თბილისის მეტროს 2 ახალი სადგური შეემატება, სადგური „ვარკეთილი“ სექტემბრამდე გარემონტდება, ხოლო 12 მეტროსადგურის რეაბილიტაცია მომდევნო წლიდან დაიწყება. ერთი სიტყვით, მიწისქვეშეთში დიდი მუშაობაა გაჩაღებული, რამაც მიწის ზევით ადგილობრივ არჩევნებზე უნდა მოახდინოს გავლენა.

თბილისის სატრანსპორტო კომპანიამ მეტროს პირველი ხაზის 5 კილომეტრით დაგრძელების და ახალი სადგურების მშენებლობის მიზნით საერთაშორისო ფასების მოკვლევა გამოაცხადა. ამის შესაბამისი განაცხადი სახელმწიფო შესყიდვების სააგენტოს ვებ-გვერდზე უკვე გამოქვეყნდა. ფასების გამოკვლევით უნდა დადგინდეს თუ რამდენი ასეული მილიონი დოლარი დაჯდება აღნიშნული პროექტი.

წარდგენილი აღწერის თანახმად, შესყიდვის ობიექტს წარმოადგენს თბილისში, მეტროპოლიტენის პირველი ხაზის გაგრძელების მიზნით გლდანის და ვარკეთილის მიმართულებებით ახალი სადგურების საპროექტო-სახარჯთაღრიცხვო დოკუმენტაციის შედგენა და სამშენებლო სამუშაოები შესყიდვა ე.წ. დაპროექტება-მშენებლობის მეთოდით. ეს კი ნიშნავს, რომ დაინტერესებულმა კომპანიამ უნდა უზრუნველყოს როგორც სადგურების დიზაინის შექმნა, ასევე მათი სამშენებლო სამუშაოების ჩატარებაც.

მეტროს ხაზის პერსპექტიული დაგრძელების ჯამური სავარაუდო სიგრძე 5,2 კმ-ია, გლდანის მიმართულება - 2,2 კმ; ვარკეთილის მიმართულება - 3 კმ.

პროექტის ფარგლებში ასაშენებელია ორი სადგური. გლდანის მიმართულებით - ერთ სადგური, ვარკეთილის მიმართულებით - ერთი სადგური.

ფასების გამოკვლევის დასრულების ვადად 2025 წლის 1-ლი მაისი არის მითითებული.

თბილისის სატრანსპორტო კომპანიის გენერალური დირექტორის გიორგი შარკოვის განცხადებით, მეტროსადგურების ქსელის გაფართოება ხელს შეუწყობს ბოლო სადგურების განტვირთვას.

„ქალაქი ვითარდება, ხოლო მეტრო კომუნისტების დროსაა აშენებული და ის მორგებული იყო, იმ პერიოდში იმ განაშენიანებაზე, რაც მაშინ დაგეგმილი იყო. შესაბამისად, მარტივად რომ გადავხედოთ იგივე გლდანს ან ვარკეთილს, მეტროების ბოლო სადგურები ისედაც გადატვირთულია. გარდა ამისა, უშუალოდ ეს სადგურები დასახლების თავშია და მთელი ნაკადი მოედინება ბოლო სადგურებზე. სტატისტიკასაც რომ გადავხედოთ, მარტივი განსასაზღვრია, რომ ყველაზე გადატვირთული სწორედ, ეს ბოლო სადგურებია. შესაბამისად, ეს დაგრძელებები ხელს შეუწყობს ბოლო განტვირთვას. გარდა ამისა, რა თქმა უნდა, კომფორტი და მომსახურების ხარისხი მგზავრებისთვის გაიზრდება.

რაც შეეხება ახალ სადგურებს, ადგილები ჩვენს მიერ კონცეპტუალურად შერჩეულია, მაგრამ რა თქმა უნდა, ისევ და ისევ დეტალური პროექტირების ეტაპზე განისაზღვრება, ეს სადგურები სად გაკეთდება, შესაბამისად, ამ სადგურების ამოსასვლელები, ამ ეტაპზე ნაადრევია ამ თემაზე საუბარი“, - განაცხადა შარკოვმა.

მისივე თქმით, ბაზრის კვლევა აჩვენებს, თბილისის მერიას მიწისქვეშა განლაგების მშენებლობა რა დაუჯდება.

„ბოლო სამი-ოთხი წლის წინ მოძიებული ფასებით, 1 კილომეტრი ხაზის მშენებლობა მიწისქვეშა განლაგების 60-დან 100 მილიონ დოლარამდე ჯდებოდა… ჩვენი პროექტის შემთხვევაში ბაზრის კვლევა აჩვენებს, მაგრამ ჩვენ 1 კილომეტრის ხაზის მშენებლობას 70-80 მილიონი დოლარის ფარგლებში ვვარაუდობთ“, - განაცხადა შარკოვმა.

ამასთან, მან 12-ვე მეტროსადგურის მოდერნიზებასთან დაკავშირებით ისაუბრა. მერია იმედოვნებს, რომ სამუშაოებზე და დეტალურ პროექტირებაზე შემდეგი წლის დასაწყისში ხელშეკრულებას დადებენ.

„12 მეტროსადგურის რეაბილიტაცია არის დაგეგმილი. ამასთან, დარჩენილ სადგურებზე სარეაბილიტაციო სამუშაოების პროექტირების მომზადება იგეგმება. ჩვენ სამუშაოების ხანგრძლივობას ვვარაუდობთ დაახლოებით ხუთი წლის განმავლობაში, იმიტომ, რომ ხვდებით, რომ 12-ვე მეტროსადგურს ერთად ვერ დავიწყებთ, იმიტომ, რომ გარკვეულ ეტაპზე შესაძლებელია სადგურების დაკეტვის საჭიროება გახდეს. აქედან გამომდინარე, უნდა წარმოგვიდგინონ გეგმა, რომლის მიხედვითაც ეტაპობრივად მოხდება, ამ სადგურების რეაბილიტაცია, რომ მგზავრობა და მგზავრების შეფერხება მაქსიმალურად მინიმუმამდე დავიყვანოთ”, - აღნიშნა მან.

ამასობაში კი მეტროსადგურ „ვარკეთილის“ სარეაბილიტაციო სამუშაოების მოკლე ვადაში დასასრულებლად ხელშეკრულება შესაბამის უცხოურ კომპანიასთან გაფორმდა. მეტროსადგურის რეაბილიტაციის პროცესის შეფერხების მიზეზებსა და მიმდინარე სამუშაოებზე თბილისის მერმა, კახა კალაძემ დედაქალაქის მთავრობის სხდომაზე ისაუბრა.

„ჩვენ არასდროს ვერიდებით პრობლემებზე საუბარს, ამიტომ მინდა, ერთ საკითხზე მოგაწოდოთ ინფორმაცია, თუ რა ეტაპზე ვართ. მხედველობაში მაქვს მეტროსადგურ „ვარკეთილის“ რეაბილიტაცია, რომლის მოსაცდელ ბაქანზე ჭერი ჯერ კიდევ 2018 წელს ჩამოიშალა. მიუხედავად იმისა, რომ მუნიციპალიტეტმა სადგურის რეაბილიტაციისთვის აუცილებელი ღონისძიებების დაგეგმვა დაუყოვნებლივ დაიწყო, აღნიშნული საკითხი ჯერ კიდევ მოუგვარებელია.

პროცესის გაჭიანურების მთავარ მიზეზს წარმოადგენს მიწისქვეშა ტრანსპორტის სფეროში, როგორც ადგილობრივი საპროექტო და სამშენებლო, ისე საექსპერტო კომპანიების არასაკმარისი გამოცდილება და კვალიფიკაცია. აღნიშნულის გათვალისწინებით ადგილობრივი კომპანიები ამ პროექტში მონაწილეობას თავს არიდებდნენ. იყო შემთხვევები, როდესაც გამოგვიცხადებია ტენდერი და კომპანიები არ იღებდნენ მასში მონაწილეობას“, - განაცხადა კალაძემ.

მისივე თქმით, პირველად შერჩეულმა სამშენებლო კომპანია „მამისონმა“ ვერ შეასრულა დაკისრებული ვალდებულებები, რის გამოც მასთან ხელშეკრულება შეწყდა.

„მეტროსადგურ „ვარკეთილის“ სარეაბილიტაციო სამუშაოების მოკლე ვადაში დასასრულებლად უკვე გაფორმდა ხელშეკრულება ბელარუსულ კომპანიასთან, შპს „პრობილდ ექსპერტთან“ და მიმდინარეობს რკინაბეტონის კონსტრუქციების სრული კვლევა, ასევე, აღდგენის პროექტის მომზადება“, - დასძინა ქალაქის მერმა.

მეტროსადგურ „ვარკეთილის“ რეაბილიტაციის პროექტის დასრულება მიმდინარე წლის სექტემბერშია დაგეგმილი.