ყოფილი დეპუტატი, უფლებადამცველი დიმიტრი ლორთქიფანიძე საქართველოს მთავარ პროკურორს, არჩილ კბილაშვილს მიმართავს და რამდენიმე კითხვაზე პასუხის გაცემას ითხოვს. ამის შესახებ განცხადება ლორთქიფანიძემ facebook-ის საკუთარ გვერდზე გამოაქვეყნა.

„ამ თვეების განმავლობაში ყურადღებით ვაკვირდებოდი ციხის კადრებთან დაკავშირებული მოვლენების განვითარებას – თუ ვინ, როდის, ვისი დაკვეთით თუ თხოვნით, ვისი დახმარებით, რა ვითარებაში, დროის რა მანძილზე, რა მოტივით, იღებდა, გამოჰქონდა, ვის აძლევდა და რატომ აღნიშნულ მტკიცებულებებს. არც ერთხელ ამ საქმესთან დაკავშირებით არ გამიკეთებია კომენტარი და დღეს, როდესაც გარკვეული ინფორმაცია დაგროვდა, მინდა ყურადღება გავამახვილო ერთ, არც თუ უმნიშვნელო გარემოებაზე.“, - წერს უფლებადამცველი ლორთქიფანიძე.

როგორც ცნობილია, ლადო ბედუკაძემ მაშინ თავი ბელგიას შეაფარა. ლორთქიფანიძის თქმით, ბედუკაძეს შენგენის ვიზა მაშინდელი ხელისუფლების წარმომადგენლებმა გაუკეთეს და ამიტომ დიმიტრი ლორთქიფანიძე მიმართავს მთავარ პროკურორს კითხვებით - ვის ინტერესებში იყო ქვეყნიდან ბედუკაძის წასვლა? ვინ გამოართვა ბედუკაძეს პასპორტი სლოვენიის ვიზის მისაღებად? ვისი ოფიციალური წარდგინებით შევიდა სლოვენიის საკონსულო წარმომადგენლობაში ბედუკაძის პასპორტი?

აღნიშნულთან დაკავშირებით for.ge დიმიტრი ლორთქიფანიძეს ესაუბრა. ვეცადეთ გაგვერკვია, რატომ გახდა ეს თემა მისთვის აქტუალური ახლა და რა ინფორმაცია აქვს ყოფილ დეპუტატს იმასთან დაკავშირებით, თუ ვის ინტერესებში შედიოდა ბედუკაძის მიერ ქვეყნის დატოვება.

დიმიტრი ლორთქიფანიძე: მიმაჩნია, რომ ეს ძალიან ლეგიტიმური კთხვებია, რომლებზეც პასუხი გაცემული არ არის. ამ საკითხით მე ჯერ კიდევ მაშინ დავინტერესდი, როდესაც პარლამენტის წევრი ვიყავი. მოგეხსენებათ, პარლამენტის წევრის სტატუსი 2012 წლის 21 ოქტომბერს შემიწყდა. მანამდე გარკვეულ წყაროზე წვდომა მქონდა და ვცდილობდი, ამ თემასთან დაკავშირებით მაქსიმალურად მეტი ინფორმაცია მომეძიებინა, მაგრამ ოფიციალური კომენტარებით ამ საკითხში არ ვერეოდი მანამ, სანამ გარკვეული რაოდენობის ინფორმაცია არ დაგროვდებოდა. ამ თემაზე უამრავი კონფერენცია ჩატარდა, პრესაში, ტელევიზიაში, ინტერნეტპუბლიკაციებით ძალიან ბევრი ინფორმაცია გაჟღერდა, მაგრამ მე დღეს პირველად გავბედე, რომ ამ საკითხზე ეს კითხვები დამესვა, რადგან როგორც ჩანს, ეს თემა კვლავ ბრუნდება. ამ შემთხვევაში მე უბრალოდ სიმართლის მხარეს ვდგავარ და არავისი ადვოკატი არ გახლავართ, მაგრამ როდესაც ჩვენ ღია ეთერთი ვიხილეთ, რომ წინა ხელისუფლება ძალიან აქტიურად ეწეოდა განსხვავებული სექსუალური ორიენტაციის მქონე ადამიანებით მანიპულირებას, დღესაც, როდესაც გარკვეული განცხადებები კეთდება, მიმაჩნია, რომ სიმართლის მხარეს დგომა უფლებადამცველის გარკვეული ვალდებულებაა.

ამ კითხვებზე პასუხების მიღება მინდა, რადგან, როგორც მოგახსენეთ, კითხვები ლეგიტიმურია. ის ფაქტი, რომ ბატონი ლადო ბედუკაძე ევროპაში შენგენის შეთანხმების ხელმომწერი ერთ-ერთი სახელმწიფოს ვიზით შევიდა (კერძოდ, სლოვენიის ვიზით), ჩემში ბადებს კითხვას, თუ როგორ მიიღო მან ეს ვიზა.

თქვენს მიერ გამოქვეყნებულ განცხადებაში ნათქვამია, რომ ბედუკაძეს ვიზიანი პასპოსრტი ვიღაცამ გადასცა. რას გულისხმობდით ამაში?

- რამდენადაც ჩემთვის ცნობილია, ბატონ ბედუკაძეს ვიზის მისაღებად საქართველოს საზღვარი არ გადაუკვეთავს. მას უბრალოდ ჩამოართვეს პასპორტი, გაუკეთეს ვიზა და უკან დაუბრუნეს პასპორტი. ამის გაკეთება მხოლოდ ერთ შემთხვევაშია შესაძლებელი - როდესაც ადამიანი სახელმწიფო სამსახურშია და კონკრეტული საჯარო სამსახურის პროტოკოლი მისთვის ამა თუ იმ ქვეყნის საკონსულო წარმომადგენლობაში შესაბამის წარდგინებას ამზადებს. როგორც ვიცი, ბატონმა ბედუკაძემ თავისი პასპორტი გაატანა კონკრეტულ პიროვნებას, რომლის დასახელებისგან მე თავს ვიკავებ და პასუხი კითხვაზე, თუ ვის გაატანა ბედუკაძემ თავისი პასპორტი, გამოძიების შედეგად უნდა მივიღოთ. ამის შემდეგ მას მოუტანეს ვიზიანი პასპორტი, მან შეძლო საქართველოს საზღვრის გადაკვეთა და წავიდა ბელგიაში. ამ დროს ბატონ ბედუკაძეზე წითელი ცირკულარით გამოცხადდა ძებნა. ამიტომ არ არის საღ აზრს მოკლებული ვარაუდი, რომ ვიღაც დაინტერესებული იყო იმით, რომ ლადო ბედუკაძე საზღვარგარეთ გაეყვანა, რის შემდეგაც მასზე წითელი ცირკულარით ძებნის გამოცხადების შედეგად იგი უკან დაბრუნებას ვეღარ გაბედავდა და ამით შეეძლო ვინმეს ესარგებლა.

ვის შეეძლო ამით ესარგებლა?

- რა თქმა უნდა, ეს იყო ყოფილი ხელისუფლება, რომელმაც მიიღო რა ინფორმაცია იმის თაობაზე, რომ ასეთი კადრები არსებობდა, გადაწყვიტა ფაბრიცირებული კადრები დაემზადებინა და შემდგომში უკვე ძალიან ძნელი იქნებოდა ტყუილის და სიმართლის გარჩევა, ანუ რეალური კადრების დამონტაჟებული კადრებისგან განსხვავება. რაც ყველაზე მთავარია, იერიში უნდა მიეტანათ ბატონ ბიძინა ივანიშვილზე, კერძოდ, დღევანდელი შინაგან საქმეთა მინისტრის სიმამრზე - ბატონ თამაზ თამაზაშვილზე, თითქოს ბატონი თამაზაშვილი (რომელიც იმ პერიოდში გლდანის მერვე დაწესებულებაში იმყოფებოდა) ამ კადრებს ციხის ადმინისტრაციის კონკრეტულ თანამშრომლებს უკვეთავდა, მათ შორის - ლადო ბედუკაძეს. ამ შემთხვევაში ძალიან ძნელი იქნებოდა მტყუან - მართალის გარჩევა.

ლადო ბედუკაძესთან დაკავშირებით ორი ვარიანტია, როგორ უნდა მოქცეოდნენ მას. ერთი ვარიანტია, რომ მომხდარიყო მისი ლიკვიდაცია, ხოლო მეორე - ბედუკაძე საზღვარგარეთ გაეყვანათ.

თქვენი აზრით, მაშინ რატომ არ მოხდა მისი ლიკვიდაცია?

- მაშინ აღარ იქნებოდა იმის გარანტია, რომ ბედუკაძის ლიკვიდაციის შემდეგ ეს კადრები საზოგადოებაში და ეთერში გამოჩნდებოდა. მეორე მხრივ, მისი საზღვარგარეთ გაყვანა და ამასობაში იმ ფაბრიცირებული კადრების დამონტაჟება და ეთერში გაშვება, შესაძლებელს გახდიდა, რომ შემდგომში ტყუილ-მართლის აღრევის შედეგად საზოგადოებას ვეღარ გაერკვია, ვინ რა კონკრეტული მიზნის მისაღწევად მოქმედებდა. მართალი გითხრათ, მიუხედავად არაერთი პრესკონფერენციისა, რომელიც ამ თემაზე ჩატარდა, საზოგადოება დღმდე გაურკვევლობაშია. ამ საკითხთან დაკავშირებით კითხვები გაცილებით მეტია, ვიდრე პასუხები. ამიტომ მე კონკრეტული შეკითხვებით მივმართავ ბატონ არჩილ კბილაშვილს და არა ბატონ ბედუკაძეს, რომელსაც, ბუნებრივია, იმ ვალდებულებებიდან გამომდინარე, რაც მას გამოძიების წინაშე წარმოეშვა, უფლება არ ექნება, რომ ამ კითხვებზე პასუხები საჯაროდ გაგვცეს. სწორედ ამიტომ ჩემი კითხვების ადრესატი ბატონი არჩილ კბილაშვილი გახლავთ.

მე მაქვს დასაბუთებული ეჭვი, რომ ბატონი ლადო ბედუკაძის ქვეყნიდან გაყვანაზე წინა ხელისუფლების მაღალი პოლიტიკური ელიტა მუშაობდა, კერძოდ - ბატონები ვანო მერაბიშვილი და ზურაბ ადეიშვილი, უშუალოდ ბატონ მიხეილ სააკაშვილის მეთაურობით.

თქვენი საუბრიდან გამომდინარე, თქვენ ფიქრობთ, რომ წინა ხელისუფლების მაღალჩინოსნებმა ბედუკაძე თავისი მიზნებისთვის გამოიყენეს?

- არა, თავისი მიზნებისთვის კი არ გამოიყენეს, არამედ ლადო ბედუკაძე, რომელიც თავისი შინაგანი რწმენით მოქმედებდა და ამ კადრების გამოტანა მოახერხა, საბოლოო ჯამში ისეთ გარემოცვაში აღმოჩნდა, საიდანაც ინფორმაციამ ხელისუფლებამდე გაჟონა. ამიტომ ხელისუფლებას უნდა მიეღო გადაწყვეტილება და როგორც ჩანს, ლადო ბედუკაძე, მისთვის სანდო პირის მეშვეობით დაარწმუნეს, რომ ქვეყანა უნდა დაეტოვებინა. მან რა თქმა უნდა, არ იცოდა ვინ იყო იმ ადამიანის უკან, ვისაც იგი ენდობოდა. როგორც ჩანს, ეს იყო რჩევა, რომელსაც ბატონი ბედუკაძე დაემორჩილა და ქვეყანა დატოვა, მაგრამ გავიდა თუ არა იგი საქართველოდან, ქართულ ტელესივრცეში გამოჩნდა ის ფაბრიცირებული კადრები, რომლებიც სასჯელაღსრულების დაწესებულებებში შესაბამისი დრამატურგიით გადაიღეს და სასწრაფოდ დაამონტაჟეს. შემდგომში კი უნდოდათ თამაზ თამაზაშვილისთვის დაებრალებინათ, თითქოს იგი ლადო ბედუკაძეს და მის კოლეგებს მსგავს კადრებს უკვეთავდა და შემდეგ ავრცელებდა მათ.

თქვენ ზემოთ თქვით, ახლა როდესაც გარკვეული განცხადებები კეთდება, საჭიროდ ჩავთვალე, ამ თემაზე მესაუბრაო. რას გულისხმობთ ამაში და რატომ გახდა თქვენთვის ეს თემა აქტუალური?

- სულ რამდენიმე კვირის წინ ვიხილეთ წინა ხელისუფლების მხრიდან სექსუალური უმცირესობების წარმომადგენლებით ძალიან ბინძური მანიპულირება, როდესაც წინა ხელისუფლება ამ ადამიანების ნების საწინააღმდეგოდ აიძულებდა მათ, რომ სხვადასხვა პირები დაეშანტაჟებინათ და შემდგომ ამ პირების მადისკრედიტირებელი კადრები გადაეღოთ. დღესაც ჩვენ ვხედავთ გარკვეულ განცხადებებს, რომელსაც აკეთებს პირი, რომელმაც ლადო ბედუკაძე ბინძურ ქმედებებში დაადანაშაულა (საუბარია ყოფილ მსჯავრდებულზე, რომელიც ბედუკაძეს გაუპატიურებაში ადანაშაულებს. რ.უ.). ამიტომ ბუნებრივია მიჩნდება კითხვა- ამ შემთხვევაშიც იგივე ქმედებებთან ხომ არ გვაქვს საქმე? უბრალოდ, ეს არის ჩემი ვარაუდი და ამიტომ ვითხოვ გარკვეულ კითხვებზე პასუხებს მთავარი პროკურუროსგან.