საკადრო ცვლილება, რომლის შესახებ სამთავრობო კულუარებში საუბრობდნენ, ოფიციალურად გამოცხადდა. ამ ცვლილებით იზრდება რეგიონების გავლენები და გაზრდილი სახელმწიფო ბიუჯეტის გათვალისწინებით, ეს მოსალოდნელიც იყო. მთავრობის გადაწყვეტილებით რეგიონული განვითარების სამინისტრო დამოუკიდებელ სამინისტროდ ჩამოყალიბდება, რომელსაც სუს-ის ყოფილი უფროსი გრიგოლ ლილუაშვილი უხელმძღვანელებს, რომელსაც უფლებამოსილების ვადა ოქტრომბერში ეწურებოდა.

მთავრობის მეთაურის განცხადებით, ახალი სამინისტროს ერთ-ერთი უმნიშვნელოვანესი მისია რეგიონულ განვითარებასთან დაკავშირებული ღონისძიებების მაქსიმალური ეფექტიანობისა და ხარჯეფექტიანობის უზრუნველყოფა იქნება. რაც შეეხება სუს-ის უფროსის ხელმძღვანელს, ამ თანამდებობაზე ანრი ოხანაშვილია წარდგენილი, რომელიც იუსტიციის მინისტრის პოსტს იკავებდა. იუსტიციის მინისტრის პოსტზე კი ოხანაშვილს „ქართული ოცნების“ დეპუტატი პაატა სალია შეცვლის.

ამ სამთავრობო ცვლილებამ ყველაზე მეტი კითხვები სწორედ ლილუაშვილის ნაწილში გააჩინა, რომელიც ერთ-ერთი წარმატებული იყო და მისი წარმატებად ითვლება ის ფაქტი, რომ მცდელობისა და დაფინანსების მიუხედავად, საქართველოში სახელმწიფო გადატრიალების ყველა მცდელობა უშედეგოდ დასრულდა.

ლილუაშვილის წარმატებული ოპერაციის შედეგია არაჟნებში დამალული სააკაშვილის დაპატიმრებაც. თუმცა, იყო ჩავარდნაც, კერძოდ, საპარტნიორო ფონდის ყოფილი უფროსის, გიორგი ბაჩიაშვილის ქვეყნიდან გაქცევა. ვრცელდება ინფორმაცია, რომ ბაჩიაშვილის ქვეყნიდან გაქცევა გახდა „ქართული ოცნების“ საპატიო თავმჯდომარის უკმაყოფილების მიზეზი, რატომაც ლილუაშვილს ვადაზე ადრე მოუწია თანამდებობის დატოვება. მიუხედავად იმისა, რომ რეგიონული განვითარების სამინისტრო დამოუკიდებელ სამინისტროდ ჩამოყალიბდება, ეს ცვლილება ადასტურებს, ბევრს აფიქრებინებ, რომ ლილუაშვილი დააქვეითეს.

პრემიერ-მინისტრმა აღნიშნული ცვლილება იმით ახსნა, რომ საქართველოს რეგიონული განვითარების სამინისტრო დამოუკიდებელ სამინისტროდ ჩამოყალიბდება და ახალი სამინისტროს ერთ-ერთი უმნიშვნელოვანესი მისია რეგიონულ განვითარებასთან დაკავშირებული ღონისძიებების მაქსიმალური ეფექტიანობისა და ხარჯეფექტიანობის უზრუნველყოფა იქნება. ირაკლი კობახიძის განცხადებით, ეკონომიკის ზრდასთან ერთად, მნიშვნელოვნად გაიზარდა ადგილობრივი ხელისუფლების ბიუჯეტები, რომელთა ჯამმა, თბილისის გარეშე, 4 მილიარდს გადააჭარბა.

მთავრობის მეთაურის განცხადებით, ეს, ერთი მხრივ, ზრდის ადგილობრივი ხელისუფლების შესაძლებლობას, განახორციელონ საზოგადოებისთვის მნიშვნელოვანი პროექტები, ხოლო, მეორე მხრივ, ზრდის გამოწვევებსაც, რომლებიც შესაბამისი ამოცანების შესრულებასთან არის დაკავშირებული.

„ამდენად, რეგიონული განვითარების ეფექტიან დაგეგმვასა და მონიტორინგს ქვეყნის თანაბარი სოციალ-ეკონომიკური განვითარებისთვის განსაკუთრებული მნიშვნელობა ენიჭება. ახალი სამინისტროს ერთ-ერთი უმნიშვნელოვანესი მისია რეგიონულ განვითარებასთან დაკავშირებული ღონისძიებების მაქსიმალური ეფექტიანობის უზრუნველყოფა იქნება.

გრიგოლ ლილუაშვილი საქართველოს პარლამენტში წლების მანძილზე იკავებდა რეგიონული პოლიტიკისა და თვითმმართველობის კომიტეტის თავმჯდომარის თანამდებობას. ზოგადად, მას აქვს რეგიონებთან მუშაობის გამორჩეული გამოცდილება. შესაბამისად, მისი მინისტრობა უზრუნველყოფს საქართველოს მთავრობის ეფექტიან საქმიანობას რეგიონული განვითარების ამოცანების შესრულებისას“, - განაცხადა ირაკლი კობახიძემ.

რადიკალურ ოპოზიციაში კი თვლიან, რომ სუს-ი ფუნქციონირებას რეგიონული სამინისტროს სახელით გააგრძელებს, რაც დასტურდება იმით, რომ მისი რეალური უფროსიც ისევ ლილუაშვილია. პარტია „გახარია საქართველოსთვის“ თავმჯდომარის მოადგილე, ნათია მეზვრიშვილი სოციალურ ქსელში წერს, რომ აღნიშნული გადაწყვეტილებით, „ქართული ოცნება“ადგილობრივი თვითმმართველობის არჩევნებისთვის ემზადება.

„ოცნების“ ამ გადაწყვეტილებასთან პირდაპირ კავშირშია ასევე, ორი დღის წინ დაანონსებული თითქოსდა, მთავრობის ეფექტიანობის დეპარტამენტის შექმნა, რომლის მიზანი კორუფციის ცენტრალიზებაა და არა ეფექტიანობის უზრუნველყოფა ან კორუფციის წინააღმდეგ ბრძოლა. მთავრობის ადმინისტრაციაში გვქონდა შიდა აუდიტის დეპარტამენტი, რომელიც გენერალური ინსპექციის ფუნქციას ასრულებდა ადმინისტრაციის მასშტაბით. ეს დეპარტამენტი გადაკეთება ე.წ. მთავრობის ეფექტიანობის დეპარტამენტად. ამ ნაბიჯით ივანიშვილი ახდენს კორუფციული გარიგებების როგორც მისი ძალაუფლების წყაროს სრულ მონოპოლიზებას“, - წერს ნათია მეზვრიშვილი.

„ნაციონალური მოძრაობის“ წევრის თინა ბოკუჩავას განცხადებით, რეგიონული განვითარების სამინისტრო, სავარაუდოდ, უფრო მეტი კორუფციული სქემისთვის მზადებაა, რომ მეტი ფული მოპაროს ხალხს ბიძინა ივანიშვილმა და მისმა დანაშაულებრივმა, კრიმინალურმა სინდიკატმა.

„დამერწმუნეთ, რომ დიდხანს ეს სამთავრობო კარუსელი ვერ გასტანს, იმიტომ რომ განაჩენი ქართველ ხალხს უკვე გამოტანილი აქვს, ივანიშვილის კოლაბორაციონისტი, მოღალატე ხელისუფლების მიმართ და ყველა მის მინისტრს, ასევე, თავად ბიძინა ივანიშვილს ქართველი ხალხი ძალაუფლებას ჩამოაშორებს და ქვეყანა ნორმალურ, დემოკრატიულ განვითარების კალაპოტს დაუბრუნდება“, - განაცხადა თინა ბოკუჩავამ.

სამთავრობო ცვლილებებით გამოწვეულ კითხვებს უპასუხა ვიცე-სპიკერმა. გია ვოლსკის განცხადებით, არაადეკვატური შეფასებაა, რომ გრიგოლ ლილუაშვილს დროზე ადრე დაატოვებინეს სუს-ის უფროსის თანამდებობა. მისი თქმით, ადამიანი რომ მინისტრად გადაგყავს და ამას სასჯელს უწოდებ, ძალიან დიდი მონდომებაა საჭირო.

„რასაკვირველია, მართვის სისტემა განახლებას მოითხოვს. მშვენიერი საკადრო შემადგენლობა გვყავს „ქართულ ოცნებას“ - ინტელექტუალური, კარგი ავტორიტეტის, დიდი გამოცდილების მქონე ადამიანები და ძალიან საინტერესო ცვლილებები ხორციელდება. არაადეკვატური შეფასებაა ის, რომ გრიგოლ ლილუაშვილს დროზე ადრე დაატოვებინეს თანამდებობა იმ უშველებელი ამოცანების გათვალისწინებით, რაც ახალ სამინისტროს დაეკისრება.

უშველებელი პასუხისმგებლობა და ძალიან დიდი მოლოდინი, რომ ეს სამინისტრო იქნება ერთ-ერთი ყველაზე ეფექტური და მაღალი მაჩვენებლების სამინისტრო. აქ რომ გადაგყავს ადამიანი მინისტრად და ამას უწოდებ სასჯელს, რასაკვირველია, ძალიან დიდი მონდომებაა ამისათვის საჭირო. იქმნება უწყება, რომელიც იქნება ერთ-ერთი წარმმართავი იმ ვითარების, რომელიც საქართველოში არსებულ ხვალინდელ დღეს განაპირობებს და აქ ადამიანის გადაყვანა სწორედაც პოზიტიურად უნდა შეფასდეს“, - განაცხადა გია ვოლსკიმ.

„ხალხის ძალის“ წევრი გურამ მაჭარაშვილი კი განმარტავს იმ მიზეზებს, რატომ დატოვა დროზე ადრე თანამდებობა ლილუაშვილმა. დეპუტატი ამბობს, რომ სუს-ის ხელმძღვანელს უფლებამოსილების ვადა წელს ეწურებოდა და კანონის თანახმად, პრემიერს აღარ შეეძლო, ამ თანამდებობაზე მისი კანდიდატურა ხელახლა წარმოედგინა.

„გადაწყდა, რომ რეგიონული განვითარების სამინისტრო შეიქმნება. ეს კარგი გადაწყვეტილება იმითაც არის, რომ ინფრასტრუქტურა მაინც სხვა სფეროა. კარგია, თუ რეგიონული განვითარების სამინისტრო ცალკე იქნება და ისეთი გამოცდილების მქონე ადამიანი, როგორიც გახლავთ ბატონი გრიგოლ ლილუაშვილი, ამ სამინისტროს სათავეში ჩაუდგება. ეს საქმეს ორმაგად წაადგება რეგიონულ განვითარებასაც და ზოგადად იმ სფეროს, რომელიც რეგიონული განვითარებისთვის არსებობს.

ჩვენ და ქართული საზოგადოებაც, დიდი ხანია, არანაირ მნიშვნელობას აღარ ვანიჭებთ, „კოლექტიური ნაცმოძრაობა“ რას იტყვის. ერთი მხრივ, შეიძლება იუმორით შეხედო ამ აურზაურს. ერთმანეთში თვითონ ვერ გაურკვევიათ, ერთი მიტინგი ვერ ჩაუტარებიათ, რომ ყველას ერთიანი პოზიცია ჰქონდეს. არათუ მიტინგი, ერთი შეხვედრა ვერ ჩაუტარებიათ და ასეთი ადამიანებისგან მხოლოდ კომიკურად თუ შეხედავ ამ პროცესს. დანარჩენი, „ნაცმოძრაობის“ თაობაზე საგამოძიებო კომისიაზე ითქმება“, - აღნიშნა გურამ მაჭარაშვილმა.