აშშ-ის სენატში ამერიკელმა სენატორებმა, ჯიმ რიშმა და ჯინ შაჰინმა „მეგობარი აქტი“ წარადგინეს, რაც „ქართულ ოცნებაზე“ პოლიტიკური ზეწოლის გაზრდის ბერკეტად შეფასდა. აღნიშნულმა გარკვეული მოლოდინებიც შექმნა, რომ საქართველოს მმართველმა ხელისუფლებამ რიტორიკა და ხისტი დამოკიდებულება დასავლეთთან მიმართებაში შეცვალოს და კონკრეტული ნაბიჯები გადადგას აშშ-სა და ევროპასთან ურთიერთობების დასალაგებლად და გადასატვირთად. როგორც ცნობილია, „მეგობარი აქტის“ განხილვა სენატის საგარეო ურთიერთობათა კომიტეტის სხდომაზე 11 მარტს იგეგმებოდა, თუმცა განხილვა გადაიდო და აქტს, სავარაუდოდ, 27 მარტს განიხილავენ.

ამის ფონზე, ასევე ვხედავთ თბილისში „მეგობარი აქტის“ მხარდამჭერ მსვლელობებს. აქციის მონაწილეები ითხოვენ აქტის მიღებასა და ამით „ქართულ ოცნებაზე“ ზეწოლის გაძლიერებას.

ანალიტიკოსი ზაალ ანჯაფარიძე For.ge-სთან ინტერვიუში ამბობს, რომ თუკი აშშ „მეგობარ აქტს“ და დანარჩენ ორ აქტს მიიღებს, რომლებიც ასევე საქართველოს ხელისუფლების წინააღმდეგ არის მიმართული, ქართულ-ამერიკული ურთიერთობების გადატვირთვის შესაძლებლობა გრძელვადიან კრიზისში შევა.

„მეგობარი აქტის“ გარდა, აშშ-ს წარმომადგენლობით პალატასა და სენატში დაინიცირებულია კიდევ ორი აქტი - ეს არის „ქართველი ხალხის“ და „ქართული კოშმარის დასრულების აქტი“. თუ ეს აქტები იქნება მიღებული და პრეზიდენტი ტრამპი ხელს მოაწერს, ქართულ-ამერიკური ურთიერთიბების გადატვირთვის იმედი არ უნდა გვქონდეს, შეიძლება ეს ურთიერთობა გრძელვადიან კრიზისში შევიდეს.

აშშ-ს სჭირდება მეტი სიცხადე საქართველოს საგარეო პოლიტიკურ პრიორიტეტებში, თუ სად მიდის საქართველო, როგორი იქნება მისი ურთიერთიბები ჩინეთთან, ირანთან და ზოგადად, როგორ განვითარდება საქართველოში დემოკრატია - დარჩება თუ არა საქართველო აშშ-ს ინტერესების გამტარებელი სამხრეთ კავკასიაში და სტრატეგიული პარტნიორი“, - განაცხადა ზაალ ანჯაფარიძემ.

ანალიტიკოსმა, ვახტანგ ძაბირაძემ ჩვენთან კომენტირებისას აღნიშნა, რომ თუ ამერიკის შეერთებული შტატები „უფრო შორს წავიდა“, ვიდრე „მეგობარი აქტის“ მიღებაა, ეს უარყოფით გავლენას იქონიებს საქართველოში არსებულ ეკონომიკურ-ფინანსურ მდგომარეობაზე.

„მეგობარი აქტის“ მიღება, უპირველეს ყოვლისა, არის პოლიტიკური განაცხადი ამერიკის ხელისუფლების მხრიდან, რომ ის იზიარებს პოზიციას საქართველოს ხელისუფლებასთან მიმართებაში, რაც ამ აქტით არის გამოხატული. შესაბამისად, ეს საწყის ეტაპზე შეიძლება ბევრს არაფერს ნიშნავდეს, მაგრამ ამას ადმინისტრაციის მხრიდან მოჰყვება გადაწყვეტილებების მიღება, რომელიც იქნება შეუზღუდავი. საკმაოდ კრიზისული სიტუაციაში აღმოვჩნდებით, რადგან ამერიკის დამოკიდებულება საქართველოს ხელისუფლების მიმართ, ფაქტობრივად, იდენტური იქნება იმასთან, რასაც ევროკავშირი აკეთებს, თუმცა თუ აშშ-მა უფრო შორს წასვლა მოინდომა, ეს იქნება პირდაპირი ზეგავლენა არამარტო პოლიტიკური, არამედ ეკონომიკური და სოციალური თვალსაზრისითაც საქართველოსა და ქვეყნის ეკონომიკაზე.

ალბათ, გაძლიერდება ზეწოლა „ქართულ ოცნებაზე“, რომ ჩატარდეს ხელახალი არჩევნები. თუ „მეგობარი აქტის“ მიღება ქვეყნისთვის პლიუსია, ხელისუფლებისთვის დიდი გამოწვევაა. არ გამოვრიცხავ იმას, რომ საქართველოს ხელისუფლებამ პოზიციები გარკვეულწილად შეცვალოს“, - განაცხადა ვახტანგ ძაბირაძემ For.ge-სთან.

„მეგობარი აქტის“ ძირითადი დებულებებია დემოკრატიისა და კანონის უზენაესობის მხარდაჭერა. აღნიშნულია, რომ აქტი განსაზღვრავს აშშ-ის პოლიტიკას საქართველოში დემოკრატიული ღირებულებების, ადამიანის უფლებებისა და კანონის უზენაესობის დასაცავად. იგი აღიარებს საქართველოს სამოქალაქო საზოგადოების მნიშვნელოვან პროგრესს და ხაზს უსვამს დემოკრატიის გაძლიერების მნიშვნელობას რეგიონული სტაბილურობისათვის.

აქტში ვკითხულობთ ასევე დებულებას დემოკრატიულ უკუსვლასთან დაკავშირებით.

„საქართველოში ბოლოდროინდელი დემოკრატიული უკუსვლის საპასუხოდ, აქტი მოითხოვს საქართველოს მთავრობის ქმედებების, რუსეთსა და სხვა ავტორიტარულ რეჟიმებთან მისი კავშირების გაძლიერებულ შესწავლას“, - წერია აქტში.

ამასთან, საუბარია სანქციებზეც: „არასათანადო გავლენა და სანქციების თავიდან აცილება: ანგარიშები საქართველოში კორუფციული პრაქტიკის შესახებ, რომელიც მხარს უჭერს რუსეთის ინტერესებს და სანქციების თავიდან აცილებას.

„სტრატეგია აღმაშენებლის“ ლიდერის, გიორგი ვაშაძის თქმით კი, „მეგობარი აქტის“ მიღება მოიტანს „ქართული ოცნების“ ლიდერებისა და ივანიშვილის მეტ იზოლაციას, საქართველოს მეტ ინტეგრაციას ამერიკასთან, რაც საქართველოსთვის ნიშნავს დაცულობას, განვითარებას და წინსვლას.

„თუ მარტო დავრჩებით ძალიან მარტივი იქნება ჩვენი დამონება, ამიტომ გვინდა ჩვენ მეგობრობა ამერიკასთან და ჩავთვალოთ, ეს არის ამერიკის მეგობრობის მხარდაჭერის მსვლელობა. ეს „მეგობრობის აქტი“ საქართველოს სჭირდება. ჩვენ ბევრი გვყავს ამერიკაში, ევროპაში და მათაც სჭირდებათ ჩვენგან გამხნევება ჩვენი აქციებით, ჩვენი მოქმედებით, ჩვენი ხმამაღალი სიტყვით, რომ არ დაიღალონ ჩვენ მხარდაჭერაში იმიტომ, რომ ჩვენ დარწმუნებული ვართ, გამარჯვებაში. ეს უნდა ვაჩვენოთ. ამ აქტის განხილვა იწყება აშშ-ის სენატში, ეს არის ძალიან მნიშვნელოვანი. ჯერჯერობით მიღების კონკრეტული ვადები არ არის ცნობილი, ამიტომ ეს განხილვა უმნიშვნელოვანესია. ჩვენ ბევრ რამეს გავიგებთ საქართველოსთან მიმართებაში, მით უმეტეს, ტრამპის პრეზიდენტობის პერიოდში, რა პოზიციები არის ამერიკიდან საქართველოსთან მიმართებაში. დარწმუნებული ვარ, „ქართული ოცნება“ მისთვის ბევრ არასასურველ რამეს მოისმენს, ჩვენ, ძალიან ბევრს იმედისმომცემს“, - განაცხადა გიორგი ვაშაძემ.