24 იანვრიდან ათეულობით მედიკამენტი ჯგუფს იცვლის და ფსიქოტროპულ ნივთიერებად ცხადდება, რაც იმას ნიშნავს, რომ აღნიშნული მედიკამენტები მხოლოდ ავტორიზებულ აფთიაქებში და მხოლოდ რეცეპტით გაიყიდება. ჯანდაცვის მინისტრის ბრძანება საკანონმდებლო მაცნეში უკვე გამოქვეყნებულია, მისი მიზანი კონკრეტული ფარმაცევტული პროდუქციის რეკლასიფიკაციაა.

მინისტრის ბრძანების თანახმად, ბაკლოფენი, გაბაპენტინი, დექსტრომეტორფანის შემცველი პრეპარატები (გარდა სიროფებისა), ზოპიკლონი, ზალეპლონი და ტროპიკამიდი მეორე ჯგუფიდან პირველ ჯგუფში გადადის. აღნიშნულ მედიკამენტებზე გავრცელდება კონტროლის იგივე მექანიზმები და რეჟიმები, რაც ფსიქოტროპულ ნივთიერებებზე მოქმედებს.

ჯანდაცვის სამინისტროში აღნიშნულ გადაწყვეტილებას რეცეპტის ინსტიტუტის დამკვიდრებასთან დაკავშირებული ეტაპობრივი ცვლილებებით ხსნიან.

„ბოლო წლებში ძალიან გახშირდა ინფორმაციები როგორც საზოგადოებრივი, ასევე სამედიცინო სექტორიდან აღნიშნული სამედიცინო პროდუქტის ბოროტად გამოყენების შესახებ. არასრულწლოვნები ხშირად მას ნარკოტიკული თრობის მისაღწევად იღებენ. ყველასთვის ცნობილია ე.წ. ბაკლოსანი, ანდანტე, გაბაგამა, გრიმოდინი, ტებანტინი... ეს სამკურნალო საშუალებები არის ამ ნივთიერებების შემცველი. სწორედ, ამიტომ გადაწყდა, გამკაცრებულიყო კონტროლი“, - განაცხადა ჯანდაცვის სამინისტროში გამართულ პრესკონფერენციაზე რეგულირების სააგენტოს ფარმაცევტული საქმიანობის დეპარტამენტის უფროსის მოადგილემ დავით მაჭარაშვილმა.

მისივე განმარტებით, პირველ ჯგუფს მიკუთვნებული ფარმაცევტული მედიკამენტების მიმოქცევის უფლება ყველა ფარმაცევტულ დაწესებულებას არ აქვს, მისი რეალიზაციის უფლება აქვთ მხოლოდ ავტორიზებულ და მასთან გათანაბრებულ აფთიაქებს.

პირველ ჯგუფში გადაყვანილ მედიაკმენტებზე კონტროლს რეგულირების სააგენტო ექსპორტ-იმპორტის დროსაც განახორციელებს. რაც იმას ნიშნავს, რომ კონკრეტული მედიკამენტის შესახებ იმპორტიორის მიერ წარდგენილ განაცხადში, შესაძლოა, კორექტირება განხორციელდეს.

„მედიკამენტების აღრიცხვა აფთიაქებში მიმდინარეობს რეგულირების სააგენტოს მიერ დამოწმებულ სპეციალურ საგნობრივ-რაოდენობრივი აღრიცხვის ჟურნალში, ისინი აფთიაქიდან უნდა გაიცეს ასევე მკაცრ აღრიცხვას დაქვემდებარებულ ფორმა N2-ის სარეცეპტო ბლანკით, რომელიც სამედიცინო დაწესებულებებში რეცეპტის აღრიცხვის ჟურნალებსა და პაციენტის ინდივიდუალური ამბოლატორიული ბარათებში აღინიშნება“, - განმარტავს დავით მაჭარაშვილი.

მინისტრის ბრძანებით განსაზღვრული მედიკამენეტების ურეცეპტოდ გაცემის შემთხვევაში, აფთიაქებზე ადმინისტრაციული სახდელი წესდება - პირველ ჯერზე 6 ათასი, განმეორების შემთხვევაში კი 12 ათასი ლარის ოდენობით.

ყველა ფარმაცევტული დაწესებულება, რომელიც ახორციელებს მეორე ჯგუფიდან პირველ ჯგუფში გადაყვანილი ფარმაცევტული პროდუქციის რეალიზაციას, ვალდებულია, რეგულირების სააგენტოს თვეში ერთხელ მიაწოდოს ინფორმაცია, თუ რა რაოდენობით მედიკამენტი მიიღო და რის საფუძველზე გასცა.

რეგულირების სააგენტოში აცხადებენ, რომ აღიცხვის მკაცრი სისტემის საფუძველზე შეემუშავდება სტატისტიკა და დადგინდება, თუ რამდენად ლეგალურად იყიდება კონკრეტული ფსიქოტროპული მედიკამენტები და რამდენად მიზნობრივად გამოიყენებენ მას პაციენტები.