ზუსტად იმ დროს, როცა რუსეთ-უკრაინის ომი მიმდინარეობს, მოსკოვში ქართული კულტურის დღეებისთვის მოიცალეს. 11- 13 დეკემბერს მოსკოვში მცხოვრები ქართველები ღონისძიების გამართვას გეგმავენ, რომელიც დაგვირგვინდება გრანდიოზული კონცერტით, სახელწოდებით, „ჩვენ ერთად ვართ“.

რუსეთ-უკრაინის ომის ფონზე რამდენად სწორად არის შერჩეული ქართული კულტურის დღეების თარიღი მოსკოვში, ამას ახსნა განსხვავებული პოლიტიკური გემოვნების მიხედვით შეიძლება მოეძებნოს. წინასწარი ინფორმაციით, ღონისძიებაში მონაწილეობას მიიღებენ ქართველი და რუსი შემსრულებლები, ქორეოგრაფიული ანსამბლები. ასევე, იგეგმება გამოფენების მოწყობა, ქართული კულინარიის მასტერ-კლასების ჩატარება, დაგეგმილია კონფერენცია მიგრაციის შესახებ.

არსებული ინფორმაციით, ღონისძიებაში მონაწილეობას მიიღებენ, ასევე, ე.წ. ფედერალური ეროვნულ-კულტურული ავტონომიისა და რუსეთის ხელისუფლების წარმომადგენლები. ღონისძიების ორგანიზატორია ბათუმში დაბადებული დავით ცეცხლაძე.

პოლიტოლოგი, საგარეო საქმეთა ყოფილი მინისტრი ირაკლი მენაღარიშვილი for.ge-სთან საუბრისას აცხადებს, რომ გაუგებარია, რატომ უნდა ჩატარდეს ქართული კულტურის დღეები მოსკოვში, სასიკეთოს რას გვაძლევს ასეთი ღონისძიებები?! პოლიტოლოგის აზრით, უკრაინა-რუსეთის ომიც რომ არ იყოს, არც სხვა პერიოდში იყო გამართლებული მსგავსი ღონისძიებების მოწყობა.

„სრულ გაუგებრობას იწვევს ჩემში ასეთი იდეა. საინტერესოა, როგორი იქნება ქართული კულტურის დღეების ფორმატი მოსკოვში, ერთად იქნებიან რუსები და ქართველები?! იქვე იქნებიან ოკუპირებული რეგიონების წარმომადგენლებიც? ცხადია, რუსები სადაც არიან, ოკუპირებული რეგიონების წარმომადგენლებიც იქვე იქნებიან“, - აცხადებს for.ge- სთან საუბრისას ირაკლი მენაღარიშვილი.

მისი აზრით, მოსკოვში ამ ღონისძიებაზე დასასწრებად ქართული დასების და შემსრულებლების წასვლაც კონტრპროდუქტიული და სრული უაზრობა იქნება, მით უმეტეს, ისეთ სიტუაციაში, როცა რუსეთი უკრაინას წყლისა და დენის გარეშე ტოვებს. ირაკლი მენაღარიშვილის შეფასებით, ეს ნორმალური სიტუაცია არ არის. ამდენად, გინდ მშვიდობიანი დრო იყოს, გინდ არამშვიდობიანი, რუსეთთან მიმართებით ასეთი ღონისძიებები ცუდის გარდა არაფრის მომტანია.

ანალიტიკოსი იგორ კვესელავა for.ge-სთან საუბრისას აცხადებს, რომ შევარდნაძის პერიოდში დაიწყო აფხაზეთის ომი, რაც ამერიკისა და რუსეთის დაპირისპირების შედეგი იყო. 1993 წელს დავკარგეთ აფხაზეთი. ამის შემდეგ რუსეთში დაახლოებით 1 მილიონი ადამიანი გადავიდა საცხოვრებლად საქართველოდან. დღესაც ყველა ეკონომიკური მონაცემით დასტურდება, რომ რუსეთიდან შემოდის ყველაზე მეტი თანხა საქართველოში, ხორციელდება გადმორიცხვები, რომლითაც თავს ირჩენენ ჩვენს ქვეყანაში. ეკონომიკურ ზრდაზე როცა ლაპარაკობს ჩვენი ხელისუფლება, აქ უზარმაზარი როლი აქვს რუსეთს. ამდენად, იგორ კვესელავას აინტერესებს, ჩვენ რომ შევწყვიტოთ ახლა ეკონომიკური, კულტურული ურთიერთობა რუსეთთან, მისაღები იქნება? ჩვენი ხალხისთვის კარგი იქნება?

„ვერ დავეთანხმები რუსეთთან ეკონომიკური და კულტურული ურთიერთობის შეწყვეტას. ქართული კულტურის დღეების გამართვა მოსკოვში ეს არის სახელმწიფოთა შორის ჩვეულებრივი ურთიერთობა. ომი ომია, მაგრამ ომის დროსაც ადამიანებს აქვთ ამ ტიპის ურთიერთობები. ამჟამად რუსეთთან ომი არ გვაქვს. როცა ჩვენ აგვისტოს ომი გვქონდა რუსეთთან, რას აკეთებდა მაშინ უკრაინა? რაიმე ეკონომიკურ საშუალებას გვაძლევდა? მხარს გვიჭირდა? პირიქით, უკრაინელი მოხალისეები ქართველების წინააღმდეგ იბრძოდნენ. უფრო უარესიც, როცა ზვიად გამსახურდიას კანონიერი ხელისუფლება ჩამოაგდეს და დაამხეს, მაშინ ბალტინისა და კრავჩუკის (უკრაინის პრეზიდენტი) მეშვეობით საქართველოში შემოვიდნენ უცხო ნაწილები, შემოვიდნენ ოკუპანტი ძალები, მხარი დაუჭირეს უკანონო ხელისუფლებას და საბოლოოდ ყველაფერი გამსახურდიას მკვლელობით დასრულდა“, - აღნიშნა იგორ კვესელავამ.

მანვე განმარტა, რომ ისტორიული პასაჟები არ უნდა დავმალოთ. მოსკოვში ქართული კულტურის დღეების გამართვა კი ხალხთა შორის ურთიერთობას ნიშნავს. შეიძლება პოლიტიკოსებმა ერთმანეთთან ურთიერთობა გაწყვიტონ, შეიძლება ხელისუფლებებმა ერთმანეთთან დიპლომატიური ურთიერთობაც შეწყვიტონ, მაგრამ საზოგადოება, ხალხი, მეცნიერები, მწერლები, კულტურის მოღვაწეები, სპორტსმენები ამ ურთიერთობას არ უნდა წყვეტდნენ.

ამიტომ ამ სიტუაციაში მოსკოვში ქართული დღეების გამართვა იგორ კვესელავას აბსოლუტურად გამართლებულად მიაჩნია, თუნდაც იმიტომ, რომ ყველამ იცის უკრაინის ხელისუფლების დამოკიდებულება საქართველოს მიმართ. ანალიტიკოსის თქმით, ჩვენი ერი უკრაინას ყველანაირ მხარდაჭერას უცხადებს, მაგრამ უკრაინელების დამოკიდებულება არ უნდა იყოს არც სახელისუფლებო, არც უკრაინის პრეზიდენტის დონეზე გადასაწყვეტი. ახლა ჩვენი მთავარი ამოცანაა, საქართველო გაძლიერდეს ეკონომიკურად.

„ზოგიერთები ხბოს აღტაცებით ხვდებიან საქართველოში უცხოელების ჩამოსვლას, თუ რას იტყვის ვიღაც კონგრესმენი. პარალელურად წამდაუწუმ გაისმის „რუსეთი ოკუპანტია“, რადგან უკრაინასთან აქვს ასეთი დამოკიდებულება. სინამდვილეში, რუსეთი უკრაინასთან დამოკიდებულების გამო კი არ არის ოკუპანტი, არამედ ჯერ საქართველოსთან ურთიერთობის გამოა ოკუპანტი. დავუშვათ, აფხაზეთისა და ცხინვალის რეგიონების საკითხი უცბად გადაწყდა იმ პირობებით, რაც არსებობდა თავის დროზე, რომ ფედერაციული რესპუბლიკა ყოფილიყო. თუკი რუსეთი ამას არ შეეწინააღმდეგება და მივიღებთ სახელმწიფოს სახელმწიფოში აფხაზეთის სახით, მაშინ ჩვენ აღარ გავაგრძელებთ სიტყვა „ოკუპანტის“ დაძახებას. ვფიქრობ, უნდა აღვადგინოთ დიპლომატიური ურთიერთობა რუსეთთან. დიპლომატია არის ბრძოლა, წართმევა, მორიგება, მოტყუება, დიპლომატიით რაღაცას უნდა მივაღწიოთ, ვიდრე ის, რომ საზღვართან მიდის ზოგიერთი ჩვენი ოპოზიციონერი, ჩაიხდის შარვალს, რაც სამარცხვინოა იმ ერისთვის, რომელსაც საუკუნეების განმავლობაში უზარმაზარი კულტურა გააჩნია. რუსეთს უნდა ებრძოლო ხელოვნებით, სპორტით, პოლიტიკით, დიპლომატიით“, - მიიჩნევს იგორ კვესელავა.