„ქართული ოცნება“ კომისიაზე დაბარებულ ყველა პირს  კიდევ ერთხელ ახსენებს, რომ საგამოძიებო კომისიის მოთხოვნის შეუსრულებლობა სისხლის სამართლის დანაშაულია, მათი არგუმენტები პოლიტიკურ დევნაზე, აბსურდული და საზოგადოების შეცდომაში შეყვანის მიზანმიმართული მცდელობაა.

პარლამენტის საგამოძიებო კომისიაზე დაბარებულები არიან კოალიცია „ცვლილებისთვის“ ლიდერები. ნიკა გვარამია და ზურა გირჩი ჯაფარიძე საკანონმდებლო ორგანოში მისვლას არ აპირებენ.

ხოლო ის პირები, რომლებიც დაბარებულები იყვნენ და არ გამოცხადდნენ, მათ ბრალდება სისხლის სამართლის კოდექსით წარედგინათ. მამუკა ხაზარაძე საქართველოს პარლამენტის დროებითი საგამოძიებო კომისიის სხდომაზე 25 მარტს ახსნა-განმარტებისთვის იყო დაბარებული, სადაც ის არ გამოცხადდა. აღნიშნულის შემდეგ, ხაზარაძემ ჩვენება მაგისტრატი მოსამართლის წინაშე მისცა.

მამუკა ხაზარაძეს ბრალდება სისხლის სამართლის კოდექსის 349-ე მუხლით წარედგინა, რაც „საქართველოს პარლამენტის დროებითი საგამოძიებო კომისიის მოთხოვნის შეუსრულებლობას“ გულისხმობს. აღნიშნული ქმედება ისჯება ჯარიმით ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.

მამუკა ხაზარაძეს 50 000-ლარიანი გირაო დროებით საგამოძიებო კომისიასთან თანამშრომლობაზე უარის გამო შეეფარდა. გადაწყვეტილება მოსამართლე არსენ კალატოზიშვილმა გამოაცხადა და სრულად გაიზიარა პროკურატურის შუამდგომლობა, რომელიც ხაზარაძისთვის გირაოს გამოყენებას ითხოვდა.

სასამართლოს გადაწყვეტილებას სხდომათა დარბაზში ისმენდა ბრალდებული მამუკა ხაზარაძე. „ლელოს“ ლიდერი პროცესზე ცდილობდა აეხსნა, რატომ აარიდა თავი საგამოძიებო კომისიასთან თანამშრომლობას. მამუკა ხაზარაძეს თავის მართლება ბიზნესის რეკეტის საქმეზეც მოუწია.

მოსამართლემ მამუკა ხაზარაძეს გირაოს გადასახდელად 30-დღიანი ვადა განუსაზღვრა. „ლელოს“ ლიდერი ამბობს, რომ ჯერ გადაწყვეტილი არ აქვს, გადაიხდის თუ არა სასამართლოს მიერ დაკისრებულ გირაოს.

საგამოძიებო კომისიასთან თანამშრომლობაზე უარის გამო, 2 აპრილს, დღის ბოლოს სასამართლოში ბადრი ჯაფარიძე მივიდა. ის მაგისტრი მოსამართლის თანდასწრებით გამოჰკითხეს. „ლელოს“ ლიდერი საგამოძიებო კომისიის სხდომაზე შპს „მაგნატის“ საქმეზე იყო დაბარებული, რომლის მფლობელი ჯაფარიძეს ხაზარაძესთან და წინა ხელისუფლების მაღალჩინოსნებთან ერთად ბიზნესის რეკეტში ადანაშაულებს. ჯაფარიძე პარლამენტში არ მივიდა, რის შემდეგაც საქმე პროკურატურას გადაეცა.

2 აპრილსვე, მაგისტრი მოსამართლის წინაშე გამოიკითხა ყოფილი თავდაცვის მინისტრი ირაკლი ოქრუაშვილიც. სასამართლოში მისვლის მიზეზი, ამ შემთხვევაშიც, საგამოძიებო კომისიასთან თანამშრომლობაზე მისი უარი გახდა. ირაკლი ოქრუაშვილი 26 მარტს პარლამენტში აგვისტოს ომთან დაკავშირებით იყო დაბარებული, თუმცა თავდაცვის მაშინდელი მინისტრი კომისიაზე არ გამოცხადდა.

„ხალხის ძალის“ წევრი ზურაბ ქადაგიძე for.ge-თან ამბობს, რომ არაფერ შუაშია აქ ლეგიტიმური და არალეგიტიმური პარლამენტი. მისი თქმით, ამ ადამიანებს, რომლებიც საგამოძიებო კომისიაზე არ გამოცხადდნენ, იმდენი სიბინძურე აქვთ ჩადენილი, რომ მისი აფიშირების ეშინიათ.

„საგამოძიებო კომისიაზე რომ მივიდნენ, ჩუმად ხომ არ ისხდებიან, დუმილის რეჟიმში. ძალაუნებურად, კითხვებზე პასუხის გაცემა მოუწევთ. ამ დროს კი, შესაძლოა, სიმართლე წამოსცდეთ და ეს არაფრით არ აწყობთ. ვნახეთ ეს განსაკუთრებით გენერლების მაგალითზე, როგორ ღიად თქვეს ბოლოს, რომ ხალხი რუსებს შეატოვეს და 2008 წელს მოსახლეობის ევაკუაცია არ მოახდინეს. ბევრი რამ აღიარეს კიდევ. ეს ხომ დაინახეს ამ ადამიანებმა და ახლა შეშინებულები არიან. რომ მივიდნენ, ვაითუ უარესი იყოს, ვიდრე სასამართლო და ჯარიმაა. წარმოიდგინეთ, ხაზარაძეს როგორ ეშინია კომისიის, რომ მზად არის 50 ათასი გირაოც კი გადაიხადოს, ოღონდ იქ არ მივიდეს. როცა არაფერში ხარ დამნაშავე, მიდი და თქვი ის, რაც იყო, პირიქით, ხომ უნდა გამოიყენო იმისთვის რომ ხალხი შენს სიმართლეში დაარწმუნო?! ხაზარაძეზე იმდენი სხვადასხვა საქმე და მომჩივნები არსებობენ, მას რომ ნამუსი ჰქონდეს, ამ კითხვებზე პასუხების გაცემა მის ინტერესშიც უნდა იყოს. კაცს ედავებიან, რომ ციხეებში მყოფი ბიზნესმენებისგან ქონებას ღამე იფორმებდიო და ამაზე პასუხის გაცემა არ უნდა. ფულს იხდის, ოღონდ არ ილაპარაკოს, რომ „მართალია“. ხაზარაძე და სხვებიც, ვერ გაექცევიან ამ კითხვებს, მათ ამაზე პასუხის გაცემა მოუწევთ“, - ამბობს ქადაგიძე.

მისივე თქმით, სამწუხაროდ, ეს არის ზღვაში წვეთი და საგამოძიებო კომისიის მიერ განხილული საქმეების გარდა, ათასობით დანაშაულზეა საუბარი. ქადაგიძის თქმით, ეს ადამიანები სისტემას ქმნიდნენ, როგორ დაერეკეტებინათ ბიზნესმენები.

„გიორგი ზერეკიძის საქმე არის ყველაზე სულის შემძვრელი, როცა 14 წლის ბავშვს და მის ოჯახს ცხოვრება ჯოჯოხეთად უქციეს, მთელი სისტემა, როგორ ებრძოდა არასრულწლოვან მოზარდს. რატიანების ქეისი, სადაც აქციის მონაწილეებისთვის საჭმლის მიტანის გამო მთელი ოჯახი გაანადგურეს, ყველაფერი წაართვეს, რაც კი გააჩნდათ. ომის თემაზე ხომ უდიდესი დანაშაულია ჩადენილი, როცა მოსახლეობა არ გამოიყვანეს და რუსებს შეატოვეს. ასევე, - ჯარის არასწორი მართვა და დანაშაულებრივი ბრძანების გაცემა, რამაც ჩვენი სამხედროების სიცოცხლე იმსხვერპლა. ამათ, უნდათ თუ არა, პასუხის გაცემა მაინც მოუწევთ. თეა წულუკიანია ადამიანი, რომელიც სისტემას ღიად ამხელს, საზოგადოებას დეტალურად აჩვენებს, სინამდვილეში რისი მკადრებელი და ჩამდენია ეს ხალხი.

მეტი ზიანი ამ ხალხმა რაღა უნდა მიიღოს. რადიკალური ოპოზიციის ამომრჩევლის რაღაცა პროცენტია მხარდამჭერი, დანარჩენი ხომ ამას უსმენს და მშვენივრად აანალიზებს რაზეა საუბარი. ხაზარაძეს ვერანაირი 50 ათასი ვეღარ უშველის. მან ერთხელ და სამუდამოდ, ნება უნდა იბოძოს და გასცეს კითხვებს პასუხი. მათივე ამომრჩეველი ხომ უყურებს ამათ უპრინციპობას, როცა ალეკო ელისაშვილი 2 წლის წინ ხაზარაძეს პირდაპირ ეთერში აგინებდა და ციხეში გადაფორმებული წილების გამო პასუხის სთხოვდა. შემდეგ კი ის ხაზარაძემ იყიდა და ასეთი პოლიტიკოსების მიმართ ნდობა ვის შეიძლება ჰქონდეს? კარგია, მათი ლუსტრაცია ხდება“, - ამბობს ქადაგიძე.