მას შემდეგ, რაც საერთაშორისო სავაჭრო პალატის თავმჯდომარე ფადი ასლიმ ქართველი ერი არაეთიკური სიტყვებით მოიხსენია და აღნიშნა, რომ ბიძინა ივანიშვილმა 3,7 მილიონ ქართველზე იძალადა, საზოგადოების ნაწილს აღშფოთების გრძნობა დაეუფლა. საზოგადოებრივი მაუწყებლის ბორდის წევრი ბონდო მძინარაშვილი პრეზიდენტ ზურაბიშვილისგან მოითხოვს, „გარეწარ ფადი ასლის ჩამოართვას საქართველოს მოქალაქეობა“. ბონდო მძინარაშვილი საქართველოს მთავრობასაც მოუწოდებს, „გააძევეთ ეს ნაძირალა საქართველოდან!“

რატომ აძლევს ფადი ასლი საკუთარ თავს ასეთი განცხადებების გაკეთების უფლებას, ეს უცნობია, მაგრამ აშკარაა, რომ არაბი ბიზნესმენი ბოლო წლებში პოლიტიკურად გააქტიურებულია.

„ქართული ოცნების“ ხელისუფლებაში მოსვლის შემდეგ ფადი ასლი რეკომენდაციებს რეკომენდაციებზე უგზავნიდა ჩვენს ხელისუფლებას, კახა კალაძისგან მოითხოვდა, მოსკოვის გამზირისთვის ზელენსკის გამზირი ეწოდებინათ.

არაბი ბიზნესმენი ქართველი ერის ხსნის გზასაც გვთავაზობდა და მოითხოვდა, ყოფილ მაღალჩინოსნებს ამნისტია შეხებოდათ, რადგან ეროვნული შერიგება იხსნიდა ჩვენს ქვეყანას.

არც სააკაშვილის გამოქომაგებას ივიწყებდა და მთელ მსოფლიოს არწმუნებდა, თითქოს სააკაშვილს საქართველოს მთავრობამ სიკვდილი მიუსაჯა.

ბიძინა ივანიშვილზე საუბარი კი ფადი ასლის ერთ-ერთი ყველაზე საყვარელი თემა იყო, ივანიშვილს ფადი ასლი კორუფციაში, შოვინიზმსა და პოლიტიკურ ანგარიშსწორებაში ადანაშაულებდა.

პერიოდულად ფადი ასლის გამონათქვამები არ რჩებოდა საზოგადოების ყურადღების მიღმა, მას ხან „არაბ ჯაყოდ“, ხანაც „არაბ ოსტაპ ბენდერად“ მოიხსენიებდნენ. სააკაშვილის რეჟიმისგან გაწამებული ბიზნესმენები კი იხსენებდნენ, რომ ფადი ასლი მათი წამების და რეკეტის დროს დუმდა. ბიზნესმენი ვახტანგ ბეგიაშვილი გაუგონარ ცინიზმად მიიჩნევდა, როცა ბანანების გამყიდველი ფადი ასლი ბიძინა ივანიშვილს მორალს უკითხავდა, დიქტატურის გზას ადგახარო. „ჩემს ძმას დავით ბეგიაშვილს და ასობით ბიზნესმენს ყველაფერი რომ წაართვეს, ღამის სამ საათზე რომ მიჰყავდათ ნოტარიუსთან და ქონებას ათმობინებდნენ, მაშინ სად იყო ფადი ასლი, ახლა რომ გვევლინება ბიზნესის გულშემატკივრად? ქართველები სტუმართმოყვარე ხალხი ვართ, მაგრამ ეს იმას არ ნიშნავს, ფადი ასლისნაირი ჯაყოები თავზე დავისვათ“, - აცხადებდა ვახტანგ ბეგიაშვილი.

ცალკეული ადამიანები ფიქრობენ, რომ ფადი ასლი საქართველოს ხელისუფლებას აშანტაჟებს. თუმცა იგი ყველას მიმართ უკმაყოფილო არ არის. როგორც ირკვევა, ფადი ასლისაც ჰყავს ფავორიტები ქართულ პოლიტიკაში. ის მიიჩნევს, რომ 2003 წელს საქართველოს ეკონომიკისთვის მაშველი რგოლი კახა ბენდუქიძე აღმოჩნდა, რომლის გონივრულმა რეფორმებმა ქვეყნის ეკონომიკა კრახისგან იხსნა.

„ყოფილი პოლიტპატიმრები ადამიანის უფლებებისთვის“ თავმჯდომარე ნანა კაკაბაძე ეჭვობს, რომ ფადი ასლი ზუსტად იმიტომაა ზედმეტად გააქტიურებული და ლანძღავს საქართველოს ხელისუფლებას, რომ ის აგენტია და ვიღაცის დავალებებს ასრულებს. ნანა კაკაბაძის თქმით, სწორედ ამიტომაა საჭირო აგენტების შესახებ კანონის მიღება, რომ გაირკვეს, რა ამოძრავებთ ფადი ასლის მსგავს ადამიანებს.

ნანა კაკაბაძის მოსაზრებით, ამიტომაცაა, რომ ეს კანონი ბევრ ქვეყანაში მოქმედებს და კიდევ ბევრ ქვეყანას უნდა, ამ კანონმა აბსოლუტურად ყველგან იმუშაოს, რადგან გარედან დაფინანსებული ორგანიზაციების მხრიდან საფრთხე ქვეყნის შიგნით იგრძნეს ევროპაშიც. უფრო დაცულმა ქვეყნებმა თუ იგრძნეს ამის საფრთხე, ჩვენ ასეთ დაუცველ ქვეყანას, რომელშიც ორი გადატრიალება მოხდა, რა უფლება გვაქვს, ეს კანონი არ გვქონდეს? ეს კანონი ხომ სახელმწიფოს დაიცავს.

„სახელმწიფო თუ არ იქნა დაცული, რიგითი მოქალაქე როგორ უნდა დაიცვა გადატრიალებისგან, ომებისგან, გამოწვევებისგან, რაც დღეს არის. შენ თუ აგენტურას მიეცი საშუალება, მაშინ ნებისმიერი მტრული სახელმწიფო მოყვრული სახელმწიფოს ნიღბით მტრობას შეგიქმნის. ხომ უნდა გაიგო, ვინ მტერია, ვინ მოყვარე? ამას სხვანაირად როგორ გაიგებ? ხომ უნდა ვიცოდეთ, ვისგან ფინანსდება ფადი ასლი, ვისგან ფინანსდება ლომჯარია, დღეს რომ ამტვრევს უნივერსიტეტის კარებს, მე მგონი, როცა სწავლობდა, თავის დროზე არ უნახავს უნივერსიტეტი. ვისგან ფინანსდებიან ენჯეოები, ასე ხმალამოღებული რომ იბრძვიან, არ წაიკითხოთ, არ განიხილოთ ეს კანონპროექტიო. მარტო ბოლშევიკურ იარლიყს იყენებენ, ეს კანონპროექტი რუსულიაო. ამ დროს რუსულია მთელი სისხლის სამართლის კოდექსი და არა მარტო სისხლის სამართლის, სამოქალაქო კოდექსშიც ასეა. ჩვენს კანონმდებლობაში 80% რუსულია ისევე, როგორც გერმანიაშიც რუსულია, ეს არის ზოგადი კანონმდებლობა“, - აცხადებს ნანა კაკაბაძე for.ge- სთან საუბრისას.