"პრაიმტაიმის" ექსკლუზიური ინტერვიუ შინაგან საქმეთა მინისტრთან საკმაოდ სკანდალურიც აღმოჩნდა... ჩვენთან საუბრისას ალექსანდრე ჭიკაიძე ქვეყანაში მოსალოდნელ დესტაბილიზაციაზე საუბრობს... რა ინფორმაციას ფლობს ქვეყნის პირველი პოლციელი? ვინ და როდის გეგმავს მასობრივი გამოსვლების დაწყებას? რას ყვება თათუხაშვილის გახმაურებულ საქმეზე, დეპუტატ ნუგზარ წიკლაურზე თავდასხმის, ასევე ქურდულ სამყაროსთან და ნარკოტიკების წინააღმდეგ ბრძოლის შესახებ? ამ და სხვა აქტუალურ თემებზე გთავაზობთ "პრაიმტაიმის" ექსკლუზიურ ინტერვიუს შინაგან საქმეთა მინისტრ, ალექსანდრე ჭიკაიძესთან.

პირველ რიგში მინდა გკითხოთ, თუ რამდენად დეპოლიტიზირებულია დღეს შინაგან საქმეთა სამინისტრო? მიუხედავად თქვენი მტკიცებისა, რომ ამ მიმართულებით მნიშვნელოვანი ნაბიჯები გადაიდგა, ოპონენტები მაინც ირწმუნებიან, რომ მთელი რიგი საქმეები პოლიტიკურად არის მოტივირებული...

- ამ შენიშვნას ნამდვილად ვერ მივიღებ. ზოგადი საუბარი ერთია და მეორეა კონკრეტული ფაქტები. ფაქტი კი არის ის, რომ ჩვენ ამ ხნის განმავლობაში პოლიტიკური ნიშნით არავინ დაგვიკავებია, სრული პასუხისმგებლობით შემიძლია განავაცხადო ეს. კანონის წინაშე ყველა თანაბარია, როგორც ჩვენი მომხრეები, ისე მოწინააღმდეგეები. მიზანშეუწონლად მიმაჩნია ამ თემებით სპეკულირება. არათუ დაკავება, თანამდებობაზე დანიშვნაც კი არ ხდება პოლიტკური ნიშნით, შსს აღარავის დევნის პოლიტიკური ნიშნით და არ ასრულებს, რომელიმე პოლიტიკური ძალის დაკვეთებს. ჩვენ ვემსახურებით საქართველოს მოქალაქეებს და, ვფიქრობ, წარმატებითაც.

ახლოვდება ადგილობრივი არჩევნები და საინტერესოა, რა ფორმით იქნება ჩართული შსს ამ პროცესში? ამას იმიტომ გეკითხებით, რომ გასულ წლებში მუდმივად იყო ბრალდებები, თითქოს შსს-ს სხვადასხვა დანაყოფი მთელი თავისი რესურსით იყო ჩართული ნებისმიერი ტიპის საარჩევნო პროცესში...

- პოლიცია გამოყენებული იქნება მხოლოდ იმ შემთხვევაში, თუ არჩევნების დღეს იქნება კანონდარღვევები, ინციდენტები... ჩვენ ვუზრუნველვყობთ საარჩევნო გარემოს უსაფრთხოებას და ამის მაგალითი იყო წინა არჩევნებიც. არანაირი ჩარევა პოლიციის მხრიდან არ ყოფილა, ასე იქნება ადგილობრივი არჩევნების დროსაც. ყველა ადამიანს ექნება საკუთარი ნების თავისუფლად, უსაფრთხო გარემოში გამოხატვის შესაძლებლობა და ამის გამო მის დევნას არავინ დაიწყებს. სამწუხაროდ, ეს ასე არ ხდებოდა წინა წლებში. იგივე 2012 წლის არჩევნებზე, მთელი სამინისტრო, სახელმწიფო რესურსი ჩართული იყო იმ მიზნით, რომ მოქალაქეების თავისუფალი ნება შეზღუდულიყო.

"ნაციონალური მოძრაობა" ხშირად აკეთებს მინიშნებას იმის თაობაზე, რომ შესაძლოა საქართველოში განმეორდეს ევრომაიდნის მოვლენები... ხედავთ თუ არა ამის ალბათობას და როგორ იმოქმედებს პოლიცია უკრაინული სცენარის შემთხვევაში?

 - უკრაინაში რაც მოხდა, განაპირობა იმან, რომ იქ ხელისუფლებამ უარი თქვა დემოკრატიულ და ევროპულ ღირებულებებზე, რაც საქართველოში არ შეიმჩნევა, პირიქით, ივნისში ჩვენ ხელს ვაწერთ ასოცირების ხელშეკრულებას, რაც კიდევ უფრო დაგვაახლოებს ევროპასთან. უკრაინაში რა მიზნითაც მოხდა ევრომაიდანი, ჩვენთან ამის წინაპირობა ნამდვილად არ არის. წინა წლებთან შედარებით 200 და 300 პროცენტით მეტად არის დაცული ადამიანის უფლებები, მათი პირადი ცხოვრება, პოლიტიკური შეხედულებები და ა.შ. თუმცა, არ დაგიმალავთ და გეტყვით, რომ არსებობს გარკვეული ინფორმაციები. როგორც იცით, ყოფილმა პრეზიდენტმაც გააჟღერა ევრომაიდნის იდეა და ამბობენ, რომ პარტიის შიგნითაც ეს თემა აქტიურად განიხილება. არის ინფორმაციები, რომ დაიწყეს საბურავების ყიდვაც.

ანუ თქვენ გინდათ თქვათ, რომ "ნაციონალური მოძრაობა" აქტიურად განიხილავს მასშტაბური გამოსვლების სცენარს და ამ მიზნით მოიმარაგეს საბურავები?

- დიახ, არის ასეთი ინფორმაცია. მათ სურთ რაღაც ზონდერ-ჯგუფების ჩამოყალიბება, შესაძლოა მოახდინონ წარსულში კრიმინალთან და მრავალ დანაშაულებებთან ასოცირებული პირების მობილიზება. არის ჯგუფები, რომლებიც შეეცდებიან გამოიწვიონ ქვეყანაში აურზაური და ეს კეთდება იმისთვის, რომ საკუთარი პოლიტიკური ინტერესები გაამყარონ. მე მგონი ამას თვითონ საზოგადოება არ დაუშვებს, რადგან დღეს ქვეყანა დგას სწორ გზაზე. მთავარი პრობლემა რაც გააჩნია საქართველოს, არის სოციალურ-ეკონომიკური მდგოამრეობა და მერწმუნეთ საქართველოს მთავრობა, ირაკლი ღარიბაშვილის ხელმძღვანელობით აქტიურად მუშაობს ამ პრობლემის დაძლევის მიზნით. ოპონენტებს რა თქმა უნდა ექნებათ არეულობის მცდელობები, მაგრამ ეს არის მხოლოდ მათი სურვილი და ასეთ იდეებს რეალობაში განხორციელება არ უწერია. მეტსაც გეტყვით, მათ ჩამოიყვანეს უკრაინიდან ევრომაიდნის აქტივისტები, ატარებენ ტრენინგებს და მოსამზადებელ სამუშაოებს. ეს ინფორმაცია მედიაშიც მუსირებს. მათ საფარქვეშ ჰყავთ რამდნიმე არასამთავრობო ორგანიზაცია, რომლებიც აქტიურად მუშაობენ იმაზე, როგორ გამოიყვანონ ხალხი ქუჩაში, მოხდეს არეულობა, შემდეგ ისევ თავიანთმა ხალხმა ესროლოს ვინმეს და ეს დაბრალდეს ხელისუფლებას. იგეგმება, რომ გაშალონ კარვები, სადაც 300-400 კაცის მობიზილებას მოახდენენ. მე მჯერა, რომ ჩვენი ოპონენტები, თავადვე მიხვდებიან, რომ ეს არ არის ის გზა, რომელიც ქვეყანას, ან ნებისმიერ ჩვენგანს რაიმე სიკეთეს მოუტანს.

თუკი თქვენ საუბრობთ მოსალოდნელ სისხლისღვრაზე, რა პრევენციულ ღონისძიებებს ატარებთ იმისთვის, რომ ეს არ მოხდეს?

 - დღეს ჩვენ არ ვართ ის უწყება, რომელიც სურვილების და იდეების გამო, რაგინდ მიუღებელიც არ უნდა იყოს ეს, დავიწყოთ დაჭერები. მათ აქვთ საკუთარი ნების თავისუფლად გამოხატვის შესაძლებლობა, მაგრამ ჯგუფები, რომლებიც ეცდებიან ქვეყანაში დესტაბილიზაციის მოხდენას, ხალხისა და ოპონენტების ცემას, რათა ეს ყველაფერი მერე სახელმწიფოს დააბრალონ, უმკაცრესად იქნებიან დასჯილნი! ჩვენ მაქსიმალურად შევეცდებით, არ დავუშვათ ქვეყანაში დესტაბილაზაცია და აღვკვეთოთ ყოველგვარი მსგავსი ქმედება. მათ, პირველ რიგში, საზოგადოება უპასუხებთ და გაცილებით მკაცრად. საქართველოში უკანასკნელი წლების განმავლობაში საკმაოდ ბევრი სისხლის დაიღვარა. ეს ხალხს აღარ სჭირდება, ხალხს სჭირდება სიმშვიდე და ნორმალური განვითარება.

უკრაინაში ევრომადინის შედეგად დაემხო იანუკოვიჩის მთავრობა... ამ შემთხვევაშიც მიზანი იგივე იქნება, თუკი თქვენ უკარინულ სცენარზე საუბრობთ?

 - მიზანი არის დესტაბილიზაცია, შეეცდებიან ევროპელ პოლიტკოსებს მიაწოდონ ცრუ ინფორმაციები და ამით მოიპოვენ გარკვეული წრეების მხარდაჭერა. მიზანი შეიძლება იყოს სახელმწიფო ინსტიტუტების დამხობა, ხელისუფლების შეცვლა და ა.შ. არის ინფორმაცია, რომ შესაძლოა ამ სცენარის ამუშავება დაიწყონ თვითმმართველობის არჩევნების შემდეგ, თუმცა შესაძლოა გარკვეული ნიადაგი მანამდეც მოსინჯონ.

საკმაოდ სერიოზული განცხადებაა, მით უმეტეს, როცა ამაზე შინაგან საქმეთა მინისტრი საუბრობს, თუმცა არჩევნებამდე წინ გვაქვს 17 მაისი, რომელიც იქეცვა ერთგვარ ტესტად როგორც საზოგადოებისთვის, ასევე თქვენი უწყებისთვის... გასული წლის გამოცდილებიდან გამომდინარე, რამდენად ადეკვატური იქნება პოლციია იმ შემთხვევაში, თუ იგივე ექსცესებს ექნება ადგილი?

- პირველ რიგში მოვუწოდებ საზოგადოებას, რომ კანონს სცენ პატივი. ის, რაც მოხდა გასულ წელს, არ არის მისასალმებელია. უნდა გვესმოდეს, რომ ყველა ადამიანს, ნებისმიერ ჯგუფს აქვს სკუთარი აზრის გამოხატვის უფლება. მე არ მგონია, რომ მოვლენები წელს კლავ დრამატულად განვითარდეს. ქართველი ხალხი არის ბრძენი, მას აქვს ანალიზის შესანიშნავი უნარი და დასკვნებსაც კარგად აკეთებს. აქედან გამომდინარე, რაიმე განსაკუთრებულ გართულებებს არ ველით, თუმცა ნებისმიერ სამართალდარღვევას პოლიცია ადეკვატურად უპასუხებს და იქნება შესაბამისი რეაგირება.

რაც შეეხება ქვეყანაში არსებულ კრიმინოგენულ ვითარებას... ხშირად გსაყვედურობენ, რომ სტატისტიკის მიუხედავად, ქვეყანაში კრიმინალის დონზე საგრძნობლად გაიზარდა...

- საუბარი იმაზე, რომ ქვეყანაში კრიმინალური ვითარება დამძიმდა არის აბსოლუტურად უსაფუძვლო და ემსახურება მხოლოდ და მხოლოდ შინაგან საქმეთა სამინისტროს დისკრედიტაციას. რაც არ უნდა კარგი გავაკეთოთ, ჩვენი ოპონენტები ცდილობენ სიტუაციის დამძიმებას და საზოგადოებაში არასწორი შეხედულების ჩამოყალიებებას. მინდა დაგარწმუნოთ, რომ ჩვენ ვაკონტროლებთ სიტუაციას და არაფერი საგანგაშო არ ხდება. კრიმინალი ყველა სახელმწიფოში ხდება. სახელმწიფო თუ არსებობს, სამწუხაროდ იქ ხდება კრიმინალიც, ეს თანმდევი პროცესია. მთავარია, მოხდეს ამის კონტროლი და მინიმალიზება. ამას ჩვენ წარმატებით ვახეხებთ და ყოველგვარი სუაბარი კრიმინალური ვითარების გაუარესებაზე, არის სპეკულაცია.

თქვენ წინა ხელისუფლების დროსაც ამავე სტრუქტირაში მუშაობდით და საინტერესოა იმდროინდელი სიტუაცია კრიმინალის კუთხით, რამდენად განსხვავდება დღეს არსებულისგან?

 - დღეს თითქმის ყველა დანაშაული, რაც ხდება ქვეყანაში, ამას საზოგადოებაც იგებს, ეს იმიტომ, რომ სამინისტრო არის გახსნილი და ჩვენი საზოგადოებასთან ურთიერთობის დეპარტამენტი ღიაა ნებისმიერი ინფორმაციისთვის. ჩვენ არ ვაწვდით საზოგადოებას ტყუილს და შეფუთულ ინფორმაციას. რაც შეეხება გასულ წლებს, მინდა გითხრათ, რომ უფრო მეტი დანასაულიც ხდებოდა და უფრო მძიმე კატეგორიების, მაგრამ უმეტეს შემთხვევაში ადგილი ჰქონდა ამ ინფორმაციების მიჩქმალვას. მაგალიტად ღამე რომ გადიოდა გადაცემა "პატრული" იქ ქვეყნდებოდა სტატისტიკური ინფორმაციები, სადაც მაგალითად ეწერა, რომ დღის განმავლობაში ქვეყნის მასშტაბით მოხდა 3 ქურდობა. ეს მაშინ, როცა მე ვიყავი ერთ-ერთი დანაყოფის ხელმძღვანელი და მარტო მე მქონდა 20-მდე მსგავსი შემთხვევა აღრიცხული დღის განმავლობაში. დასკვნები თქვენ თვითონ გააკეთეთ.

ბოლო პერიოდში თქვენი უწყება განსაკუთრებით აქტიურობს ნარკოდანაშაულის წინააღმდეგ.. წამოიწყეთ სპეციალური კამპანიაც და ხორციელდება საკანონმდებლო ცვლილებები... რატომ გახდა ასეთი აქტიურობა საჭირო? რა საფრთხეები გამოიკვეთა ამ მიმართულებით?

 - იმიტომ, რომ ეს იყო სერიოზული პრობლემა წლების განმავლობაში. უამრავი ახალგაზრდა შეიწირა ზოგადად ნარკოტიკებმა. აფთიაქებიდან დაუბრკოლებლად ხდებოდა ისეთი პრეპარატების რეალიზება, რომლისგანაც მზადდება ე.წ. "კრაკადილი" და სხვა მსგავსი ნივთიერებები. ამაზე დაწესებული იყო მხოლოდ ადმინისტრაციული სასჯელი. ჩემი გადაწყვეტილებით მოხდა გამკაცრება. შესაბამისი ინციატივა წარვუდგინე მთავრობას, რომელიც შემდგომ პარლამენტმა დაამტკიცა და დღეს რეცეპტის გარეშე ფსიქოტროპული მედიკამენტების გაცემა უკვე შეიზღუდა, თუ ვინმე ამას მაინც მოახდენს, მას დაეკისრება სისხლის სამართლის პასუხისმგებლობა. ამან მოგვცა საკმაოდ დადებითი შედეგი, დაახლოებთ 80-90 პროცენტით შემცირდა. სიამაყით შემიძლია ვთქვა, რომ ჩვენ ეს მოვახერხეთ.

თუმცა, არსებობს მეორე და არანაკლებ სერიოზული პრობლემა სინთეტიკური ნარკოტიკების სახით...

- ე.წ ბიოს რაც შეეხება, მისი შემოდინება ხდება ძალიან მარტივად და არ არსებობდა არანაირი საკანონმდებლო ბაზა ამის აღსაკვეთად. იყო შემთხვევები, როცვა ერთდროულად 8-10 კილო სინთეტიკური ნარკოტიკის კი ამოვიღეთ, თუმცა იმის გამო, რომ ეს არ იყო კრიმინალიზებული, ვერავის ვსჯიდით. ახლა მოხდა კანონპროექტის ინიცირება, რის მეშვეობითაც დარეგულირდება სინთეტიკური ნარკოტიკების შემოდინება, მისი რეალიზაცია და მოხმარება. უფრო გათვლა არის შემოტანა-რეალიზაციაზე და არა იმდენად მოხმარებაზე. ეს ჩვეულებისამებრ დაექვემდებარება სისხლის სამართლის პასუხისგებლობას. ზოგადად, ჩვენი სამინისტრო, ძალიან აქტიურია ნარკოტიკების უკანონო ბრუნვის წინააღმდეგ, ამის დასტურია უპრეცენდენტო რაოდენობის "ჰეროინის" (116 კგ) ამოღება. ჩვენ არცერთი წუთით არ ვაპირებთ მოვუყრუოთ ამ საკითხს.

საზოგადოებაში იყო მოლოდინი, რომ შინაგან საქმეთა სმაინისტრო ნათელს მოჰფენდა გასულ წლებში საკმაოდ ბუნდოვან ვითარებაში გაუჩინარებული ადამიანების საქმეებს... შეგიძლია გვითხრათ რა ეტაპზეა ეს საქმეები?

- გამოძიება მიმდინარეობს და მე დიდი იმედი მაქვს უახლოეს ხანში გაიხსნება ეს დანაშაულებები, თუმცა გამოძიების ინტერესებიდან გამომდინარე, წიანსწარ ვერაფერს გეტყვით. ამას აქვს თავისი საიდუმლო საქმეები. გეტყვით, მხოლოდ იმას, რომ არის გარკვეული შედეგები.

ბოლო დღეების ერთ-ერთ გახმაურებულ საქმეზე მინდა გკითხოთ. მართალია ეს უშუალოდ თქვენს უწყებას არ ეხება, მაგრამ მაინც სიანტერესოა რა აზრის ხართ თათუხაშვილის გარდაცვალებასთან დაკავშირებით... ოჯახი და თქვენი ოპონენტებიც პროკურატურას ადანაშაულებენ...

- თათუხაშვილის გარდაცვალება არის თემა, რომელსაც ოპონენტები იყენებენ პოლიტიკური კამპანიისთვის, რაც ძალიან სამწუხაროა. მე მოვისმინე პროკურატურის პოზიცია, რომელიც იყო გამყარებული მტკიცებულებებით. რეალობას ხედავს საზოგადოება და არა მგონია, საბოლოდ ამ მიმართულებით კითხვები დარჩეს. თვითონ პროკურატურას არანაირად არ აძლევდა ხელს ამ ადამიანის გარდაცვალება. პროკურატურის დანაშაულს ამ საქმეში გამოვრიცხავ.

როგორ ფიქრობთ, მინიმუმ დაცვის პასუხისმგებლობის საკითხი მაინც თუ იკვეთება, რომელიც თათუხაშვილის პროკურატურის მიერ ჰყავდა დანიშნული და აღმოჩნდა, რომ გაექცათ... შეგახსენებთ, რომ ზურაბ ჟვანიას დაცვის წევრი მიხეილ ძაძამია დაკავებულია იმის გამო, რომ მან ვერ უზრუნველყო დასაცავი ობიექტის უსაფრთხოება და ვერ შეასრულა მასზე დაკისრებული მოვალეობა...

- შედარება არასწორია, რადგან ზურაბ ჟვანიას დაცვის უზრუნველყოფა იყო სავალდებულო პირადი მცველისთვის. თათუხაშვილის შემთხვევაში არ ყოფილა პირადი დაცვა, ეს იყო მოწმის დაცვის სამსახური, რომელზეც თუ თავად დასაცავმა ობიექტმა თქვა უარი, არანაირი უფლება არ გვაქვს სავალდებულო დაცვა განვახორციელოთ მასზე. მოწმეს იძულების წესით ვერავინ დაიცავს. ჟვანიას შემთხვევაში კი დაცვას პირდაპირ ევალებოდა ნებისმიერ შემთხვევაში დაეცვა ის.

დეპუტატ ნუგზარ წიკლაურის ცემის ფაქტთან დაკავშირებით, თუ ხართ ინფორმირებული რა ეტაპზეა ძიება?

- გამოძიება დაიწყო 125-ე მუხლით, ცემის ფაქტზე. იძიებდა დიდუბე-ჩუღურეთის პროკყურატურა, თუმცა რამდენადაც ვიცი მათივე მოთხოვნით საქმე გადავიდა მთავარ პროკურატურის საგამოძიებო ნაწილში. დაიკითხა რამდენიმე პიროვნება, თვითმხილველები, რომლებიც ამბობენ, რომ სამ კაცზე მეტი არ შეუნიშნავთ ამ იციდენტის დროს. თავად ბატონი ნუგზარი ამბობს, რომ 9 კაცი დაესხა თავს, გამოიყენეს ელექტრო შოკები და სცადეს გატაცება. ვნახოთ, გამოძიება დაადგენს რეალურად რა მოხდა, არა აქვს მნიშვნელობა რაოდენობას, ვინც დააშავა, ნებისმიერი პიროვნება პასუხს აგებს კანონის შესაბამისად. ამ შემთხვევაშიც ხელისუფლების დადანაშაულება სრულიად გაუგებარია, არ მესმის, რაში აწყობდა ხელისუფლებას ოპოზიციონერი დეპუტატის ცემა? ზოგადად ნაციონალური მოძრაობის მიმართ საზოგადოებაში არის აგრესია და ხშირად მიწევს მითითების მიცემა, რომ პოლციამ მაქსმალურად უზრუნველყოს მათი უსაფრთხოება მოქალაქეებისგან. ამისთვის პოლციას მინდა მადლობა გადავუხადო, რადგან მათ ესმით, რომ თითოეული ადამიანი პოლიტიკური შეხედულების მიუხედავად არის ამ ქვეყნის მოქალაქე.

რამდენად აქტიურია შინაგან საქმეთა სამინისტრო ქურდულ სამყაროთან წინააღდეგ ბრძოლაში?

- ქურდული სამყაროს წევრობის გამო ჩვენ პასუხისგებაში მივეცით არაერთი პირი. შსს მაქსიმალურად მობილიზებულია ამ დანაშაულის წინააღდმდეგ და ალბათ თქვენს მკითხველსაც მოეხსენება, რომ ჩატარდა რამდენიმე სპეცოპერაციაც. აქვე მინდა შევეხო ე.წ. "მაზავშიკების" თემას, რომელიც გარკვეულწილად დაკავშირებულია ქურდულ სამყაროსთან, რადგან ხშირად ხდება ხოლმე რომ თანხის ამოღების მიზნით საქმეში ერთვებიან სწორედ კრიმინალური "ავტორიტეტები". ჩვენ დავაკავეთ რამდენიმე პირი, რომლებიც აკეთებდნენ ე.წ. მაზებს. შემდეგ ის პიროვნებები, რომლებიც აგებდნენ თანხებს, უმეტესწილად იძულებულნი ხდებოდნენ სახლიდან ქონება გამოეტანათ. იყო შემთხვევები, როდესაც ხდებოდა პირდაპირ სახლების გადაფორმება. ამიტომ შსს-ს გასაკუთრებული კონტროლის ქვეშაა ეს დანაშაული, რადგან ამას თან სდევს მრავალი სხვა დანაშაულიც - ყაჩაღობა, ძარცვა ქურდობა და ა.შ.

არასამთავრობო ორგანიზაციების ნაწილმა წამოიწყო კამპანია სახელწიოდებით - "ისევ გვისმენენ".. მოდით პირდაპირ გკითხავთ - გვისმენთ?

- პირდაპირ გიპასუხებთ, რომ არა! ამას სრული პასუხისმგებლობით გეუბნებით. მიმდინარეობს კონსულტაციები სამართლებრივი ნორმების დახვეწის მიზნით. კარგია ამ ადამიანების აქტიურობა, თუმცა გარკვეულწილად მე ვიგრძენი, რომ ადგილი აქვს შსს-ს დისკრედიტაციას. განცხადება, რომ ისევ გვისმენენ, არის ტყუილი. სამწუხაროდ, ეს ადამიანები წინა წლებშიც აქ ცხოვრობდნენ, მაშინაც წარმოადგენდნენ არასამთავრობო ორგანიზაციებს, თუმცა მათი მხრიდან ასეთი აქტიურობა ფარულ მოსმენებთან და მიყურადებებთან დაკავშირებით, სამწუხაროდ, არ მახსოვს. როცა მათ ამის რეალური საფუძველი ჰქონდათ, ჩუმად იყვნენ. მე თავად გახლდით იმ კომისიის თავმდჯომარე, რომელმაც გაანადგურა პირადი ცოხვრების ამსახველი ფარული კადრები. პრაქტიკულად, უსმენდნენ და იღებდნენ ყველას და ყველაფერს, საკუთარ თანაგუნდელებსაც კი. ეს ადამიანები დღესაც არიან მათ პარტიაში, გამიკვირდა, რომ ერთმანეთზეც კი ასეთ კომპრომატებს აგროვებდნენ.

ჩანაწერების განადგურება მოხდა, მაგრამ რამდენად არსებობს კვლავ მათი გავრცელების საფრთხე? ხშირად საუბრობენ იმაზე რომ ჩანაწერების ნაწილი გატანილია..

- სამინისტროდან დისკის ან რაიმე ჩანაწერის გატანა სავსებით შესაძლებელი და მარტივი იყო. დისკი კი არა, ავტომანქანებს, უშველებელ ჯიპებს ვეძებთ, რომლებიც სამინისტროს ბალანსზე იყო და გაურკვეველია სად წაიღეს. შემიძლია გითხრათ, რომ სამინისტროდან დიდი ოდენობის მასალაა გატანილი და თუ ამას წარმოადგენენ, პასუხისმგებლობა არ დაეკისრებათ, ხოლო თუ ვინმე გამოიყენებს შანტაჟისა და საკუთარი მიზნებისთვის, ეს იქნება უმკაცრესად დასჯილი. მაქვს ინფორმაცია, რომ "ნაციონალური მოძრაობის" წევრები კვლავ ახორციელებენ ფარული ჩანაწერებით შანტაჟს.

რას გულისხმობთ?

- დაიბარეს რამდენიმე პიროვნება და ანახეს რაღაც ჩანაწერები - აი, ჩვენ შენზე ეს გვაქვს და ჭკუით იყავიო. თუ ეს მართალია და დადასტურდა - ძალიან ცუდი. იმედის ვიტოვებ, რომ ინფორმაცია, რომელიც ჩვენ მოგვაწოდეს არ შეესაბამება სიმართლეს.

და ბოლოს, მინდა გკითხოთ მთავრობაში მოსალოდნელ საკადრო ცვლილებებზე... შეგიძლიათ გვითხრათ, რა მიმართულებით იგეგმება ცვლილებები?

 - ბატონი პრემიერი ამას მე არ შემითანხმებს. ეს გადაწყდება კონკრეტული შედეგებით. ჩემთვის ამ ეტაპზე არ არის ცნობილი, თუ რომელ მინისტრს შეიძლება შეეხოს ცვლილება.