არის თუ არა ბიძინა ივანიშვილის მიერ გამოქვეყნებული წერილი იმის წინაპირობა, რომ ის პოლიტიკაში დაბრუნებას უკვე მესამედ აპირებს? ივანიშვილმა პოლიტიკიდან უკვე მეორედ წასვლისას თქვა, რომ ქვეყანაში ძალიან გამოუვალი სიტუაცია უნდა შეიქმნას, რომ ის ისევ უკან პოლიტიკაში შემობრუნდეს. არის თუ არა ახლა ეს სიტუაცია და რას ნიშნავს მისი მხრიდან იმის დადასტურება, რომ ამერიკის ელჩთან შეხვედრა უკრაინის ომის დაწყებიდან ერთი თვის თავზე ჰქონდა? არის თუ არა ქვეყნის გარშემო სიტუაცია იმაზე მძიმედ, ვიდრე ეს რეალურად ჩანს?

საჯაროდ დასმულ შეკითხვას ბიძინა ივანიშვილმა საჯაროდ უპასუხა. „ქართული ოცნების“ დამფუძნებელი უკრაინაში ომის დაწყების შემდეგ, ამერიკის ელჩთან შეხვედრას ადასტურებს და ამბობს, რომ შეხვედრა კელი დეგნანის ინიციატივით გაიმართა. რაზე იმსჯელეს მხარეებმა 3 საათის განმავლობაში? - ყოფილი პრემიერ-მინისტრი წერილში შეხვედრის შინაარსზე არაფერს წერს, თუმცა იმავე განცხადებაში ის რამდენჯერმე ახსენებს საფრთხეს, საქართველოში მეორე ფრონტის გახსნასთან დაკავშირებით. ივანიშვილის შეფასებით, ქვეყნის ომში ჩართვის მცდელობა ისევ აქტუალურია, თუმცა რისკები განეიტრალებული. ის საზოგადოებას და ხელისუფლებას მოუწოდებს, იზრუნონ, რომ სტრატეგიულ პარტნიორებთან ურთიერთობა არ დაზიანდეს.

ბიძინა ივანიშვილისგან კელი დეგნანთა შეხვედრის საჯარო დადასტურებას, „ქართული ოცნებიდან“ წასულები რამდენიმე დღის განმავლობაში ითხოვდნენ. დეპუტატები დღეს ამბობენ, რომ კონკრეტული პასუხი ამ საკითხზე უკვე მიიღეს, რადგან მათთვის ნათელია, რაზე იქნებოდა საუბარი ელჩსა და ივანიშვილს შორის.

შეხვედრის კონკრეტულ შინაარსზე არაფერი უთქვამს, თუმცა წერილის შინაარსს სრულად იზიარებს „ქართული ოცნების“ თავმჯდომარე. ირაკლი კობახიძემ აქცენტი იმაზეც გააკეთა, რომ მართველი გუნდისთვის სტრატეგიულ პარტნიორებთან ურთიერთობა პრიორიტეტია. წერილმა რომ ბევრი კითხვა გააჩინა, ამას მმართველ გუნდშიც ადასტურებენ, თუმცა ამბობენ, რომ გარკვეულ საკითხებზე საჯაროდ ვერ ისაუბრებენ.

ბიძინა ივანიშვილმა პოლიტიკიდან წასვლის შესახებ, წელიწადნახევრის წინ გაკეთებული განცხადების შემდეგ საჯარო წერილი დღეს მეორედ გამოაქვეყნა. ყოფილი პრემიერი წერს, რომ არ სურდა პოლიტიკურ პროცესებზე მის ფაქტორს რაიმე გავლენა ჰქონოდა, რაც საჯარო სივრციდან მისი დისტანცირების მიზეზი იყო, თუმცა ივანიშვილი ამბობს, რომ ამავდროულად, როგორც მოქალაქე და ქვეყნის გულშემატკივარი, საქართველოში მიმდინარე მოვლენებს ყურადღებით ადევნებს თვალს.

ანალიტიკოსი ვახტანგ ძაბირაძე for.ge-სთან მიიჩნევს, რომ არ არის გამორიცხული ამერიკის ელჩის ბიძინა ივანიშვილთან ვიზიტის რეალური მიზანი იმის მოთხოვნა ყოფილიყო, რომ ის პოლიტიკაში დაბრუნდეს. შესაძლოა, შეხვედრის მიზეზად სხვადასხვა ვერსიები განვიხილოთ, მაგრამ ამ ვერსიასაც არსებობის უფლება აქვს. ანალიტიკოსი ამბობს, რომ, როგორც ჩანს, ამერიკაშიც არ ფიქრობენ, რომ ივანიშვილი პოლიტიკიდან ბოლომდე წასულია, ამიტომაც მოითხოვა ელჩმა მასთან შეხვედრა. ძაბირაძე მიიჩნევს, რომ საქმე იმაზე ცუდად ჩანს, ვიდრე ეს საჯაროდ საზოგადოებისთვის არის ცნობილი, სხვაგვარად გაუგებარია რატომ უნდა შეხვდეს ამერიკის ელჩი პოლიტიკიდან წასულ ყოფილ პრემიერს და ეს თან დამალოს.

„ზოგადად, ასეთი კონფიდენციალური შეხვედრების შემდეგ განცახდებები არ კეთდება, რა თქმა უნდა, თუ ეს ორივე მხარეს არ სურს. როდესაც ელჩმა ამაზე პასუხი პირდაპირ არ გასცა და თქვა, რომ კარგა ხანია ივანიშვილი არ უნახავს, სწორედ ეს არის მიზეზი, რომ ეს შეხვედრა იყო ამერიკის მხრიდან შემდგარი და ელჩი მხოლოდ შუამავლის როლს ასრულებდა. მან ივანიშვილს ის უთხრა, რაც მისი ქვეყნიდან გზავნილის სახით მიიღო. ამიტომ ელჩის დუმილი ამის ნიშანია, რომ ის ამერიკის ხელისუფლების გარეშე გადაწყვეტილებას ვერ მიიღებს.

ივანიშვილს, უბრალოდ, თანამდებობა არ უჭირავს, თორემ როგორც აღმოჩნდა, არსადაც არ წასულა. აგერ, ამერიკელებიც კი მიიჩნევენ, რომ გადამწყვეტი სიტყვა ამ ქვეყნის მართვაში მაინც მას ეკუთვნის. უბრალოდ, კარგი იქნება, რომ ის დე იურედაც პოლიტიკაში დაბრუნდეს და ხალხს გასაგებად აუხსნას, რა ხდება. ნებისმიერი პროცესი, რომელიც ამ ქვეყანაში მიდის დადებითი თუ უარყოფითი, საბოლოოდ მაინც მას მიეწერება, ამიტომ სჯობია ჩრდილიდან მალევე გამოვიდეს და ღიად ისაუბროს რა ხდება. როდესაც ქვეყნისთვის რთული თემები ჩნდება, ის მაინც წერილობით, ეპისტოლარულ ჟანრში გამოდის და საზოგადოებას გარკვეულ თემებთან დაკავშირებით ინფორმაციას აწვდის. ამიტომ, მე მგონია, რომ სიტუაცია იმაზე რთულად არის, ვიდრე ეს რეალურად საჯაროდ ჩანს“, - ამბობს ძაბირაძე.

მისივე თქმით, ახლა რა პროცესებიც ქვეყნის გარშემო ვითარდება, იმდენად რთულია, რომ შესაძლოა, იურიდიული პასუხისმგებლობაც კი მეორეხარისხოვანი აღმოჩნდეს. ძაბირაძე არ გამორიცხავს, რომ ივანიშვილზე პოლიტიკაში დაბრუნების მოთხოვნით ზეწოლა ხორციელდებოდა. ასევე საუბრის თემა შესაძლოა საქართველოს სანქციებთან მიერთების თემაც ყოფილიყო. ის გამორიცხავს, რომ ამერიკის ელჩს ასე პირდაპირ ქვეყნის ომში ჩართვა მოეთხოვა, თუმცა ფაქტია, რომ ივანიშვილისგან რაღაცა სურდათ.

„გამომდინარე იქიდან, რომ ელჩი საკუთარ პოზიციას ამ დრომდე არ ახმოვანებს, ეს არის პარტნიორებთან საკმაოდ უხეში დამოკიდებულება. როგორც ჩანს, აქ საქმე მარტო იმ ფულს არ ეხება, რომელიც ივანიშვილს დაუყადაღეს. როგორც ჩანს, ვითარება უფრო რთულად არის ივანიშვილის ირგვლივ და ის მოქმედებაზე გადადის. მან საუბრის თემატიკაზე არფერი თქვა, ეს კი ბევრი სპეკულაციის საშუალებას იძლევა. ამიტომ არ გამოვრიცხავ, რომ ვითარება ძალიან მძიმედ არის და ივანიშვილს ისევ პოლიტიკაში დაბრუნება მოუწიოს. ვფიქრობ, საქართველოს მომავალს ძალიან სერიოზული პრობლემები აქვს და სიტუცია ასე მარტივად არ არის. ივანიშვილმა უნდა ისაუბროს რა საკითხთან დაკავშირებით იყო ეს შეხვედრა და ელჩის მოედანზე ბურთი არ უნდა გადააგდოს“, - ამბობს ძაბირაძე.

ანალიტიკოსი დავით ქართველიშვილი კი for.ge-სთან მიიჩნევს, რომ ამ ეტაპზე ბიძინა ივანიშვილის პოლიტიკში დაბრუნების აუცილებლობა არ არსებობს. მისი აზრით, ხელისუფლებამ ომის დაწყებიდან დღემდე, ქვეყანაში თუ მის გარეთ, ყველა მნიშვნელოვან გამოწვევას გაუძლო და ძალიან წარმატებულად გაუმკლავდა. ამიტომ არ არსებობს მიზეზი, რის გამოც ივანიშვილი უკან, პოლიტიკაში უნდა დაბრუნდეს. თუმცა მის გეგმებზე და გადაწყვეტილებაზე ზუსტად ვინმემ მის მაგივრად ისაუბროს რთულია.

„რა თქმა უნდა, ივანიშვილის გეგმების განსაზღვრა ზუსტად რას აპირებს, გამიჭირდება, ყოველ შემთხვევაში, მის პოლიტიკაში დაბრუნებას განსაკუთრებული მიზეზი უნდა ჰქონდეს. ერთხელ ივანიშვილმა ბრძანა, რომ რაღაცა სასწაული უნდა მოხდეს, რომ პოლიტიკაში დავბრუნდეო. ახლა ამ სასწაულის წინაპირობას მე პირადად ვერ ვხედავ. ეს მთავრობა მსოფლიო კრიზისის ფონზე არსებულ გამოწვევებს ძალიან კარგად უმკლავდება. ომის დაწყებიდან დღემდე, პრემიერი წარმოუდგენელ პოლიტიკას აწარმოებს. ის, რომ დღეს ჩვენს ქვეყანაში სიმშვიდეა და ამ პროვოკაციაზე ქვეყანა არ წამოეგო, ხელისუფლების სწორად წარმართული პოლიტიკის შედეგია. თუ ვინმეს ქვეყნის ან მის გარეთ ჰგონია, რომ ივანიშვილი უკან პოლიტიკაში დაბრუნდება და რაღაცა რადიკალურად შეიცვლება, ძალიან სცდება. რაც შეეხება ივანიშვილის მხრიდან ელჩთან საუბრის დეტალებში არშესვლას და ამაზე თავის შეკავებას, ვფიქრობ, ახლა ჯერი ქალბატონ დეგნანზეა. ივანიშვილი ჯენლტმენია, რომელმაც ქალბატონს მისცა განმარტების შესაძლებლობა და იმედი ვიქონიოთ, რომ ეს დუმილი დიდი ხანი არ გაგრძელდება“, -ამბობს ქართველიშვილი.