ჩეხეთის პრეზიდენტი მილოშ ზემანი ალექსეი ნავალნის ნაციონალისტური შეხედულებების გამო აკრიტიკებს. ვრცელი ინტერვიუ მან რადიო Frekvence 1-ს მისცა.
„ის თავს დემოკრატიისთვის მებრძოლად ასაღებს, სინამდვილეში კი, ჩვეულებრივი რუსი ნაციონალისტია. რამდენადაც ვიცი, ის მხარს უჭერდა ყირიმის ანექსიას, სტალინის რეპრესიებსა და ჩეჩნების დეპორტაციას, ასევე მონაწილეობას იღებდა სხვადასხვა ნაციონალისტურ მოძრაობებში“, - აღნიშნა ზემანმა.
ბერლინიდან დაბრუნებული ალექსეი ნავალნი შერემეტიევოს აეროპორტში 17 იანვარს დააკავეს და აღკვეთის ღონისძიების სახით 30-დღიანი პატიმრობა შეუფარდეს. მისი გათავისუფლების მოთხოვნით რუსეთში მასშტაბური საპროტესტო მსვლელობები იმართება.
