საქართველოსთან დაკავშირებით, ევროკომისიის შეფასების ვადამ, სავარაუდოდ, 2023 წლის შემოდგომამდე გადაიწია. როგორც ცნობილი გახდა, მომდევნო წლის გაფართოების პაკეტზე, ევროკავშირში გაწევრიანების მსურველი ქვეყნების მიერ მიღწეულ პროგრესსა და მათთვის გამოყოფილ დახმარებაზე ევროკომისია, როგორც წესი, ოქტომბერში მსჯელობს.

13 ივლისს, ევროპარლამენტის საგარეო საკითხთა კომიტეტის სხდომაზე გაირკვა, რომ ევროკომისია 12 პუნქტის შესრულებას არა 2022 წლის დეკემბერში, არამედ 2023 წელს შეაფასებს და ეს დეპოლარიზაციასა და რეფორმებზე „გულდასმით სამუშაოდ“ საქართველოსთვის სათანადო დროის მიცემის საჭიროებით აიხსნა.

ევროკომისიის 12 რეკომენდაციის შესრულების შეფასების ანგარიშს 2023 წლის გაფართოების პაკეტში წარადგენენ, მაშინ, როდესაც 17 ივნისს გამოქვეყნებული თვალსაზრისის მიხედვით, შეფასება 2022 წლის ბოლოს იგეგმებოდა. ამის შესახებ 13 ივლისს, ევროპარლამენტის საგარეო ურთიერთობათა კომიტეტში საქართველოსთან დაკავშირებული კრიტიკული ანგარიშის პროექტის განხილვის დროს, სამეზობლოსა და გაფართოებაზე მოლაპარაკებების საკითხებში ევროკომისიის გენერალური დირექტორატის (DG NEAR) წარმომადგენელმა, მიხაილ როპმა განაცხადა.

ევროპარლამენტის დელეგაცია მომავალ კვირაში საქართველოში ჩამოვა და ახალი რეზოლუციისთვის დამატებით ინფორმაციას შეაგროვებს, ბრიუსელში კი, საქართველოსთან დაკავშირებული კრიტიკული ანგარიშის პროექტზე იმსჯელეს. ამის ფონზე, ვხედავთ, საქართველოში პოლიტიკური დავა 12-პუნქტიანი რეკომენდაციების შესრულების გზებზე გრძელდება.

ანალიტიკოსი ნიკა ჩიტაძე For.ge-სთან საუბარში ამბობს, რომ ამ ვადის გახანგრძლივება „ქართულ ოცნებას“ აძლევს ხელს.

„ევროკავშირმა კარგად დაინახა, რომ „ქართული ოცნება“ არ აპირებს რეკომენდაციების შესრულებას, რომელიც ევროკომისიის მიერ იყო წარმოდგენილი 12-პუნქტიანი გეგმის ფარგლებში. ევროკავშირმა თავი აარიდა წაგებულ თამაშში ჩართვას, რადგან მის პრესტიჟზეც ნეგატიურად აისახება, რომ მის ინტერესებს უგულებელყოფენ.

ეს გადაწყვეტილება „ქართულ ოცნებას“ ნაწილობრივ ხელს აძლევს, მოთხოვნებს არ შეასრულებს და გაუადვილდება ძალაუფლების შენარჩუნება. თუ ხელისუფლება არ შეიცვლება, ძალიან გაჭირდება, რომ რაიმე დადებითი შედეგები მივიღოთ“, - განაცხადა ნიკა ჩიტაძემ For.ge-სთან.

ანალიტიკოსი რამაზ საყვარელიძე მიიჩნევს, რომ არსებობს მოსაზრება, თითქოს ევროკავშირმა საქართველოსთან დაკავშირებით, უხეში შეცდომა დაუშვა, როდესაც მას ევროკავშირის კანდიდატის სტატუსი არ მისცეს. შესაბამისად, ამ ვადის გახაგრძლივება თავად ევროკავშირსაც აძლევს ხელს.

„შეფასებები ძირითადად დადებითი იყო და გადადეს იმიტომ რომ, საქართველოსთვის მეტი დრო მიეცათ. ეს გადაწყვეტილება გაიგება როგორც მასწავლებლის მხრიდან შეღავათი იმაზე, რომ მოწაფემ ცოტა მოგვიანებით გასცეს პასუხი, მოფიქრებისთვის მეტი დრო ჰქონდეს, მაგრამ არ მგონია, რომ ეს შეღავათი მხოლოდ საქართველოზე ზრუნვით იყოს განპირობებული.

გადავადება მათ ინტერესშიც შედის იმ მხრივ, რომ ბევრი რეაქცია გაჩნდა, საქართველოსთვის კანდიდატობის სტატუსის არმიღების დროს, რომ ეს სტრატეგიული, უხეში შეცდომა იყოო. ისინი ვერ ჩამოყალიბდნენ, რომელი სტრატეგიაა მომგებიანი და მათ ინტერესებში რა ადგილი უკავია კავკასიას“, - განაცხადა რამაზ საყვარელიძემ For.ge-სთან.

საქართველოს პარლამენტის თავმჯდომარის, შალვა პაპუაშვილის განცხადებით, ევროკავშირის 12-პუნქტიანი რეკომენდაციების შესრულებისთვის 6-თვიანი ვადა „გადაჭარბებულად ცაიტნოტური იყო“. როგორც პაპუაშვილმა აღნიშნა, ვადის გაზრდით ევროკომისიამ თავი დაიზღვია. მმართველი გუნდი არ ეთანხმება ევროკავშირს: რას ნიშნავს შეფასების გადავადება და რა შეიძლება შეიცვალოს ერთ წელიწადში? 

„ზოგადად, 6-თვიანი ვადა გადაჭარბებულად ცაიტნოტური იყო, ერთი მხრივ თუ გავითვალისწინებთ იმ საკითხებს, რაც ამ რეკომენდაციებშია და მეორე მხრივ, როდესაც საქართველო ამ რეკომენდაციებს შეასრულებს, საჭიროა, ევროკომისიამაც გარკვეული დრო დაუთმოს ამის გადამოწმებას. ამიტომ, ვფიქრობ, თავი დაიზღვიეს და თავადაც დრო აიღეს, რათა შეძლებისდაგვარად სრულფასოვნად განიხილონ ეს საკითხი. როგორც ვვარაუდობ, იგივე საკითხი შეეხება უკრაინასა და მოლდოვას. იქ უფრო რთულადაა საქმე. მაგალითად, მოლდოვის მიმართ წაყენებული რეკომენდაცია, რომ საჯარო სამსახურის რეფორმა გატარდეს, ვფიქრობ, წარმოუდგენელია ამ 6 თვეში შესრულდეს, ვფიქრობ, იქით უფრო საჭირო იყო დამატებითი ვადები.

რაც შეეხება ჩვენს გეგმებს, გეგმები არ იცვლება, წარმოდგენილი გვაქვს მკაფიო გრაფიკი. არა მხოლოდ თვეებით, არამედ თარიღებითაა გაწერილი, სადაც ჩაწერილია, როდის დაინიცირდება და მესამე მოსმენით მიიღება. ამ 12 პუნქტიდან, ყველა საკითხი, ჩვენი მხრიდან დეკემბერში სრულდებოდა. ორი საკითხი იყო ჩვენს გრაფიკში – სასამართლო და საარჩევნო რეფორმა, რომელთა ინიცირება ნოემბერში და დეკემბრის დასაწყისში მოხდება, შემდეგ ვაგზავნით ვენეციის კომისიაში, ამის შემდეგ გააგრძელებს პარლამენტი მიღებას. აქ ჩვენ დამოკიდებული ვართ ვენეციის კომისიაზე, რომ 6 თვის ვადაში ჩავეტიოთ“, - განაცხადა შალვა პაპუაშვილმა.