პოლონეთის პრემიერ-მინისტრმა, მატეუშ მორავეცკიმ გამოცემა Polska Times-თან ინტერვიუში განაცხადა, რომ დასავლური საზოგადოებრივი აზრი ნელ-ნელა იღლება უკრაინის ომის თემით. დასავლურმა საზოგადოებებმა უნდა გაიგონ, რომ ეს ომი ასევე მათი უსაფრთხოებისთვისაა.

„დასავლური საზოგადოებრივი აზრი ნელ-ნელა იღლება ამ თემით. სწორედ ამიტომ ჩვენ შევეცადეთ წარმოგვედგინა რუსების მიერ უკრაინაში ჩადენილი დანაშაულების მასშტაბები მრავალი აქტივობით, მათ შორის ფართომასშტაბური აქციით „შეაჩერე რუსეთი ახლავე“. ეს ძალიან მნიშვნელოვანია, რადგან დასავლურმა საზოგადოებებმა უნდა გაიგონ, რომ ეს ომი ასევე მათი უსაფრთხოებისთვისაა. ვშიშობ, რომ მომდევნო თვეები უფრო მეტ გულგრილობას მოიტანს და ეს უაღრესად საშიში ფენომენია. სამწუხაროდ, პუტინსაც ამის იმედი აქვს“.

პოლონეთის პრემიერის თქმით, დღეს მისი მთავარი საზრუნავი უკრაინის მხარდაჭერაა საერთაშორისო დახმარების ორგანიზებითა და იარაღის მიწოდებით, ვინაიდან ჟანგიანი რუსული სატკეპნი უკრაინაში წინსვლას განაგრძობს.

„სევეროდონეცკი პრაქტიკულად რუსეთის ხელშია, ლისიჩანსკისთვის სასტიკი ბრძოლები მიმდინარეობს. სამწუხაროდ, უკრაინიდან სიგნალები სულ უფრო პესიმისტური ხდება. დასავლეთის უამრავი ქვეყნიდან დახმარება ჯერ კიდევ ძალიან ცოტაა. დასავლეთიდან საარტილერიო სარაკეტო სისტემებისა და ჰაუბიცების მიწოდება ძალიან ნელა მიმდინარეობს. ძალიან ბევრი მათგანი ჯერ კიდევ განცხადებების დონეზეა. ეს ომი საარტილერიო ომია. უკრაინას სჭირდება არტილერია“, - აღნიშნა პოლონეთის პრემიერ-მინისტრმა.

საგარეო ურთიერთობის საკითხებში ვალერი ჩეჩელაშვილის განცხადებით, პოლონეთის პრემიერს, მატეუშ მორავეცკის მიზეზი ჰქონდა აღნიშნული განცხადების გაკეთების. მისივე თქმით, სანქცირებული პოლიტიკა გარკვეულ სირთულეებს ქმნის.

„დასავლეთში უკრაინის ომი უკანა პლანზე არ გადაწეულა. როგორც ჩანს, პოლონეთის პრემიერს მიზეზი ჰქონდა აღნიშნული განცხადება გაეკეთებინა. ომი დაძაბულობასა და სირთულეს ყოველთვის ქმნის. სწორედ, სანქცირებული პოლიტიკის გამო ევროპის ქვეყნები გარკვეულ სირთულეებს აწყდებიან. მაინც, ვფიქრობ, ბოლო მნიშვნელოვანმა შეხვედრებმა, როგორიც დიდი შვიდეულის, ასევე ნატოს შეხვედრებმა დაადასტურა, რომ დასავლეთის მხრიდან უკრაინის მიმართ ურყევი მხარდაჭერაა. ევროპის სახელმწიფოს მეთაურების განცხადებებიდან ჩანს, რომ უკრაინას იმდენი ხანი დაეხმარებიან, ვიდრე საკუთარ ტერიტორიებს არ გაათავისუფლებს. კიდევ მნიშვნელოვანია ერთი საკითხი - ვიდრე უკრაინის ტერიტორიული მთლიანობა საერთაშორისო აღიარებულ საზღვრებში არ აღდგება და ყირიმი არ დაუბრუნდება, იქამდე რუსეთი სანქცირებული იქნება“, - აღნიშნა ვალერი ჩეჩელაშვილმა.

მისივე თქმით, დასავლეთის პასიურობით პუტინი ვერ იხეირებს, მიუხედავად იმისა, რომ რუსეთს შესაძლებლობა უსაზღვროა.

„რუსეთი ცნობილია თავისი შესაძლებლობებით და საზოგადოების მანიპულირება შეუძლია. ამაზე ფულსაც ხარჯავს და ზოგიერთ პოლიტიკურ მოღვაწეებს ქრთამავს კიდეც. ბუნერივია, თუ დასავლეთი იპასიურებს, პუტინს ამაზე პასუხი ექნება. მთავარია დასავლეთმა უკრაინისთვის იარაღის მიწოდება არ შეწყვიტოს და დროულად მიაწოდოს. ამ ომში გარდატეხა რაც შეიძლება მალე უნდა მოხდეს, რათა ევროპა დროულად მიხვდეს, რომ მხოლოდ დროული იარაღის მიწოდებით შეიძლება დასრულდეს ომი“, - განუცხადა ჩეჩელაშვილმა for.ge-ს.

ანალიტიკოსი ირაკლი მენაღარიშვილი იმედს იტოვებს, რომ დასავლეთი უკრაინის ომით არ დაღლილა. მისივე თქმით, თუკი დასავლეთში უკრაინის ომი მეორე პლანზე გადავა, ამას ვლადიმერ პუტინი სათავისოდ გამოიყენებს.

„პოლონეთის პრემიერის განცხადება არასასიამოვნო იყო. ბუნებრივია, ამის სათავისოდ გამოყენებას პუტინი შეეცდება. იმედი მაქვს, მთლად ასე არის და დასავლეთი უკრაინის ომით არ დაღლილა. თუ ასეთი რამ არსებობს, ეს ნიშნავს, რომ დასავლეთში ომის საშინელებაზე საზოგადოებრივი აზრი ვეღარ რეაგირებს“, - აღნიშნა ირაკლი მენაღარიშვილმა.

მისივე თქმით, საქმე იქამდე არ მივა, რომ რუსეთმა მთლიანი უკრაინის ოკუპაცია შეძლოს.

„პუტინს ბევრი მექანიზმის ამუშავება არ დასჭირდება. თუ დასავლეთის მხრიდან უკრაინის მხარდაჭერა შემცირდება, ეს პუტინს ხელს აძლევს. საქმე არ მგონია იქამდე მივიდეს, რომ რუსეთმა მთლიანი უკრაინა ხელში ჩაიგდოს, მაგრამ თუ ეს პროცესი ღრმად წავიდა, ამის საშუალება ექნება“, - აღნიშნა ანალიტიკოსმა.