საქართველოში ბოლო დროს განვითარებული მოვლენიდან გამომდინარე, კულუარებში აქტიურად მიდის საუბარი, რომ პრემიერ-მინისტრი ირაკლი ღარიბაშვილი თვითმმართველობის არჩევნებამდე პოსტს დატოვებს, ვინაიდან ამის მომხრეა საქართველოს პარტნიორი ამერიკაც.

For.ge დაინტერესდა, აღნიშნული ინფორმაცია თუ გამართლდა, რამდენად დააზარალებს „ქართულ ოცნებას“ თვითმმართველობის არჩევნებზე და ამ კითხვით ანალიტიკოსებს მივმართეთ.

ექსპერტი ლევან ნიკოლეიშვილი ამ ეტაპზე ვერ ხედავს იმის საშიშროებას, რომ პრმიერ-მინისტრი ირაკლი ღარიბაშვილი გადადგეს.

„ღარიბაშვილის გადადგომა რამდენიმე თითზე ჩამოსათვლელ ადამიანს უნდა და ამას გაიძახიან, პლუს, ამას ემატება ის პარტიული ტელევიზიებიც. მოსახლეობის განწყობაში კი მსგავს ვერაფერს ვამჩნევ. ამერიკა საქართველოს საქმიანობაში ერევა იმდენად, რამდენადაც პარტნიორებს შეუძლიათ ერთმანეთში ისაუბრონ. ამერიკა არ აყენებს და არ ნიშნავს საქართველოში პრემიერ-მინისტრს“, - განუცხადა for.ge.

ანალიტიკოს დავით ქართველიშვილს ირაკლი ღარიბაშვილის მიერ გავრცელებულ „ჭორებზე“ კომენტარის გაკეთება უჭირს.

„თუ ადამიანს გადაწყვეტილი აქვს, რომ პოსტი დატოვოს, თან როდის - როდესაც მისი რეიტინგი ძალიან მაღალია, როდესაც მის მიმართ ნდობა მოსახლეობაში ძალიან მაღალია, როდესაც თავად „ქართული ოცნება“ ასეთი პრემიერის პირობებში თამამად გრძნობს თავს და მზად არის ნებისმიერ გამოწვევას უპასუხოს, ასეთ პოპულარობის პიკში ჩემთვის გაუგებარია რატომ უნდა გადადგას ასეთი ნაბიჯი“, - განუცხადა for.ge-ს ექსპერტმა.

საქართველოს შიდა სამზარეულოში ამერიკის ხელის „ფათურის“ გამო, დავით ქართველიშვილი დასავლელ პარტიორებს საქართველოს ისტორიის გახსენებასაც სთავაზობს.

„ყველას, ვისაც პრეტენზია აქვს პარტნიორობაზე, თანაბარუფლებიანობაზე ჩვენთან, რასაც ჩვენ ჩვენი მხრიდან ყოველთვის ხაზს ვუსვამთ, უბრალოდ, საქართველოს უახლოესი ისტორია უნდა შეისწავლონ. კოლონიზატორი და ვასალის ურთიერთობაზე დაყვანილი პარტნიორობა საქართველოსთან მიმართებაში ხანგრძლივი არაა და დასაშლელად განწირულია. ასე იყო მეფის რუსეთთან მიმართებაში, როდესაც ეგზარხოსის გუბერნატორი ქედმაღლურად ეპყრობოდა ჩვენს სახელმწიფოებრიობას. ასე იყო საბჭოთა-ბოლშევიკურ რუსეთთან თანაცხოვრების პერიოდში, როდესაც საქართველოში ცეკას მეორე მდივანი კარნახობდა მოვლენათა განვითარებას. დღეს არც მეფის რუსეთია და არც საბჭოთა კავშირია, მაგრამ საქართველო ასე თუ ისე, არის და ყოველ წელიწადს მიისწრაფის იმ პატნიორულ თანაბარუფლებიანობისკენ, რასაც დასავლური ოჯახი ჰქვია. თუ ეს ყველაფერი რისკის ქვეშ უნდა დადგეს და თუ ეს ყველაფერი შედის დასავლეთის ინტერესებში, რაშიც ეჭვი მეპარება, მაშინ დასავლეთმა ის ტოტი უნდა მოჭრას, რომელზეც ამიერკავასიის რეგიონში თავადაც ზის. საქართველო არის ერთადერთი ქვეყანა, რომელიც ერთგულია ამერიკასთან და ევროკავშირთან მეგობრულ-პარტნიორულ ურთიერთობებში. ამ ტოტის მოჭრა რატომ უნდა მოინდომოს ან ერთმა, ან მეორემ, ჩემთვის გაუგებარია“, - გვითხრა ექსპერტმა.

კოლეგებისგან განსხვავებული ვერსია აქვს, ექსპერტ ნიკა ჩიტაძეს. ის თვლის, რომ თუკი ირაკლი ღარიბაშვილი პოსტს დატოვებს, „ქართულ ოცნების“ რეიტინგზე ნეგატიურად აისახება.

„ღარიბაშვილის წასვლა მანიშნებელი იქნება იმისა, რომ „ოცნება“ აცნობიერებს სხვადასხვა შეცდომას, მათ შორის 5-6 ივნისს განვითარებულ მოვლენებსაც“, - განაცხადა ნიკა ჩიტაძემ.

მისივე მოსაზრებით, ამერიკა დაინტერესებულია საქართველოში მიმდინარე მოვლენებით და ასევე გაკვირვებულია ღარიბაშვილის საქციელით.

„შეიძლება ღარიბაშვილი გადადგეს, მაგრამ „ქართული ოცნება“ ინარჩუნებს ძალაფლებას. თუმცა, ვფიქრობ, რომ დასავლეთი დაინტერესებულია იმით, რომ „ქართული ოცნების“ მმართველობა საქართველოში დასრულდეს“, - გვითხრა ექსპეტმა.

ანალიტიკოსის თქმით, ამერიკას საქართველოში აღმასრულებელ ხელისუფლებაში კოალიციური მთავრობის ხილვა სურს.

„ხალხის არჩევანი იქნება ვინ მოვა ხელისუფლებაში. მათი სურვილი იქნება, რომ არც ერთ პარტიას არ ჰქონდეს ძალაუფლებაზე მონოპოლია. დასავლეთს დაბალანესებული მთავრობა სჭირდება“, - განუცხადა for.ge-ს ნიკა ჩიტაძემ.