ექსპრეზიდენტ სალომე ზურაბიშვილის ოპოზიციის ერთიანი ლიდერობა ჩავარდა. 31 მარტის აქციამ და მასზე დადებულმა პოლიტიკურმა ფსონმა ფიასკო განიცადა. სიტუაცია ისე გართულდა, რომ ტრიბუნასთან მდგარ ზურაბიშვილს აქციის მონაწილეები უსტვენდნენ და შეძახილებით ცდილობდნენ მის გაჩუმებას. ყოფილი პრეზიდენტის გამოსვლა, საპროტესტო აქციაზე ახალი პროტესტის მიზეზი გახდა. სალომე ზურაბიშვილს ნახევარსაათიანი სიტყვა მისმა მხარდამჭერებმა შეაწყვეტინეს. დაუწუნეს ძველი შინაარსით, ახალი პლატფორმის შექმნის ინიციატივა და დივერსიაშიც დაადანაშაულეს. 5 თვის შემდეგ პირველად, მეხუთე პრეზიდენტს ჯერ სცენის დატოვება, მისივე მხარდამჭერების ბოიკოტის ფონზე მოუწია, შემდეგ კი იძულებული გახდა, მწვავე კრიტიკა სოციალური ქსელითაც მიეღო.

„საპრეზიდენტო რაფაელო“, „ტროას ცხენი“ და „ქართული პოლიტიკის ფურუნკული“ - ამ შინაარსის ასობით გზავნილი გაავრცელეს ოპოზიციონერმა პოლიტიკოსებმა და საპროტესტო აქციის მონაწილეებმა. პროტესტის და გაღიზიანების კიდევ ერთი მიზეზი მიხეილ სააკაშვილის პლაკატების გამოფენა იყო. ზურაბიშვილის უკან სააკაშვილის მხარდამჭერებმა ბანერები გაშალეს, სადაც ეწერა „თავისუფლება მიშას“, რამაც რუსთაველზე მყოფი საზოგადოების აგრესია გამოიწვია.

კრიტიკას დუმილით შეხვდა ყოფილი პრეზიდენტი. სალომე ზურაბიშვილმა საპროტესტო აქციის შემდეგ, ოპოზიციის ცალკეულ წარმომადგენლებთან 1აპრილს პირველი შეხვედრა გამართა, თუმცა არც ერთი სიტყვა არ უთქვამს იმ მწვავე რეაქციაზე, რომელიც სცენაზე გაისმა.

ზურაბიშვილის შეტყობინება ყველამ მიიღო, თუმცა ჭოველიძის 4-ში, 13:00 საათზე მხოლოდ 6 ოპოზიციონერი მივიდა. ყოფილი პრეზიდენტის მოლაპარაკების მაგიდასთან პირველად არ იჯდა „ნაციონალური მოძრაობა“, რომელიც ბოლო პერიოდში ზურაბიშვილის მთავარ მოწინააღმდეგედ იქცა. იყო ელენე ხოშტარია, თუმცა არ მივიდნენ მისი კოალიციის სხვა პარტიების ლიდერები - ზურაბ გირჩი ჯაფარიძე და ნიკა გვარამია, რომელმაც მოგვიანებით სოციალურ ქსელში დაწერა, რომ ზურაბიშვილის მორიგი ინიციატივა გაუმართლებელია.

თბილისის მერის კახა კალაძის განცხადებით, სალომე ზურაბიშვილი არც ლიდერია, არ ლიდერული თვისებები გააჩნია და შესაბამისად, ის ოპოზიციის გამაერთიანებელი ვერ იქნება.

„სალომე ზურაბიშვილი როგორც ჩვენთვის არ არის საინტერესო, ისე იმ რადიკალური დაჯგუფებისთვის. ის მათთვის საინტერესო იყო მაშინ, როდესაც პრეზიდენტის სტატუსი ჰქონდა. ზურაბიშვილი არც ლიდერია, არ ლიდერული თვისებები აქვს, შესაბამისად, ის ვერ იქნება ამ რადიკალური დაჯგუფების გამაერთიანებელი ან წარმომადგენელი. პირდაპირ რომ ვთქვათ, არსებითი მნიშვნელობა არ აქვს, ისინი გაერთიანებულები იქნებიან თუ დაშლილები. როდესაც შენ ქვეყნის წინააღმდეგ დგამ ნაბიჯებს, ხარ აგენტი, ემსახურები სხვა ქვეყნის ინტერესებს, ამ ქვეყანაში არანაირი მომავალი არ გაგაჩნია“, - განაცხადა კახა კალაძემ.

ამასთან, კითხვაზე, მოახერხებს თუ არა ოპოზიცია გაერთიანებას საერთო პლატფორმის ირგვლივ, თბილისის მერი უპასუხებს, რომ ამას არანაირი მნიშვნელობა არ აქვს.

„ხალხის ძალის“ წევრი და ანალიტიკოსი დავით ქართველიშვილი for.ge-თან ამბობს, რომ 31 მარტს სალომე ზურაბიშვილი, ე.წ. პრეზიდენტი აქციაზე, ხალხის წინაშე ცვილის ფიგურების დირექტორად წარსდგა. ქართველიშვილი ამბობს, რომ ტრიბუნაზე გამოსული ზურაბიშვილი საერთოდ არ იზიარებდა იქ მდგომი ხალხის პათოსს და სურვილს. შეუსაბამო იყო მისი სიტყვა და უაზრო საუბარი იმაზე, რის გამოც ხალხი რუსთაველზე მოტყუებით მიიყვანეს.

„ზურაბიშვილს ამბიცია აქვს, რომ მთელი ოპოზიცია მის გარშემო გაერთიანდეს და ყველა, როგორც ლიდერმა, უნდა ჩაანაცვლოს. ის ხალხს თავს თითქოს ახალი ყაიდის ევროპელ ლიდერად სთავაზობს, რომელზეც დასავლეთში ზოგიერთებს ფსონი აქვთ დადებული. მის ზურგს უკან კი მთელმა მსოფლიომ დაინახა გაცვეთილი ლოზუნგები და ყავლგასული პოლიტიკური ლიდერი მიხეილ სააკაშვილი. ორი ე.წ. ლიდერი იყო რუსთაველზე - სააკაშვილი სურათიდან და ზურაბიშვილი ტრიბუნიდან, მაგრამ საზოგადოებისთვის არცერთს არ ჰქონდა ფასი. სად არის ახალი ჟანგბადი? სად არის ახალი ხედვა? ეს ხომ წრეზე მორიგი სიარული და ბოდიალია, რომელსაც უკვე ვერც ახალგაზრდობა და ვერც ოპოზიციის ამომრჩეველი ვეღარც იჯერებს“, - ამბობს ქართველიშვილი.

მისივე თქმით, 31 მარტის აქცია სასოწარკვეთა და ბოლო წვეთი იყო ბანის პაატა ბურჭულაძის განცხადება. ბურჭულაძემ განაცხადა, რომ რაღაცა უნდა გააკეთონ, მაგრამ რა არის ეს რაღაც, უკვე 13 წელია ვერაფრით დაადგინეს.

„ოპოზიცია ამ წლების განმავლობაში ვერაფერს აკეთებს, ყველას, მათ შორის მეც, მართლა გვაქვს ინტერესი, ოღონდ ამათმა რამე გააკეთონ. ოღონდ ამაში არ ვგულისხმობ მავნებლობას, დესტრუქციას, ნგრევას, არამედ ამ ქვეყნის აღმშენებლობაში ოპოზიციის მონაწილეობას ვგულისხმობ. მათ ამის სურვილი არანაირად არ გააჩნიათ. დღეს საკუთარ თავსაც, ამომრჩეველსაც და მთელს საქართველოს, ეს ცვილის მუზეუმების დირექტორი მადამ პრეზიდენტად წოდებული, ყველას ატყუებს, თითქოს და რაღაცა გაერთიანებული ოპოზიციის ლიდერია. რაღაცა ქარტიის თუ პლატფორმის ავტორია და ა.შ. ზურაბიშვილმა საკუთარი დამოუკიდებელი პარტია რომ შექმნას, მისი რეიტინგი ფსკერს მიღმა იქნება. ეს კარგად იცის, ამიტომ არ რისკავს იმას, რაც ისედაც არ გამოუვა. უბრალოდ, უფრო მეტი უნდა, ოპოზიციის ლიდერობას იჩემებს, რომელსაც რეალურად არავინ უჯერებს. თავად ოპოზიციაში არიან ერთმანეთს წაკიდებულები, ყველა არის ლიდერი და ახლა მაგათ ზურაბიშვილის ლიდერობა უნდათ? ზურაბიშვილს ამიტომაც არ უნდა წაგებულ გზას დაადგეს, ასედაც ყველაფერი ნულიდან ექნება დასაწყები. მაგის პარტიაში საკუთარი დაქალები არ მივლენ“, - ამბობს ანალიტიკოსი.

მისივე თქმით, მას საზოგადოებასთან, ხალხთან კომუნიკაციის პრობლემა აქვს, ეს კი ძალიან კარგად 31 მარტის აქციაზე გამოჩნდა.

„როგორ შეიძლება ის იყოს რაღაცის სულის ჩამდგმელი და ახალი პროცესების დამწყები. 31 მარტს მისი ისედაც მინავლებული პოლიტიკური შესაძლებლობები საერთოდ ჩაიფერფლა. ქალმა ხალხს დაუძახა რუსთაველზე რაღაცა უნდა გითხრათო და ხალხი მას არ უსმენდა, რადგან დაინახეს, რომ ის არც ლიდერია და არც რაიმე სიახლის შემთავაზებელი არ არის“, - ამბობს ქართველიშვილი.