„ჯობდა პრემიერ-მინისტრს ემსჯელა იმაზე, როგორ აპირებს იმ 12 პრობლემატური საკითხების მოგვარებას, რომელიც ევროკომისიამ წარმოგვიდგინა“, - ასე შეაფასა ანალიტიკოსმა, ვახტანგ მაისაიამ For.ge-სთან ინტერვიუში პრემიერ-მინისტრის, ირაკლი ღარიბაშვილის 22 ივნისს პარლამენტში გამოსვლა.

რა გზავნილები მივიღეთ პრემიერ-მინისტრისგან და რეალურად, როგორ ფიქრობთ, რაზე უნდა ესაუბრა ირაკლი ღარიბაშვილს საკანონმდებლო ორგანოს ტრიბუნიდან?

- გასაგებია პრემიერ-მინისტრის რიტორიკა „ნაცმოძრაობის“ მიმართ, მაგრამ ამას ჯობდა ემსჯელა იმაზე, როგორ აპირებს იმ 12 პრობლემატური საკითხების მოგვარებას, თუნდაც ამ პრობლემების მოგვარების გზების დაწყებას, რომელიც ევროკომისიამ წარმოგვიდგინა. გასაგებია, წარდგა წლიური ანგარიშით, მაგრამ გეოპოლიტიკურად ახლა ქვეყანაში არის ფორსმაჟორული სიტუაცია.

ევროკომისიის ერთ-ერთი რეკომენდაციაა, საქართველოში პოლარიზაციის დასრულება. თუმცა, ორი დღის წინ პარლამენტში სრულიად საპირისპირო სურათი ვნახეთ: ხელისუფლების და ოპოზიციის წარმომადგენლები ერთმანეთს სიტყვიერ შეურაცხყოფას აყენებდნენ და ერთმანეთს ბრალდებებს უყენებდნენ. ამის ფონზე, თქვენ პირადად, როგორ წარმოგიდგენიათ ქვეყანაში პოლარიზაციის შემცირება?

- დანარჩენ 11 პრობლემასთან შედარებით, რაც ევროკომისიის მიერ არის წარმოდგენილი, პოლარიზაცია ყველაზე იოლად გადასალახია, თუ მმართველ ძალას აქვს პოლიტიკური ნება და მზაობა.

რაც შეეხება დანარჩენ პუნქტებს, წლის ბოლომდე რამდენად არის შესაძლებელი ამ მოთხოვნების შესრულება?

- დანარჩენი პუნქტები არის მთავარი და მნიშვნელოვანი, როგორ მოახერხებენ ამის მოგვარებას: ანტიკორუფციული მიმართულება ჩვენთან აბსოლუტურად ჩავარდნილია და ვფიქრობ, საერთოდ პულსიც არ ესინჯება. ასევე, ორგანიზაციულმა დანაშაულმა რომ ფრთები გაშალა, ესეც ფაქტია. ევროკავშირმა ეს იმიტომ კი არ დააფიქსირა, რომ მხოლოდ საქართველოს პრობლემაა, საქართველოს პრობლემიდან უკვე გადავიდა ევროპული უსაფრთხოების კონტექსტში. ამ საკითხთან დაკავშირებითაც პრემიერისგან პასუხი ნამდვილად ვერ მოვისმინე. ამ ყველაფრის გათვალისწინებით, გასაგებია რა გადაწყვეტილებას მიიღებს ევროპის კავშირის სამიტი.

ვინც ხელისუფლებაშია, იმან თუ არ გამოავლინა პოლიტიკური ნება და მზაობა, არაფერი შეიცვლება. აქ არის მთავარი, ვინ არის მმართველი ძალა და ვის აქვს პოლიტიკურად მართვის ბერკეტები. რისი მოსმენაც მინდოდა 22 ივნისს, პრემიერ-მინისტრის გამოსვლისას, ვერ მოვისმინე, ნაწილობრივ პასუხი გაცემული იყო, თუმცა, ნაწილობრივ ნამდვილად არ შეადგენს იმ თემატიკის საკითხებს, რომელიც სწრაფად უნდა ყოფილიყო გადაჭრილი.

როგორ ფიქრობთ, ევროკომისიის ეს გადაწყვეტილება უსამართლობის განცდას ხომ არ აჩენს მოსახლეობაში და რამდენად შეიძლება ამან იმოქმედოს იმ კუთხით, რომ ქვეყანაში დასავლური განწყობები შემცირდეს?

- რა თქმა უნდა, უსამართლობის შეგრძნებას ტოვებს, მაგრამ ზოგად კონტექსტში რომ ვისაუბროთ, უფრო მეტად იმ მიმართულებას ავითარებს, რომ ევროპული არჩევანის მოთხოვნით უფრო ორგანიზებულად შეიკრიბოს ხალხი და ხელისუფლებას მოსთხოვოს, შესაბამისად შეასრულოს ევროკავშირის მოთხოვნები. ის რაოდენობა, 100 ათასზე მეტი ადამიანი ნამდვილად არ შეკრებილა ანტიევროპული სენტიმენტებით. აქ უკვე სხვა მოთხოვნებია დაფიქსირებული. 

ანტისკეპტიკოსების რაოდენობაც არსებობს ქვეყანაში, მაგრამ ამ ჯგუფებმა თავიანთი მოსაზრების დაფიქსირება და გამოსვლა ვერც კი გაბედეს, თუნდაც „ალტ-ინფოს“ შემადგენლობა, რომელიც კონტრაქციის ჩატარებას აპირებდა, მათი წარმომადგენლები ჰორიზონტზეც არ ჩანდა.

24 ივნისს მორიგი შეკრებაა დაანონსებული. ოპოზიციური პარტიების ნაწილი ვადამდელი არჩევნების ჩატარების აუცილებლობაზე საუბრობს. პროცესების როგორ განვითარებას ელოდებით? ვადამდელი საპარლამენტო არჩევნების დანიშვნის შესაძლებლობას ელოდებით თქვენ პირადად?

- ცოტა მიჭირს იმის თქმა, თუ როგორ განვითარდება მოვლენები ხვალინდელ აქციაზე. ალბათ, დაიწყება ახალი პოლიტიკური კრიზისი, რომელიც არ ვიცი სადამდე მივა. ეს, რა თქმა უნდა, გამოწვეულია ევროკავშირის მხრიდანაც, რომელმაც ელემენტარულად, საქართველოს არ მისცა კანდიდატის სტატუსი, რაც გამოიწვევს პირდაპირ კორელაციას საქართველოში არსებულ პოლიტიკურ პროცესებზე. 20 ივნისის ფართომასშტაბიანმა მანიფესტაციამ ეს ცალსახად აჩვენა. მე ნამდვილად არ მსურს საქართველოში განვითარდეს მოლდავური სცენარი. 

იმედია, რომ ჯერ კიდევ არის შესაძლებლობა, რომ მხარეები კონსენსუსს მიაღწევენ და ამით გამოინახება საერთო შეხების წერტილები, რომელიც შექმნის 6 თვის განმავლობაში საშინაო დავალების კარგ მაგალითს.

და მაინც, არჩევნების თუ რევოლუციით გზით, რამდენად ხედავთ იმის პერსპექტივას, რომ მომავალ 6 თვეში ხელისუფლება შეიცვალოს?

- საქართველოში უკვე ნებისმიერი სცენარი შეიძლება განვითარდეს. როდესაც გამოდის 100 ათასზე მეტი ადამიანი, რომელსაც პროტესტის გრძნობა გააჩნია, აქ უკვე კითხვები ისმება და სხვა მიმართულებით შეიძლება განვითარდეს სცენარი, თუ ხელისუფლებამ არ გამოიტანა დასკვნები ამ არასასიამოვნო მოვლენიდან. ამდენი ადამიანის გამოსვლა შეიძლება საკუთარი ინტერესებისთვის გამოიყენონ და ამიტომ შეიძლება ბევრი სცენარით განვითარდეს მოვლენები.