ექსპერტთა ნაწილი მიიჩნევს, რომ დაწყებულია სამიზნე ქვეყნების, მათ შორის, საქართველოს მოსახლეობის რუსიფიკაცია. ამას ისიც ადასტურებს, რომ პუტინმა ახალი კონცეფცია დაამტკიცა, რომლის თანახმადაც, ლატვიასთან, ლიეტუვასთან, ესტონეთთან, საქართველოსა და მოლდოვასთან ურთიერთობისას გათვალისწინებულ იქნება ამ ქვეყნებში რუსულენოვანი მოსახლეობის უფლებების დაცვა.

ექსპერტი ხათუნა ლაგაზიძე ფიქრობს, რომ რუსიფიკაციასთან ერთად მიმდინარეობს საქართველოს მშვიდობიანი ოკუპაციის დაანონსება, რასაც ემატება წლეულს ათიათასობით რუსი დესანტის გადმოსხმა საქართველოში.

„ყოფილი პოლიტპატიმრები ადამიანის უფლებებისთვის“ თავმჯდომარე ნანა კაკაბაძე არ ფიქრობს, რომ საქართველოს რუსიფიკაცია მიმდინარეობს. მისი განმარტებით, საბჭოთა კავშირის დროს, როდესაც რუსეთი მართლაც რუსიფიკაციით გვემუქრებოდა, მაშინ ვერ განხორციელდა ეს გეგმა. დღეს ამის საფრთხე არ არსებობს. ამიტომ, თუკი ვინმეს ეშინია რუსების მოზღვავების, ნანა კაკაბაძე მათ შეახსენებს, რომ საერთოდ რუსებთან, საბჭოთა კავშირში არ ვცხოვრობდით?! ამის მიუხედავად, ჩვენი კულტურა, ენა, ჩვენი ღირებულებები მაშინ რომ იყო დაცული, ნეტავ, ახლა იყოს ისე დაცული.

„ცხადია, შეიძლებოდა, საბჭოთა კავშირის დროს უკეთესადაც ვყოფილიყავით, მაგრამ, ყოველ შემთხვევაში, დღევანდელ დღეზე უარესად ნამდვილად არ იყო ჩვენი გინდაც ეროვნული ღირებულებები, ტრადიციები, მენტალობა, ქართული ენა და ეს ხდებოდა საბჭოთა კავშირის 70 წლიანი ბატონობის მიუხედავად. დღეს ჩვენ რაც გვემუქრება, ეს არის ყურადსაღები, ანუ ჩვენი ღირებულებების და ტრადიციების ნგრევა, ამ ღირებულებების სიმახინჯეებით ჩანაცვლება. როცა ვიგრძნობთ, რომ რუსეთისგან რუსიფიკაციის საფრთხე გვემუქრება, მაშინ ხმაც უნდა ამოვიღოთ და ყველანაირი ზომებიც მივიღოთ. ახლა რაც გვემუქრება, ის არის, რომ გამოდის ამერიკის ელჩი, თითს გვიქნევს, გვამუნათებს, ჭკუას გვარიგებს, მოსამართლეებს ხვდება, განაჩენებს რევიზიას უტარებს, სიაში ჩასმულ მოსამართლებს სიიდან იღებს“, -აცხადებს ნანა კაკაბაძე for.ge-სთან საუბრისას.

პოლიტოლოგი სოსო ცინცაძე მიიჩნევს, რომ რუსიფიკაცია საქართველოში ყოველთვის იყო, პირველსავე დღიდან მოყოლებული, როდესაც საქართველოს უკანასკნელი მეფე გიორგი მე-12 გარდაიცვალა და რუსებმა დაიწყეს ქართველების დაფიცება რუსეთის იმპერატორის ერთგულებაზე. იმ დღიდან დაწყებული, მოხდა ჩვენი ეკლესიის ავტოკეფალიის გაუქმება, დღის წესრიგში დადგა გიმნაზიებში რუსული ენის სწავლების აუცილებლობა, შემდეგ უკვე უფროსი თაობა მოესწრო ლიგაჩოვის პირველ ჩამოსვლას საქართველოში რუსული ენის სწავლების გაძლიერების შესახებ, გაიზარდა რუსული ენის საათები სკოლებში, უმაღლესებში, ასე რომ, რუსიფიკაცია სულ მიმდინარეობს.

„ეს არის რუსების გენეტიკური კოდი, ნებისმიერი რუსი იმპერიალისტია, თვით რუსი ინტელიგენტიც კი. ჩემი სიცოცხლის ნახევარი მოსკოვში მაქვს გატარებული, დისერტაცია იქ დავიცავი, იქ ვსწავლობდი, დღესაც რუსეთში თეორიულად, ქაღალდზე ვითვლები ერთ-ერთი წამყვანი ინსტიტუტის სამეცნიერო საბჭოს წევრად, არადა, 20 წელია, რუსეთში არ ვყოფილვარ. მარტო სოლჟენიცინი ხომ არ იყო იმპერიალისტური აზროვნების? იგივე დოსტოევსკი, ეს დიდი მწერალი, იმპერიალისტი არ იყო? ის სლავიანოფილების იდეური დროშა იყო. თავიდანვე ასე იყო, „ვლადეი კავკაზ“ -ვლადიკავკაზი, ამ სახელებს რუსები შემთხვევით არ არქმევდნენ. თვითონ ეკატერინემაც თავის შვილიშვილებს ალექსანდრე და ნიკოლოზი დაარქვა. მისი გეგმა იყო, „კრესტ ნად სვიატოი სოფიეი“, ე.ი. სოფიის ტაძარზე ჯვარი აღემართა და ალექსანდრე უნდა კურთხეულიყო ბიზანტიის იმპერატორად. რასიზმში არ მინდა გადავვარდე, მაგრამ მოსკოვში რომ ვცხოვრობდი, სადაც ნაქირავები მქონდა ბინა, ჩემი რუსი მეეზოვე ზევიდან მიყურებდა, არადა, მე მეცნიერ-მუშაკი ვიყავი, სოციალურად მასზე გაცილებით მაღლა გახლდით, მაგრამ მე მისთვის ვიყავი „ინოროდეცი“. ლოთი, „ბასიაკი“ მეეზოვე, რომელიც სამ მანეთს მთხოვდა არყისთვის, ზემოდან იყურებოდა. ეს თვისება ყველა რუსს აქვს. იგივე სოლჟენიცინი, კი, დიდი მწერალი იყო, „არქიპელაგი გულაგი“ დაწერა, ნობელის პრემიაც დაიმსახურა, მაგრამ მისი სტატია „კაკ აბუსტროიც რასიუ“, ეს არის ერთგვარი შოვინისტური მანიფესტი, შოვინისტური პროგრამა. ყველაფერს თავი დავანებოთ, „ველიკორუსკი შოვინიზმის“, ამ ტერმინის ავტორი ლენინია“, - აცხადებს სოსო ცინცაძე ჩვენთან საუბრისას.

ამასთან, ანალიტიკოსი მიიჩნევს, რომ რუსები შეიძლება საქართველოში შემოვიდნენ ტურისტებად, დაისვენონ, დრო გაატარონ, მაგრამ ჩვენ უნდა დავიცვათ პრინციპი, რაც ჩვენი წინაპრებისგან გაგვიგონია, „სტუმარო, დილით ოქრო ხარ, შუადღეს ვერცხლად იქცევი; თუ ძაან შეგიგვიანდა, სპილენძად გადაიქცევი“. ასე რომ, სტუმარმაც მობეზრება იცის.