ვინ დაიღლება და ვინ გატყდება ამ დაუსრულებელი ომით -უკრაინა, რუსეთი, თუ მთელი დანარჩენი მსოფლიო, რომელიც, ერთი მხრივ, სანქციებს უწესებს რუსებს, მეორე მხრივ, არ მალავს, რომ სანქციები თავადაც დააზარალებს.

უკრაინაში მიმდინარე ომი ყველა ნიშანს იძლევა საიმისოდ, რომ ეს არის „ომი გამოფიტვამდე“, ანუ ორი მოწინააღმდეგე მხარე ერთმანეთს უყურებს, ვინ დაიღლება და ვინ გატყდება საბოლოოდ. როგორც წესი, გამოფიტვის ტაქტიკას მაშინ მიმართავენ, როცა ომის სხვა მეთოდი არ ამართლებს. სწორედ გამოფიტვის ხელოვნური სტრატეგია გამოიყენეს პირველი მსოფლიო ომის დროს, როცა ბრიტანეთმა, საფრანგეთმა და რუსეთმა კაპიტულაციამდე მიიყვანეს გერმანიის, ავსტრო-უნგრეთის, ოსმალეთის იმპერიები და ბულგარეთის სამეფო.

სამხედრო თეორეტიკოსები თვლიან, რომ გამოფიტვის ტაქტიკა ტიპური ომის პრინციპთან წინააღმდეგობაშია. თუკი ტიპური ომი დროის მოკლე მონაკვეთში გამარჯვებას გულისხმობს, გამოფიტვის ომი მოწინააღმდეგის დაუძლურებაზეა გათვლილი. ასეთ დროს ის მხარე იმარჯვებს, რომელსაც მეტი რესურსი გააჩნია.

ნატო-ს გენერალური მდივანი იენს სტოლტენბერგი იზიარებს აზრს, რომ ეს ომი გადაიქცა გამოფიტვის ომად, სადაც უკრაინელები დიდ საფასურს იხდიან ქვეყნის დასაცავად. თუმცა სტოლტენბერგი იქვე დასძენს, რომ ეს ომიც, ომების უმეტესობის მსგავსად, დიდი ალბათობით, მოლაპარაკების მაგიდასთან დასრულდება.

უსაფრთხოების ექსპერტი ანდრო გოცირიძე for.ge-სთან საუბრისას აცხადებს, რომ „ომი გამოფიტვამდე“ აუცილებლად რუსეთის დამარცხებით დასრულდება, რადგან წარმოუდგენელია ამ ომში გამარჯვება გინდა ეკონომიკურად, გინდა სამხედრო ძალით რუსეთმა მოახერხოს. უბრალოდ, უკრაინას ჯერ კიდევ ელის რამდენიმე მძიმე თვე. რუსეთმა სწრაფი ოპერაციით ვერ მოახერხა უკრაინაში მისთვის არასასურველი რეჟიმის შეცვლა, ახლა ცდილობს პოზიციურ ბრძოლებში გადავიდეს ისევე, როგორც აფხაზეთის ტერიტორიაზე მიმდინარეობდა ამ ტიპის ბრძოლები საქართველო-რუსეთის ომის დროს 1992-93 წლებში.

„რუსეთის სურვილია, ხანგრძლივი ომით გამოფიტოს უკრაინა და უკრაინის მოსახლეობა საკუთარი ხელისუფლების წინააღმდეგ წასვლისკენ აიძულოს, მაგრამ რუსეთი ამას ვერ მიაღწევს, ეს გვიჩვენა აღმოსავლეთ უკრაინაში მიმდინარე ომმაც, როდესაც პრორუსული და რუსულენოვანი უკრაინის მოსახლეობამ მედგარი წინააღმდეგობა გაუწია რუსეთის ჯარებს. ეს მოხდა იმ მოსაზრებების და სადაზვერვო გეგმის საწინაღმდეგოდ, რომელიც კრემლს გააჩნდა“, - აღნიშნა ანდრო გოცირიძემ.

ექსპერტი თავდაცვისა და უსაფრთხოების საკითხებში, თადარიგის პოლკოვნიკი აკია ბარბაქაძე ჩვენთან საუბრისას აცხადებს, რომ ომი გამოფიტვამდე იწყება მაშინ, როცა ომი გადადის სტატიკურ ფაზაში. ამ შემთხვევაში, რუსეთიც იფიტება და უკრაინაც, მაგრამ უკრაინას ახლა უფრო მეტი რესურსი აქვს იმის გამო, რომ მას, ფაქტობრივად, ეხმარება 40 ქვეყანა. რუსეთი კი მარტოა ამ ომში.

„აქედან გამომდინარე, როდესაც რუსეთი გადადის თავდაცვით ომში, ასეთ დროს შემოდის გაჭიანურებული ომისა და გამოფიტვის ომის ცნებები. რუსეთს არ აქვს იმის შესაძლებლობა, ჩაატაროს შეტევითი ოპერაციები, მანევრები, ანუ რუსეთს სტრატეგიული ინიციატივა დაკარგული აქვს, ამის გამო რუსეთი უკვე გადავიდა გამოფიტვით სტადიაზე და დღეს ორივე მხარე იფიტება. უკრაინას რესურსი მაინც აქვს დასავლეთიდან, განსხვავებით, რუსეთისგან, რომელიც მარტოა“, - გვითხრა აკია ბარბაქაძემ.