დათა ახალაიას შემდეგ, „ფეისბუქში“ საქართველოს ყოფილი იუსტიციის მინისტრის, ზურაბ ადეიშვილის ახალი გვერდი რეგისტრირდება, სადაც ადეიშვილის „აღსარებას“ ვკითხულობთ:

„მე, ზურაბ ადეიშვილი ვარ საქართველოდან გაქცეული და მინდა დღეს დავარღვიო დუმილი და ყველაფერი ვთქვა, რაც ხდებოდა ამ ცხრა წლის განმავლობაში საქართველოში. დიახ, მე მინდა ზუსტად ყველაფერი ვთქვა იმის შესახებ, რაც ვიცი ციხის ამბების შესახებ. ამ საქმეში ვანო მერაბიშვილია დამნაშავე, რომელიც მეთაურობდა ყველა იმ საშინელებას, რაც ხდებოდა იმ დროს ციხეებში, ასევე ლაფანყურის ამბებიც მაგის ერთ-ერთი საგმირო საქმეა. მე მარტო ვანო მერაბიშვილს არ ვადანაშაულებ. იმ ამბებს, რაც ხდებოდა იმ დროს საქართველოში, ამ საქმეებს ძირითადად საქართველოს პრეზიდენტის მიხეილ სააკაშვილის შეკვეთით ასრულებდა ვანო მერაბიშვილი, ასევე ძმები ახალაიები მისი ქვეშევრდომები და შემსრულებლები იყვნენ და არაერთი ბოროტება აქვთ ჩადენილი. მე მზად ვარ ჩამოვიდე და სამართალდამცველების ყველა კითხვას ვუპასუხო.

მე არ გავურბივარ სამართალს და თუ დამნაშავე ვარ, მზად ვარ კანონის წინაშე წარვსდგე.

მე ასევე მაქვს ის დამამტკიცებელი საბუთები, სადაც სააკაშვილის ბრძანებით მოხდა 7 ნოემბერს მშვიდობიანი ხალხის დარბევა და ასევე მისივე ბრძანებით დაარბიეს 26 მაისს მშვიდობიანი მოქალაქეები, რა დროსაც რამდენიმე ადამიანი ცემით მოკლეს. ბევრი მაქვს სათქმელი ხალხისთვის.

მინდა ხალხს ბოდიში მოვუხადო იმის შესახებ, რომ ამდენი ხნის განმავლობაში ვდუმდი და არ ვლაპარაკობდი. დიახ, აი, ამიტომ ვარ მე დამნაშავე და არ მიკვირს, რომ ხალხს ჩემდამი ზიზღის გრძნობა აქვს“, - წერს ადეიშვილი.

„ფეისბუქში“ ზურაბ ადეიშვილის გვერდი, სადაც ეს განცხადება გამოქვეყნდა, დაახლოებით რამდენიმე საათის წინ შეიქმნა.

„წარმოდგენა არ მაქვს ზურაბ ადეიშვილის სახელით გავრცელებული განცხადება, მას ეკუთვნის თუ არა“,- აცხადებს ადეიშვილის ადვოკატი გოჩა სვანიძე, რომელიც განმარტავს, რომ მას ადეიშვილთან კონტაქტი არ აქვს და შესაბამისად, ინფორმაციის გადამოწმებას ვერ მოახერხებს.

შეგახსენებთ, რომ მანამდე სოციალური ქსელებით გავრცელდა დათა ახალაიას ორი წერილი, სადაც ის ვანო მერაბიშვილს ამხელს. ერთი წერილის ნამდვილობას რამდენიმე ადამიანი ადასტურებს, თუმცა რეალურად მაინც უცნობია, ვინ არის ავტორი.

როდესაც „ცეცხლი გახსნილია“, პრინციპში, უკვე ნაკლები მნიშვნელობა აქვს ამ წერილების ნამდვილობა-არანამდვილობას, ურთიერთბრალდებები უკვე გაისმა და შესაბამისი პასუხიც არ დააგვიანებს. რას ნიშნავს სოციალურ ქსელებში ატეხილი ომი, ვინ შეიძლება იყოს მისი ინიციატორი, რეალურად რა ხდება „ნაციონალურ მოძრაობაში“, ხომ არ ხდება მათივე ხელით სოციალურ ქსელებში ამ განცხადებების გავრცელება, რათა შემდეგ ხელისუფლებას გადააბრალონ, ან ის სიმძაფრე გაანეიტრალონ, რაც ამ განცხადებებს შეიძლება მოჰყვეს.

ამ თემებზე ექსპერტი ვახტანგ ძაბირაძე გვესაუბრება.

ბატონო ვახტანგ, ახლა უკვე ზურაბ ადეიშვილის წერილიც ვიხილეთ სოციალურ ქსელებში, მისი ავთენტურობის დადგენა ჯერ ვერ ხერხდება, თუმცა საინტერესოა სხვა რამ, რეალურად ჩანს, რომ რაღაც პროცესი დაწყებულია და მის გამოძახილს ვხედავთ ამ განცხადებების სახით. თქვენი შეფასებით რა პროცესის მოწმენი ვართ?

- არ ვიცი, რამდენად შეესაბამება სინამდვილეს ადეიშვილის მიერ „ფეისბუკზე“ გავრცელებუილი განცხადება, ვიცი, რომ მეორე განცხადება ახალაიასი, უარყო მისმა ადვოკატმა.

თვითონ ეს პროცესი ღებულობს ძალიან საინტერესო განვითარებას. მოსალოდნელია, რომ იქნება კიდევ ახალ-ახალი განცხადებები, რამდენად იქნება ეს სიმართლესთან შესაბამისობაში, საკმაოდ რთული და ძნელი სათქმელია, თუმცა მნიშვნელოვანი ამ განცხადებებიდან მაინც ადეიშვილის ფაქტორია, რადგან ფაქტობრივად, სხვა აღარავინ დარჩა მაღალი რანგის ჩინოვნიკებიდან. ამიტომ, მნიშვნელოვანია, ეს განცხადება შეესაბამება თუ არა სიმართლეს.

რაც შეეხება, „ნაციონალურ მოძრაობაში“ ღრვევა იწყება თუ არა, ჩვენ უკვე ვიხილეთ მარიკა ვერულაშვილის განცხადება იმასთან დაკავშირებით, რომ ის ეხმიანება ახალაიას განცხადებას და თავადაც ადასტურებს ამ განცხადების ნამდვილობას. ეს ადასტურებს, რომ რღვევის პროცესი დაწყებულია და ის თავისთავად წავა. აქვე გავიხსენოთ მამა ახალაიას ფაქტორიც.

ეს ყველაფერი ისედაც მოსალოდნელი იყო, უბრალოდ, დროის ფაქტორი მუშაობდა, რამდენ ხანს გაუძლებდა „ნაციონალური მოძრაობა“ და მისი გუნდი ერთად ყოფნას. უფრო სწორი იქნება თუ ვიტყვით, რამდენ ხანს შეძლებდნენ ერთმანეთის ატანას.

ის, რაც დღეს, თუნდაც ადრე ითქმებოდა, „ფეისბუკით“ და საერთოდ, საინფორმაციო საშუალებებით ვრცელდებოდა, ზოგადად, საზოგადოებისთვის ხომ სიახლეს არ წარმოადგენს. შეიძლება, უბრალოდ, გაგაოცოს ფაქტმა, რომ იგივე პრეზიდენტის სპეციალური დაცვის დაფინანსებიდან ვიღაცისთვის საჩუქარს ყიდულობენ. არ შეიძლებოდა, სხვანაირად მოეფიქრებინა რამე? შეიძლება მხოლოდ ამ კომბინაციამ გაგაოცოს, თორემ „ნაციონალური მოძრაობა“ ბიუჯეტს რომ ისე ხარჯავდა, როგორც საკუთარ ფულს და არც ფიქრობდა, ვინმესთვის ანგარიში ჩაებარებინა, ეს ყველამ მშვენივრად ვიცით. ამ მხრივ რაიმე სიახლე ეს არ არის და დროთა განმავლობაში ამისი გამოაშკარავებაც აუცილებლად მოხდებოდა.

როგორც ჩანს, ნაციონალებში კომპრომატების ომი იწყება, მიზეზი რა უნდა იყოს?

- შესაძლოა, ამას ვიღაცამ მართლაც შეუწყო ხელი და ეს შეიძლება იყოს 19 აპრილთან მართლაც დაკავშირებული, მაგრამ მეეჭვება, ეს დღევანდელი უმრავლესობის მხრიდან იყოს პედალირებული და ინიცირებული.

უფრო სხვა ფაქტორი მუშაობს 19 აპრილთან მიმართებაში, იგივე „ნაციონალურ მოძრაობაშიც“ ყველა ხედავს, რომ განწყობა საზოგადოებაში არის ძალიან უღიმღამო. არც აქტიურ ნაციონალებს და არც პასიურებს, რეალურად არ უნდათ მისვლა ამ შეკრებაზე. ეს პროცესი შესაძლოა, თავად გაააქტიურეს და დაიწყეს საბაბის ძებნა იმისათვის, თუ რატომ არ უნდა მივიდნენ აქციაზე. ამ კუთხით ეს შეიძლება, მართლაც უკავშირდებოდეს 19 აპრილის აქციას.

თუმცა, ეს პროცესი კიდევ უფრო დაჩქარდება და კიდევ უფრო სწრაფად დაიწყება რღვევა „ნაციონალური მოძრაობის“, შემაკავებელი, როგორც ჩანს, აღარც აღარავინ აღარ არის. თუ პრეზიდენტის გუშინდელ ინტერვიუს გადავხედავთ მთლიანობაში, თავად სააკაშვილიც კი ცდილობს ამ სიტუაციისგან დისტანცირებას.

ძალიან მნიშვნელოვანი იყო პრაიმერის თემა, პრეზიდენტისგან წამოწეული, ზოგადად დემოკრატიული ფორმაა, მაგრამ თუ სააკაშვილის ხასიათს გავითვალისწინებთ, პრაიმერი რეალურად ნიშნავს იმას, რომ მას არ უნდა იყოს საპრეზიდენტო კანდიდატის დასახელების ინიციატორი, ამიტომ დისტანცირებას ცდილობს.

ასეთი ინფორმაციაც კი ვრცელდება, რომ მერაბიშვილი სააკაშვილის პარტიიდან გარიცხვის საკითხის დაყენებას აპირებს აქციაზე, ნაციონალების თავს, რაღაც, მათთვის ძალიან ცუდი ხდება?

- სიმართლე გითხრათ, ერთმანეთისგან გამიჯვნისა და თავის არიდების პროცესი დაიწყო. როგორც ჩანს, ისინი უკვე გადავიდნენ იმ ეტაპზე, როცა ჯერი საკუთარი თავის გადარჩენაზე მიდგა. როგორც ჩანს, მიხვდნენ, რომ ჯგუფური გადარჩენა მათთვის შესაძლოა, საკმაოდ რთული აღმოჩნდეს და ამიტომ იმ მიმართულებით წავიდნენ, რომ სჯობს, ყველამ საკუთარ თავს მიხედოს.

სხვათა შორის, ბოლო პერიოდში სააკაშვილსაც არაერთხელ უთქვამს, რომ ბევრ საკითხში ზურაბ ადეიშვილს ზედმეტი მოსდიოდა და უფლებამოსილებას აჭარბებდა. ხომ არ ცდილობენ მთელი ის უბედურება, რაც ქვეყანაში ხდებოდა, ყველაზე არაპოლპულარულ სახეებს, ახალაიებსა და ადეიშვილს გადააბრალონ? თუ ეს ასეა და ეს პროცესი დაიწყო, საინტერესოა, საპასუხოდ რაც მოიმოქმედებენ და დანარჩენებს როგორ დაადანაშაულებენ, შეიძლება ბრალდებათა ომი დაიწყოს ნაციონალებში?

- რა თქმა უნდა, დაიძრა ეს პროცესი, სააკაშვილ-მერაბიშვილი, როგორც ჩანს, ცდილობს, ეს პროცესი ადეიშვილ-ახალაიასკენ გადაამისამართოს. ყველა ხვდება, რომ მარტო ახალაიები ვერაფერ შუაში ვერ იქნებოდნენ, მაგრამ აქ შეიძლება იყოს კიდევ მეორე პროცესი, რომ „ნაციონალურ მოძრაობაში“ რაღაც გუნდს უნდა პოლიტიკაში დარჩენა. ეს გუნდი ვისთან შეიძლება ასოცირდებოდეს, ადეიშვილ-ახალაიას გუნდთან თუ სააკაშვილ-მერაბიშვილის გუნდთან?

ძალიან საინტერესო იყო თუთბერიძის განცხადება ამ კუთხით ახალაიასა და მერაბიშვილთან მიმართებაში. თუ ვიგულისხმებთ, რომ თუთბერიძე, უგულავა, ბოკერია ერთი გუნდი არიან (თუმცა უგულავა ცოტა რთული ფაქტორია), ამ გუნდისთვის მიმართულების მერაბიშვილისკენ წაყვანა უფრო მომგებიანია. ამიტომაც ეს პროცესი საკმაოდ დაძაბულად მიდის.

რაკი რაღაცნაირად ეს უკვე მოხდა, ვგულისხმობ, დათა ახალაიას განცხადებას, ეს პროცესი იქნება უკვე შეუქცევადი. ერთია, რომ ურთიერთობები გაიხლიჩა და მეორეა, რომ წავა ახალ-ახალი ბრალდებებისა და კომპრომატების კორიანტელი. ისიც კი, რაც შეიძლებოდა საზოგადოებისთვის ასე თუ ისე უცნობი დარჩენილიყო, წინა პლანზე წამოვა.

ეს იქნება ურთიერთჩათრევის პროცესი რადგან აქედან თავის დაღწევა შეუძლებელი იქნება, სუფთად ამოსვლას, რა თქმა უნდა, ვერც ერთი ვერ შეძლებს და არც შეიძლება რომ ასე მოხდეს. მაგრამ მეტ-ნაკლებად მორალური და ზნეობრივი სახის შენარჩუნება ყველას გაუჭირდება, რადგან ეს მორევი ყველას და ყველაფერს მაინც ჩაითრევს, იძულებული გახდებიან, კომპრომატებს კომპრომატით უპასუხონ.

საინტერესო იქნება თუ როგორ გადაჯგუფდება სიტუაცია, თუმცა გარკვეული დროის შემდეგ, ეს დაჯგუფებები ისევ ერთმანეთში აირევა, იმიტომ, რომ იქნება ძალიან მძიმე ხასიათის ბრალდებები ერთმანეთის მიმართულებით. ვიცით, რომ დიდი ხანია ეს პროცესი უნდა დასრულებულიყო და დაიწყო კიდეც ნაციონალების დასრულების პროცესი.

ამ ეტაპზე უმცირესობის წევრები აცხადებენ, რომ ახალაიებმა ვერ გაუძლეს ზეწოლას, ცოტა ხანში შეიძლება იგივე მოვისმინოთ ადეიშვილზეც, შეიძლება თუ არა ვივარაუდოთ, რომ ეს განცხადებები ხელისუფლების ზეწოლის შედეგია?

- ხელისუფლების ზეწოლაზე თუ არის საუბარი, ბაჩანა ახალაიაზე შეიძლება ივარაუდო, რომ რაღაც ზეწოლა იყო. დათა ახალაიას, მეგის ქარდავას, სოსო თოფურიძეს რაც შეეხება, რომლებიც საქართველოში არ იმყოფებიან, რა ზეწოლა შეიძლებოდა მომხდარიყო?

კი, დათა ახალაიაზე შეიძლება ვივარაუდოთ, რაკი მისი ძმა ციხეშია, მასზე რაღაც „პრესი“ ხდებოდა და ეს ზეწოლად ჩავთვალოთ, მაგრამ დანარჩენებზე რა შეიძლება ვიფიქროთ? რაც შეეხება ადეიშვილს, რომელმაც იცის, რომ ამ ეტაპზე დუმილი სჯობს და თუ ეს განცხადება ნამდვილი არ არის, აგრძელებს დუმილს, ისიც ვიცით, რომ ადეიშვილი მთელ ამ გუნდში ყველაზე ნიჭიერი და ჭკვიანი კაცია, მასზე ზეწოლა როგორ შეიძლება განხორციელდეს?

აქ უკვე მეორე ფაქტორმა დაიწყო მუშაობა, მათ ეშინიათ, რომ დააგვიანებენ - შეიძლება ფსიქოლოგიური ფაქტორი ამოქმედდა, ხელისუფლება აქ არაფერ შუაში არ არის. თუ ვიღაცაზე მოხდა დანაშაულების გადაბრალება, მერე უფრო რთული იქნება ამ სიტუაციიდან გამოსვლა, ამიტომ ცდილობებნ, რომ ერთმანეთს დაასწრონ. ეს უფრო მგონია ვიდრე ის, რომ ხელისუფლება ახორციელებს ზეწოლას.

ისინი ნელ-ნელა შედიან იმ რეალობაში, რა მოხდა მათ თავს და როგორი პერსპექტივები შეიძლება ჰქონდეთ, ისინი ამ პერსპექტივებმა შეიძლება დააფრთხოს, დააშინოს და აიძულონ იმ მოქმედებებისაკენ, რაც დღეს ხდება.

იმ ადამიანებზე კიდევ შეიძლება იფიქრო, ვინც საქართველოშია, რომ ზეწოლა ხდებოდეს, მაგრამ ვინც ქვეყანას გაეცალა მათზე ზეწოლა როგორ უნდა ხდებოდეს? ვინც საქართველოშია ზეწოლა მათზეც კი არ ხდება, ზეწოლას ვერ დავარქმევ ადამიანის დაკითხვაზე დაბარებას, როდესაც დაკიხვაზე მიდის 7 ადვოკატით, 30 ჟურნალისტით და ა.შ.

შაშკინიც ჩამოვიდა საქართველოში, რომელზედაც არანაკლები მასალები არსებობს, თუნდაც მხოლოდ სასკოლო სახელმძღვანელოებთან დაკავშირებით. ხიფათის განცდა მაინც უნდა ჰქონოდა, მაგრამ არანაირი ხიფათის განცდა არ აქვს და მშვენივრად დადის ქვეყანაში.

აბა რას უნდა ეიძულებინა „ნაციონალური მოძრაობა“ თვითონვე დაეწყოთ ერთმანეთისთვის კომპრომატების „სროლა“, როცა ეს პროცესი ლოგიკურად უნდა დაეწყო პროკურატურას, სამართალდამცავ უწყებებს, ამასაც არ ელოდებიან, თვითონვე ერთმანეთში არკვევენ, ვინ ლაფანყურში სცოდავდა და ვინ სხვა ეპიზოდში, რამ გამოიწვია ურთიერთბრალდებები?

- პირველი არის ის, რომ გააცნობიერეს, უფრო უარესი მოხდა, ვიდრე მხოლოდ არჩევნებში დამარცხებაა, მეორეა, რომ თვითონ ყველაზე უკეთ იციან რა დანაშაულები აქვთ ჩადენილი და მესამე, ნახეს, რომ პროცესი ისე არ განვითარდა, როგორც ეგონათ, ხვდებიან, რომ რაღაც სასჯელი გარდაუვალი იქნება. ასეთ შემთხვევაში გაუჩნდათ შიში, მას ხომ თავისი დანაშაული აქვს, სხვამ თავისი ცოდვები არ აჰკიდოს. გაჩნდა იმედი, რომ თუ მე ვიტყვი სხვის ცოდვებს, ეგებ რაღაც შეღავათი მეც მივიღო.

ახალაიებთან მიმართებაში სავარაუდოდ ასეთი რამ მოხდა, იგივე მერაბიშვილი და სხვები, როგორც ჩანს, მათ რაღაცას დაპირდნენ, აიმედებდნენ, ბაჩო ახალაიას გამოჩენა საქართველოში საკმაოდ უცნაური იყო, მაშინ, როდესაც იცოდა, რომ მის მიმართ საკმაოდ მტრული სიუტუაცია იყო.

როგორც ჩანს, მიხვდნენ, რომ მათმა მოლოდინმა არ გაამართლა, ამიტომ ცდილობენ, როგორმე გაემიჯნონ სიტუაციებს და თავისი და სხვისი ცოდვაც იქნებ სხვებს აჰკიდონ. ამას უფრო ვხედავ, ვიდრე ხელისუფლებისგან ზეწოლას, მაგრამ თუ ვინმე ხელისუფლებიდან ამ პროცესის დაწყებას დაეხმარა, ვთვლი, რომ ძალიან სწორადაც მოიქცა. მინიმუმ, ხელისუფლებას დასავლეთთან თავის მართლებას მაინც ააცილებს. თვითაღიარების პროცესი თუ დაიწყება, ეს ხელისუფლებისთვის ძალზე მომგებიანია და რატომაც არ უნდა გაეკეთებინა ორგანიზება, თუიკი ამისი საშუალება ჰქონდა?

მაინც მგონია, რომ ძირითადი პროცესები მაინც „ნაციონალური მოძრაობის“ შიგნით დაიწყო და არა, სხვისი ინიცირებით. მარიკა ვერულაშვილის განცხადება გაცილებით მომგებიანი იქნებოდა მაშინ, როდესაც საკონსტიტუციო პროცესი მიმდინარეობდა, ვიდრე ახლა. ამიტომ მგონია, რომ ხელისუფლების წილი არის ძალიან ცოტა.

ნაციონალები იმასაც ამბობენ, რომ ამ პროცესით, ყოფილი ჩინოვნიკების განცხადებებს ვგულისხმობ, 19 აპრილის გადაფარვა ხდება და რეალურად, ხელისუფლებას ამ აქციის ეშინია...

- არ შეიძლება ხელისუფლებას ეშინოდეს იმ აქციის, რომელიც არავინ იცის საერთოდ შედგება თუ არა, იმ განწყობების ფონზე, რა განწყობებიც იყო საზოგადოებაში, თუნდაც, ახალაიას მიმართვამდე. იმის განცდა, რომ პროვოკაცია არ მოხდეს, მართლაც არსებობს, რადგან პროვოკაციისთვის 100 კაციც საკმარისია. ისიც კი ითქვა, რომ რაღაც რეისები გადაიდო, მაგრამ მგონია, რომ ძალიან გაზვიადებულია. საზოგადოებაში ხომ საერთოდ არ ჩანს რაიმე განწყობა - ის მაინც ვისწავლეთ, განწყობის მიხედვით განვსაზღვროთ, მიტინგზე რამდენი ხალხი მივა. საამისო განწყობა ნამდვილად, არ იგრძნობა, პირიქით არავის არ სურს ამ მიტინგზ