„საბჭოთა კავშირი არ გვინდოდა და დისიდენტები საბჭოთა კავშირს ვებრძოდით, რომ იქ ადამიანის უფლებები და ღირებულებები ილახებოდა. ზუსტად პირადი ცხოვრების ამსახველი კადრები საკუთარი თვალით ნახეს დასავლეთის ქვეყნების ელჩებმა შინაგან საქმეთა სამინისტროში, რომ ამ ყველაფერს ჩადიოდა „ნაცხროვა“ და ამ ყველაფრის მერე ისევ იძახიან, რომ ის კარგი მმართველობა იყო“, - აცხადებს for.ge-სთან საუბრისას „ყოფილი პოლიტპატიმრები ადამიანის უფლებებისთვის“ თავმჯდომარე ნანა კაკაბაძე.

ევროპარლამენტარების რეზოლუცია ჩვენს ქვეყანაში აღიქვეს, როგორც მეორე ფრონტის გახსნა საქართველოში. ჩვენმა საზოგადოებამ ჩათვალა, რომ ეს იყო უფრო „ნაცმოძრაობის“ რეზოლუცია, ვიდრე ევროპარლამენტართა რეზოლუცია. რატომ იჩენენ ევროპარლამენტარები იმაზე მეტ სიხისტეს ახლანდელი ხელისუფლების მიმართ მაშინ, როცა სააკაშვილის რეჟიმის დროს შეუმჩნეველი რჩებოდათ ადამიანის უფლებათა შელახვა საქართველოში?

- თავისი რეზოლუციით ევროპარლამენტმა ჩამოიხსნა ნიღაბი. თუ ჩვენ აქამდე ვსაუბრობდით, რომ „ნაცმოძრაობა“ იდგა ამის უკან და მათ ჰყავდათ ევროპარლამენტში ერთეული ადამიანები ლობისტებად, ახლა გაჩნდა ეჭვი, რომ „ნაციონალური მოძრაობა“ ყოფილა სწორედ იმ დასავლური დაჯგუფების სახე, რომელიც ჩვენ ომისკენ მოგვიწოდებს. ეს დაჯგუფება „ნაციონალურ მოძრაობას“ ამუშავებს საქართველოსა და ქართველი ხალხის ინტერესების საწინაღმდეგოდ. ეს ძალიან მკაფიო გახდა ახლა. უპირველეს ყოვლისა, ენა, რომელი ენითაც ევროპარლამენტარები საუბრობენ რეზოლუციის ტექსტით, არ არის არც დიპლომატიის ენა, არც პარტნიორი ქვეყნის ენა, ეს გახლავთ კოლონიზატორის ენა თავისი დაპყრობილი კოლონიის მიმართ. სხვათა შორის, კოლონიზატორისთვისაც კი სამარცხვინო იყო, რაც მათ ჯერ ტყუილები ილაპარაკეს თუნდაც მხოლოდ ლექსო ლაშქარავას გარდაცვალებასთან დაკავშირებით, თითქოს ის ცემის შედეგად დაიღუპა. ამ დროს მთელმა საქართველომ იცის სიმართლე და ევროპარლამენტის ასეთი ტყუილი ქართველ ხალხში ნათელს ხდის იმას, რომ ისინი სიცრუეს და უსინდისობასაც კი კადრულობენ თავიანთი ინტერესების მისაღწევად, ეს ძალიან ცუდი მესიჯია და მკაფიო მესიჯია ქართველი ხალხისთვის, გადახედოს იმ პოზიციას, რა პოზიციაც აქამდე გვქონდა, რომ გვინდოდა ევროპაში. თუ ესენი ასეთი ცბიერები არიან, თუ ასეთი ძალადობრივი ფორმებით ცდილობენ, ხელისუფლება შეცვალონ და ამის წახალისებას ახდენენ, თუ საუბრობენ, რომ ის ცხრაწლიანი რეჟიმი ყოფილა კარგი მმართველობა და ახლა არის ცუდი მმართველობა, მაშინ სიმართლე რაღაა?! ისინი გვეუბნებიან, რომ ის მმართველობა, რომელიც ქართველმა ხალხმა თავისი სიცოცხლის ფასად განდევნა პოლიტიკიდან არჩევნების გზით, თურმე კარგი მმართველობა იყო. თურმე თვალთვალი, მიყურადება, პირადი ცხოვრების ამსახველი კადრები კარგი ყოფილა. ზუსტად პირადი ცხოვრების ამსახველი კადრები ამ ქვეყნების ელჩებმა საკუთარი თვალით ნახეს შინაგან საქმეთა სამინისტროში, რომ ამას ჩადიოდა „ნაცხროვა“, ამ ყველაფერს ისინი ხედავდნენ, ამის მიუხედავად, კიდევ იძახიან, რომ ეს კარგი მმართველობა იყო. ახლა უკვე ნათელია, რომ ამათ ჩვენი ქვეყნის სიკეთე და დემოკრატია კი არ აინტერესებთ, არამედ სურთ, თავიანთი მართული ძალა ჰყავდეთ საქართველოს ხელისუფლებაში. ეს არის ენა, რომლითაც „ნაცმოძრაობა“ საუბრობს ქვეყანაში, ფაქტობრივად, მოხდა ნიღბის ჩამოხსნა და მათი გაშიფვრა, რომ აქ არის მათი აგენტურა, ლომჯარია იქნება, „ნაცმოძრაობის“ წარმომადგენლები იქნებიან, პრეზიდენტი იქნება, თუ ვინ, მთავარია, მათი პოზიცია გაიზიარონ, რომ საქართველო ომში უნდა ჩაითრიონ და ქართველი ხალხი გაანადგურონ. ესენი საქართველოს დაუძინებელი მტრები არიან, ჩვენისთანა პატარა ქვეყნისთვის ამაზე მეტი მტრობა არ არსებობს, როცა გვეუბნებიან, რომ დავუპირისპირდეთ 140-მილიონიან ქვეყანას - რუსეთს, რომელიც შეიარაღებით ერთ-ერთი პირველია მსოფლიოში. ეს ნიშნავს, რომ საქართველო და ქართველი ხალხი საზარბაზნე ხორცად უნდათ გამოიყენონ იმის გამო, რომ რუსეთს უბწკინონ და წარმოაჩინონ ერთი შტრიხი, თურმე რა ცუდი ყოფილა რუსეთი. ამისთვის გვეუბნებიან, რომ ჩვენ, როგორც ქვეყანა, უნდა გადავშენდეთ.

ფიქრობთ, რომ შემთხვევითი არ არის ნინო ლომჯარიას წამოცდენა - „შეიძლება, ბომბებისგან მიღებული რაღაც ცეცხლი სჯობდეს სირცხვილს“?

- რა თქმა უნდა, ეს არის აგენტურა საქართველოს წინააღმდეგ მოქმედი ძალების, რომლებიც ახორციელებენ პროექტს „საქართველო ქართველების გარეშე“. მათ აინტერესებთ ჩვენი ქვეყნის გეოპოლიტიკური მდებარეობა და არა აქ მცხოვრები ხალხი.

ევროპარლამენტართა ამ რეზოლუციის შემდეგ უკვე გაჩნდა ევროსკეპტიკური მოწოდებები პრემიერის მიმართ, რომ ევროკავშირში გაწევრიანების მიზნით შეტანილი დამამცირებელი განცხადება უკანვე გამოიტანოს. რა მოგვიტანა ევროპამ, როცა ისტორიულად დახმარებას ვითხოვდით მისგან და რას გვთავაზობს ახლა? ხომ არ ვიჩქარეთ ევროკავშირში განცხადების შეტანა, რასაც 2024 წლისთვის ვგეგმავდით?

- ჩვენი ისტორია ცხადყოფს, რომ როდესაც ჩვენ ვაკეთებდით არჩევანს რუსეთის სასარგებლოდ, ეს გამოწვეული იყო იმით, რომ დანარჩენი მსოფლიო, ანუ ევროპა, დასავლეთი, ფაქტობრივად, უარს გვეუბნებოდა დახმარებაზე და იძულებულნი ვიყავით რუსეთს შევერთებოდით. დღეს ვიღაცების სალაპარაკო გახდა მეფე ერეკლე, მათ არც მორალური, არც არანაირი უფლება არ აქვთ, ისაუბრონ ადამიანზე, რომელმაც თავი შესწირა საკუთარ ქვეყანას. ეს იყო აბსოლუტურად გააზრებული ქმედება, რომ ორი უბედურებიდან მეფე ერეკლემ აირჩია ერთი, რომელიც იმ მომენტში იყო საქართველოს ფიზიკური გადამრჩენი. ეს არჩევანი გაკეთდა გამოუვალი სიტუაციიდან გამომდინარე, ასე იყო ყოველთვის, ორ ბოროტებას შორის კეთდებოდა არჩევანი. დღესაც, რასაც ევროპა აკეთებს, სხვა არაფერია, თუ არა ის, რომ ჩვენ მიგვდენის რუსეთისკენ. როდესაც გვეუბნებიან, ფულს გიხდიდით იმიტომ, რომ როცა დაგვჭირდებოდა, უნდა ქცეულიყავით საზარბაზნე ხორცად, ეს თვით კომუნისტებსაც არ უკადრებიათ და საბჭოთა კავშირის დროსაც არ უთქვამთ ასეთი რამ. ამაზე მეტი სიძულვილის ენა რა შეიძლება იყოს, როცა გვეუბნებიან, რომ უნდა ვიქცეთ საზარბაზნე ხორცად?! თვითონ შეუქმნან პრობლემები რუსეთს, ათასჯერ ჩვენზე მეტი შესაძლებლობაც აქვთ და რაოდენობრივადაც ამერიკა თუ ევროპის ქვეყნები ჭარბობს საქართველოს. რაღა საქართველოს გადაეკიდნენ, წავიდნენ, თვითონ იომონ, გვაჩვენონ, როგორ იბრძვიან და მერე ჩვენც მივიღებთ გადაწყვეტილებას.

ევროპარლამენტართა ასეთი განწყობა ხომ არ არის „ქართული ოცნების“ ლიდერშიპის ძველბიჭური საუბრის გამოძახილი, როგორც ამაზე ოპოზიცია აპელირებს?

-რომელი ძველბიჭური საუბარი? როცა უნდათ, „ნაციონალები“ ორ შაურად აგინებენ ევროპელებს, ელჩებს და მათ წარმომადგენლებს. იგივე გვარამია რა ტონალობაში ლაპარაკობდა! ხომ ხედავთ, გვარამიას დაპატიმრება თურმე მედიის დამოუკიდებლობის ხელყოფა ყოფილა. რომელი მედია და რომელი ჟურნალისტი გვარამიაა, როცა სისხლიანი რეჟიმის პროკურორი იყო? აქ მთავარია მათი ინტერესი, რომ საქართველოს ხელისუფლებაში ჰყავდეთ ყურმოჭრილი მონები, რომლებიც მათ შეკვეთას შეასრულებენ, ამ შემთხვევაში, ყველაზე მთავარი შეკვეთა იყო საზარბაზნე ხორცად ჩვენი გადაქცევა. აქ მთავარია, როგორ გაბედეს ასეთი ტონალობით საუბარი, როგორ გაბედეს ამდენი ტყუილის ჩაწერა რეზოლუციის ტექსტში, რომელიც მათი სახელით უნდა გავრცელებულიყო საქართველოში? ამაზე უნდა მოსთხოვოს ხელისუფლებამ პასუხი ევროპარლამენტს. საბჭოთა კავშირი არ გვინდოდა და დისიდენტები საბჭოთა კავშირს ვებრძოდით, რომ იქ ადამიანის უფლებები და ღირებულებები ილახებოდა, ახლა მეორე კავშირი გვინდა, რომელიც კიდევ უარეს რამეს უქადის ქვეყანას, ვიდრე საბჭოთა კავშირი უქადდა? ამიტომ უნდა გავერკვეთ, სად მივდივართ, ვისთან და როგორ ურთიერთობებში? განა საკმარისი არ არის, ჩვენი ქვეყნის 20% რომ არის ოკუპირებული? ახლა 80%-ის ოკუპირებას აპირებენ? გვეუბნებიან, შენი კანონი კი არ უნდა მუშაობდეს ამ ტერიტორიაზე, არამედ - ჩემი ნება. ე.ი. კოლონიაა ჩვენი ქვეყანა? ჩვენი ტერიტორიების 80% მათი მხრიდან დაპყრობილია?