ოპოზიციაში ფიქრობენ, რომ ხელისუფლებაში მიმდინარე საკადრო ცვლილებები ახალი არჩევნებისთვის მზადებაა. მათი აზრით, „ოცნებას“ დასავლეთის მხრიდან წამოსული ზეწოლის ფონზე, არჩევნების ჩატარება მოუწევს. მაგალითად, თავდაცვის ყოფილ მინისტრს თინა ხიდაშელს აქვს ვერსია, რომ რეგიონული განვითარების სამინისტროს შექმნა სწორედაც ახალი არჩევნების დანიშვნასთან არის დაკავშირებული. მისი აზრით, ეს არის პირდაპირ არჩევნების სამინისტრო და მას რეგიონების გაკონტროლება ექნება დავალებული.

ექსპრეზიდენტი სალომე ზურაბიშვილი კი ცესკოში განხორციელებული ცვლილების ფონზე მიიჩნევს, რომ ხელისუფლების რიგგარეშე არჩევნების დანიშვნისთვის მზადებას ვადევნებთ თვალს, ამიტომ ოპოზიცია ამ ფაქტს მომზადებული უნდა შეხვდეს.

მმართველ გუნდში კიდევ ერთხელ განმარტავენ, რომ ახალი არჩევნები არ იქნება და დროა ოპოზიცია თვითმმართველობის არჩევნებისთვის მოემზადოს. მომდევნო საპარლამენტო არჩევნები კი 2028 წლის ოქტომბერში გაიმართება.

საინტერესოა, იმ მდგომარეობაში, რაშიც ახალ ოპოზიცია იმყოფება, რეალურად, მათვე რატომ უნდა აწყობდეთ ახალი არჩევნების დანიშვნა? იმ ფონზე, როცა ოპოზიციამ ვერა და ვერ დადო ვერც სამოქმედო გეგმა და ვერც გაერთიანება შეძლო, მის ამომრჩეველში უდიდესი ნიჰილიზმი და ოპოზიციის მიმართ კრიტიკული დამოკიდებულებაა, რატომ აქვთ იმედი, ხვალ რომ არჩევნები დაინიშნოს, იმაზე უარეს შედეგს არ მიიღებენ, ვიდრე 2024 წლის არჩევნებში ჰქონდათ?

მიუხედავად ამისა, სალომე ზურაბიშვილი ოპოზიციას მოუწოდებს ნებისმიერ დროს ახალი არჩევნების დანიშვნისთვის მზად იყვნენ.

„ეს იმის მაჩვენებელია, რომ ძალიან ნერვიულობენ და არჩევნებისთვის ემზადებიან. ვისაც ეჭვი აქვს, რომ რაღაც მომენტში იძულებულები გახდებიან, დანიშნონ საპარლამენტო არჩევნები, სჯობს უყუროს იმას, რას აკეთებენ და რამდენად ემზადებიან. იციან, რომ მოუწევთ არჩევნების დანიშვნა და ამისთვის ყველა კუთხით, ეს არის მაქსიმალურად ყველაფრის დაზღვევა. მაგრამ ესეც არ გამოუვათ! ესეც იმის ნიშანია ჩვენთვის, „წინააღმდეგობის პლატფორმისთვის“, რომ ჩვენც უნდა მზად ვიყოთ. მზადყოფნა იმას ნიშნავს, რომ დამკვირვებლების ჯარი იყოს მომზადებული და დღესვე დავიწყოთ ამისთვის მზადება. ეს არის სწორი გზა და ჩვენ, ყველანი ერთად, ამისთვის უნდა ვემზადებოდეთ“, - თქვა სალომე ზურაბიშვილმა.

ანალიტიკოსი ვახტანგ ძაბირაძე for.ge-თან ამბობს, რომ ახალი არჩევნების დანიშვნის წინაპირობა ჯერჯერობით „ოცნებას“ არ ეტყობა, თუმცა ის არ გამორიცხავს მოვლენების სხვადასხვა სცენარით განვითარებას. ძაბირაძე მიიჩნევს, რომ შესაძლოა, „ოცნებამ“ შემოდგომისთვის ახალი არჩევნები თვითმმართველობის არჩევნებთან ერთად დანიშნოს, ოღონდ ამას რამდენიმე მიზეზის გამო გააკეთებს.

„მე არ მიმაჩნია, რომ ახლა, რა საკადრო ცვლილებებიც მიმდინარეობს ხელისუფლებაში, ამას აკეთებენ იმიტომ, რომ ხელახალი არჩევნების დანიშვნისთვის ემზადებიან. ამას უფრო სხვა მიზეზებიდან გამომდინარე აკეთებენ. მე ასეთი ვერსია მაქვს, რომ ივანიშვილი დასავლეთიდან წამოსული საფრთხეს სანქციების სახით, თავის ერთგულ ხალხს არიდებს. ლილუაშვილის გაყვანა თამაშიდან სწორედ ამის მანიშნებელი მგონია. არაა გამორიცხული, ის სწორედ ახალი არჩევნების დანიშვნის შემდეგ თუნდაც პრემიერ მინისტრად მოგვევლინოს. მე არ მიმაჩნია, რომ ლილუაშვილზე ივანიშვილი გაბრაზებულია და ამის გამო გადააყენა. ეს უბრალოდ, ივანიშვილის მორიგი ტაქტიკური სვლა მგონია, რათა ლილუაშვილი სანქციების ქვეშ არ მოექცეს. რაც შეეხება ახალი არჩევნების დანიშვნის საკითხს, ამ გაზაფხულზე ამას ნაკლებად ველი. თუმცა, თუკი პროცესები რადიკალურად შეიცვლება და სიტუაცია ამას მოითხოვს, მაშინ ივანიშვილი ახალ არჩევნებს შემოდგომაზე დანიშნავს. მე ეს მისი გეგმა „ბ“ მგონია.

ახლა ავხსნი, ამას რა შემთხვევაში გააკეთებს. დიდი ალბათობით, ის ახლა გეოპოლიტიკური მოვლენების განვითარებას ელოდება. პირველ რიგში, ის აკვირდება დასავლეთის მოქმედებებს. კი ბატონო, საკმაოდ მძიმე კვირა იყო ხელისუფლებისთვის. იქ ევროკავშირის საგარეო საქმეთა მინისტრების განცხადება, ჰელსინკის კომისიის განცხადება ანაკლიის პორტზე; შემდეგ ამერიკის სახდეპიდან გაკეთებული ორაზროვანი განცხადება და ა.შ. გერმანიიდან და დიდი ბრიტანეთიდან ახალი სანქციები. მიუხედავად ამისა, ეს მხოლოდ არის განცხადებები. ჯერჯერობით ის მოქმედებები, რასაც დასავლეთიდან ვხედავთ, ხელისუფლებისთვის არ არის იმ დონის დარტყმის მიმყენებელი, რომ არჩევნების დანიშვნა საჭირო გახდეს. ასევე მნიშვნელობა ექნება იმას, თუ უკრაინის ომთან დაკავშირებით მოვლენები როგორ განვითარდება. სწორედ ამის შესაბამისად იმოქმედებს ივანიშვილიც“, - ამბობს ძაბირაძე.

მისივე თქმით, ასევე ბევრი რამ ამერიკის ახალი ადმინისტრაციის განცხადებაზე და მოქმედებაზე იქნება დამოკიდებული. რა სახის პოლიტიკას აირჩევს საქართველოს ხელისუფლებასთან მიმართებაში.

„ოცნება“ ამ ნაბიჯს გადადგამს იმ შემთხვევაში, თუკი დასავლეთიდან ეს განცხადებები მოქმედებაში გამოიხატება. ვგულისხმობ უკვე ძალიან რთულ ფორმებს, როცა ვიზალიბერალიზაციის შეჩერებაზე წავა საუბარი და ქვეყნის მართლა უკვე იზოლაციაზე მიდგება საქმე. ივანიშვილმა დასავლეთიდან ახალი არჩევნების დანიშვნის შემთხვევაში ლეგიტიმაცია უნდა მიიღოს, ისე, აბა, არჩევნების დანიშვნა რაში აწყობს?! ასე ხომ ისედაც ხელისუფლებაშია. მეორეც, მე მგონია, რომ ეს საგამოძიებო კომისია და ნაცების აკრძალვის საკითხი რეალობაში არ მოხდება. ეს არის გარკვეული პოლიტიკური მანევრი, რათა საზოგადოებაში მათი საბოლოო დისკრედიტაცია მოხდეს. ოპოზიციური პარტიები თუ არ იქნებიან და ყველას აკრძალავს, მაშინ არჩევნები რაღად უნდა?! ისედაც რთული სიტუაცია აქვს დასავლეთთან და ამაზე ბოლომდე არ წავა. ამიტომ მგონია, რომ ჯერ არჩევნების დანიშვნას არ აპირებს და კიდევ მოვლენების განვითარებას ელოდება“, - ამბობს ძაბირაძე.

რაც შეეხება ოპოზიციის მზაობას, ხვალ რომ არჩევნები დანიშნოს, ძაბირაძე ამბობს, რომ ოპოზიცია ძალიან მძიმე სიტუაციაშია. ამიტომ, ალბათ, არჩევნების დანიშვნა ახლა ყველაზე მეტად მათ არ უნდა აწყობდეთ.

„თუ არჩევნების ისევ ამ მოცემულობით დანიშვნას დასთანხმდებიან, რაც 2024 წლის 26 ოქტომბერს იყო, მაშინ რაღა გაყალბებაზე დავობენ, არ ვიცი. ცესკოს თავმჯდომარე ვინ იქნება, ამასაც რა მნიშვნელობა აქვს, ცესკო კი არ აყალბებს არჩევნებს. არჩევნებისთვის ოპოზიცია თუ არ მოემზადა და ისევ იგივე გააკეთა, რაც 26 ოქტომბერს, საერთოდ წინასაარჩევნო კამპანია არ ჰქონიათ, ახლა რისი იმედი აქვთ? მეორეც, გაერთიანებაზე რომ ლაპარაკობენ, ეს ხომ სისულელეა. ძალიან სხვადასხვაგვარი ამომრჩეველი გვყავს. ჩვენს საზოგადოებაში ნაციონალების ძალიან დიდი მიუღებლობაა. ამიტომ მათთან გაერთიანება ოპოზიციას რას მისცემს? ძალიან ბევრი პრობლემის წინაშე დგანან და არ ვიცი, როგორ უნდა მოემზადონ თუკი ახალი არჩევნები დაინიშნა“, - ამბობს ძაბირაძე.

ანალიტიკოსი რამაზ საყვარელიძე კი for.ge-თან ფიქრობს, რომ ხელისუფლებაში მიმდინარე საკადრო ცვლილებები საერთოდ არანაირ კავშირში არჩევნების დანიშვნასთან არ არის. მეორეც, როცა ხელისუფლება თითქმის ფონს გავიდა და იმაზე ძლიერ დარტყმებს გაუძლო დასავლეთიდან ვიდრე ახლაა, რატომ უნდა დანიშნოს ახალი არჩევნები გაუგებარია.

„იმ ფონზე, როცა ქვეყნის შიგნით აქციებიც მინელდა, ოპოზიცია უმძიმეს სიტუაციაშია და ერთმანეთთან არიან დაპირისპირებულები, რამ უნდა აიძულოს ხელისუფლება, რომ ახალი არჩევნები დანიშნოს? კი ბატონო, ისიც ლოგიკურია, რომ ამ ფონზე დანიშნოს და იმაზე უკეთესი შედეგით მოუგოს ოპოზიციას, ვიდრე 2024 წლის არჩევნებისთვის, თუმცა ეს ხომ იმის აღიარება გამოვა, რომ არჩევნები გაყალბდა?! მეორე მხრივ გამოვა, რომ „ოცნებამ“ ვერ შეძლო საკუთარი ამომრჩევლების ხმების დაცვა. ეს ხომ მის ამომრჩეველს გააბრაზებს, რა გარანტიაა, რომ გაბრაზებული ისევ მივა მისთვის ხმის მისაცემად? ამიტომ ამაში ლოგიკას ვერ ვხედავ. კარგი, დავუშვათ, დასავლეთიდან დაიწყო ისევ ზეწოლა და მცდელობა იმის, რომ ხელისუფლება გატეხონ, ამაზე დიდი ზეწოლა არ იყო მანამდე, არჩევნების წინ? მით უმეტეს, პირდაპირ მუქარა და კანდიდატის სტატუსით შანტაჟი მიდიოდა. როცა ხელისუფლებამ ამ ყველაფერს გაუძლო, მაშინ რაღატომ წავა ამ ნაბიჯზე? მით უმეტეს ამერიკაში სრულიად შეიცვალა ადმინისტრაციის პოლიტიკა. კი ბატონო, ჯერ არ ჩანს საქართველოსთან დაკავშირებით მკვეთრი პოლიტიკა, მაგრამ პატარ-პატარა ნაბიჯების გადადგმას ხომ ვხედავთ. ამიტომ მე არ ველი რომ „ოცნება“ ამ გადაწყვეტილებას მიიღებს“, - ამბობს საყვარელიძე.