ეროსი კიწმარიშვილის გარდაცვალების ფაქტზე გამოძიება თვითმკვლელობის მუხლით მიმდინარეობს. საზოგადობის ნაწილს ამ ვერსიის არ სჯერა, ისევე როგორც მისი ოჯახის წევრებს. მმართველ გუნდში კი აცხადებენ, რომ ხელისუფლება თვითმკვლელობის ვერსიაში წელგამართულია.

თუ რას ფიქრობენ ხელსიუფლებაში უფრო კონკრეტულად ამ სკანდალურ საქმეზე, ამის გარკვევის მიზნით, for.ge გარემოს დაცვის კომიტეტის თავმჯდომარეს, გიორგი ცაგარეიშვილს ესაუბრა:

ეროსი კიწმარიშვილის გარდაცვალების ფაქტზე გამოძიება 115-ე მუხლით მიმდინარეობს. ოფიციალურ ვერსიას ეთანხმებით?

- იმ ადამიანებს ვერ დავემსგავსები, რომელთაც აბსოლუტურად გადაუმოწმებელად შორსმიმავალი დასკვნები გააკეთეს. მათ არაფრად ჩააგდეს ის, რომ გვამიც არ იყო გაციებული და გარდაცვლილს ოჯახი ჰყავს. ნაციონალებმა „რუსთავი 2“-თან ერთად ჩერგოლეიშვილის „გამოყენებით“ ისტორია შეთხზეს, რომ თითქოს, ეროსი კიწმარიშვილი იმიტომ მოკლეს, რომ შემდეგ ხელისუფლებამ „რუსთავი 2“ -ის განადგურება განიზრახოს. ეს ერთმანეთთან რა კავშირშია, ვერ ვხვდები. ადამიანი მორალურად ასე როგორ უნდა დაეცეს, რომ ეს ტრაგედია ფაქტების გარეშე ხელისუფლებას პირდაპირ დაუკავშიროს. ამ კონტექსტში კალაძის სიტყვებს იყენებენ.

თამარ ჩერგოლეიშვილმა კალაძის ის განცხადება მოიშველია, სადაც ვიცე-პრემიერი აცხადებს, რომ არჩევნების შემდეგ „რუსთავი 2“ კანონიერ მესაკურეს გადაეცემა...

- აღნიშნულ საქმეზე საჩივარი პროკურატურაშია შეტანილი და კალაძემ განსაკუთრებული რა თქვა? მან სურვილი გამოთქვა, რომ წართმეული ქონება მესაკუთრეს უკან დაუბრუნდეს. კალაძე თვლის, რომ სამართლიანობა იმ პირების მიმართაც უნდა აღდგეს, რომელთაც ქონება ჩამოართვეს. „რუსთავი 2“-ის მეპატრონეებთან დაკავშირებით ბევრი რამ ბურუსით არის მოცული და ეს ტელევიზია ვის ეკუთვნის, ეს დღემდე გაურკვეველია. ამბობენ, რომ ეს არის სააკაშვილის ჯიბის ტელევიზია, თუ არა სააკაშვილის სხეულის სხვა ნაწილის. ეს ტელევიზია „ნაციონალური მოძრაობის“ პოლიტიკური რუპორი რომ არის, ამას ბევრი კვლევა-ძიება სჭირდება?! ზოგჯერ, გიორგი გაბუნია ბევრად უფრო შორსმიმავალ პოლიტიკურ დასკვნებს აკეთებს, ვიდრე პარლამენტში დარჩიაშვილი. გაბუნია ჩამოყალიბებულ პოლიტიკოსად გვევლინება. მის გადაცემას რომ უყურებ, გგონია, ნაციონალების შეკრებებს ესწრებოდა. „რუსთავი 2“-ის ჟურნალისტები „ნაციონალური მოძრაობის“ წევრები არიან - ბევრად უფრო აქტიურები, ვიდრე კანდელაკი, ბობოხიძე და წიკლაური. რაც შეეხება გვარამიას, ის ჯოჯოხეთის მოწყობით გვემუქრებოდა, მაგრამ საინტერესოა, „დამოუკიდებელ“ მედიაში სააკაშვილის დაცვამ კამერები რატომ დაამონტაჟა? რატომ უსმენდნენ ჟურნალისტებს, მათ არ ენდობოდნენ? საზღვარი რაღაცას ხომ უნდა ჰქონდეს?! მესმის, რომ ნაციონალებს კლასობრივ მტრად მივაჩნივართ, ისინი გულზე მეც არ მეხატებიან, მაგრამ ადამიანის საზარელი ისტორია დააკავშირო „ქართულ ოცნებას“, „რუსთავი 2“-ის წართმევაზე უხილავი ძაფები გაატარო და ეს ყველაფერი ფოჩიანი კამფეტივით შეფუთო, ამორალური საქციელია. ეს ადამიანები დილიდან საღამომდე სიცრუეს ქადაგებენ და სააკაშვილის ხელისუფლებაში მობრუნებას ემსახურებიან. სად არის ჟურნალისტური ეთიკა და ადამიანობა?!

ბატონო გიორგი, ბოლო პერიოდში ჩანს, რომ მედიის მიერ გამოთქმული კრიტიკა ხელისუფლებას აღიზიანებს. თქვენ „რუსთავი 2“-სადა „ნაციონალურ მოძრაობას“ შორის არსებულ თანამშრომლობაზე აპელირებთ, მაგრამ მთავრობას არც ვახო სანაიას გადაცემა ეამა, სადაც მან გაგაკრიტიკათ და პრესკონფერენცია მიუძღვენით. რამდენიმე დღის წინ, ენერგეტიკის მინისტრის პირველმა მოადგილემ ელექტროენერგიის გაძვირებაზე ისაუბრა, კახი კალაძემ კი „რუსთავი 2“ გააკრიტიკა და საზოგადოებას მოუწოდა მათ ნუ ენდობიან. ამ ტელევიზიის სარედაქციო პოლიტიკას არ ვიცავ, მაგრამ ამ შემთხვევაში, „რუსთავი 2“ რა შუაში იყო?

- „რუსთავი 2“-ის საქმეებში არავინ ერევა. მათი ბინძური თეთრეულის გამოქექვა ჩვენი საქმე არ არის. 2003 წლის რევოლუციიდან მოყოლებელი ეს ტელევიზია „ნაციონალური მოძრაობის“ განაყარია. სითამამე უნდა ეყოთ და თქვან, რომ რუპორი ვართ, ჩვენ ვართ მედია, რომლის მფლობელები ცნობილები არ არიან და დამფუძნებლებს წილები ძალით წაართვეს. ეს ტელევიზია დილიდან-საღამომდე დაკავებულია იმით, რომ პასკვილი გამოაცხოს და აპოკალიფსური სურათი შექმნას. თამაშობენ, რომ ვითომ თავისუფლები არიან. ჩვენც ამას ვიღებთ, თვალს ვხუჭვთ და მათ ეთერებში დავდივართ. აუდიტორია არსებობს და მათ ეთერს ვიყენებთ. ბრმები არ ვართ, რომ არ ვიცოდეთ, რა ხდება ამ მედიაში. ვერ ვიტყვი, რომ თავისუფლები არიან, მაგრამ ჟურნალისტებს პირად შეურაცხყოფას არასოდეს მივაყენებ.

რაც შეეხება ტარიფს, ტარიფი არ იზრდება და განცხადება შეუთანხმებელი იყო, მინისტრის მოადგილის განცხადება კი, ბუნდოვანი. ასევე ბუნდოვანი იყო სემეკი-ს განცხადებაც. მართალია, საქართველოს პარლამენტი დამოუკიდებელი მარეგულირებელი კომისიების მუშაობაში არ ერევა, მაგრამ საკანონმდებლო ორგანო არ დაუშვებს, რომ ჩვენი სააარჩევნო დანაპირები ისე შეიცვალოს, რომ ჩვენ ეს არ ვიცოდეთ. პარლამენტი არ არის მონათა თავშესაყარი და უმრავლესობა არ არის გროვა, რასაც ეტყვიან ის გააკეთოს.

ეროსი კიწმარიშვილის საქმეს რომ მივუბრუნდეთ. თქვენ ბრძანეთ, რომ კალაძის პოზიციას იზიარებთ, რომ „რუსთავი 2“ კანონიერ მესაკუთრეებს უნდა დაუბრუნდეს, მაგრამ მესაკუთრეებში კიწმარიშვილიც მოიაზრებოდა, რადგან როგორც მისი ინტერვიუდან ირკვევა, ის ტელევიზიის დაბრუნებისთვის ბრძოლას გეგმავდა. კერძოდ, მის ერთ-ერთ ინტერვიუში ის აღნიშნავდა, რომ „თუ დვალი და აქიმიძე მართლები არიან, მაშინ მეც მართალი ვარ და, თუ ქიბარია მართალი, მაშინაც მეც მაქვს მოთხოვნის უფლება, მაგრამ ბუნებაში შეუთავსებელია ის, რომ აქიმიძე–დვალიც და ქიბარიც მართლები იყვნენ. დიდი ინტერესით ველოდები, როგორ აპირებენ ამ ორი თემის ერთმანეთში შერწყმას, რადგან ორივე გადაწყვეტილების შემთხვევაში მე „ცოცხალი“ ვრჩები. სასამართლო უჩემოდ ამ თემას ვერ დაამთავრებს“…

- ამ საქმის დეტალები არ ვიცი. გამომძიებელი არ ვარ და არ ვიცი, ეროსი კიწმარიშვილის საჩივარი თუ არსებობდა, რომ ქიბარ ხალვაშზე წილი იძულებით გადააფორმებინეს. 2008 წელს, როცა პარტიას აფუძნებდა, მას ნათქვამი აქვს, რომ წილი იძულებით გადააფორმებინა სააკაშვილმა. ეს განცხადება პროკურატურისთვის საკმარისი უნდა ყოფილიყო, რომ მოკვლევა დაწყეულიყო და არ ვიცი თუ დაიწყო, მაგრამ ჯარჯი აქიმიძისა და სხვებს ქონება წაართვეს, მათთვის კი სანაცვლოდ ერთი თეთრიც არავის გადაუხდიათ.

ანუ, კიწმარიშვილს გადაუხადეს?

- როგორც ხალვაში ამბობს, მან ეს გააკეთა. როგორც ჩანს, ამ ადამიანებთან წილების გადაფორმება მარტივად გადაწყდა. ეროსისთან მოლაპარაკება კი, რთული აღმოჩნდა მისი ფიგურიდან გამომდინარე „ვარდების რევოლუციაში“. ეროსი უდაოდ ნიჭიერი კაცი იყო და ლიდერი თავის საქმეში. „რუსთავი 2“-ის საქმესთან დაკავშირებით, მას ხელწამოკვრით ვერ დაელაპარაკებოდნენ. როგორც ჩანს, მასთან გასვლა სხვა ხაზით და სხვა მეთოდებით მოხდა.

ბატონო გიორგი, ეჭვებს ბადებს კიწმარიშვილის იარაღი. ერთი მხრივ, ოფიციალური ვერსიით, იარაღი თავად ეროსი კიწმარიშვილმა დაარეგისტრირა, მეორე მხრივ იარაღზე ანაბეჭდები არ არის. ასევე, კიწმარიშვილის თანაშემწემ განაცხადა, რომ 17 წელი მასთან მუშაობდა და საორგანიზაციო საკითხებს ის აგვარებდა. ამ ქალბატონმა კი იარაღის ყიდვის თაობაზე არაფერი იცის...

- იქედან გამომდინარე, რომ ბატონი ეროსი იარაღს არ ატარებდა, შეიძლება, ეს მისთვის იმდენად ინტიმური თემა იყო, რომ მან ამ იარაღის ყიდვა არავის ანდო. ფაქტია, რომ მან იარაღი პირადად იყიდა და გააფორმა. ბალისტიკურმა ექსპერტიზამ მარტივად უნდა დაადგინოს, ეს ტყვიის გულა ბალისტიკურად თუ შეესაბამება იმ იარაღის სახეობას, რომელიც გაფორმებული იყო ეროსიზე. საგამოძიებო ჯგუფი მაღალი კვალიფიიური ადამიანებისგან შევქმენით, რადგან ვიცოდით, რომ ჩერგოლეიშვილისა და ბარამიძისნაირი ყბედები ხელს ჩვენ შეგვახოცავდნენ. თუ იოტისოდენად მაინც ვუშებთ, რომ მან თავი მოიკლა და ამის გააზრებაც კი ტანში მზარავს, როგორ დღეში უნდა იყოს ადამიანი, რომ მიზანმიმართლად მივიდეს, იარაღი იყიდოს და სიცოცხლე თვითმკვლელობით დაასრულოს. ეროსის სახლის გარშემო თურქეთისა და ჩეხეთის საელჩოებია. შესაბამისად, ამოღებული იქნება ვიდეო მასალები და შესამოწმებელია ყველა დეტალი. დაწყებული რუსთავში მისი პარტიული ოფისიდან, დამთავრებული სატელეფონო ზარებით.

როგორც ცნობილია, შტაბში მომუშავეებისთვის ხელფასის გადახდაზე პრობლემები ყოფილა. მართალი გითხრათ, ხელაღებით თქმა, რომ ეს არის საზარელი მკვლელობა, არ შეგვიძლია. გარდაცვალების რეალური მიზეზები უნდა დადგინდეს.

კიწმარიშვილის გარდაცვალება საკმაოდ სკანდალური საქმეა. ობიექტური გამოძიების ჩატარებას შეძლებთ, თუ როგორც ჟვანიასა და შარაძის საქმეებია ბურუსით მოცული, ისე დარჩება ეს საქმეც?

- ამ საქმის გამოძიება სამართალდამცავებისთვის პრესტიჟის საქმეა. რთულად გასახსნელი საქმე არ არის. იმ დღის ქრონომეტრაჟი უნდა გაკეთდეს. წამოუდგენელია, ადამიანი საელჩოების შუაში ისე მოკლა, რომ დაუსჯელი დარჩე. ამის არ მწამს. კარგია, რომ ხელისუფლება თვითმკვლელობის ვერსიაში წელგამართულია. ექსპერტიზასც ოჯახის მოთხოვნით მაია ნიკოლაიშვილი ესწრებოდა და მისი პირველადი დასკვნა საუკეთესოა, რაც შეიძლება გაკეთებულიყო. ყბედ ადამაინებს არცერთი კითხვა არ უნდა დარჩეთ. ჩვენს საკრიტიკოდ ლუცენკო ჩამოიყვანეს, რომელიც გვიყვება იმაზე, თუ როგორი მამა აბრაამის ბატკანი და ფრთიანი ანგელოზია მერაბიშვილი. ლუცენკოსთან კითხვა მაქვს, უკრაინაში მამაკაცებს ცოცხებს უკეთებდნენ უკანალში?! ლუცენკოს ძმაკაც მერაბიშვილის მეუღლის დანაშაულის დასაფარავად, გირგვლიანი ჩაკუწეს და სასაფლაოზე ჩააგდეს. ბატონი ლუცენკო წავიდეს და თავის უკრაინას მიხედოს, გაგვანებოს თავი. მათ საქმეში ვერევით?! ქვეყანა ენგრევათ, აქ რომ ჩამოდის და მეყბედება, აიღოს იარაღი და თავი უკრაინისთვის გადადოს და არა ვანოსთვის. ერთმანეთთან რაიმე სხვა კავშირები აქვთ? სახიფათო თამაშია და უკრაინელ მეგობრებს ქართულ საქმეებში ცხვირის ჩაყოფას არ ვურჩევ, რადგან ამ ადამიანებმა დანაშაულები ჩაიდინეს. ლუცენკო თავის საქმეს მერაბიშვილს რომ უკავშრებს, მან ვინმეს აგარაკი წაართვა?! მათთან რომ ჩავსულიყავი და მეთქვა კუჩმას ხელისუფლება ღონღაძის მკვლელობაში არაფერ შუაშია-თქო, მართალი ვიქნებოდი? ვინ მისცა მათ ამის უფლება, სააკაშვილმა? სააკაშვილი ქართველ ხალხს ფეხებზე კიდია და ამას შეეგუონ.