ბაიდენის ადმინისტრაცია უკრაინიდან აშშ-ის მოქალაქეების პოტენციური ევაკუაციის ვარიანტებს სწავლობს, თუ რუსეთი უკრაინაში შეიჭრება. ინფორმაციას ამის შესახებ ტელეკომპანია CNN-ი წყაროებზე დაყრდნობით ავრცელებს.
წყაროების ინფორმაციით, პენტაგონი გეგმაზე მუშაობს, რომელიც იმ შემთხვევაში ამოქმედდება, თუ უკრაინაში სიტუაციის დესტაბილიზაცია მოხდება რუსეთის შეჭრის შემდეგ.
წყაროები აღნიშნავენ, რომ აშშ-ის ადმინისტრაცია ამჟამად ევაკუაციის საჭიროებას არ ხედავს, ვინაიდან ავიახაზები უკრაინის საერთაშორისო აეროპორტებიდან შეუფერხებლად ოპერირებენ და სახმელეთო საზღვრები უკრაინის დასავლელ მეზობლებთან ღიაა.
აღნიშნული გეგმა იმ შემთხვევისთვისაა, თუ უკრაინაში უსაფრთხოების ვითარება მკვეთრად გაუარესდება.
2 დეკემბერს, აშშ-ის სახელმწიფო მდივანმა თავის რუს კოლეგას განუცხადა, რომ უკრაინაში შეჭრის შემთხვევაში, რუსეთი სერიოზული შედეგების წინაშე დადგება.
უკრაინის თავდაცვის მინისტრის, ალექსეი რეზნიკოვის ინფორმაციით, რუსეთმა უკრაინის საზღვართან 94 000-ზე მეტი ჯარისკაცი განათავსა და იანვრის ბოლოსთვის ფართომასშტაბური სამხედრო შეტევისთვის შეიძლება მოემზადოს.
