„დღეს აშშ-სა და საქართველოს ხელისუფლებას შორის დაძაბული ურთიერთობა არის. მაშინ, როდესაც სახელმწიფო დეპარტამენტის პრესსპიკერი ასეთ განცხადებას აკეთებს, ეს სწორედ ამას ნიშნავს“, - ასე შეაფასა სამხედრო ექსპერტმა, ვახტანგ მაისაიამ For.ge-სთან ინტერვიუში სახელმწიფო დეპარტამენტის პრესსპიკერის, ნედ პრაისის განცხადება, რომელიც საქართველოს საკითხს შეეხებოდა.

როგორც ნედ პრაისმა აღნიშნა, ევროპულმა საბჭომ საქართველოს ევროპული პერსპექტივა მიანიჭა რეფორმების საგზაო რუკასთან ერთად, რომელიც საქართველომ უნდა განახორციელოს, რათა კანდიდატის სტატუსი მიიღოს.

- პირველად, ბოლო 30 წლის განმავლობაში, საქართველოს ხელისუფლებას აქვს რთული ურთიერთობა ამერიკასთან. ალბათ, საზოგადოების მხრიდანაც იქნება გარკვეული სიგნალები, რამდენად უჭერს მხარს საქართველოს ხელისუფლების ასეთ მიდგომებს.

მოვლენების როგორ განვითარებას ელოდებით? მოსალოდნელია თუ არა საქართველოდან აშშ-ს ელჩის, კელი დეგნანის გაწვევა?

- ამერიკა არის მსოფლიო წესრიგის ერთ-ერთი გარანტორი სახელმწიფო, ამიტომ, ამერიკასთან ასეთი დამოკიდებულება წარმოადგენს არც თუ იოლ თამაშის წესებს. ძალიან ფრთხილად უნდა იყოს მმართველი პოლიტიკური ძალა, რადგან ამერიკა არ არის რომელიმე სხვა სახელმწიფო, სადაც ჩვენ გვქონდა გარკვეული, დაძაბული ურთიერთობები. ამიტომ, ამერიკასთან თამაში შეიძლება დიდი გართულებისკენ წავიდეს. ამერიკამ თუ გაიწვია ელჩი, ეს ძალიან ცუდი ჟესტი იქნება. 

თქვენ პირადად ელოდებით, რომ ვითარება აქამდე მივა?

- ჯერჯერობით, ამერიკელები ყველანაირად თავს იკავებენ, რომ ასეთი ნაბიჯი გადადგან, საქართველო სტრატეგიული პარტნიორია და მოქმედებს ქარტია. დღევანდელმა მმართველმა პოლიტიკურმა ძალამ უკვე გადააბიჯა „წითელ ხაზებს“, რომლის იქითაც შეიძლება იყოს ძალიან სერიოზული კონფრონტაცია.

რით დაიწყო ეს ყველაფერი, საქართველოსა და აშშ-ს შორის ვითარების დაძაბვა? ხომ არ მოქმედებს რუსეთის ფაქტორი?

- არ მგონია, რომ ეს რუსეთის ფაქტორის გამო იყოს, თუმცა ესეც ყურადსაღებია. როდესაც ამერიკამ გამოაცხადა პირდაპირი ეკონომიკური ბლოკადა რუსეთის წინააღმდეგ, ის მოკავშირეებისგან ელოდებოდა ანალოგიური ტიპის ქმედებას, ეკონომიკური სანქციების განხორციელებას, მაგრამ იგივე არ წამოსულა ჩვენგან. 

ასევე, უკრაინის ხელისუფლების ცალკეული წარმომადგენლები აკეთებდნენ არასწორ განცხადებებს, მაგრამ ასეთ პოლიტიკურ თემებზე აყოლა არც ღირდა. მანამდე გვახსოვს, ამერიკის ელჩის დანიშვნა ამ თანამდებობაზე იბლოკებოდა. 

საქართველოში შეიქმნა კომპატორული ტიპის პოლიტიკური გაერთიანება, რომლის ერთ-ერთი მთავარი ამოცანაა, სხვადასხვა პოლიტიკური მანიპულაციებით შეინარჩუნონ ხელისუფლება. 

თქვენი აზრით, „ქართული ოცნება“ მესამე ვადით ხელისუფლებას შეინარჩუნებს? მმართველი პოლიტიკური ძალა, ალბათ, უშვებს შესაძლებლობას, რომ 2024 წლის საპარლამენტო არჩევნებზე ის აღარ იქნეს არჩეული. ამის ფონზე, საქართველოს ხელისუფლების მხრიდან ამერიკის წინააღმდეგ გაძლიერდება თუ არა მკაცრი რიტორიკა და ბრალდებები?

- ამერიკამ თავის დროზე დიდი როლი ითამაშა ავტორიტარული რეჟიმის მშვიდობიანად დამხობის საქმეში. მიხეილ სააკაშვილის მეორე ვადით დარჩენის დროს, ამერიკამ მკვეთრად შეცვალა მასთან ურთიერთობა, პოლიტიკურ იზოლაციაში მოაქცია და აკრიტიკებდა. როგორც ჩანს, ანალოგიური სცენარი ვითარდება ახლაც. მეორე ვადით მყოფი ხელისუფლება მესამე ვადით არ აპირებს წასვლას. ვფიქრობ, ეს ურთიერთობები კიდევ უფრო მეტად გაუარესდება. 

თქვენ პირადად ხედავთ თუ არა იმის შესაძლებლობას, რომ 2024 წლისთვის შესაძლოა, მესამე, ალტერნატიული ძალა გამოჩნდეს, თუნდაც ოპოზიციური პარტიების კოალიციის შედეგად?

- თუ დღევანდელი 5%-იანი ბარიერი შენარჩუნდება, ახალი ძალის ფორმირების ილუზია არავის ჰქონდეს. შესაბამისად, მმართველი პოლიტიკური ძალა შეინარჩუნებს ამ პოზიციას. შედეგად, ერთი მხრივ, ფარული დაპირისპირება იქნება მხარეებს შორის, მეორე მხრივ ფარული კონსენსუსი, - ვგულისხმობ „ქართულ ოცნებასა“ და „ნაციონალურ მოძრაობას“ - შემდეგ კი, ორივე პოლიტიკური ძალა გადაიქცეს ავტოკრატულ, პოლიტიკურ პარტიად და საქართველოში ჰიბრიდული რეჟიმი დამყარდეს. ამის საფრთხე არსებობს, თუკი ორპარტიული მმართველობა ქვეყანაში შენარჩუნდება. დღეს სად იწყება, ან სად მთავრდება „ქართული ოცნება“ და „ნაციონალური მოძრაობა,“ მგონი თვითონაც ვერ არკვევენ.

გამოდის, რომ საქართველოსთვის ევროკავშირის კანდიდატის სტატუსის მიღების შესაძლებლობამ შესაძლოა კვლავ რამდენიმე წლით გადაიწიოს?

- ევროკავშირის კანდიდატის სტატუსის მიღებაზე აღარ იქნება საუბარი, არამედ იმაზე, ადამიანები საქართველოში დარჩებიან თუ არა. ევროკავშირის კანდიდატობას ვინღა ჩივის?! - ამის ტენდენცია, სამწუხაროდ, ნელ-ნელა იკვეთება, თუ არ მოხდება 2%-იანი ბარიერის შემოღება. 

ვინ ჩააგდო შარლ მიშელის დოკუმენტი, რომელსაც შეეძლო ქვეყანა გადაეყვანა სულ სხვა დონეზე?! - ჩააგდეს „ქართულმა ოცნებამ“ და „ნაციონალურმა მოძრაობამ.“ მათ უნისონში, ერთად და ჰარმონიულად ჩააგდეს საქართველოს პოლიტიკური განვითარების ძალიან მნიშვნელოვანი და სტრატეგიული გეგმა.