მას შემდეგ, რაც 31 მარტის აქციაც ჩავარდა, ჯერ სალომე ზურაბიშვილის მიმართ გამოთქვეს უკმაყოფილება, ხოლო შემდეგ ერთმანეთს დაერივნენ. როგორც აღმოჩნდა, ზურაბიშვილმა ოპოზიციის გაერთიანება რამდენიმე მიზეზით ვერ მოახერხა. ერთ-ერთი მიზეზი კოალიცია „ცვლილებებისთვის“ წევრის, ნიკა გვარამიას არაერთგვაროვანი პოზიციაა თვითმმართველობის არჩევნებში მონაწილეობასთან დაკავშირებით. გვარამია აცხადებს, რომ პარტიის „გახარია – საქართველოსთვის“ უარის გამო წინააღმდეგობის პლატფორმის დოკუმენტში რამდენიმე ფუნდამენტურ საკითხზე, მათ შორის ადგილობრივი თვითმმართველობის არჩევნებში მონაწილეობაზე მკაფიო ჩანაწერი არ არის, რაც გაუმართლებელია. თვითმმართველობის არჩევნებში, შესაძლოა, მონაწილეობა „ლელომაც“ მიიღოს, თუმცა, როგორც ცნობილია, მკაფიო პოზიცია ამაზე არც ამ პოლიტიკურ ძალას არ გააჩნია. ოპოზიციაში არსებობს ასეთი მოსაზრებაც, რომ ხელისუფლებას თვითმმართველობის არჩევნებში მონაწილეობა ორ რამეში გაუცვალოს, ე.წ. პოლიტპატიმრების გათავისუფლებაში და პარალელურად, ახალი არჩევნების დანიშვნაში.
მმართველ გუნდში კი ამბობენ, რომ ოპოზიციას თუ რამის თავი აქვს, ოქტომბრის თვითმმართველობის არჩევნებში მონაწილეობა მიიღოს და აჩვენოს ყველას, რა რეიტინგი დარჩათ. მათი თქმით, ოპოზიცია არ არის იმ მდგომარეობაში, რომ ხელისუფლებას ულტიმატუმების ენით ესაუბროს.
გვარამია კი წერს, რომ პარტია „ახალი“ მზადაა, იმოქმედოს კოორდინაციის რეჟიმში ნებისმიერ პროდასავლურ აქტორთან მხოლოდ იმ დათქმით, რომ არ დარჩება არავითარი ბუნდოვანება და სივრცე ინტერპრეტაციისთვის.
„პარტია „ახალი“ ყოველთვის მისცემს შანსს კოორდინაციას და ერთიან ქმედებებს საქართველოს ინტერესებში, მაგრამ ფუნდამენტურ საკითხზე – სრული ართანამშრომლობა რეჟიმთან, მათ შორის: ადგილობრივი თვითმმართველობის არჩევნებში მონაწილეობაზე უარი, არალეგიტიმურ კომისიებში სიარულზე უარი და მსგავს ქმედებებზე ბოიკოტის მკაფიო, ცალსახა მხარდაჭერის გარეშე, მეტიც, შეთანხმებაზე ხელმოწერაზე უარი სწორედ ამ საკითხებზე მკაფიო ჩანაწერის გამო და პრეზიდენტის გადაწყვეტილება, რომ ერთი კონკრეტული პარტიის („გახარია – საქართველოსთვის“) უარის გამო ეს საკითხები საერთოდ არ დაფიქსირებულიყო წინააღმდეგობის პლატფორმის სადამფუძნებლო დოკუმენტში, არ მიგვაჩნია გამართლებულად. პარტია „ახალი“ მზადაა, იმოქმედოს კოორდინაციის რეჟიმში ნებისმიერ პროდასავლურ აქტორთან მხოლოდ იმ დათქმით, რომ არ დარჩება არავითარი ბუნდოვანება და სივრცე ინტერპრეტაციისთვის იმგვარ პოლიტიკურ საკითხებთან დაკავშირებით, რაც პოტენციურად, შესაძლოა, ივანიშვილის რეჟიმის ლეგიტიმაციის საფუძველი გახდეს. ამ საკითხზე „კოალიცია ცვლილებისთვის“ სხვა წევრები თავად გააკეთებენ განმარტებას საკუთარ პოზიციასთან დაკავშირებით“, – წერს ნიკა გვარამია.
„ძირითადი განხეთქილება გამოიწვია სიცხადის დაკარგვამ. ჩვენ გვინდა სიცხადე და ეს სიცხადე შეეხებოდა ადგილობრივი თვითმმართველობის არჩევნებს. ცხადად უნდა ვუთხრათ ამომრჩევლებს, რომ ჩვენ, გაერთიანებულად, ვინც სალომე ზურაბიშვილის გარშემო არის და პროდასავლურ ძალად მოიაზრებს თავს, ბოიკოტს უცხადებს ადგილობრივი თვითმმართველობის არჩევნებს. გუშინდელი აქცია სწორედ ამიტომ ვერ შედგა. პროცესი ჩავარდა და ჩავარდა სწორედ ამიტომ, რომ თუ სალომე ზურაბიშვილი არ აცხადებს იმას, რაც ჩვენი მოთხოვნაა, მათ შორის პოლიტიკური პატიმრების მშობლების, თუ პარტიები არ აწერენ დეკლარაციას ხელს, მაშინ რას ვაცხადებთ?“, - ამბობს „კოალიცია ცვლილებისთვის“ წევრი, გიორგი ბუტიკაშვილი და დასძენს, რომ არსებობს ბუნდოვანი საკითხები, მათ შორის გახარიას პარტიის პოზიცია თვითმმართველობის არჩევნებთან დაკავშირებით.
მედია პოლიტიკის ექსპერტი გიორგი ახვლედიანი for.ge-თან ამბობს, რომ ოპოზიციის ქცევები და განცხადებები იმდენად არაადეკვატურია, ფაქტია, პოლიტიკურ რეალობას ვერ ხედავენ. ახვლედიანი მიიჩნევს, რომ ეს ადამიანები ყოველ ჯერზე, იმდენად უაზრო და ჩიხურ ვითარებაში იყენებენ თავს, რომ იქიდან გამოსავალს ვეღარ პოულობენ.
„რამდენჯერმე უნდა ვნახოთ ჩვენი ოპოზიცია ამ პირობებში, როცა ერთი და იგივე წრეზე დადიან. ისევ იმავეს იმეორებენ, რასაც წლების განმავლობაში. უნდა გამოაცხადონ არჩევნებს ბოიკოტი, პარლამენტში არ უნდა შევიდნენ, მანდატები უნდა დახიონ და ა.შ. დაიღალა მათივე ამომრჩეველი. ხომ ხედავენ, რომ მიკროფონთან მათი დანახვაც აღარ უნდათ. პოლიტიკური პარტიები, რომლებიც პოლიტიკურ დღის წესრიგს ვერ ქმნიან, მათსავე მხარდამჭერებს არა აქვთ მათთან ურთიერთობის სურვილი. ამ ფონზე კი ისევ უარს ამბობენ პოლიტიკურ ცხოვრებაზე, რა შეიძლება ამ ხალხს ეშველოს? არჩევნებში მონაწილეობის გამო ჯერ ერთმანეთს ლანძღავენ, მერე იძულებულები არიან მიიღონ მონაწილეობა და ახლა ამაზე ლანძღავენ. დარწმუნებული ვარ, საბოლოო ჯამში, მაინც მიიღებენ თვითმმართველობის არჩევნებში მონაწილეობას. მერე იტყვიან, რომ აბა, სხვა გზა არა ჰქონდათ, ყველა მონაწილეობას იღებდა და ისე ხომ არ დარჩებოდნენ. აი, ამ უბედურებას ვუყურებთ წლებია“, - ამბობს ახვლედიანი.
მისივე თქმით, წინასაარჩევნოდ, ოპოზიციურ ფლანგზე, ყველანი ერთმანეთის კონკურენტები ხდებიან, ხოლო პოლიტიკურ ველზე სულ ორი ფლანგია, ესაა კონსერვატული, რომელიც ხელისუფლებას უჭირავს და ლიბერალური, რომელზეც მთელი ოპოზიცია ძოვს. ამიტომ ადგილობრივ არჩევნებზე ერთმანეთისთვის ამომრჩევლის წართმევა მოუწევთ.
„ეს ფსევდო ლიბერალები ახლა ერთმანეთის ამომრჩევლის გამო დაეტაკებიან. ფაქტია, რომ მთელი ეს ნაცკლასტერი ლიბერალურ ბაბლზე დაიწყებს მუშაობას. ეს კარგად იციან და ხედავენ, რომ ამომრჩეველიც დაკარგული ჰყავთ. არ მიიღონ მონაწილეობა და კიდევ უარესი, მათი პოლიტიკური დასასრული გარანტირებულია. აბა, ოპოზიცია სად არსებობს პოლიტიკური ცხოვრების გარეშე? მხოლოდ მათ ტელევიზიებში არიან ოპოზიცია? ხალხს ისედაც ყელში აქვს ამოსული ამათი ტყუილები და ახლა უკვე ამათი კინკლაობით დაიღალნენ. როგორც კი არჩევნები მოახლოვდება, ერთმანეთს დაასწრებენ მონაწილეობას. ეს ულტიმატუმები კიდევ და თავისი ჭკუით ხელისუფლებისთვის შეთავაზებული რაღაცა გეგმები იმდენად აბსურდულია, რომ მისი შესრულების შანსი ნულია.
ასეთი იდიოტური ულტიმატუმები არაერთი გვინახავს. ოპოზიციაში არავის სჯერა, რომ ხელისუფლება ადგილობრივ და ვადამდელ არჩევნებს ერთად ჩაატარებს. ამ ინიციატივას, ძირითადად, ის კონტინგენტი აყენებს, რომელიც ამბობს, რომ არჩევნებში მონაწილეობა არ უნდა მიიღოს. ეს უფრო ნაციონალების იდეაა, მაგრამ ჯერჯერობით სჭირდებათ, რომ რადიკალები იყვნენ. ნაცების ჰეგემონია დასრულდა, ამის გამო კი ცდილობენ ეს ლიდერობა დაიბრუნონ“, - ამბობს ახვლედიანი.
რაც შეეხება გახარიას პოლიტიკურ მანევრს, ახვლედიანი ამბობს, რომ ექსპრემიერის ვირეშმაკობა ოპოზიციისთვის გაშიფრულია. ის რამდენიმე სკამზე ჯდომას ცდილობს. ერთი მხრივ, ოპოზიციას ეუბნება, ვითომ მათ მხარესაა, მეორე მხრივ კი ოპოზიციურ ამომრჩეველს, რომელიც ჩამოუყალიბებელია, აჩვენებს, რომ მათთან არ არის, რითაც გახარია მხარდამჭერებს კარგავს. მას ეშინია ამის და ცდილობს ამ ოპოზიციას ბოლომდე არ ჩაჰყვეს.
