23 თებერვალის დილით, „ნაციონალური მოძრაობის“ ოფისზე შტურმმა და პარტიის თავმჯდომარის, ნიკა მელიას დაკავებამ კვირის აბსოლუტურად ყველა რეზონანსული თემა გადაფარა. კადრებმა, რომლებიც ვიხილეთ, ბევრი მოსაზრება და არაერთგვაროვანი შეხედულება წარმოშვა. მაგალითად, იყო თუ არა ლეგიტიმური ის ძალა, რომელიც სპეცოპერაციის დროს ვიხილეთ? ადგილი ხომ არ ჰქონდა ძალის გადამეტებას? - თუმცა, უნდა აღინიშნოს, ანალიტიკურ და პოლიტიკურ წრეებში საუბრობენ, რომ სპეცოპერაცია საბოლოოდ მშვიდობიანად ჩატარდა.

აღნიშნული საკითხის სამართლებრივი შეფასება და სხვა მნიშვნელოვანი ნიუასების განხილვა, უფლებადამცველსა და იურისტს, ლია მუხაშავრიას ვთხოვეთ.

ქალბატონო ლია, სპეცოპერაციას იურიდიული კუთხით როგორ შეაფასებთ?

- ვფიქრობ, იყო ძალის გადაჭარბება. გამოიყენეს ძალოვანი უწყების რამდენიმე ათასი წარმომადგენელი. რომ დავთვალოთ რა დაჯდა ეს ოპერაცია, ალბათ, ძალიან დიდი თანხა გამოვა. მაშინ, როდესაც არდაკავებითაც არაფერი დაშავდებოდა. მართლმსაჯულების განხორციელება უნდა იყოს ეკონომიური, ქმედითი და ეფექტიანი. არც ერთი მიზანი არ იყო მიღწეული, მით უფრო, რომ მართლმსაჯულების მიერ მიღებული გადაწყვეტილება არ იყო კანონიერი. არავის ეჭვი არ ეპარება, რომ სასამართლომ არ მიიღო კანონიერი, დასაბუთებული და მიუკერძოებელი გადაწყვეტილება.

თქვენი აზრით, ნიკა მელიას საქმე ექვემდებარება თუ არა გასაჩივრებას და რა შედეგი იქნება მიღწეული?

- ეს გადაწყვეტილება გასაჩივრებულია ზემდგომ ინსტანციაში და მე არ გამოვრიცხავ, რომ მელიას ადვოკატებმა გაასაჩივრონ ევროპულ სასამართლოშიც. ევროსასამართლოს წესების 39-ე წესით მიხედვით, როდესაც გადაუდებელ ვითარებაში 24 საათში იღებს ხოლმე ევროპული სასამართლო გადაწყვეტილებას და აცნობებს მთავრობას, რომ რაიმე მოქმედება მათ განახორციელონ ან რაიმე მოქმედებისგან თავი შეიკავონ. ამიტომ, არანაირად არ იყო საჭიროება იმ უზარმაზარი ოპერაციის ჩატარებისა, რაც ჩვენ იმ დილით ვნახეთ.

სპეცოპერაციის დაწყებამდე, რა პროცედურების გავლა ხდება სამართალდამცავი ორგანოს მხრიდან?

- გაფრთხილება უნდა ყოფილიყო გაკეთებული ვერბალურად, პირადად მელიასთავის. იქნებ სულ არ იყო საჭირო იქ შევარდნა, იქნებ თვითონაც ჩაბარებოდა? აუცილებელი იყო, რომ გაფრთხილება ყოფილიყო, არა ისეთი როგორიც გააკეთეს ეზოში, არამედ პირადად მელიასთვის უნდა ეთქვათ, რომ სანამ შევიდოდნენ ოთახში და ხელს სტაცებდნენ, შემოეხვეოდნენ გარს, უნდა ეთქვათ, „თუ თქვენ თანახმა ხართ, ნებაყოფილობით ჩაგვბარდეთ, მაშინ არ გამოვიყენებთ ძალას.“

გამოიყენეს ცრემლსადენი გაზი, თანაც შენობაში, რაც ყოვლად დაუშვებელი და აკრძალულია, მით უფრო, რომ შიგნით არავის გაუწევია შეიარაღებული წინააღმდეგობა. არც ერთი ადამიანი აღმოჩენილი არ არის, ვისაც რაიმე ცივი იარაღი ჰქონდა, ცეცხლსასროლი იარაღი ან მომარჯვებული ჰქონდა რაიმე საგანი, როგორც იარაღი. წინააღმდეგ შემთხვევაში ამას ხომ გვაჩვენებდნენ და ამით გამართლდებოდა ძალისმიერი მეთოდების გამოყენება.

ის ზიანი, რაც მიადგა შენობას და ოფისს, ეს კიდევ დასათვლელია და სამართლებრივად „ნაციონალურ მოძრაობას“ აქვს უფლება მოითხოვოს მიყენებული ზიანის ანაზღაურება, რომ არაფერი ვთქვათ სერვერების წაღებაზე.

სერვერის გატანა შენობიდან, სადაც პარტიის ინფორმაციაა, ეს ყოვლად დაუშვებელი ამბავია და ალბათ, ამაზეც ადვოკატებმა უნდა გააკეთონ ძალიან მნიშენლოვანი აქცენტი.