ყალბია თუ არა სოსო გოგაშვილის მიერ არჩევნების გაყალბებასთან დაკავშირებით მისთვის ცნობილ ფაქტებთან დაკავშირებული ინფორმაციები? ეცდება თუ არა დასავლეთი საქართველოში მისთვის სასურველი ხელისუფლების მოყვანას? რამდენად დაძაბავს ქვეყანაში პილიტიკურ პროცესებს 12-პუნქტიანი „საშემოდგომოს“ გამოყოლება საქართველოს ხელისუფლებისთვის და შეეწირება თუ არა ამ რთულ პროცესს ქვეყნის მოქმედი პრემიერი? - ამ საკითხების ირგვლი for.ge-ს საკუთარ მოსაზრებებს უზიარებს ყოფილი პოლიტპატიმარი და უფლებადამცველი ნანა კაკაბაძე.

ბოლო პერიოდის მოვლენები ცხადყოფს, რომ საკმაოდ დაძაბული და რთული ეტაპის გავლა მოუწევს ქვეყანას, არამხოლოდ ევროკავშირის 12-პუნქტიანი გეგმის შესასრულებლად. რამდენად მისაღწევია პოლარიზაციის შემცირება და დეოლიგარქიზაცია, რაზეც მუდმივად აპელირებს ოპოზიცია და ვინ შეიძლება მოყვეს დეოლიგარქიზაციის ბადეში? ოპოზიცია ივანიშვილის პოლიტიკიდან ჩამოშორებას და პრემიერ ირაკლი ღარიბაშვილის გადადგომაზე აკეთებს აქცენტს, ხელისუფლება კი ნაცებში ხედავს კლასიკურ ოლიგარქებს...

- მსოფლიო იცვლება. კარგია, რომ ჩვენმა ხელისუფლებამ დაინახა ეს ცვლილებები. მნიშვნელოვანია, რომ ამ დროს ჩვენი ხელისუფლების რეაქციაც იყოს ადეკვატური. მიუხედავად სერიოზული წნეხისა, რომელსაც ჩვენი ხელისუფლება დასავლეთიდან განიცდიდა, ასევე აქაური მოღალატეებისგან, კარგია, რომ ვერ მოხერხდა საქართველოს ჩართვა მიმდინარე ომში. შეიძლება ითქვას, ეს არის ქართული პოლიტიკის გამარჯვება, ვინაიდან ქვეყანა გადაურჩა განადგურებას. 12-პუნქტიანი „საშემოდგომოთი“ დასავლეთი ცდილობს ქვეყანაში არეულობისა და დესტაბილიზაციის ხელშეწყობას, რითაც ის ეხმარება ნაციონალების მცდელობას დაბრუნდნენ ხელისუფლებაში, ვინაიდან 9 არჩევნებმა აჩვენეს, რომ ნაცები კონსტიტუციური გზით ვერ მოდიან ხელისუფლებაში. ახლა გადასალახია ეს მეორე (12-პუნქტიანი მოთხოვნა) პროვოკაცია. მართალია, ეს პირველთან (ომთან) შედარებით ნაკლებად საშიშია, მაგრამ არეულობა მაინც არ წაადგება ქვეყნის წინსვლას; მესამე, პოლარიზაცია, ცოტა გაურკვეველი ტერმინია, გააჩნია ვინ რას გულისხმობს პოლარიზაციაში და შეიძლება იმიტომაცაა გაუგებრად ნათქვამი, რომ, როცა შეფასების დრო მოვა, იტყვიან, არა ჩვენ პოლარიზაციაში სხვას ვგულისხმობდითო. დეპოლარიზაციად ჩვენს შემთხვევაში თავისუფლად შეიძლება ჩაითვალოს ის გუნდური მუშაობა 12 პუნქტის შესასრულებლად, რომელიც ხელისუფლებამ შესთავაზა ოპოზიციას. რაც შეეხება დეოლიგარქიზაციას (გამოგონილ ტერმინს), ეს საქართველოს ხელისუფლებას შეუძლია მსგავსი კანონმდებლობით, რომელიც აქვს უკრაინას. ასეთ შემთხვევაში, ამ კანონის თანახმად, „ნაცმოძრაობის“ ოლიგარქები ნამდვილად მოხვდებიან დეოლიგარქიზაციის სიაში. რაც შეეხება ბიძინა ივანიშვილს, ის ამ კანონის ვერც ერთი პარამეტრით ვერ შეფასდება ოლიგარქად. ბიძინა ივანიშვილი არის და ისტორიაში შევა უდიდეს მეცენატად, რომლის მასშტაბები ბევრად აღემატება საქართველოს ისტორიისთვის ცნობილ მეცენატთა წვლილს.

შეიძლება საქართველოსთვის განკუთვნილ ვადაში, ვიდრე დაანონსებული 12 პუნქტი შესრულდება, პროცესები ისე განვითარდეს, რომ მთავრობის ცვლილება ვიხილოთ? ფაქტია, პრემიერი ღარიბაშვილი სწორედ ის პოლიტიკური ფიგურაა, ვინც ბიძინა ივანიშვილთან ყველაზე მეტად ასოცირდება და ვისი გაშვებისკენაც ისწრაფვის ოპოზიცია და მათი სატელიტი არასამთავრობო ორგანიზაციები.

- სამთავრობო ცვლილებები მოსალოდნელი არ არის, მით უმეტეს, პრემიერ ირაკლი ღარიბაშვილის წასვლა. ევროკავშირის 12-პუნქტიანი მოთხოვნების შესრულების საკითხზე, თუნდაც უარყოფითი პიარის აგორება, საზოგადოებაში ვერ გააჩენს ღარიბაშვილის გადადგომის მოთხოვნას, ვინაიდან საზოგადოების დიდი ნაწილი კარგად გაერკვა, რასთანაც გვაქვს საქმე. რაც დრო გადის, სულ უფრო ნათელი ხდება, რის გამოც სჯის დასავლეთი საქართველოს ხელისუფლებას.

ამ მხრივ დასავლეთის აქტიურობა გამორიცხულია? ფაქტია, გარკვეული ევროპარლამენტარები სერიუზულად ცდილობენ თავისი განცხადებებით პროცესების დაძაბვას და გარკვეულწილად, საქართველოში პოლიტიკური ხელისუფლების ცვლილების ინსპირირებას...

- დასავლეთის მხრიდან მცდელობები იმისა, რომ საქართველოში მოიყვანონ მათი მორჩილი ხელისუფლება, ცხადია. ეს მცდელობები გაგრძელდება. დასავლეთის სურვილები არ არის თანხვედრაში ქართველი ხალხის ინტერესებთან და სურვილებთან, ამიტომ, ისინი მიზანს ვერ მიაღწევენ.

რადგან ცვლილებებზე და დასავლეთის პოლიტიკურ მხარდაჭერაზე ვსაუბრობთ, აქვე საინტერესოა თქვენი მოსაზრება სუს-ის უფროსის ყოფილი მოადგილის, სოსო გოგაშვილის დაპატიმრებასა და იმ მიზეზებზე, რაზეც თავად ბრალდებული საუბრობს. გოგაშვილი დარწმუნებულია, რომ მისი მხრიდან არჩევნების გაყალბების სქემების გაშიფვრაა მისი დაპატიმრების მიზეზი, სხვა მნიშვნელოვან ფაქტებთან ერთად, რომელიც ინფორმაციულად ქვეყნის გარეთ არის გატანილი და დიპკორპუსიც იცნობს, რომელზეც, მისი ოჯახის მტკიცებით, ინფორმაციები პერიოდულად გასაჯაროვდება.

- სოსო გოგაშვილის ინფორმაცია, რომ თითქოს მას გატანილი აქვს რაღაც მასალები, რომელიც საქართველოში არჩევნების გაყალბებას უკავშირდება, მე ყალბი მგონია, ვინაიდან ასეთი მასალა ვერ იარსებებს. არჩევნების გაყალბებას ადგილი არ ჰქონია. რაც შეეხება დარღვევებს, ეს ყველა დონეზე განხილული და ცნობილია. ცნობილია ისიც, რომ მას შედეგებზე არ უმოქმედია. გოგაშვილს რაც შეიძლება ჰქონდეს გატანილი, ეს არის უკანონო თვალთვალისა და მიყურადების ფაქტები, რომელსაც ჩემი აზრით, დაპატიმრებამდეც ახორციელებდა. ეს მასალები კი გამოდგება მისი დამატებითი სასჯელისთვის და ასევე იმ ხალხის გამოვლენისთვის, ვისი ხელითაც ეს ხორციელდებოდა - ასევე, ის კრეფსები, რომლებიც პერიოდულად იდება ინტერნეტსივრცეში. მნიშვნელოვანია სწრაფი და ეფექტური გამოძიება, ყველა დამნაშავის გამოვლენა, რომ ერთხელ და სამუდამოდ დასრულდეს ამ ქვეყანაში ადამიანების დაბულინგება - „დავერბოვკება“ კომპრომატებით.

რამდენად სახიფათო და სერიოზული პოლიტიკური თამაში წამოიწყო სოსო გოგაშვილმა ამ ფარული ინფორმაციების დასავლეთის პილიტიკურ წრეებში გატანით, როგორც თავად აღნიშნა და რამდენად დამაზიანებელი შეიძლება გამოდგეს მისი ფიგურა, დაპატიმრების სტილი და ფარული ჩანაწერები მოქმედი ხელისუფლებისთვის და პირადად ექსპრემიერ ბიძინა ივანიშვილისთვის? ფაქტია, პირველად გაიჟღერა მისი მხრიდან უკმაყოფილებამ ივანიშვილის მიმართ...

- რა თქმა უნდა, ეს დამაზიანებელია დღევანდელი ხელისუფლებისთვის, ვინაიდან ჯერ ერთი, გამოიკვეთა არასწორი საკადრო პოლიტიკა და მეორე - ასეთი უკანონო მოსმენები და ჩანაწერები აზიანებს ქვეყანას და ხელისუფლებას. ამიტომაა მიჩნეული ეს მძიმე კატეგორიის დანაშაულად.

როგორი ხმაურიანი განცხადებაც არ უნდა გაეკეთებინა გოგაშვილს, ვერ გახდებოდა დაპატიმრების საფუძველი. დაპატიმრება შესაძლებელია მხოლოდ საჭირო მტკიცებულებების მოპოვების შემდეგ. სავარაუდოდ, ახლა ჰქონდა გამოძიებას საკმარისი მტკიცებულებები. რაც შეეხება მისი მხრიდან პატრიარქის დაცვის ხსენებას დაპატიმრების მიზეზად, აშკარად გაუგებარია, ვინაიდან საყოველთაოდ არის ცნობილი ხელისუფლების დამოკიდებულება და ურთიერთობა უწმინდესთან.