ბოლო პერიოდში, უფრო კონკრეტულად კი, მას შემდეგ, რაც საქართველომ ევროკავშირის კანდიდატის სტატუსი ვერ მიიღო, განსაკუთრებით გააქტიურდა საუბარი „ქართული ოცნების“ დამფუძნელისა და ყოფილი თავმჯდომარის, ბიძინა ივანიშვილის პოლიტიკაში თანამდებობრივად დაბრუნების თაობაზე. აღნიშნულის შესახებ საუბარი ოპოზიციურ სპექტრში დაიწყო და ცალკეული ევროპარლამენტარების მიერ გააჟღერებული კრიტიკით გაგრძელდა.

საუბარია, რომ ბიძინა ივანიშვილი ფორმალურად დაუბრუნდეს პოლიტიკას და გარკვეულ პასუხისმგებლობაც აიღოს ხელისუფლების მიერ ჩადენილ შეცდომებსა და არგაკეთებულ საქმეებზე. ანალიტიკურ და პოლიტიკურ წრეებში აცხადებენ, რომ ბიძინა ივანიშვილის პოლიტიკაში თანამდებობრივად დაბრუნება არაფერს შეცვლის და რეალურად, არც ყოფილ თავმჯდომარეს არ აწყობს ეს.

ანალიტიკოსი რამაზ საყვარელიძე ბიძინა ივანიშვილის ხელისუფლებაში დაბრუნების შესაძლებლობაზე საუბარს პროვოკაციულს უწოდებს და For.ge-სთან საუბარში აცხადებს, რომ ამ შემთხვევაში, ოპოზიცია ისევ დაიწყებს საუბარს, თითქოს ქვეყანას ოლიგარქი მართავს. მისი თქმით, „ქართული ოცნების“ მესამე ვადით არჩევის აუცილებლობა 2024 წელს, შესაძლოა მისაღები ალტერნატივის არარსებობის გამო დადგეს.

„ეს იდეა პროვოკაციისთვის არის შემოგდებული. გვახსოვს ივანიშვილი იყო პრემიერ-მინისტრი და გვესმოდა კრიტიკა და ამის ძირითადი წყარო ოპოზიცია გახლდათ. ახლა ვამბობთ, რომ უნდა დაბრუნდეს და ამ შემთხვევაშიც იგივე მოხდება, - ოპოზიცია ატეხავს ამბავს, რომ მილიარდელი მართავს სახელმწიფოს. ვფიქრობ, ეს „ქართულ ოცნებას“ და ივანიშვილს არ აწყობს.

ხალხისთვის მომაბეზრებელი ხდება ერთი და იგივე პოლიტიკური ჯგუფი დიდხანს ხელისუფლებაში, მაგრამ მისაღები ალტერნატივა რა არის? ბიძინა ივანიშვილი თუ რამით დაეხმარება არჩევნების დროს თავის პარტიას, ეს იქნება ავტორიტეტით. როდესაც მეტოქეს ავტორიტეტი არ აქვს, მაშინ რაღა საჭიროა ივანიშვილის ავტორიტეტი?! - მეორედ რომ დაბრუნდა ივანიშვილი პოლიტიკაში, თქვა, რომ ნაპრალი გაჩნდა პარტიასა და საზოგადოებას შორის, თუმცა დღეს ეს ნაპრალი არ ჩანს.

პოლიტიკური ჯგუფის მომწიფების პროცესი „ქართულ ოცნებაში“ შესაძლოა დაიწყოს, ალბათ, თვითონ პარტიაშიც ფიქრობენ, რომ მესამე ვადით ხელისუფლების შენარჩუნება გაუჭირდებათ ერთი და იგივე შემადგენლობით. ვფიქრობ, „ოცნების“ წიაღში დაიწყება სხვადასხვა ჯგუფების ფორმირება“, - განაცხადა რამაზ საყვარელიძემ For.ge-სთან.

ფილოსოფოსი ზაზა ფირალიშვილი თვლის, რომ ბიძინა ივანიშვილის პოლიტიკაში თანამდებობრივად მესამედ დაბრუნება პოლიტიკურ ვითარებას არ შეცვლის და არც „ქართულ ოცნებაზე“ იმოქმედებს დადებითად ეს ფაქტი.

„ივანიშვილი პოლიტიკიდან არ წასულა. ასე რომ, მის დაბრუნებაზე ლაპარაკი არ უნდა იყოს. ის შეინარჩუნებს თავის გავლენას „ქართულ ოცნებაზე“ და ქართულ პოლიტიკაში ყოფნა სხვა არის?! პოლიტიკური თანამდებობის დაკავების შემთხვევაში, პასუხისმგებლობები დაეკისრება, თუმცა არსებითად ახალი არაფერი მოხდება.

თანამდებობრივად არ მგონია, რომ ის მესამედ დაბრუნდეს. გადაწყვეტილებების მიღების მექანიზმი იგივე დარჩება და პასუხისმგებლობაც მას დაეკისრება. მის დაბრუნებას პოლიტიკაში თანამდებობრივად, საზრისი არ ექნება, მისი დაბრუნება „ქართულ ოცნებას“ მდგომარეობას ვერ გააუმჯობესებს.

ერთი და იგივე ძალის ხელისუფლებაში ყოფნის ხალხისთვის მოსაბეზრებელია. თუ ივანიშვილი მოძებნის ვინმე ბისმარკს, რომელიც მკეთრად გააუმჯობესებს მდგომარეობას, ამის არ მჯერა. შესაძლოა თვითონ დაიჯეროს, რომ ვინმე ბისმარკია, მაგრამ მისი საკადრო პოლიტიკიდან არ გამომდინარეობს ის, რომ ის შეძლებს განსაკუთრებული ბრწყინვალე ადამიანის მოძებნას, ჯერჯერობით მან ეს ვერ მოახერხა“, - განაცხადა ზაზა ფირალიშვილმა For.ge-სთან.