„ქართული ოცნებიდან“ წასულ სამეულს კიდევ ერთი - გურამ მაჭარაშვილი შეუერთდა. უმრავლესობის ყოფილი წევრი for.ge-თან იმ მიზეზებზე საუბრობს, რის გამოც მმართველი გუნდი დატოვა.

თქვენ შეუერთდით „ქართული ოცნებიდან“ წასულ სამ დეპუტატს. რეალურად, მმართველი გუნდიდან თქვენი წამოსვლის მიზეზი რა იყო, რასთან დაკავშირებით დაგრჩათ კითხვები, რომლებზეც პასუხები ვერ მიიღეთ?

- ერთი ან ორ კითხვაზე პასუხის არმიღებაზე არაა საუბარი. აქ ლაპარაკია ქვეყნის შიგნით და გარეთ არსებულ ბევრ ფაქტზე, რომლის შესახებაც საზოგადოებას უნდა ვაცნობოთ. მას შემდეგ, რაც დამოუკიდებელმა დეპუატებმა აშშ-ს ელჩს კითხვები დაუსვევს, მან ჯერ პასუხის გაცემას თავი აარიდა, მაგრამ ამან მოიტანა ის შედეგი, რომ საზოგადოებამ გაიგო იმ შეხვედრის შესახებ, რომელსაც კელი დეგნანი უარყოფდა და ეს გადაწყვეტილებაც აქედან გამომდინარე მივიღე. ამ შემთხვევაში დამოუკიდებელმა დეპუტატმა უნდა შეძლოს და საზოგადოებას მაქსიმალურად სწორად და ობიექტურად უნდა მიაწოდოს ინფორმაცია.

ჯერ ბიძინა ივანიშვილიმა გამოაქვეყნა წერილი, რასაც მოჰყვა კელი დეგნანის პასუხი. თქვენ რომელი მათგანის პასუხმა დაგიტოვათ უკმაყოფილების გრძნობა?

- ბიძინა ივანიშვილი პოლიტიკიდან წასულია, ქალბატონი კელი დეგნანი მოქმედი ელჩია, რომელიც ჩვენს სტრატეგიულ ქვეყანას წარმოადგენს და მისი განცხადებები მნიშვნელოვანია. ბიძინა ივანიშვილთან დაკავშირებით კითხვები შეიძლება ნაკლები იყოს, რადგან ის პოლიტიკურ პროცესებში არ მონაწილეობს. ელჩი მოქმედია და ის ერევა ამა თუ იმ კანონის მიღების პროცესებში, მაგრამ როდესაც დეპუტატი კითხვას უსვამს, ამითაც უნდა დაინტერესდეს. სწორედ პასუხგაუცემელი კითხვებია, რომელიც ქართულ-ამერიკულ ურთიერთობას აზიანებს. როდესაც ელჩი საუბრობს, რომ საქართველოს ომში ჩართვის საკითხი რუსული ნარატივია, ხომ შეიძლება იქვე თქვას, რომ ომის პროპაგანდა დაუშვებელია?!

ბიძინა ივანიშვილის წერილის გამოქვეყნების შემდეგ, კელი დეგნანმა განაცხადა, რომ საქართველოს ომში ჩართვასთან დაკავშირებით საუბარი არ ყოფილაო...

- როდესაც მასთან კონკრეტული კითხვა იყო, უკრაინის ომის დაწყების შემდეგ, ბიძინა ივანიშვილს შეხვდა თუ არა, მისგან კონკრეტული პასუხი არ მიგვიღია. ამის შემდეგ, როდესაც დეპუტატებმა კითხვით ბიძინა ივანიშვილს მიმართეს, მან განაცხადა, რომ შეხვედრა შედგა. ელჩმა ამის შემდეგ აღიარა, რომ შეხვედრა შედგა. ვერ ვხდები, ამაში დასამალი რა იყო? ხომ შეიძლებოდა ეთქვა, მოხდა შეხვედრა და გარკვეული საკითხები განვიხილეთო. მისგან არ მოგვისმენია, რომ ჩვენ ყველაფერს ვაკეთებთ უკრაინის მხარდასაჭერად, მაგრამ ომის პროპაგანდა დაუშვებელია.

თქვენი საუბრიდან გამომდინარე, მოსალოდნელია, რომ „ოცნებიდან“ წასული დეპუტატების მსგავსად, კელი დეგნანს წერილით თქვენც მიმართოთ?

- არა მგონია წერილობით მივმართო, რადგან დეპუტატის განცხადება საჯაროა. აქ მთავარი არის სხვა საკითხი - დიდი სახელმწიფოები ძალაუფლებას ინაწილებენ, სადაც პატარა სახელმწიფოებს რამეს ნაკლებად ეკითხებიან. ამ შემთხვევაში, როდესაც ხელისუფლებაში ხარ, მაღალი პასუხისმგებლობა გჭირდება, რადგან პოლიტიკურად ჯანმრთელი იყო და როგორც სახელმწიფო არ განადგურდე.

როდესაც ხელისუფლებაში იყავით ამ კითხვების დასმისგან რატომ და რითი იყავით შეზღუდული ან ვინ გზღუდავდათ?

- პრინციპული განცხადებები გამიკეთებია, მაგრამ არსებობს რაღაც ჩარჩო, რასაც ვერ გადააბიჯებ. სწორედ იმიტომ რომ, საქართველო-ამერიკის ურთიერთობის გაფუჭება ვერავინ შეძლოს. ამიტომ გვინდა, საჯაროდ რაღაცები გამოვიტანოთ.

რამდენიმე თვის წინ კელი დეგნანი შუამავლის როლში იყო ხელისუფლებასა და ოპოზიციას შორის. ახლა, ამ ვითარებაში, როდესაც მის მიმართ ამდენი კითხვები გაჩნდა, შესაძლოა მან ეს ფუნქცია დაკარგოს?

- ეს მასზეა დამოკიდებული. ჩვენი მიზანი დღეს არის ის, რომ ხელისუფლების მიმართ წნეხი მოიხსნას.

თქვენ თქვით, რომ საჯაროდ უნდა გამოვიტანოთ ინფორმაციები, რომელიც ხელისუფლების პირობებში არ გამოდის. შესაძლებელია დადგეს მოცემულობა, რომ ამ მიზეზის გამო უმრავლესობა კიდევ დატოვონ სხვებმაც?

- ამ ეტაპზე ვერ გეტყვით, თუ კიდევ ვინმე აპირეს უმრავლესობის დატოვებას. რაც შეეხება საჯაროდ ინფორმაციების გამოტანას, ეს ჩვენი მიზანი არაა. ჩვენი მიზანია რადიკალურ ოპოზიციას დავუმტკიცოთ, რომ „ქართული ოცნება“ ანტიდასავლურ რიტორიკას არ ატარებს.