„ნაცმოძრაობას“, როგორც დანაშაულებრივ ორგანიზაციას, ქომაგი ქართულ ოპოზიციურ პარტიებში არ გამოუჩნდა, რამაც ლევან ხაბეიშვილი დაადარდიანა. მან მოუწოდა ოპოზიციურ პარტიებს, ხმა აიმაღლონ „ნაცმოძრაობის“ დასაცავად, წინააღმდეგ შემთხვევაში, თუკი ისინი გაიტრუნებიან, ყველა იქნება ლუსტრურებული, როგორც ივანიშვილის ჯიბის ოპოზიცია.

„მნიშვნელოვანია, „ნაცმოძრაობის“ გაუქმების თაობაზე გამოვიდნენ და ხმა ამოიღონ. ვინც არ იღებს ხმას, იგივე გახარიას პარტია, ჩემი წარმოდგენით, არის ბიძინა ივანიშვილის ჯიბის ოპოზიცია“, - აცხადებს ლევან ხაბეიშვილი.

,,ნაცმოძრაობის'' ანტიკონსტიტუციურად გამოცხადებას მიესალმება კახა კალაძე. დედაქალაქის მერი აცხადებს, რომ მათ ჩაიდინეს ღალატი, მათი უგუნური პოლიტიკის შედეგად დავკარგეთ ტერიტორიები, დაიღუპა მშვიდობიანი მოსახლეობა.

 აღმოჩნდა, რომ მმართველი გუნდის მიერ დაანონსებულმა „ნაცმოძრაობის“ გაუქმების დაპირებამ ყველაზე მეტად დანარჩენი ოპოზიციური პარტიები გაახარა. თუკი მმართველი გუნდი აცხადებს, რომ „ნაცმოძრაობის“ გაუქმება ქართული პოლიტიკის გაჯანსაღების საფუძველია, დანარჩენ ოპოზიციურ პარტიებს ეს ნაკლებად ადარდებთ. პოლიტიკური სივრცის გაჯანსაღება მათთვის სრულიად უინტერესოა, მათ მთავარი მერკანტილური ინტერესი ამოძრავებთ, როგორმე მოიშორონ კონკურენტი, ანუ დანაშაულებში ჩაფლული ეს „უნიკალური“ პარტია.

თუმცა მახე „ნაცმოძრაობის“ სატელიტებისთვისაცაა დაგებული. მმართველმა გუნდმა დააინიცირა კანონპროექტი „ნაცმოძრაობის“ მემკვიდრე პარტიების არაკონსტიტუციურად გამოცხადებასთან დაკავშირებით. შესაბამისად, „ნაცმოძრაობა“ და მისი სატელიტები ვერ მიიღებენ არჩევნებში მონაწილეობას, რისთვისაც სამართლებრივ საფუძველს შექმნის საგამოძიებო კომისია.

რატომ არ იღებენ ხმას „ნაცმოძრაობის“ დასაცავად დანარჩენი ოპოზიციური პარტიები და ნაცების სატელიტები?

საერთაშორისო ურთიერთობების სპეციალისტი, მეცნიერი თამარ კიკნაძე for.ge-სთან საუბრისას აცხადებს, რომ აქ უკვე შიშის მომენტია, ამოიღებენ ხმას „ნაცმოძრაობის“ დასაცავად და, შესაბამისად, მათ წინააღმდეგაც გატარდება ზომები. თამარ კიკნაძის განმარტებით, ყველანი ვგრძნობთ, რომ „ქართული ოცნება“ გადამწყვეტი ნაბიჯებისთვის ემზადება, რაც მისასალმებელია.

„არა მარტო „ნაციონალური მოძრაობა“, არამედ მათი სატელიტებიც ზედმეტს ილაპარაკენ და ეგენიც გაუყვებიან „ნაცმოძრაობის“ გზას, ამიტომაც ფრთხილობენ. ძალიან კარგია საგამოძიებო კომისიის მუშაობა ტელევიზიით რომ გადაიცემა, ხალხმა უნდა გაიგოს, რასთან გვქონდა საქმე და რა დანაშაულებრივ ქმედებებს აწარმოებდნენ. საკითხავია, კიდევ როგორ გადარჩა ეს ქვეყანა მათ ხელში“, - აცხადებს თამარ კიკნაძე.

„მართვის სტრატეგიული ინსტიტუტის“ ხელმძღვანელი პეტრე მამრაძე მიიჩნევს, რომ „ნაცმოძრაობა“ პარტია არ არის, ეს არის დამნაშავეთა ორგანიზებული ჯგუფი, თავისი კეზერაშვილებით და სისხლის სამართლის დამნაშავეებით აღსავსე. რა თქმა უნდა, ეს ე.წ. პარტია პოლიტიკურად აკრძალული უნდა იყოს საკონსტიტუციო სასამართლოს მიერ. დანარჩენმა ოპოზიციურმა ჯგუფებმა ძალიან კარგად იციან, რასაც წარმოადგენდა „ნაცმოძრაობა“, რადგან თვითონვე იყვნენ „ნაცმოძრაობის“ თანანზრახველები და შემსრულებლები. გვარამიამ ეს ყველაზე კარგად იცის, რომელიც აღარ არის „ნაცმოძრაობაში“, ასევე, ეს კარგად იცის მელიამ და სხვებმა. გარდა ამისა, მაშინდელი რეჟიმის მსახურები და საფულეები იყვნენ ხაზარაძე-ჯაფარიძე. ცხადია, დღეს არც ერთ მათგანს არ უნდა „ნაცმოძრაობასა“ და აგვისტოს ომის კატასტროფასთან გაიგივება, გარდა საწყალი ხაბეიშვილისა.

„ნაცმოძრაობის“ შიგნით იყო მგლების ხროვა, რომლებიც ერთმანეთს ჭამდნენ და ყველაფერი აგებული ჰქონდათ სიძულვილზე, ტყუილსა და ძალადობაზე. ეს სამი რამ აერთიანებდა ამ მაფიას. დღესაც რომელ ერთობაზეა ლაპარაკი? წარამარა გამოდის ბოკუჩავა, „ენდიაის“ ყოფილი მუშაკი, რომელიც პოლიტიკაში გადაბარგდა და ამბობს, უტოპია ყოფილა ეს ერთობა, საერთო პლატფორმა. რა სისულელეს აღარ ლაპარაკობს ეს ქალი ღიად. ასე რომ, ვინ დაიცავს ნაცებს, როცა არავის აქვს ამის სურვილი? რაც შეეხება გახარიას, რომელიც არ აპირებს ნაცების გამოქომაგებას, 2022 წლის 10 მარტს, როცა კელი დეგნანი მოითხოვდა უკრაინისთვის ჯაველინების გადაცემას, გახარია „მთავარზე“ გამოვიდა და განაცხადა, აი, უკრაინაა ჩვენთვის მაგალითი, ჩვენ რომ გვეუბნებოდნენ, თურმე არაფერი შეგვიძლია, პატარა ქვეყანა ვართ, უძლურები ვართ და ბრძოლა არ შეგვიძლია, აი, მაგალითი, როგორ უნდა მოვიქცეთ ახლა. ეს გახარიამ ილაპარაკა, რომელიც ფორმალურადაც არ იყო „ნაცმოძრაობაში“, საქართველოშიც არ ცხოვრობდა მაშინ, მოსკოვში იყო. ცხადია, ოპოზიციას აწყობს, გაუქმდეს დანაშაულებრივი პარტია - „ნაცმოძრაობა“, ისინი მოიშორებენ კონკურენტს. მართალია, მხოლოდ მეორე ადგილზე გავიდა ბოკუჩავას და ვაშაძის ხელმძღვანელობით „ნაცმოძრაობა“ და ნიკა გვარამიამ მეტი ხმა აიღო, მაგრამ „ნაცების“ გაუქმება ნამდვილად აწყობთ დანარჩენ ოპოზიციონრებს“, - აცხადებს პეტრე მამრაძე ჩვენთან საუბრისას.

ამასთან, იხსენებს, რომ საარჩევნო კამპანიის დროს ნიკა გვარამიამ საინტერესო რამ მოიფიქრა. როცა მას ეკითხებოდნენ, „კი მაგრამ, მიხეილ სააკაშვილი?“ გვარამია იდეალურად პასუხობდა, სააკაშვილს რომ შეშურდებოდა, ზუსტად იმ სტილში - „რა დროს სააკაშვილია?!“ და მხრებსაც იჩეჩავდა. გვარამია იმას კი არ ამბობდა, რომ ცუდი იყო სააკაშვილი, ან კარგი იყო, არამედ „რა დროს სააკაშვილია“. ამან იმუშავა ისე, რომ გვარამიას პარტიამ მეტი ხმა აიღო, ვიდრე მეორე ადგილზე გასულმა „ნაცმოძრაობამ“.