რა ფარული გარიგება შედგა «ოცნების» ერთ-ერთ წევრსა და «ნაციონალებთან» დაახლოებულ ლევან გახელაძეს შორის

გაფლანგა თუ არა კახა ბექაურმა ბიძინა ივანიშვილის ფული

ისეთი პირი უჩანს, რომ 2013 წლის პირველი სკანდალი შესაძლოა, «საზოგადოებრივი მაუწყებლის» გარშემო აგორდეს. ყოველ შემთხვევაში, არსებობს ალბათობა, რომ სამართალდამცავი უწყებები მხოლოდ «საზოგადოებრივი მაუწყებლის» ყოფილი დირექტორის, გია ჭანტურიას კი არა, სამეურვეო საბჭოს, ანუ ე.წ. ბორდი-ს ხელმძღვანელობის საქმიანობითაც დაინტერესდნენ. საქმეს ისიც ამწვავებს, რომ «პირველი არხის» დირექტორობის 200-მდე მსურველიდან ბორდმა კონკურსის მეორე ტურში მხოლოდ ხუთი არცთუ ცნობილი პერსონა გადაიყვანა, ისეთი პროფესიონალი «ტელევიზიონშჩიკები» კი, როგორიც, მაგალითად, მამუკა არეშიძეა, «დაბრაკა». მეორე ტურში გადასული ხუთი კანდიდატიდან ერთ-ერთი თინათინ რუხაძეა, რომელიც «პირველი არხის» ყოფილი ხელმძღვანელების _ კახა ბექაურისა და ერთი პიროვნების «ნდობით აღჭურვილი პირია». შესაბამისად, არსებობს ეჭვი, რომ ბექაურისა და ამ ერთი პიროვნების დუეტი «საზოგადოებრივ მაუწყებელში» დაბრუნებას სწორედ რუხაძის მეშვეობით აპირებს. ამ ეჭვს ისიც აძლიერებს, რომ არცთუ დიდი ხნის წინ, კახა ბექაურმა «მე-9 არხი» დატოვა. მართალია, «მე-9 არხიდან» ბექაურის წამოსვლის ოფიციალურ მიზეზად ტელევიზიის რეორგანიზაცია დასახელდა, მაგრამ არსებობს გონივრული ეჭვი, რომ ბექაურსა და პრემიერ ივანიშვილს შორის უთანხმოება მოხდა. სხვათა შორის, «მე-9 არხი», ბექაურთან ერთად, მთელმა მისმა გუნდმაც დატოვა. ერთი ვერსიით, ბექაურის «იდეების გენერატორი» ერთი პიროვნებაა. თუკი ასეა, მაშინ ეჭვი, რომ «საზოგადოებრივი მაუწყებლის» დირექტორად თინათინ რუხაძის გაყვანას ზემოხსენებული დუეტი «ჩალიჩობს», აბსოლუტურად ლეგიტიმურია დამ ას «საზოგადოებრივი მაუწყებლის» «ხელში ჩაგდება», შესაძლოა, ორი მიზეზით უნდოდეს: ჯერ ერთი, ეს ტელევიზია ბიუჯეტიდან ფინანსდება, ანუ ფულის პრობლემა არ აქვს და, მეორეც, ზემოხსენებული დუეტი განაწყენებულია და ივანიშვილზე «შურისძიებას გეგმავს». საამისოდ კი, «საზოგადოებრივი მაუწყებელი» ზედგამოჭრილია _ სხვა თუ არაფერი, მთელი ქვეყნის მასშტაბით «თეფშებისა» და სხვა დამხმარე საშუალებების გარეშე მაუწყებლობს... ეჭვს, რომ რუხაძის უკან შეიძლება, ბექაური და ერთი პიროვნება იდგნენ, ხელაღებით არც «ბორდი»-სგან «დაბრაკული» მამუკა არეშიძე უარყოფს. ამასთან, საზოგადოებრივი მოძრაობა «ქართული ოცნების» რეგიონალური პოლიტიკისა და ეროვნული უმცირესობების საკითხთა მიმართულების ხელმძღვანელი, კავკასიის საკითხების ექსპერტი და კოალიცია «ქართული ოცნების» გარდაბნის მაჟორიტარობის ყოფილი კანდიდატი «ქართულ სიტყვასთან» საუბრისას სკანდალურ განცხადებებსაც აკეთებს. სხვათა შორის, მამუკა არეშიძემ ე.წ. სი-ვი-ში შეგნებულად ჩაწერა, «ოცნების» მაჟორიტარობის კანდიდატი ვიყავიო და ეჭვობს, რომ კონკურსის მეორე ტურში სწორედ ამ, ერთი შეხედვით, არაფრისმთქმელი ნიუანსის გამო არ გადაიყვანეს.    

ბატონო მამუკა, «საზოგადოებრივი მაუწყებლის» დირექტორის არჩევასთან დაკავშირებით რა ხდება? რაღა დაგიმალოთ და, დავიშოკე, როცა გავიგე, რომ კონკურსის პირველივე ტურიდან «გამოგაგდეს». ე.წ. ბორდ-ს ისეთი რა მოთხოვნები ჰქონდა, რომ ვერ დააკმაყოფილეთ?
_ «საზოგადოებრივი მაუწყებლის» დირექტორის კონკურსში მონაწილეობა 200-მდე ადამიანმა გამოთქვა, თუმცა მეორე ტურში გადასვლა მხოლოდ ე.წ. სი-ვი-თ ხდებოდა.

კონკურსის მეორე ტურში სი-ვი-თ გადასვლა კანონითაა დადგენილი?
_ საქმე ისაა, რომ ეს კანონი თვითონ შექმნეს.
«თვითონ», ანუ «ბორდმა? 
_ დიახ... ვანო, ჯობია, ისტორია თავიდან გავიხსენოთ: ბორდ-ის შექმნის იდეა 2007 წლის კრიზისის დროს გაჩნდა.

ბორდ-ის შექმნის ინიციატივით, როგორც მახსოვს, «თავისუფლების ინსტიტუტი» გამოვიდა.
_ ეს ზუსტად არ ვიცი, მაგრამ იმჟამინდელ ოპოზიციასაც უნდოდა, რომ შექმნილიყო სამეურვეო საბჭო, რომელშიც ორივე მხარე _ ხელისუფლება და ოპოზიცია იქნებოდა წარმოდგენილი. სამეურვეო საბჭოს პირველ თავმჯდომარედ ირაკლი ტრიპოლსკი დაინიშნა, მაგრამ აღმოჩნდა, რომ ის ამინდს ვერ შეცვლიდა, რადგან საბჭოში ოპოზიციას ხელისუფლებაზე ნაკლები წარმომადგენელი ჰყავდა. სამეურვეო საბჭოს დებულებაში თავიდან ეწერა, რომ საბჭო საზოგადოებისთვის ცნობილი სანდო ადამიანებით უნდა დაკომპლექტებულიყო, ანუ საზოგადოება ამ საბჭოს დელეგირებას აძლევდა, რომ მისი ფულით მომუშავე ტელევიზია ემართა, მაგრამ ამ იდეამ დეგრადაცია განიცადა.

რატომ?
_ იმიტომ, რომ სამეურვეო საბჭოს მფარველებმა, ანუ «ნაცმოძრაობის» ისეთმა «თვალსაჩინო» წარმომადგენლებმა, როგორებიც გიგა ბოკერია, გიგი უგულავა და სხვები არიან, ოპოზიციის სრული უკონტროლობით ისარგებლეს... საბჭოში ვითომ ქვოტური პრინციპი მუშაობდა: ზოგ პარტიას შეეძლო, საბჭოში თავისი წარმომადგენელი ჰყოლოდა, ზოგს _ არა. მაგალითად, «საზოგადოებრივი მაუწყებლის» სამეურვეო საბჭოში ვინმე კანდელაკი თორთლაძის პარტიის ქვოტითაა გასული. მოკლედ, საბჭომ მახინჯი ფორმა მიიღო.

ისე, ამ ბორდ-ში დღეს, მგონი, საზოგადოების ფართო ფენებისთვის ცნობილი ერთი სახეც არაა...
_ თითო-ოროლა ცნობილი სახე არის. მაგალითად, საზოგადოებისთვის კარგად ცნობილია გივი ღამბაშიძე... ჰოდა, საბჭო სრულად მართვადი გახდა. ტელევიზიის საქმიანობას, პრინციპში, გია ჭანტურია კი არა, სწორედ ამ სამეთვალყურეო საბჭოს ხელმძღვანელი ლევან გახელაძე და, როგოც ამბობენ, საინფორმაციო სამსახურის უფროსი ხათუნა ბერძენიშვილი წარმართავდნენ. სხვათა შორის, ხათუნა ჩემი გაზრდილია...

ბატონო მამუკა, გკითხეთ და არ მიპასუხეთ. ამიტომ, ხელმეორედ გეკითხებით: ე.წ. სი-ვი-ში ისეთი რა გეწერათ, რომ ბორდ-მა დაგბლოკათ?
_ მერე, საუბარი რომ არ დაეწყოთ, «სი-ვი» დემოკრატიულად შევადგინე, ანუ ჩავწერე, რომ პირველი ოქტომბრის არჩევნებზე «ქართული ოცნების» გარდაბნის რაიონის მაჟორიტარობის კანდიდატი ვიყავი. ისე, კულუარულად სულ წინ მახვედრებენ, რომ «ქართულ ოცნებასთან» ვასოცირდები, მაგრამ ამავე დროს, კავკასიოლოგიასთან, ეროვნული უმცირესობის საკითხებთან, ტელევიზიასა და, რა ვიცი, კიდევ ბევრ რამესთან ვასოცირდები. მოკლედ, მერე, სპეკულაცია რომ არ დაეწყოთ, «სი-ვი»-ში სპეციალურად მივუთითე, რომ «ქართული ოცნების» მაჟორიტარობის კანდიდატი ვიყავი. ისე, იმაზე ხომ არ დავიწყებ ლაპარაკს, რომ ლევან გახელაძე ჩემთვის «ნაცმოძრაობის» წევრია...

გახელაძე «ნაცმოძრაობის» წევრი ოფიციალურადაა?
_ ეს არ ვიცი, მაგრამ «ნაციონალების» იდეოლოგიის გამტარებელია...

ბატონო მამუკა, «სი-ვი»-ში ისიც ხომ გეწერათ, რომ ტელევიზიაში მუშაობის ხანგრძლივი გამცდილება გაქვთ?
_ ტელევიზიას 16 წელი შევალიე, აქედან, ბოლო 6 წლის განმავლობაში ხელმძღვანელ თანამდებობებზე ვმუშაობდი _ კინორედაქციის მთავარი რეჟისორი, პროგრამა «საღამო მშვიდობისას» წამყვანი და ხელმძღვანელი, «მოამბის» მთავარი რედაქტორი ვიყავი...

და ყველაფერი ეს «სი-ვი»-ში გეწერათ?
_ რასაკვირველია, მაგრამ დარწმუნებული ვარ, რომ განსაკუთრებული ყურადღება მაჟორიტარობას მიაქციეს.

არ ჯობდა, რომ ეს დეტალი საერთოდ არ მიგეთითებინათ?
_ არა.
რატომ?
_ იმიტომ, რომ ამით ხაზი გავუსვი.

რას?
_ იმას, რომ ამ საკითხში «ქართული ოცნება», ანუ ხელისუფლება ჩარეული არ იყო. ასე რომ ყოფილიყო, მაშინ ბორდ-თან მოლაპარაკება-გარიგებას რაღაცნაირად მოვახერხებდი. სხვათა შორის, ვასილ მაღლაფერიძე ამბობს, ის, ვინც ახლა «საზოგადოებრივი მაუწყებლის» ხელმძღვანელი გახდება, «ნაცმოძრაობასთან» გარიგებული იქნებაო...

კონკურსში მონაწილეობის მისაღებად საბუთები, პრინციპში, ბოლო წუთს შეიტანეთ. მანამდე კი, ამბობდით, «საზოგადოებრივი მაუწყებლის» ხელმძღვანელობას იმ პირობით დავაპირებ, თუკი სამოქალაქო საზოგადოება, არასამთავრობო ორგანიზაციები და ხელისუფლება მხარდაჭერას წინდაწინვე აღმითქვამენო... ეს გარანტია მიიღეთ?
_ პირველი ორისგან, _ კი. სხვათა შორის, მხარდაჭერა «საზოგადოებრივი მაუწყებლის» დღევანდელი თანამშრომლებისგანაც მივიღე _ ბევრმა მთხოვა, რომ კონკურსში მონაწილეობა მიმეღო. რაც შეეხება ხელისუფლებას, მისგან მხარდაჭერას ვერც ვგრძნობ და არც მიმიღია. არადა, სიმართლე გითხრათ, მინდოდა.

ბატონო მამუკა, ქვეყანაში, პრაქტიკულად, ორხელისუფლებიანობაა და თქვენ რომელ ხელისუფლებაზე ლაპარაკობთ _ «ოცნებაზე» თუ «ნაცმოძრაობაზე»?
_ «ოცნებასა» და პრემიერ-მინისტრის გუნდზე.

«ოცნებას» სთხოვეთ, რომ თქვენთვის მხარი დაეჭირა?
_ არა, უბრალოდ, ვცდილობდი, გამერკვია, თუ რა პოზიცია ეკავა ხელისუფლებას. ძალიან მაღალი რგოლის წარმომადგენლებმა მითხრეს, საქმე სხვანაირადაა _ ძალიან სერიოზული დარღვევებია, რომლებიც უნდა გამოაშკარავდეს და ამ დარღვევებში, როგორც ჩანს, მონაწილეობა სამეურვეო საბჭოს ხელმძღვანელობასაც აქვს მიღებული. რამე რომ არ დაგვაბრალონ, დირექტორის არჩევაში არ ჩავერევითო.

სხვათა შორის, ამბობენ, რომ «საზოგადოებრივი მაუწყებლის» დირექტორად თქვენს, ასე ვთქვათ, გაყვანას «ოცნების» გარკვეული ფრთა ბლოკავდა...
_ გარკვეული ფრთა კი არა, ვეჭვობ, ერთი პიროვნება ერეოდა.

ეს ერთი პიროვნება ვინაა, გია ხუხაშვილი?
_ არა... ხუხაშვილი, შეიძლება, ყველა სხვა საქმეშია ჩარეული, მაგრამ ამ საქმეში ჩართული არ ყოფილა...

გასაგებია, რომ ამ ადამიანის ვინაობას არ ასახელებთ, მაგრამ ფაქტებით თუ დასტურდება, რომ ეს ადამიანი თქვენს წინააღმდეგ მუშაობდა?
_ ამ ეჭვს მოვლენათა განვითარების ლოგიკა და ის ფრაზა ბადებს, რომელიც გახელაძემ ბორდი-ს იმ დაუმორჩილებელ წევრებს უთხრა, რომელთაც სამართლიანობა მოითხოვეს.

გახელაძემ ასეთი რა თქვა?
_ რა და, _ «ქართულ ოცნებასთან» მოლაპარაკებულია და გთხოვთ, ხელს ნუ გვიშლითო.

და ბორდი-ს ის წევრები, ვისაც გახელაძემ ეს ფრაზა უთხრა, მოითხოვდნენ, რომ კონკურსის მეორე ტურში გადასულიყავით?
_ არა, ისინი ჩემთან კავშირში არ არიან და მათ თავიანთი კანდიდატურები ჰყავდათ, მაგრამ მოითხოვდნენ, მოდით, იმ შეკითხვებზე გავცეთ პასუხები, რომლებიც საზოგადოებას ბორდი-ს მიმართ აქვსო. მოკლედ, გახელაძის ფრაზის ლოგიკა ისაა, რომ მასთან კონტაქტში შეიძლება, «ოცნების» ერთ-ერთი წარმომადგენელი ყოფილიყო...

183 მსურველიდან, კონკურსის მეორე ტურში ბორდ-მა «საზოგადოებრივი მაუწყებლის» დირექტორობის ხუთი კანდიდატი _ გიორგი ბარათაშვილი, თინათინ რუხაძე, ნათია აბრამია, მეგი თავდუმაძე და ნიკოლოზ მახარაშვილი გადაიყვანა. ამ ხუთიდან ერთ-ერთი საინტერესო პერსონა თინათინ რუხაძეა, რომელიც კახა ბექაურისა და ერთი პიროვნების მეგობრად ითვლება, ანუ არსებობს ეჭვი, რომ «საზმაუწყებელში» დაბრუნებას ბექაური ცდილობს.
_ თიკა რუხაძე ჩემი მეგობრის, რუსუდან კერვალიშვილის მარჯვენა ხელია...

ხმა დადის, რუხაძეს ქალბატონ რუსუდანთან ურთიერთობა დაეძაბაო... «საზოგადოებრივი მაუწყებლის» ფინანსების თემა ახალი არაა და ჯერ კიდევ «ვარდების რევოლუციამდე» ლაპარაკობდნენ, რომ თანხა არამიზნობრივად იყო გახარჯული. ბატონო მამუკა, ხომ არ ფიქრობთ, რომ ახალი ხელისუფლება ამ საკითხითაც უნდა დაინტერესდეს და ე.წ. «პირველი არხის» რევოლუციამდელი ხელმძღვანელობის პასუხისმგებლობის საკითხიც დასვას?
_ აბსოლუტურად ყველას პასუხისმგებლობის საკითხი უნდა დადგეს, მათ შორის, თუ საჭირო გახდა, ჩემი პერიოდისაც...

ანუ, ფინანსებთან შეხება თქვენც გქონდათ?
_ არა... ჩემს დროს «საზოგადოებრივი მაუწყებელი» კი არა, სახელმწიფო ტელევიზია იყო და თანამშრომლები უხელფასოდ ისხდნენ.

როგორც ვიცი, იმდროინდელ «პირველ არხზე» კონტროლის პალატის არცთუ სასიამოვნო დასკვნაც არსებობს...
_ დიახ...

მოკლედ, გამორიცხავთ, რომ კახა ბექაური «პირველ არხზე» დაბრუნებას თინათინ რუხაძის მეშვეობით ცდილობს?
_ შესაძლოა, ამის სურვილი არსებობს, მაგრამ დარწმუნებული ვარ, რომ ყველა ფიგურა, რომელიც მეორე ტურში გადავიდა, გიორგი ბარათაშვილის შეფუთვაა.

გიორგი ბარათაშვილი ვინაა?
_ ეს არის კაცი, რომელიც ტელევიზიაში არ დაბადებულა, თორემ ბავშვობიდან იქაა. ტექნიკური მუშაკი და დავალების შემსრულებელია, ანუ შემოქმედი და ის პიროვნება არაა, რომელსაც შეუძლია, რომ ტელევიზია დამოუკიდებლად მართოს. ამიტომ, დარწმუნებული ვარ, ლევან გახელაძემ წინ სწორედ ისეთი პიროვნება წამოწია, რომელიც ნებისმიერ ბრძანებას შეასრულებს.

ანუ, ბარათაშვილი «ნაციონალების», ასე ვთქვათ, კადრია?
_ რასაკვირველია... სხვათა შორის, რამდენიმე ადამიანი ბორდ-მა თვითონ მოიპატიჟა, რომ კონკურსში მონაწილეობა მიეღო.

ვის გულისხმობთ?
_ ლევან ღირსიაშვილს, რომელიც თავის დროზე «მოამბეში» მუშაობდა, ახლა კი, ვაშინგტონში, «ამერიკის ხმის» რედაქციაში მუშაობს. ერთხანობას საგარეო დაზვერვაშიც მუშაობდა... შიგნით, კანდიდატურებთან დაკავშირებით, რაღაც ძალები ერთმანეთს უპირისპირდებოდნენ და, როგორც ჩანს, გიორგი ბარათაშვილის კანდიდატურა გადაწყდა, თორემ კაცი შეაწუხეს _ ამერიკიდან «სი-ვი» გამოაგზავნინეს და მეორე ტურშიც არ გადაიყვანეს. არადა, ღირსიაშვილს, მართლაც, კარგი «სი-ვი» აქვს და ერთადერთ უხერხულობას ის იწვევს, რომ საქართველოს საგარეო დაზვერვის ანალიტიკურ დეპარტამენტში მუშაობდა, ანუ ის, რომ «ნაცმოძრაობის» სხვადასხვა ჯგუფს შორის დაპირისპირება მიდიოდა, ეს კანდიდატურებსაც ეტყობათ.

სხვათა შორის, მეორე ტურში გადასული ხუთეულის წევრი ნათია აბრამია, როგორც ამბობენ, ვანო ჩხარტიშვილის გარემოცვიდანაა, ე.ი. «საზოგადოებრივი მაუწყებლისთვის» ჩხარტიშვილიც იბრძვის?
_ ნათია აბრამიას, როგორც ვიცი, სხვა ტელევიზიისთვის, ასე ვთქვათ, ამზადებდნენ...

დიახ, ვრცელდებოდა ინფორმაცია, რომ ნათია «მზერა.ტვ»-ის ე.წ. სტაფში იქნებოდა...
_ ნათია, სხვებთან შედარებით, ცნობადი სახეა, თუმცა ყველაფერი რაღაც თამაშის ნაწილია...

მოკლედ, რეზიუმე რომ გავაკეთოთ, მეორე ტურში გადასული ოთხი კანდიდატურა იმ თამაშის მონაწილეა, რომელიც გიორგი ბარათაშვილის «საზოგადოებრივი მაუწყებლის» დირექტორად არჩევას უკავშირდება?
_ კი... კონკურსს მიღმა ისეთი ადამიანები დარჩნენ, რომ ყველაფერი აბსოლუტურად პოლიტიზირებულია და ეს «ნაცმოძრაობის» თამაშის წესია.

ბატონო მამუკა, წეღან «საზოგადოებრივი მაუწყებლის» საინფორმაციოს ხელმძღვანელი ხათუნა ბერძენიშვილი ახსენეთ. ის და ბორდი-ს ხელმძღვანელი ლევან გახელაძე მეგობრები არიან?
_ ამ წრეში მეგობრობა პირობითი ცნებაა და უფრო პარტნიორობა არსებობს.

ეს პარტნიორობა ფინანსებს უკავშირდება თუ პოლიტიკურ თამაშებს?
_ საქმე ფულში კი არა, ძალაუფლებაშია!

კი ბატონო, მაგრამ «საზოგადოებრივი მაუწყებელი» არცთუ რეიტინგული არხია და რომელ ძალაუფლებაზეა ლაპარაკი?
_ ფსიქოლოგიურად, საზოგადოების ცნობიერებაში ჩადებულია, რომ «საზოგადოებრივი მაუწყებელი» «ნაცმოძრაობის» ტელევიზიაა, რომელსაც საზოგადოებაში ყოველთვის დიდი გავლენა ჰქონდა. ხათუნა ბერძენიშვილიც «ნაციონალური პარტიის» მხარდამჭერთა წრეებში საკმაოდ გავლენიანია.

«ნაცმოძრაობა» ამ არხის დირექტორად საკუთარი კადრის გაყვანას იმიტომ ხომ არ ცდილობს, რომ ფინანსური დარღვევები, თუკი მართლა არსებობს, «გაასუფთაოს»?
_ რასაკვირველია. გიორგი ბარათაშვილი ტექნიკური მუშაკია, მაგრამ იცის, ტელევიზაში რაც ხდებოდა _ ძირითადი ხარჯები მაინც ტექნიკასთანაა დაკავშირებული. გახელაძეს არ ურჩევია, ტელევიზიის დირექტორი გიორგი იყოს, რომელიც, რბილად რომ ვთქვათ, მისი კარგი ნაცნობია, ვიდრე _ სხვა ადამიანი, რომელიც ქექვას დაიწყებს?

«ნაციონალების» მტკიცებით, გიორგი ჭანტურიამ «საზოგადოებრივი მაუწყებლის» დირექტორის პოსტი ზეწოლის გამო დატოვა. თქვენ რა ინფორმაცია გაქვთ?
_ ჩემი შთაბეჭდილებით, მან დაცვის გარანტია ვერ მიიღო, ანუ «ნაცმოძრაობამ» გადაწყვიტა, რომ ყველაფერი მხოლოდ გია ჭანტურიას დაბრალებოდა და გადადგომაც ჭანტურიას დე-მარში იყო.

ანუ, ვთქვათ, თუკი ჭანტურიას სამართალდამცავები მიადგებიან, ის ალაპარაკებდა და იტყვის, თუ რა ხდებოდა «საზოგადოებრივ მაუწყებელში»?
_ რა თქმა უნდა. ფულის განკარგვასთან დაკავშირებით გადაწყვეტილებას ვერც მხოლოდ ჭანტურია მიიღებდა და ვერც _ გახელაძე. ფულის ის ნაწილი, რომელიც ტელეკომპანია «პიკ»-თანაა დაკავშირებული, დარწმუნებული ვარ, რომ წინა ხელისუფლებისგან წამოსული დირექტივა იყო, ანუ სხვა საქმეში დასჭირდა, ააცალა და უკან აღარ დააბრუნა. ყველაფერი სწორედ «პიკ»-ის სკანდალიდან დაიწყო.

ბიძინა ივანიშვილმა შეცდომა ხომ არ დაუშვა, როცა «მე-9 არხისა» და «საზოგადოებრივი მაუწყებლის» შეერთების იდეით გამოვიდა?
_ ეს, ჩემი აზრით, სწორი განცხადება არ იყო.

თქვენი აზრით, ვინ ურჩია?
_ არ მგონია, რომ ეს ვინმეს ერჩია. ეს უფრო ემოციური განცხადება იყო, ანუ პრემიერმა, ალბათ, ჩათვალა, რომ ამით კარგ საქმეს გააკეთებდა და პრობლემას მოაგვარებდა. საერთოდ, ივანიშვილი კრიზისული სიტუაციის მართვის უბადლო მენეჯერია და ხანდახან ისეთ ფრაზას ამბობს, რომლითაც უნდა, რომ კარგი გააკეთოს, მაგრამ ეს საზოგადოებრივ-პოლიტიკური ცხოვრების წესში არ ჯდება.

ისე, ბატონო მამუკა, ვერ გავიგე, «მე-9 არხთან» დაკავშირებით აჟიოტაჟი რატომ ატყდა. კი ბატონო, ამ არხის მფლობელი პრემიერის მეუღლეა, მაგრამ მას თუ უნდა, ტელევიზიას საერთოდ დახურავს და არ მესმის, «ლიბერტარიანელები» რატომ «პანიკობენ», ტელევიზიაზე ზეწოლის საფრთხე არსებობსო... მოკლედ, «მე-9 არხიდან» კახა ბექაურისა და მისი გუნდის გაშვებით, თავისუფალ მედიას საფრთხე დაემუქრა?
_ საქართველოში თავისუფალი ელექტრონული მედია არ არსებობს და დიდი დროა საჭირო, რომ მედია აბსოლუტურად თავისუფალი გახდეს. ისე, ობიექტური რომ ვიყო, არ მეჩვენება, რომ «ბი-ბი-სი»-ც აბსოლუტურად თავისუფალია და როცა საქმე ბრიტანეთის ინტერესებს ეხება, კონიუნქტურულია. მოკლედ, შევთანხმდეთ, რომ აბსოლუტურად დამოუკიდებელი ელექტრონული მედია არ არსებობს, მაგრამ გააჩნია, რა ხარისხითაა ვინმეზე დამოკიდებული და ამას ჟურნალისტები როგორი პროფესიონალიზმით ფუთავენ.
რაც შეეხება «მე-9 არხს», ეს ტელევიზია კერძო საკუთრებაა და ადამიანს უნდა დახურავს, უნდა _ არა, მაგრამ ზოგმა ის საფრთხე დაინახა, რომ ამ არხიდან მთელი «სტაფი» «საზოგადოებრივ მაუწყებელზე» გადავიდოდა და «პირველი არხი» «ქართული ოცნების» ტელევიზია გახდებოდა. ამიტომაც ატყდა ასეთი ამბავი. გარდა ამისა, ჩვენს არასამთავრობო ორგანიზაციებს ხშირად სჭირდებათ თემა, რომ საზოგადოებას თავი შეახსენონ.

თუ იცით, ბიძინა ივანიშვილსა და კახა ბექაურს შორის რა მოხდა?
_ არ ვიცი, თუმცა, როგორც ყური მოვკარი, ეს დაკავშირებულია რაღაც ფინანსურ საკითხებთან.

ანუ, გაფლანგვასთან?
_ გაფლანგვასთანაა დაკავშირებული, თუმცა, ამასთან დაკავშირებით ოფიციალური მონაცემები არ მაქვს და ამიტომ, ვთვლი, რომ ყველაფერი უნდა გაირკვეს...

ერთი სიტყვით, ისე გამოდის, რომ «ოცნებამ» «საზოგადოებრივი მაუწყებელი» დათმო?
_ არა, ასე არ გამოდის. როცა ამასთან დაკავშირებით შეკითხვა დავსვი, საკმაოდ მკაფიო პასუხი მივიღე, რომ საჭიროა, გაირკვეს, თუ რა ხდება ფინანსებთან დაკავშირებით და, მთავარი, თუ გაფლანგვა არსებობს, პასუხისმგებელი მხოლოდ ჭანტურია კი არა, სამეთვალყურეო საბჭოცაა, ანუ ბორდ-მა, რომელიც ფინანსური დანაკარგი დაუშვა, უფლება არ აქვს, რომ გენერალური დირექტორის ახალი არჩევნები ჩაატაროს.

იმ კონტექსტში, როცა სამართალდამცავების მხრიდან ნიკა გვარამიას პერსონით დაინტერესება გაოპოზიციონერებულმა «ნაციონალებმა» მედიაზე ზეწოლად მონათლეს, საგამოძიებო უწყებებში «საზოგადოებრივი მაუწყებლის» ბორდი-ს წევრთა დაბარება, ალბათ, ახალი სკანდალის საბაბი გახდება...
_ რასაკვირველია და ამიტომაც, დაკითხვაზე, ჯერჯერობით, არავის იბარებენ _ ჯერ აუდიტი მუშაობს, შემდეგ, მუშაობას «საფინანსო» დაიწყებს...
რაც შეეხება ნიკა გვარამიას, «ნაციონალებმა» იცოდნენ, რომ გვარამია შეიძლება, დაეკავებინათ და «რუსთავი 2»-ის დირექტორადაც ამიტომ დანიშნეს, ანუ ჩათვალეს, რომ ეს ერთგვარი დაცვა იქნებოდა და «რუსთავი 2»-ის ხელმძღვანელ გვარამიას არ დააკავებდნენ.

ნიკა გვარამია სააკაშვილისთვის «ძვირფასი» რატომაა?
_ ვანო, წარმოიდგინეთ, გვარამიამ «ენვერზე» სიმართლე რომ თქვას...

როცა «ენვერი» «გამოცხვა», გვარამია სახელმწიფო ჩინოვნიკი აღარ იყო და რა უნდა იცოდეს?
_ ასეთი ტიპის ქმედებებზე გვარამიამ ყველაფერი იცის... ისიც კი იცის, რა ხდებოდა «ფოტოგრაფების საქმეზე».

ანუ, სამართალდამცავები გვარამიათი იმიტომ დაინტერესდნენ, რომ მან ბევრი რამ იცის?
_ არ გამოვრიცხავ... გვარამიამ ბევრი იცის და თავს არ შეიკავებს, ამიტომაც მოხდა მასზე გასვლა... მგონია, რომ ის ყველაფერს აუცილებლად იტყვის. შეიძლება, მის მიმართ სხვადასხვა პრეტენზია არსებობს, მაგრამ ის იმ ტიპის ადამიანი არაა, რომელსაც ყველაფერზე შეუძლია თქვას, კარგიაო.

სწორედ ამის გამო გადაწყვიტა «ოცნებელმა» გედევან ფოფხაძემ ნიკა გვარამიას დაცვა?
_ არა... როგორც ვიცი, გედევან ფოფხაძის ამ დემარშმა გაღიზიანება მის გუნდში _ «თავისუფალ დემოკრატებშივე» გამოიწვია... გვარამია გასაგებია, მაგრამ აქ საქმე სხვა რამეშია.

მაინც, რაში?
_ რაში და, _ მთავარია, იმ კალაპოტში ვიმოძრაოთ, რომელიც ბიძინა ივანიშვილმა თავიდანვე დასახა.

და ეს კალაპოტი რა არის?
_ საზოგადოებრივი აქტივობის გაზრდა...

ერთი სიტყვით, ბატონო მამუკა, ეჭვობთ, რომ «საზოგადოებრივი მაუწყებლის» ხელმძღვანელის არჩევა სკანდალით დამთავრდება?
_ რასაკვირველია. საერთოდ, ყველაფერი ეს ისედაც სკანდალია.

რატომ?
_ 55 წლის კაცი ვარ, 16 წელი ტელევიზიას შევალიე, ტელევიზიაში მუშაობის აბსოლუტურად შეურყვნელი ბიოგრაფია მაქვს. ის ადამიანები, ვინც კონკურსის მეორე ტურში გადავიდნენ, ტელევიზიასთან მიმართებაში, ჩემთან ნამდვილად ვერ მოვლენ და, უბრალოდ, ყველაფერი ეს მხოლოდ ჩემთვის კი არა, კიდევ რამდენიმესთვის, ვინც მეორე ტურში ვერ გადავიდა, შეურაცხმყოფელია. ამიტომ, პასუხი უნდა გაეცეს შეკითხვებს: ყველაფერი ეს როგორ და რატომ მოხდა? ამასთან, ვთვლი, რომ ყველამ, ვინც ამაში მონაწილეობა მიიღო, პასუხი უნდა აგოს!

 P.S. საინფორმაციო სააგენტო «ივერიონის» ინფორმაციით, „საზოგადოებრივ მაუწყებელში“ 260 „მკვდარი სული» მუშაობს. «მკვდარი სულების» უმეტესობა, როგორც სააგენტო იუწყება, ტელევიზიის ხელმძღვანელთა, „ნაცმოძრაობის“ ლიდერთა ნათესავ-მეგობრები და ყოფილი მმართველი პარტიის მხარდამჭერი მომღერლები არიან. სააგენტო, «პირველი არხის» ჟურნალისტებზე დაყრდნობით, ასევე, იუწყება, რომ 260 „მკვდარი სულის“ ყოველთვიური ხელფასი, დაახლოებით, 300 ათას ლარზე მეტს შეადგენს, რაც წელიწადში 3.6 მილიონ ლარზე მეტია. შესაბამისმა ორგანოებმა ყველა ზემოთქმული ინფორმაციის შემოწმება-შესწავლა რომ დაიწყონ, იმედია, არავინ «ატკვარცალდება», არიქა, «ოცნება» თავისუფალ მედიაზე ზეწოლას ახდენსო...