სამხედრო გადატრიალების შემდეგ, მიანმარში საპროტესტო აქციებზე სამართალდამცველებმა 300-ზე მეტი ადამიანი მოკლეს. ინფორმაციას ამის შესახებ სააგენტო Reuters-ი ავრცელებს.
„კაცობრიობის წინააღმდეგ დანაშაულები ყოველდღიურად ხორციელდება“, - განაცხადა პოლიტპატიმრების დახმარების ასოციაციამ.
ორგანიზაციის მონაცემებით, 25 მარტისთვის საპროტესტო აქციებზე 320 ადამიანი დაიღუპა. აქციებზე მოკლული ადამიანების 25%-ს სასიკვდილო ჭრილობა თავში ცეცხლსასროლი იარაღით აქვს მიყენებული.
24 მარტს მიანმარში სამთავრობო ძალებმა 7 წლის ბავშვი მოკლეს. სამხედროები საპროტესტო აქციების მონაწილეთა სახლებში რეიდს ატარებდნენ. გოგონას მშობლებმა კი მათ კარი არ გაუღეს, ძალოვნებმა ცეცხლი გახსნეს, ნასროლი ტყვია 7 წლის ბავშვს მოხვდა.
მიანმარში 1-ელ თებერვალს მომხდარი სამხედრო გადატრიალების შემდეგ საპროტესტო აქციები დაიწყო. სამთავრობო ძალები დემონსტრაციებს ცეცხლსასროლი იარაღის გამოყენებით არბევენ. ამერიკის შეერთებულმა შტატებმა და ევროკავშირმა მიანმარის გადატრიალების ლიდერებს სანქციები უკვე დაუწესეს.
