანაშაულის გამოქვეყნების სტატისტიკა ასე გამოიყურება:

ყაჩაღობის 1711 ფაქტიდან ვებგვერდზე განთავსდა ინფორმაცია 77 ყაჩაღობის შესახებ; 524 მკვლელობიდან -  121 და 269 გაუპატიურებიდან - 1. საერთო ჯამში 2009-2012 წწ. ვებგვერდზე police.ge ნიუსის სახით განთავსდა შემთხვევათა (ყაჩაღობა, მკვლელობა, გაუპატიურება) მხოლოდ 7%.

2013 წ. 7 თვის განმავლობაში კი ზემოჩამოთვლილი ჩადენილი დანაშაულიდან (ყაჩაღობა, მკვლელობა, გაუპატიურება) ვებგვერდზე police.ge ნიუსის სახით განთავსდა შემთხვევათა 16,5%.

შედარებას თუ გავაკეთებთ, 2013 წლის 7 თვის განმავლობაში შსს-ს საიტზე გაშუქების პროცენტული მაჩვენებელი ორჯერ გაიზარდა, ვიდრე წინა ოთხი წლის განმავლობაში იყო ერთად აღებული.

რაც შეეხება აგვისტოს თვის მკვლელობებს, რომელიც პოზიცია-ოპოზიციას შორის დიდი დებატების თემად იქცა, „გურია ნიუსის“ მიერ მოპოვებული ინფორმაციით, 2010 წელს მომხდარი 17 მკვლელობიდან ტელეკომპანია „რუსთავი2“ -ის და „იმედის“ საშუალებით მხოლოდ 3 ფაქტი გაშუქდა. ასეთ მონაცემები ფიქსირდება მედიამონიტორინგისა და „რუსთავი 2“-ის ელექტრონული არქივის მიხედვით. ამავე არქივის მიხედვით, 2011 წელს მომხდარი 11 მკვლელობიდან (აგვისტოს თვე) აღნიშნულ ტელეკომპანიებს გაშუქებული აქვს 4 ფაქტი.

2014 წლის აგვისტოში მომხდარი 11 მკვლელობიდან პოლიციის ოფიციალურ საიტზე განთავსებულია 6 ფაქტი.

შსს-ს საზოგადოებასთან ურთიერთობის დეპარტამენტის ხელმძღვანელი ნინო გიორგობიანი „გურია ნიუსთან“ საუბრისას აცხადებს, რომ 11 მკვლელობიდან საინფორმაციო საშუალებებმა ყველა ფაქტი გააშუქეს. რაც შეეხება იმას, რომ ოფიციალურ საიტზე 6 ფაქტია დაფიქსირებული, ნინო გიორგობიანის თქმით, მედიის წარმომადგენელმა ამომწურავი ინფორმაცია მიიღეს კომენტარების ჩაწერით და ასევე პირად მეილებზე გადაგზავნილი ინფორმაციის სახით. საბოლოო ჯამში, მედიასაშუალებებმა ყველა ფაქტი გააშუქეს.

კრიმინოგენურ სიტუაციასთან დაკავშირებით ბოლო დროს საზოგადოებაში შექმნილი განწყობებისა და რეალობის შესწავლის მიზნით არასამთავრობო ორგანიზაცია „ადვოკატთა ალიანსმა“ სტატისტიკური მონაცემების შეჯერებისა და რეალობის დადგენის სურვილით მასშტაბური კვლევა დაიწყო. კვლევის პირველი ეტაპი მოსახლეობის გამოკითხვას და საქართველოს მოსახლეობის განწყობის დადგენას მოიცავდა.

კვლევითი ჯგუფის მიერ შემთხვევითი შერჩევის მეთოდით შერჩეულ 2102-ზე მეტ მოქალაქეს ორი შეკითხვა დაუსვეს. 1.გაუმჯობესდა, გაუარესდა თუ იგივე დარჩა კრიმინოგენული ვითარება საქართველოში? 2. გსმენიათ თუ არა ისეთი ფაქტის შესახებ, რომ მოხდა დანაშაული, რომელიც ცნობილი გახდა პოლიციისთვის და მან აღნიშნულ ფაქტზე რეაგირება არ მოახდინა?

შედეგები ასეთია - 19.31% (406 ადამიანი) მიიჩნევს, რომ კრიმინოგენული სიტუაცია საქართველოში გაუმჯობესდა. 21.64% (455 ადამიანი) ფიქრობს, რომ იგივე დარჩა, ხოლო 59.03% (1241 ადამიანი) მიიჩნევს, რომ საქართველოში კრიმინოგენული სიტუაცია გაუარესდა.

ამასთან, 86.39% (1816 ადამიანი) აცხადებს, რომ პოლიცია დანაშაულს არ მალავს, ანუ არ სმენია დანაშაულის შესახებ, რომელზეც პოლიციამ რეაგირება არ მოახდინა, ხოლო 13.6% (286 ადამიანი) კი ამბობს, რომ პოლიცია დანაშაულს მალავს, ანუ სმენია დანაშაულის შესახებ, რომელზეც პოლიციამ რეაგირება არ მოახდინა, თუმცა როცა კვლევითი ჯგუფი წევრები დაკონკრეტებას სთხოვდნენ, თუ რომელი ფაქტის შესახებ სმენოდათ, ისინი პასუხის გაცემისგან თავს იკავებდნენ.

„ადვოკატთა ალიანსის“ ხელმძღვანელი მამუკა მდინარაძე აღნიშნავს, რომ პარადოქსია, როცა შსს საკუთარ სტატისტიკას აქვეყნებს იმის შესახებ, რომ ქვეყანაში კრიმინოგენული მდგომარეობა გაუმჯობესდა, ამ დროს კი გამოკითხულთა 59% აცხადებს, რომ მდგომარეობა გაუარესებულია, თუმცა იგივე ადამიანი ამავდროულად მიიჩნევს, რომ პოლიცია დანაშაულს არ მალავს.

„ჩემი აზრით, ამას ქართულ ენაზე გაურკვევლობა და დაბნეულობა ჰქვია, რაც თავის მხრივ, ცალკე ღრმა ანალიზს მოითხოვს, ამას მხოლოდ იურისტების კომპეტენცია ვერ დააკმაყოფილებს, ამაში სოციოლოგები, ფსიქოლოგები და ა.შ. უნდა ჩაერთონ. ვფიქრობ, რომ ამაში სასაყვედუროა როგორც შსს-სთან, ასევე მედიასთან. იქედან გამომდინარე, რომ მოსახლეობა რეალურად არაა გარკვეული, თუ რა ხდება ქვეყანაში კრიმინოგენულ სიტუაციასთან დაკავშირებით“, - განაცხადა მდინარაძემ.