თბილისის საკრებულოში ფრაქცია „ქართულ ოცნება - დემოკრატიულ საქართველოს“  და უმრავლესობას რიმა ბერაძე ხელმძღვანელობს. ჩუღურეთის რაიონის მაჟორიტარი დეპუტატი აცხადებს, რომ გადაწყვეტილების მიმღებ თანამდებობას თბილისელების კეთილდღეობისა და საცხოვრებელი პირობების გასაუმჯობესებლად გამოიყენებს. რიმა ბერაძე for.ge-ს პოლიტიკურ ბიოგრაფიასაც უყვება და აღნიშნავს, რომ წლების განმავლობაში მუშაობდა პრეზიდენტის აპარატში - დსთ-ისა და მშვიდობიანი კავკასიის სამსახურის განყოფილების ხელმძღვანელად. მოგვიანებით თბილისის საგადასახადო სამსახურის აპარატის უფროსის პოსტს იკავებდა. ამბობს, რომ უახლოესი წლების განმავლობაში  პოლიტიკური კუთხით „ქუჩის ოპოზიციის“ ფორმატში იბრძოდა. „ქართული ოცნების“ გუნდის წევრი კი პარტიის დაფუძნების დროიდან არის.

ქალბატონო რიმა, თქვენს გუნდს დიდი ნდობა გამოუცხადა ამომრჩეველმა და უმრავლესობით დააკომპლექტეთ კიდეც თბილისის საკრებულო. რის გაკეთებას გეგმავთ ამ მანდატის ფარგლებში, რითი იქნება ახალი საკრებულო წინა მოწვევის საკრებულოებზე უკეთესი?

- ჩვენ არ ვიქნებით ხელისუფლება ხელისუფლებისთვის. ჩვენ ყველაფერს გავაკეთებთ ადამიანებისთვის, მათი კეთილდღეობისთვის. საკითხები, რომლებსაც წინა საკრებულოები განიხილავდნენ, პომპეზურ ღონისძიებებზე იყო გათვლილი და, ძირითადად, პოლიტიკურ მიზნებს ხმარდებოდა. ჩვენ კი ვპირდებით ხალხს, რომ თბილისის ბიუჯეტის თითოეული თეთრი მხოლოდ საქმეს და ადამიანების კეთილდღეობას მოხმარდება.

უფრო კონკრეტულად რომ გვითხრათ,  რას შეცვლით, მაგალითად, ჩუღურეთის მცხოვრებლებისთვის, რომლებმაც მაჟორიტარ დეპუტატად აგირჩიეს?

- ჩუღურეთის რაიონი თბილისის ათ რაიონს შორის ყველაზე მძიმე მდგომარეობაშია. თითქმის ყველა მესამე ოჯახი მიწისძვრით არის დაზარალებული და დახმარებას საჭიროებს. ეს ფაქტი საოციალურ ფონს მეტად ამწვავებს. მიწისძვრით დაზარალებულთა პრობლემის მოსაგვარებლად ბოლო წლების განმავლობაში თითქმის არაფერი გაკეთებულა. უკეთეს შემთხვევაში, ავარიული სახლებიდან გამოჰყავდათ ხალხი და ქირას უხდიდნენ, დაზიანებული სახლების აღდგენა-გამაგრებაზე არავის უზრუნია და პრობლემა პრობლემად დარჩა. ამიტომ, ჩემი ყოველი დილა იმაზე ფიქრით იწყება, რა გავუკეთო ჩუღურეთის რაიონს, როგორც მაჟორიტარმა დეპუტატმა. უდიდესი პასუხისმგებლობა დამეკისრა იმის გამოც, რომ დამასახელეს თბილისის საკრებულოს ფრაქცია „ქართული ოცნება- დემოკრატიული საქართველოს“ ხელმძღვანელად და უმრავლესობის ლიდერად.

აღნიშნეთ, რომ დედაქალაქის ბიუჯეტს წინა მთავრობა პომპეზურ და პოლიტიკურ ღონისძიებებში ხარჯავდა. საზოგადოებას ასევე არ მოსწონს თქვენი წინამორბედების გადაწყვეტილება, როცა მათ 300%-იანი პრემიები გამოიწერეს. ვიცით, რომ მოქმედმა საკრებულომ პრემიებზე უარი თქვა, თუმცა ოპოზიციონერი დეპუტატები უკმაყოფილებას გამოთქვამენ იმის გამო, რომ ეს საკითხი საკრებულოს რეგლამენტში არ ჩაიწერა. რატომ ვერ მოხერხდა დეპუტატების ნების რეგლამენტში ასახვა?

- ჩემდა გასაოცრად, ამ საკითხზე შენიშვნებს გვაძლევდნენ წინა მოწვევის საკრებულოს დეპუტატები. პირადად მე  წინააღმდეგი ვიყავი პრემიების და ამას ჩუღურეთის რაიონის ამომრჩევლებთან გამართულ ყველა შეხვედრაზე ვამბობდი. ასეთივე პოზიცია ჰქონდა ჩვენი ფრაქციის ყველა წევრს, ისევე როგორც  კოალიციას და საკრებულოს ყველა წევრს.

რაც შეეხება პრემიების საკითხის რეგლამენტში ასახვას, რეგლამენტი არ არის დოკუმენტი, სადაც ამგვარი საკითხები შეიძლება ჩაიწეროს. რეგლამენტში საკითხის ამ კონტექსტით გათვალისწინებას თავად რეგლამენტი არ ითვალისწინებს, რამე სხვა მიზეზი არ ყოფილა. ამას ადასტურებს ისიც, რომ შევადგინეთ ცალკე დოკუმენტი და დავადასტურეთ თანხმობა და სურვილი, რომ უარს ვამბობთ პრემიებზე.

საკმაოდ ხმაურიანი თემაა საკრებულოს თანამდებობის პირების ავტომანქანებით სარგებლობის საკითხიც. თქვენ, როგორც თანამდებობის პირი თუ სარგებლობთ სამსახურებრივი მანქანით და, რა პოზიცია გაქვთ ამ საკითხზე?

- ვფიქრობ, 21-ე საუკუნეში ავტომანქანა არ წარმოადგენს ფუფუნებას - ეს არის გადაადგილების საშუალება. ჩუღურეთის რაიონის რადიუსი 10 კილომეტრია. ჩემი მთავარი ამოცანა კი ამ რაიონის ადამიანებთან ურთიერთობაა. მიზანშეუწონლად მიმაჩნია იმის თქმა, რომ მანქანა არ მჭირდება. ვეთანხმები იმას, რომ სამსახურებრივი ავტომანქანა პირადი სარგებლობისთვის არ უნდა გამოიყენებოდეს, მაგრამ, როცა ჩემს ამომრჩეველთან შეხვედრაზე მივდივარ და მათ პრობლემებზე ვმუშაობ, მჭირდება მანქანა, რომ მოკლე დროში გადავწყვიტო საკითხი და დრო და ენერგია დავზოგო.

როგორ უნდა დარეგულირდეს ეს საკითხი, თქვენი აზრით? ვინ და როგორ უნდა გააკონტროლოს, რომ საკრებულოს თანამდებობის პირი სამსახურის მანქანით ნამდვილად ამომრჩეველთან მიდის და არა ოჯახის წევრებთან?

- ამ საკითხთან დაკავშირებით შეიქმნა სპეციალური ჯგუფი, რომელიც მოიკვლევს თემას. ამის შემდეგ მივიღებთ საბოლოო გადაწყვეტილებას. მანამდე კი იყო საუბარი, რომ დადგინდეს ავტომანქანების გამოძახების წესი.  ვფიქრობ, ეს ცოტა გაურკვეველია. თუ ავტომანქანას გამოვიძახებ, მძღოლი და საწვავი მაინც საჭირო ხომ იქნება? მე ვფიქრობ, უნდა განხორციელდეს კონტროლი, თუ ვინ რა მიზნით იყენებს სამსახურებრივ ავტომანქანას. წინა მოწვევის საკრებულოში მაგალითად, ჩემს თანამდებობაზე მყოფ პირს ჰქონდა 500 ლიტრი საწვავის ლიმიტი, რაც საკმაოდ ბევრია. მიმაჩნია, ეს საკითხი ნამდვილად უნდა გადაიხედოს.

საკრებულოს ოპოზიციონერმა წევრებმა თქვენი გუნდი უკვე გააკრიტიკა იმის გამო, რომ საკრებულოში თანამდებობები არ გაუნაწილეთ. რა არგუმენტები გაქვთ მათ კრიტიკაზე?

- საკრებულოს პირველივე სხდომაზე ოპოზიციის წარმომადგენლებმა ასეთი რამ განაცხადეს - თქვენ ხართ უმრავლესობა და  იღებთ პასუხისმგებლობას მართვაზე, ჩვენ ამ საკითხებში ვმონაწილეობთ, მაგრამ პასუხისმგებლობას არ ვიღებთო. თუ პასუხისმგებლობა არ სურთ, თანამდებობებზე მათი პრეტენზია ჩემთვის მიუღებელია. თანამდებობა უდიდესი პასუხისმგებლობაა ხალხის წინაშე, მე ასე მიმაჩნია.

თბილისის არჩეულმა მერმა, დავით ნარმანიამ განაცხადა, რომ შესაძლოა, გადაიხედოს მშენებლობის ნებართვები, რომლებიც ბოლო წლის განმავლობაში საკმაოდ მრავლად არის გაცემული. რას ფიქრობთ ამ საკითხზე. თქვენი რაიონის, ჩუღურეთის მაგალითზე თუ გაქვთ ინფორმაცია ბოლო პერიოდში გაცემულ საეჭვო ნებართვებზე?

- მაქვს ინფორმაცია, რომ ბოლო პერიოდში მერიის ზედამხედველობის სამსახურმა მშენებლობის შესახებ განსაკუთრებით ბევრი ნებართვა გასცა. აშენებულის დანგრევა გაუმართლებლად მიმაჩნია. პირიქით, მშენებლობა და აღმშენებლობა უნდა დავიწყოთ.  ვფიქრობ, საკითხს უნდა მივუდგეთ ასე: თუ  მშენებლობის ნებართვა გაცემულია უკანონოდ, ეს ნებართვა უნდა გადაიხედოს და გადაწყვეტილება შესაბამისმა სამსახურებმა სპეციალისტების აზრის გათვალისწინებით უნდა მიიღონ. ყბადაღებულ თემად იქცა რიყის საკითხი. პირადად მეც არ მომწონს იქ აშენებული კონსტრუქციები, მაგრამ ეს არ ნიშნავს, რომ ის უნდა დავანგრიოთ. საკითხი უნდა შეჯერდეს და ისე გადაწყდეს, როგორც უკეთესი იქნება ქვეყნისთვის. ვფიქრობ, არ არის მართებული მიდგომა, რომ ყველაფერი დავიწუნოთ, რაც წინა ხელისუფლების დროს არის აშენებული.

ჩუღურეთის რაიონში, ჩიქობავას ქუჩაზე საუკუნოვანი სახლები დგას. მათ უმრავლეობას, ფაქტობრივად, საძირკველი არ გააჩნია. ამ ქუჩაზე  ამჟამად ორსართულიანი კომერციული ფართის მშენებლობა მიმდინარეობს და 14 ოჯახს საცხოვრებელი სახლების დანგრევის საფრთხე ექმნება. რომ მოვიკითხე ამბავი, აღმოჩნდა, მშენებლობა კანონის დაცვით მიმდინარეობს, მეპატრონეს ყველა საჭირო დოკუმენტი აქვს. ამიტომ, ასეთი საკითხები რთული მოსაგვარებელია.

რაც შეეხება თვითმმართველობებში დასაქმებულთა საკითხს. ამ კუთხით თუ იგეგმება რამე სიახლე? აპირებთ საკრებულოში ძველი თანამშრომლების შენარჩუნებას?

- ჩვენთვის მიუღებელია ადამიანების სამსახურებიდან მასობრივად გაშვება. იმიტომ მოვედით ხელისუფლებაში, რომ დემოკრატიის განვითარებას შევუწყოთ ხელი. დასრულდა  პერიოდი, როცა ადამიანებს  პოლიტიკური ნიშნით ყოფდნენ. ალბათ არის ბევრი კარგი სპეციალისტი, რომელიც იმსახურებს სამსახურში ყოფნას. პარლამენტი კვლავ მუშაობს ატესტაციის წესთან დაკავშირებით. დასაქმების და დასაქმებულთა მიერ თანამდებობების შენარჩუნების საკითხი გადაწყდება მხოლოდ კანონის შესაბამისად.

ცალკეული საზოგადოებრივი ჯგუფები და საერთაშორისო ორგანიზაციები ხშირად აღნიშნავენ, რომ საქართველოში ქალები პოლიტიკაში საკმაოდ ნაკლებად  არიან წარმოდგენილნი და კიდევ უფრო ნაკლებად - გადაწყვეტილების მიმღებ თანამდებობებზე. როგორ ფიქრობთ, რა უპირატესობა შეიძლება ჰქონდეს ქალ პოლიტიკოსს?

- ქალთა გენდერული კლუბის წარმომადგენელი ვარ და მიხარია, რომ პოლიტიკაში ქალების ჩართულობა იზრდება. ქალი არის ოჯახის ბურჯი, დედა და უფრო ფაქიზად, კრეატიულად შეუძლია ამა თუ იმ საკითხის მოგვარება, გადაწყვეტილებებების მიღება. მეც შევეცდები ყველა გადაწყვეტილების დროს ვიყო ობიექტური.