მმართველი პარტიის ოპონენტების აზრით, ქვეყნის აღმასრულებელ ხელისუფლებაში განხორციელებული ცვლილებებით, რეალურად არაფერი იცვლება. თუმცა, ამ ცვლილებებს „ცოტა ზემოდან“ და იქედნურად სწორედ ის პოლიტიკოსები აფასებენ, რომლებიც 2024 წლის ნოემბრის საპარლამენტო არჩევნებში მწარედ დამარცხდნენ. ოღონდ, საინტერესო ის არის, რომ მარცხის მიზეზი საკუთარ თავში კი არ მოძებნეს, არჩევნების გაყალბებისა და პოლიტიკური კურსის ცვლილების ბრალდებით, ხელისუფლებას დაუპირისპირდნენ და „პერმანენტული, უწყვეტი აქციების“ სახით, ლამის სახელმწიფო გადატრიალება მოაწყვეს...

აი, ეს დამარცხებული პოლიტოკოსები და მათი გულმხურვალე გულშემატკივრები - არასამთავრობო ორგანიზაციების წარმომადგენლები, თუ ექსპერტ-ანალიტიკოსები, რომლებსაც გაყალბებული არჩევნების ოფიციალური მტკიცებულებებიც კი არ აქვთ, ღია ტექსტით, პირდაპირ აცხადებენ, რომ ინფრასტრუქტურისა და რეგიონული განვითარების სამინისტროს გაყოფა, ასევე სუს-ის ყოფილი უფროსის - გიორგი ლილუაშვილის რეგიონული განვითარების მინისტრად, მის ადგილზე კი იუსტიციის ყოფილი მინისტრის - ანრი ოხანაშვილის, ხოლო ამ უკანასკნელის პოზიციაზე ანუ იუსტიციის მინისტრად „ქართული ოცნების“ დეპუტატის - პაატა სალიას წარდგენა მხოლოდ და მხოლოდ შესაკრებ რიცხვთა გადანაცვლებაა, რომლითაც ჯამი არ იცვლება.

სინამდვილეში, რას ნიშნავს ეს ცვლილება და უნდა ველოდოთ თუ არა სხვა ცვლილებებსაც აღმასრულებელ ხელისუფლებაში? რატომ იყო აუცილებელი ინფრასტრუქტურისა და რეგიონული სამინისტროს გაყოფა? For.ge-ს სტუმარია „ქართული ოცნების“ დეპუტატი, საპარლამენტო პოლიტიკური ჯგუფის - „ხალხის ძალა“ თავმჯდომარის მოადგილე, ეკა სეფაშვილი.

ქალბატონო ეკა, რას ნიშნავს ეს ცვლილებები, რას უნდა ველოდოთ ამ გადანაცვლებით?

- ამას გადანაცვლებას ვერ ვუწოდებთ, პირიქით, ვფიქრობ, ეს ცვლილება განხორციელდა ახალი რეალობის შესაბამისად. ჩემი აზრით, ეს უფრო გაზრდის მთავრობის ეფექტიანობას და ამას იქიდან გამომდინარე გეუბნებით, რომ ბატონი გიორგი ლილუაშვილის მიერ, სუს-ის ხელმძღვანელობა იყო წარმატებული. ვგულისხმობ იმას, რომ ბოლო სამი წლის განმავლობაში გადავიტანეთ ძალიან მნიშვნელოვანი საფრთხეები ისე, რომ ქვეყანა არ დაზიანებულა და ეს მისი უწყების დამსახურებაა. ბატონი გრიშა ძალიან ეფექტიანი ხელმძღვანელია, მაგრამ გარდა ამისა, ის ადრე, მე-9 მოწვევის პარლამენტში, თვითმმართველობის კომიტეტსაც ხელმძღვანელობდა, რაც პირდაპირ კავშირშია რეგიონულ მმართველობასთან. შესაბამისად, ამ სამინისტროს გაყოფა კარგიცაა, რადგან ორი, უზარმაზარი დარგი - ინფრასტრუქტურა და რეგიონული მმართველობა იყო ერთ სამინისტროში გაერთიანებული. არ ვამბობ იმას, რომ იქ რაღაც ფუჭდებოდა, მაგრამ ყურადღების ცალ-ცალკე გადანაწილება, ვფიქრობ, ცუდი არ იქნება. მით უმეტეს, თუ გავითვალისწინებთ იმას, რომ რეგიონებმა უნდა გაზარდონ საკუთარი დამოუკიდებლობა, უფრო მეტად ადგილებზე უნდა იყოს გადაწყვეტილებები მიღებული - დეცენტრალიზაციის პოლიტიკის ფარგლებში, ვფიქრობ, ძალიან სწორი ნაბიჯია სამინისტროს გაყოფა.

რაც შეეხება ანრი ოხანაშვილსა და პაატა სალიას, ორივე მათგანს ვაფასებ, როგორც პროფესიონალებს. ასე რომ, მათი დანიშვნა ამ თანამდებობზე სწორი და ეფექტიანი იქნება.

თქვენი ოპონენტები დაუფარავად აცხადებენ და ამას სოციალურ ქსელებშიც აფიქსირებენ, რომ სუს-ის ხელმძღვანელად პოლიტიკოსის, ანრი ოხანაშვილის დანიშვნით, ხელისუფლებამ ეს უწყება პარტიულ დანამატად გადააქცია. არის სხვა მოსაზრებაც, რაც შედარებით ლოგიკურია, რომ ამ ცვლილებებით, „ქართული ოცნება“ ადგილობრივი თვითმმართველობის არჩევნებისთვის სერიოზულად ემზადება. თქვენ როგორ ფიქრობთ?

- თქვენი კითხვის პირველი ნაწილი, სუს-ი რომ პარტიულ დანამატად გადაიქცევა, ძალიან უსუსური არგუმენტი მგონია, რადგან „ქართულმა ოცნებამ“ გაიმარჯვა არჩევნებში და, რა თქმა უნდა, მთავრობასაც ის დააკომპლექტებს! ეს ჩვეულებრივი, დემოკრატიული მიდგომაა და ნებისმიერ ქვეყანაში ასე ხდება - რომელი პარტიაც იმარჯვებს, ის აკომპლექტებს აღმასრულებელ ხელისუფლებასაც. ანრი ოხანაშვილამდე, გრიგოლ ლილუაშვილიც პარლამენტარი იყო. ასე რომ, გარდა პროფესიონალიზმისა, პოლიტიკური ხედვაც უნდა გააჩნდეს ადამიანს, რომელიც ამ უწყებას უხელმძღვანელებს. თუმცა, კიდევ ერთხელ გიმეორებთ - ანრი ოხანაშვილიც და გრიგოლ ლილუაშვილიც - ორივე მათგანი ქვეყნის პატრიოტები არიან. ეს არის მთავარი და ქვეყნისთვის სწორი გადაწყვეტილება, აღარაფერს ვამბობ მათ პროფესიონალიზმზე, რომელიც ისედაც ყვეელასთვის ცხადია.

რაც შეეხება მეორე მოსაზრებას, რომ „ქართული ოცნება“ ემზადება თვითმმართველობის არჩევნებისთვის, მე ვფიქრობ, ეს მოსაზრება გამოწვეულია მათი (ოპოზიციის) მარცხის წინასწარი აღიარებით. ისინი ამომრჩევლებთან არ მუშაობენ, არ ესაუბრებიან არც პრობლემებზე, არც პერსპექტივებზე და ახლა, ამ მოსაზრებით, საკუთარ მარცხს ამართლებენ წინასწარ.

აქვე, საინტერესოა, რეგიონულ მმართველობაში სუს-ის მმართველობა როგორ უნდა გადავიდეს? ვისაც ზოგადი წარმოდგენა მაინც აქვს, როგორ ფიქრობს, იქ სუს-ის მმართველობის მეთოდები როგორ უნდა გადავიდეს? სუს-ში აბსოლუტურად განსხვავებული წესებია, ადგილობრივ თვითმმართველობაში - რადიკალურად განსხვავებული და როგორ უნდა გადავიდეს სუს-ის მმართველობა იქეთ, ვერ ვხვდები. ამიტომ, ეს არგუმენტიც უსუსურია და ესეც ოპოზიციის თავისმართლება მგონია. ახლაც, 2024 წლის საპარლამენტო არჩევნები წააგეს იმიტომ, რომ მთელი საარჩევნო კამპანია აგებული იყო უცხოეთში გაკეთებულ განცხადებებზე. ეს იყო მათი დღის წესრიგიც, რომელმა უცხოელმა პოლიტიკოსმა რა თქვა კონკრეტულ დღეს და დედა, რა საშინელება იყო ის, რაც თქვა. ოპოზიცია რეგიონებში არც გასულა და სწორედ ამიტომაც იყო წინასაარჩევნო და არჩევნების პერიოდიც მშვიდი. ასე რომ, ოპოზიციას საკუთარი უსუსურობისა და უნიათობის სხვებზე გადაბრალება სურს.

ქალბატონო ეკა, ინტერვიუს დასაწყისში, სამინისტროს გაყოფა ახსენეთ და შეგნებულად არ შეგაწყვეტინეთ საუბარი. თქვენ იცით, რომ წლებია, ეკონომიკასა და ბიზნესს ვაშუქებ და პირდაპირ, დაუფარავად გეტყვით, რომ თავის დროზე, ნაციონალური მოძრაობის ხელისუფლებაში ყოფნის დროს, ეკონომიკის სამინისტრო მიზანმიმართულად „გამოშიგნეს“, გამოაცალეს ინფრასტრუქტურა - ტრანსპორტის, გზების დეპარტამენტი და რეგიონული განვითარების სამინისტროს შეუერთეს ანუ „მონსტრი“ სამინისტრო სპეციალურად შეუქმნეს მაშინდელ მინისტრს, რამაზ ნიკოლეიშვილს... არ დაგიმალავთ, 2012 წლის 1 ოქტომბრის საპარლამენტო არჩევნებში გამარჯვებისა და ხელისუფლებაში „ქართული ოცნების“ მოსვლის შემდეგ, ველოდებოდი ამ სამინისტროს გაყოფას, რაც აბსოლუტურად სწორი და ლოგიკური გადაწყვეტილება მგონია.

- დიახ, ეს არის ორი, დიდი თემა. ინფრასტრუქტურის განვითარება ქვეყნის მასშტაბით და რეგიონული მმართველობის განვითარება. ამიტომ, ლოგიკურია, რომ დღეს ეს სამინისტრო გაყოფილია. რეგიონული თვითმმართველობა მხოლოდ ინფრასტრუქტურა არ არის და მას ცალკე, დიდი ყურადღება სჭირდება, ეს გაცილებით მეტია და ეხება ადგილობრივ რეგიონებში მცხოვრები მოსახლეობის ცხოვრების გაუმჯობესებას, არა მარტო ინფრასტრუქტურის განვითარების თვალსაზრისით - ეს არის მათი კულტურული ცხოვრება, განათლება, ახალგაზრდობის საქმე, დასაქმება, თვითონ რეგიონის განვითარების პერსპექტივები. როგორც ხედავთ, გაცილებით ფართო და ვრცელი თემაა, ამიტომ მისი ცალკე გამოყოფა კიდევ უფრო ხაზს უსვამს ადგილობრივი ხელისუფლების განვითარებას, ზოგადად, ქვეყნის განვითარების კონტექსტში.

რა თქმა უნდა, ინფრასტრუქტურა მთელი ქვეყნის მასშტაბით უნდა განვითარდეს, მაგრამ, როდესაც ვხედავთ, რომ დაცლილია სოფლები და ხალხი უმეტესად მიდის ქალაქებში საცხოვრებლად, ერთ-ერთი მიზეზი ის არის, რომ რეგიონულ განვითარებას სჭირდება გაცილებით მეტი ხელშეწყობა. ამას წლების მანძილზე აკეთებდა „ქართული ოცნება“, იგივე, რეგიონული განვითარების ფონდი არსებობს, რეგიონების განვითარების პროგრამა, მაგრამ თუ ამას განსაკუთრებული ყურადღება დაეთმობა იმ თვალსაზრისით, რომ ცალკე სამინისტროს სახით იქნება, რომელსაც განსაკუთრებული ყურადღება მიექცევა თვითმმართველობის განვითარების მხრივაც, რაც დემოკრატიის გაძლიერებასაც გულისხმობს და ამაში ცუდი არაფერია. პირიქით, ქვეყნის ეკნომიკური და დემოკრატიული განვითარების ხელშეწყობისკენ გადადგმული, ძალიან მნიშვნელოვანი ნაბიჯია.

დაბოლოს, კიდევ უნდა ველოდოთ თუ არა ცვლილებებს აღმასრულებელ ხელისუფლებაში?

- ამის შესახებ ინფორმაცია არ მაქვს, მაგრამ გამორიცხული არაფერი არ არის.