“საერთო ჯამში, პირველი ასეთი კონტაქტის კვალობაზე არ იყო ცუდი შეხვედრა და, როგორც იტყვიან ხოლმე, შეხვედრამ საქმიან ვითარებაში ჩაიარა“, - განაცხადა საქართველოს პრემიერ-მინისტრის სპეციალურმა წარმომადგენელმა რუსეთთან ურთიერთობის საკითხებში ზურაბ აბაშიძემ რადიო თავისუფლებასთან სატელეფონო საუბარში.

საქართველოს პრემიერ-მინისტრის სპეციალურმა წარმომადგენელმა უარი თქვა ეპასუხა შეკითხვებზე და მხოლოდ მოკლე ინფორმაციით შემოიფარგლა. ცნობილია, რომ ზურაბ აბაშიძესა და რუსეთის საგარეო საქმეთა მინისტრის მოადგილის, გრიგორი კარასინის შეხვედრა ჟენევის ერთ-ერთ გარეუბანში 14 დეკემბერს გაიმართა. ეს იყო ამ სახის პირველი კონტაქტი, საქართველოსა და რუსეთის ფედერაციის ოფიციალურ წარმომადგენლებს შორის, რომელიც, აბაშიძის თანახმად, საქართველოს პრემიერ-მინისტრისა და რუსეთის ფედერაციის პრეზიდენტის დავალებით გაიმართა. „ჩვენ აღვნიშნეთ, რომ ჩვენს სახელმწიფოებს შორის ურთიერთობები ფაქტობრივად ჩიხშია მოქცეული და საჭიროა ამ ჩიხიდან გამოსავლის ძიება. დასაწყისისათვის სასაუბროდ განვსაზღვრეთ სავაჭრო, ჰუმანიტარულ-კულტურული ურთიერთობების საკითხები და რეგულარული საავიაციო მიმოსვლის აღდგენის თემა“, - განაცხადა ზურაბ აბაშიძემ და დასძინა, რომ დიალოგი რეგულარულ საფუძველზე გაგრძელდება.