თავდაცვის მინისტრი იმედოვნებს, რომ რეგიონში ვითარების ესკალაცია არ მოხდება. ირაკლი ალასანიას განცხადებით, ეს არის საქართველოს ხელისუფლების პოლიტიკური ნების გამოცდა რუსეთის მხრიდან. „მე დარწმუნებული ვარ, რომ ჩვენ ამ გამოცდას სწორად გავივლით. მთავარია, საერთაშორისო თანამეგობრობა გვყავს ჩართული, ინფორმირებული და მათი რეაქციები და ჩვენი ძალისხმევა იმ შედეგს მოიტანს, რომ რეგიონში ესკალაცია არ მოხდება“, - განაცხადა ირაკლი ალასანიამ.

კონფლიქტისპირა სოფლებში მცხოვრები მოსახლეობის პრობლემები ადგილზე მოისმინა რეგიონული განვითარებისა და ინფრასტრუქტურის მინისტრმა დავით ნარმანიამ და რეინტეგრაციის მინისტრის მოადგილემ ქეთევან ციხელაშვილმა. შეხვედრა სოფელ კირბალში გაიმართა, სადაც მთავრობის წევრებს 40-მდე სოფლის წარმომადგენელი შეხვდა. შეხვედრაზე საუბარი შეეხო სოფელ დვანში ბოლო დროს მიმდინარე მოვლენებს. როგორც დვანის წარმომადგენლებმა მთავრობის წევრებს განუცხადეს, აქტიურად მიმდინარეობს მავთულხლართების გავლება.

მათ ხელისუფლებას სოფლის განაპირას, სამი სახლის დაცლაც მოსთხოვეს, რადგან, შესაძლოა, ეს სახლები ე.წ. საზღვრის იქით მოხვდეს. როგორც დავით ნარმანიამ მოსახლეობას განუცხადა, მთავრობა ყველანაირად ცდილობს, რომ დვანთან დაკავშირებული მოვლენები საერთაშორისო თანამეგობრობის მხარდაჭერით მოაგვაროს. 

„ხუთშაბათს, მთავრობის სხდომაზე მექნება საუბარი არსებულ მდგომარეობასთან დაკავშირებით. დვანთან მიმართებაში უნდა ითქვას, რომ ერთი მხრივ, ძალიან არასასურველი მოვლენაა, მეორე მხრივ კი, ამას საფუძველი 2008 წლიდან აქვს. ჩვენი ხელისუფლების პოზიციაა, რომ საერთაშორისო თანამეგობრობის მხარდაჭერით, მშვიდობიანი გზით მოგვარდეს ეს პრობლემა“, - განაცხადა დავით ნარმანიამ.

ქეთევან ციხელაშვილის განმარტებით ხელისუფლება რუსულ პროვოკაციას არ უნდა წამოეგოს და ყველანაირად უნდა შეეცადოს დვანსა და კონფლიქტისპირა სოფლებში მიმდინარე მოვლენები მშვიდობიანი გზით გადაჭრას.

„მთავრობას აქვს ორი ძირითადი ბერკეტი და მექანიზმი, ჩვენ, ერთი მხრივ, ყველა ჩვენს ხელთ არსებულ სამშვიდობო ინსტრუმენტს ვიყენებთ, ზეწოლა რუსეთზე კიდევ უფრო გაიზრდება და არ მოდუნდება, იმიტომ, რომ ეს არის არაცივილური და სამარცხვინო ფორმა ოკუპაციის გაგრძელებისა და, მეორე მხრივ, ჩვენი სახელმწიფოს პასუხი ამ სამწუხარო მოვლენაზე გახლავთ ის, რომ დავეხმაროთ მოსახლეობას გამაგრდეს ამ მიწაზე, ჩვენ არსად წასვლას, არაფრის დათმობას არ ვაპირებთ“, -აცხადებს ქეთევან ცხვედიაშვილი.

ამის მიუხედავად, რუსეთისთვის დიცსა და დვანში მიმდინარე მოვლენებზე თბილისის პოლიტიკური სპეკულაციები მიუღებელია. რუსეთის საგარეო საქმეთა მინისტრის მოადგილე გრიგორი კარასინი ამბობს, რომ მიმდინარეობს პროპაგანდისტული ისტერიკა ცხინვალის ხელისუფლების აბსოლუტურად კანონზომიერ ქმედებაზე, რომელიც სახელმწიფო სასაზღვრო რეჟიმის გაძლიერებას ისახავს მიზნად.

„ვრცელდება აშკარად ცრუ ინფორმაცია საზღვრის, თითქოსდა, საქართველოს ტერიტორიის სიღრმეში გადაწევასთან დაკავშირებით. საქართველოს პოლიცია უშუალოდ ერევა ადგილობრივი მოსახლეობის საპროტესტო აქციის ორგანიზებაში, რასაც მედიასაშუალებებში ტენდენციური ასახვა მოსდევს.

თბილისი მზად არ არის, აღიაროს მიხეილ სააკაშვილის 2008 წლის დანაშაულებრივი სამხედრო ავანტიურის შედეგების შეუქცევადობა. თუმცა, ემოციების განზრახ გამძაფრება და პოლიტიკური სპეკულაციები ამ თემაზე მიუღებელია. ეს რეგიონულ სტაბილურობაზე სერიოზულ გავლენას მოახდენს“, -აცხადებს გრიგორი  კარასინი.

საგარეო საქმეთა მინისტრი, მაია ფანჯიკიძე გრიგორი კარასინის შეფასებას დიცსა და დვანში განვითარებულ მოვლენებთან დაკავშირებით, „პრინციპულად არასწორს“ უწოდებს. 

„პრინციპულად არასწორი მიდგომაა, როდესაც ბატონი კარასინი ამბობს, რომ ჩვენ, თითქოს, ხელოვნურად ვძაბავთ სიტუაციას ე.წ სამხრეთ ოსეთის ე.წ სახელმწიფო საზღვართან“, - აღნიშნა მაია ფანჯიკიძემ. 

სანამ ორი ქვეყნის დიპლომატები ერთმანეთს განცხადებებით პასუხობენ, სოფელ დვანის მიმდებარე ტერიტორიაზე, რუსი სამხედროები ე.წ. საზღვრის სადემარკაციო სამუშაოებს აქტიურად აგრძელებენ და სოფელ დვანის მცხოვრებლებს მათი კუთვნილი სათავსოების დაცლას სთხოვენ.

პრემიერ-მინისტრის სპეციალური წარმომადგენლი, რუსეთთან ურთიერთობის საკითხებში, ზურაბ აბაშიძე for.ge-სთან საუბრისას აცხადებს, რომ ის პროცესები, რაც ბოლო პერიოდში საოკუპაციო ხაზთან ვითარდება, საერთაშორისო ნორმებსა და სტანდარტებში არ ჯდება.

როგორ შეაფასებთ იმ პროცესებს რასაც ადგილი აქვს კონფლიქტის ზონაში, როგორ ფიქრობთ ვითარება ხელოვნურად იძაბება?

ზურაბ აბაშიძე: ჩვენ ამ 500-600 მეტრის გამო არ გვინდა რუსეთთან დისკუსიაში შესვლა, რადგნ აქეთ გადმოიტანენ აქცენტს და გამოვა, რომ ჩვენ მათ ვედავებით არა 20 ათას კილომეტრს, არამედ 500 მეტრს. ამიტომ, ჩვენ ამ დისკუსიაში არ შევდივართ. ჩვენ თუ ამას ავყევით, რომ 200 მეტრი იქით გადაწიე, 200 მეტრი აქეთ გადმოწიე, შეიძლება, დაგვთანხმდნენ ამაზე და შესაძლოა, ეს დააკანონონ როგორც სახელმწიფო საზღვარი, აი ეს არის დიდი სირთულე. როგორც ისინი ამბობენ, ამ ხაზს ისინი ბოლომდე გაიყვანენ.

და სად არის ეს ბოლო მათი გათვლებით?

- როგორც თვითონ ამბობენ, ბოლო არის ადმინისტრაციული საზღვრის გასწვრივ, სადაც ადრე საბჭოთა პერიოდში იყო ადმინისტრაციული საზღვარი, ეს აქვთ მხედველობაში.

როგორც ირკვევა, ისინი მოქმედებენ საბჭოთ კავშირის დროინდელი რუქით, რაც თავისთავად მიუღებელია. თუ იყო კონკრეტულად ამ საკითხზე საუბარი კარასინთან შეხვედრაზე?

- ამბობენ, რომ 2008 წელს მივიღეთ ეს გადაწყვეტილება და ახლა ვქმნით ამ საზღვარსო. „ეს არაა პასუხი თქვენს პოლიტიკაზე, ეს არის შედეგი იმისა, რაც მოხდა 2008 წელს“ - ესაა მათი პასუხი. მათ უნდათ, რომ ამას დაარქვან სახელმწიფო საზღვარი. ჩვენ ამას სახელმწიფო საზღვრად ვერ ვაღიარებთ. ჩვენ ვეუბნებით, რომ თქვენ არანაირი სახელმწიფო საზღვარი არ გაქვთ არც ცხივნალთან და არც აფხაზეთთან, ეს არის საქართველო-რუსეთის საზღვარი, ხოლო შიგნით ეს არის ადმინისტრაციული საზღვარი.

რუსეთთან მიმდინარეობს მოლაპარაკებები სავაჭრო საკითხებზე და მათ შორის საჰარეო მიმოსვლების აღდგენაზე, მაგრამ პოლიტიკური ფონი ისევ დაძაბული რჩება. რა უნდა გააკეთოს საქართველოს ხელისუფლებამ იმისათვის, რომ რუსეთი გადავიდეს კონსტრუქციული დიალოგის რეჟიმზე?

- მაქსიმალურად უნდა გამოვიყენოთ დიპლომატიური ბერკეტები. ამასთანავე უნდა გაგრძელდეს პირდაპირი დიალოგი რუსეთთან. ჟენევის ფორმატში უნდა გაგარძელდეს ეს მოლაპარაკებები. მესმის, რომ პესიმიზმი არის გარკვეულწილად, იმიტომ, რომ  ჟენევის მოლაპარაკებებში შედეგები არ გვაქვს, მაგრამ სხვა მექანიზმები, ჯერჯერობით, არ არსებობს და ეს უნდა გაგრძელდეს. საგარეო საქმეთა მინისტრი გაეროშია, ამაზე დიდი ფორუმი არ არსებობს და ვნახოთ რა შედეგებს გამოიღებს.

მე ამას ვუყურებ საერთაშორისო სამართლის კუთხით. აშკარად ადგილი აქვს საერთაშორისო სამართლისა და ჰუმანიტარული ნორმების უხეშ დარღვევას. ამას ჩვენ უნდა დავუპირისპიროთ საერთაშორისო სამართალი და ჩვენი არგუმენტები, რაც ჩვენ გვაქვს, როგორც სახელმწიფოს, რომლის საზღვრებსაც აღიარებს მთელი საერთაშორისო თანამეგობრობა. მაქსიმალურად უნდა გავააქტიუროთ ჩვენი დასავლელი მეგობრების ინფორმირება, უნდა დავანახოთ ის რაც ხდება, სხვა ბერკეტები არ არსებობს.  უნდა შევეცადოთ, რომ აფხაზებთან და ოსებთან ავაწყოთ პირდაპირი დიალოგი. ჟენევაშიც აუცილებლად უნდა გავაგრძელოთ დიალოგი, ვნახოთ რა შედეგებს მიიღებს რუსეთთან დიალოგი შემდეგ ეტაპეპზე.

ეს პროცესები ხომ არ გახდება საბაბი იმისა, რომ დავბრუნდეთ 2008 წლის ვითარებაში, ანუ შეწყდეს რუსეთთან ყველაინაირი ურთიერთობა და მათ შორის აბაშიძე-კარასინის შეხვედრის ფორმატი?

- პირდაპირ შემიძლია გითხრათ, რომ ჩვენი დასავლელი პარტნიორები ცალსახად გვირჩევენ ამ დიალოგის გაგრძელებას. უნდა გავაკეთოთ არჩევანი - რა გვირჩევნია, რთული დიალოგი, ცუდი მშვიდობა თუ კარგი ომი.

რთული დიალოგი იქნება შედეგის მომტანი?

- აუცილებლად, ადრე თუ გვიან ეს შედეგს მოიტანს. მე მხედველობაში არ მაქვს ორმხრივი დიალოგი, არამედ, ზოგადად, ჩვენი პოლიტიკა, რომელიც პრესპექტივაზე იქნება გათვლილი. სწორად გათვლილი ნაბიჯებით სიარული აუცილებლად მოიტანს შედეგს. ძალის გამოყენებამ და პროვიკაციაზე წამოგებამ, სად მიგვიყვანა 2008 წელს, ეს ყველამ კარგად ვნახეთ.