აშშ-ის სახელმწიფო დეპარტამენტის პრეს-სპიკერმა, ნედ პრაისმა ბრიფინგი საქართველოზე საუბრით გახსნა. მისი თქმით, დეზინფორმაცია და პერსონალური თავდასხმები აშშ- ის ელჩ კელი დეგნანზე და მის გუნდზე არ შეესაბამება პარტნიორებს შორის არსებულ კომუნიკაციას. მისივე განცხადებით, აშშ მხარს უჭერს ქართველი ხალხის ევროპულ მისწრაფებებს, თუმცა ზოგიერთი ქართველი ოფიციალური პირის რიტორიკა მოსახლეობის ამ მიზნიდან ყურადღების გადატანას ემსახურება.

პარლამენტის ვიცე-სპიკერმა, არჩილ თალაკვაძემ აშშ-ის სახელმწიფო დეპარტამენტის პრეს-სპიკერის განცხადება შეაფასა, რომლის თქმით, თავდასხმა და შეურაცხყოფა რადიკალური ოპოზიციის მხრიდან იყო.

„ხაზგასმით უნდა ითქვას, რომ აშშ-ის ხელისუფლებაზე, რომელიმე მის წარმომადგენელზე საქართველოს ხელისუფლების რომელიმე ოფიციალური წარმომადგენლის მხრიდან არასდროს ყოფილა არანაირი თავდასხმა და ასეთი მომავალშიც გამორიცხულია. აშშ არის საქართველოს ნომერ პირველი სტრატეგიული პარტნიორი, ჩვენ ათწლეულობის განმავლობაში ძალიან მჭიდრო თანამშრომლობა და ურთიერთობა გვაქვს. რა თქმა უნდა, ჩვენთვის ეს ძალიან ფასეულია. თუ თავდასხმა და შეურაცხყოფა ვნახეთ, ეს იყო რადიკალური ოპოზიციის მხრიდან, ამას არაერთი შეფასება მოჰყვა. ყველას გვახსოვს, „ნაციონალური მოძრაობის“ წარმომადგენლები, თუ რა შეფასებებს აკეთებდნენ დასავლეთის ელჩების მიმართ ამ წლების განმავლობაში, წარსულშიც და საერთოდ, ვხედავთ, რომ რადიკალური ოპოზიცია ცდილობს, რასაც აკეთებენ, მმართველ პარტიას გადააბრალონ“, - განაცხადა თალაკვაძემ.

პოლიტოლოგ რამაზ საყვარელიძე მიიჩნევს, რომ აშშ-ს ელჩის, კელი დეგნანის მიმართ წამოწყებული კამპანია არ გამოიწვევს მის გაწვევას, თუმცა შესაძლოა, ელჩი არდადეგებზე ამერიკაში დაბრუნდეს და სხვა თანამდებობაზე მოგვევლინოს.

„ელჩის გაწვევა მკვეთრი ჟესტია, იგივე შედეგით შესაძლებელია უფრო რბილი ფორმები მოიძებნოს. ანუ, კელი დეგნანის გაწვევის საკითხი საქართველომ არ დააყენოს, მაგრამ ის ზაფხულის არდადეგებზე ამერიკაში წავიდეს და შემდეგ სხვა თანამდებობაზე აღმოჩნდეს. ამ მიზეზით შეიძლება ელჩის შეცვლა. ასევე ნიშანდობლივი იყო აშშ-ს სახელმწიფო დეპარტამენტის სპიკერის, ნედ პრაისის ბრიფინგი, სადაც მან დეგნანის თემა ახსენა და თქვა, რომ მერიკა კელი დეგნანს მხარს უჭერს, მაგრამ ჟურნალისტის კითხვაზე მოსამრთლეებთან დაკავშირებით, მისი პასუხი იყო: არ ვიცი, დავაზუსტებო. ნედ პრაისის მხრიდან აღნიშნული განცხადება ცოტა არადამაჯერებელი იყო, რადგან სწორედ დეგნანის გარშემო ატეხილ სიტუაციაში, მთავარი წამყვანი თემა სწორედ მოსამართლეების საკითხია. დამრჩა შთაბეჭდილება, რომ აშშ-ს სახელმწიფო დეპარტამენტის სპიკერმა პასუხს თავი აარდა. კი ბატონო, პოლიტიკაში ასეთი ქმედება არსებობს, როდესაც პასუხს თავს არიდებ და რადგან ნედ პრაისმა პასუხს თავი აარიდა, ე.ი. თვლის, რომ ამერიკას ამ საკითხებში დეგნანის წყალობით წამგებიანი პოზიცია უკავია“, - განუცხადა FOR.GE-ს რამაზ საყვარელიძემ.

პოლიტოლოგის თქმით, მოსამართლეებთან დაკავშირებით კელი დეგნანს საკუთარი პოზიცია არ დაუფიქსირებია და ის ამერიკის კარნახით იქცევა.

„მოსამართლეებთან დაკავშირებით, თითქმის დარწმუნებული ვარ, რომ დეგნანის ქმედება ამერიკიდან იყო ნაკარნახევი. თუ გავიხსენებთ, ტრამპის დროინდელ დეგნანს, აბსოლუტურად სხვა აქცენტების დიპლომატი იყო. როგორც კი ამერიკაში ხელისუფლება შეიცვალა, სხვა ტიპის დიპლომატი გახდა. სავარაუდოდ, არსებობს რაღაცა წრეები, რომლებიც აშშ-ს ადმინისტრაციასთან ერთად შეიქმნა და მასზე გავლენის მატარებელნი არიან. ამ წრეების მოქმედებამ შეცვალა მისი ქცევის სტილი. ამერიკის მხრიდან საქართველოს საკითხებთან დაკავშირებით აშკარად იკითხებოდა მწვანე შუქის ანთება, ეს იქნებოდა განცხადებები, თუ რასაც მოსამართლის დასჯა ჰქვია. თუ ეს პრეცედენტი ამერიკამ საქართველოს მიმართ არ შეცვალა, მაშინ დეგნანი უნდა შეცვალონ. თუ არ შეცვალეს და ასე გაგრძელდა, მაშინ ირაკლი კობახიძის წამოყენებული პრინციპი (საკანონომდებლო მხარდაჭერა გაუკეთონ მოსამართლეებს და მიიღონ კანონი, რომელიც ასეთ ჩარევას გამორიცხავს) დამაფიქრებელ იქნება“, - აღნიშნა პოლიტოლოგმა.

ანალიტიკოს გია აბაშიძის განცხადებით, ამ ეტაპზე კელი დეგნანის გაწვევა არ მოხდება.

„ამ ეტაპზე არ მგონია კელი დეგნანის გაწვევა მოხდეს. სხვათა შორის საქართველოს ისტორიაში პირველად მოხდა ის, რომ როდესაც ლეგიტიმური კითხვა დაისვა - თუ რა მოხდა მოსამართლე ჩხიკვაძესთან დაკავშირებით, იყო თუ არა მის მიმართ რაიმე ზეწოლა, რატომღაც ამერიკულმა მხარემ აღნიშნული კითხვა თავდასხმად აღიქვა. თუ ჩვენ ირაკლი კობახიძის განცხადებას ვნახავთ, იქ არსად არ არის მსგავსი თავდასხმა ნახსენები. რადგან მოსამართლის მიერ გამოქვეყნებული წერილი არსებობს, ამიტომ საჭიროა სიტუაციაში გარკვევა. აქ ერთი მთავარი რამ არის - რატომღაც როდესაც „მთავარი არხიდან“ და რადიკალური ოპოზიციიდან ელჩების მიმართ თავდასხმები იყო, მაშინ რეაქცია არ ჰქონდათ. ვფიქრობ, ეს გაურკვევლობა, რომელიც დაკავშირებულია სასამართლო სისტემასთან, მოგვარებადია და სიტუაცია ისე არ გამწვავდება, როგორც დესტრუქციულ ოპოზიციას სურს. ასე რომ, გაუგებრობა მეგობრებშიც ხდება. გაუგებრობა მეზობელ ქვეყნებ შორის არსებობს და ეს ტრაგედიით არ სრულდება“, - აღნიშნა გია აბაშიძემ.  

ცნობისთვის, მოსამართლე ლაშა ჩხიკვაძემ წერილში დაწერა: „მას შემდეგ რაც, მე ნ. გვარამიას საქმეზე გამოვაცხადე განაჩენი, მე მქონდა შეხვედრა თბილისის საქალაქო სასამართლოს შენობაში ა.შ.შ-ს საელჩოს ერთ-ერთ თანამშრომელთან (ა.შ.შ.-ს იუსტიციის დეპარტამენტის ხაზით - კევინ ბურკთან), რომელმაც საუბრისას გამომკითხა საქმის ფაქტობრივი გარემოებები და მითხრა, რომ ელჩს აინტერესებს ამ საქმეზე რატომ მივიღე გამამტყუნებელი განაჩენი და განსაკუთრებით რატომ გამოვიყენე სასჯელად თავისუფლების აღკვეთა. ჩემი შეფასებით, ეს იყო ანგარიშის მოთხოვნა კონკრეტულ საქმესთან დაკავშირებით. ამას კი მოაყოლა, რომ სულ რამდენიმე დღეში დაგეგმილი ვიზიტში (სადაც 6 სისხლის პროფილის მოსამართლე) მივდიოდით ა.შ.შ-ში და სადაც ყველაფერი უკვე გაწერილი იყო, სამწუხაროდ, ჩემი მონაწილეობა არასასურველი იქნებოდა და სიიდან ამოღებული ვიყავი“.

მოსამართლის საპასუხოდ კი, აშშ-ის ელჩმა საქართველოში კელი დეგნანმა განაცხადა, რომ ნებისმიერი ვარაუდი, რომ აშშ ერეოდა სასამართლო პროცესში, სიმართლეს არ შეესაბამება.