ეკონომისტები და ბიზნესმენები გამუდმებული აქციებისა და მისი ხშირ-ხშირად დაშლის შედეგად გამოწვეული არასტაბილურობის გამო არასახარბიელო პერსპექტივას ამჩნევენ. მათი აზრით, ქვეყანაში უკვე იმდენად გაურკვეველი ვითარებაა, რომ ისედაც რთულ მდგომარეობაში მყოფ ეკონომიკას დიდი საფრთხე ემუქრება.

ქართული ბიზნესის წარმომადგენელთა განცხადებით, პროცესები დიდხანს თუ გაგრძელდა, ეკონომიკური სიტუაცია ქვეყანაში კიდევ უფრო გაუარსედება. ბიზნესმენი ლაშა პაპაშვილი უცხოური ინვესტიციების კლებას და ლარის გაუფასურებას ელის.

„პოლიტიკური არასტაბილურობა არა მარტო ჩვენნაირ პატარა ქვეყანაში, არამედ მსოფლიოს დიდ სახელმწიფოებშიც ცუდ გავლენას ახდენს ბიზნეს პროცესებზე. ძალიან მნიშვნელოვანია, რომ ხელისუფლებამ მოახდინოს დროული რეაგირება, რათა საზოგადოების და პოლიტიკის ამგვარი პოლარიზება არ მოხდეს. თუ მთავრობამ ეს გამოსავალი ვერ იპოვა, ქართულ ეკონომიკას რყევა ემუქრება, რაც ძალიან აზიანებს ბიზნეს პროცესებს. დღევანდელ სიტუაციაში დიდ პრობლემებს არ ველოდები, რადგან ხელისუფლებას ჯერ კიდევ აქვს ყველა ბერკეტი ამ რყევების თავიდან ასარიდებლად“, - აღნიშნა ბიზნესმენმა საუბრისას.

კომპანია „კულას“ დირექტორის ვანო გოგლიძის შეფასებით, დღეს ქვეყანაში არასტაბილური სიტუაციაა, რაც ბიზნესზე დანამდვილებით უარყოფითად აისახება. მიუხედავად ამისა, ბიზნესმენი ამბობს, რომ უცხოელი ინვესტორი რომ იყოს, საქართველოში ინვესტიციებს მაინც ჩადებდა.

„უცხოელი ინვესტორები საგადასახადო სისტემას უფრო აქცევენ ყურადღებას, ვიდრე პოლიტიკურ მდგომარეობას. ერთადერთი, რის გამოც საქართველოში ინვესტიციის განხორციელებაზე შეიძლება თავი შეიკავო, საგადასახადო სისტემაა. რაც უფრო მეტი წახალისება იქნება ამ მხრივ, უფრო მეტი ინვესტიცია განხორციელდება ქვეყანაში. სხვა მხრივ, მთავარია, ქვეყანა ვითარდებოდეს ეკონომიკურად და, ჩემი აზრით, დღეს ქვეყანა წინ მიდის“, - განაცხადა ბიზნესმენმა.

გაცილებით რადიკალური აღმოჩნდა „ფრესკოს“ პოზიცია. ქვეყანაში მიმდინარე მოვლენების ფონზე, სუპერმარკეტების ქსელმა გაფიცვა გამოაცხადა. კომპანიის მიერ გავრცელებული განცხადების მიხედვით, ქვეყანაში მოქალაქეთა ფუნდამენტური უფლებების შეზღუდვის ფონზე, ბიზნესს კანონის ფარგლებში პროტესტის გამოხატვის გარდა, სხვა გზა არ რჩება, რის გამოც, კომპანია 24 საათით სრულ გაფიცვას აცხადებს.

„ძვირფასო მომხმარებლებო, მიგვაჩნია, რომ ის, რაც დღეს ჩვენს ქვეყანაში ხდება, ჩვენთვის და ჩვენი მოქალაქეებისთვის კონსტიტუციური უფლების წართმევაა! დღეს, კიდევ ერთხელ ვრწმუნდებით, რომ ადამიანის ფუნდამეტური უფლება - აზრისა და სიტყვის გამოხატვის თავისუფლება იზღუდება. რთულია, ამ სიტუაციაში იყო უმოქმედოდ, მაგრამ ისეთი კანონმორჩილი კომპანიისთვის, როგორიც „ფრესკოა“ მიუღებელია გასცდე კანონის ფარგლებს. ამიტომ, ჩვენი პროტესტის გამოხატვის ერთადერთ შესაძლებლობას ჩვენ ვხედავთ ჩვენი ქსელის მუშაობის დროებით შეჩერებაში - ერთი დღით, 2019 წლის 19 ნოემბრის 00:00 საათიდან, 2019 წლის 20 ნოემბრის 00:00 საათამდე დაიკეტება „ფრესკოს“ ყველა სუპერმარკეტი. ჩვენ ამ ფორმით ვაფიქსირებთ ჩვენს პროტესტს ქვეყანაში მიმდინარე მოვლენებზე“, - ნათქვამია კომპანიის განცხადებაში.

არსებულ ვითარებას ეხმიანებიან ეკონომიკის ექსპერტებიც. აკაკი ცომაიას მიაჩნია, რომ ქვეყანაში მძიმე პოლიტიკური და ეკონომიკური ფონია.

„განსხვავებულს ვერაფერს ვიტყვი, გარდა იმისა, რომ სწრაფი ტემპით უკან მივდივართ. მიმდინარე მოვლენები, რასაკვირველია, გავლენას ახდენს ეკონომიკურ გარემოზე. ასევე უარყოფითად აისახება საინვესტიციო გარემოზეც. ეს კიდევ ერთხელ ადასტურებს იმ ფაქტს, რომ საქართველოში ინვესტირება დიდ რისკებთანაა დაკავშირებული, რაც განაპირობებს ინვესტიციების შემცირებას და ეკონომიკური მდგომარეობის გაუარესებას“, - განუცხადა „კომერსანტს“ ცომაიამ.

მისი აზრით, გავრილოვის აქციიდან მცირე დროში განვითარებული მოვლენების კვალი ქვეყანას მძიმედ დააჩნდება, რაც ლარზე უკვე აისახა.

„მიუხედავად იმისა, რომ ეროვნულ ბანკს აქვს გამკაცრებული მონეტარული პოლიტიკა, კურსი შესაძლოა, კიდევ უფრო გაუფასურდეს. არადა, ბევრი რამაა დამოკიდებული უცხოური ვალუტის შემოდინებაზე, თუ უცხოური ვალუტის შემოდინება შემცირდა, კიდევ უფრო მეტად გაუფასურდება ლარი“, - აცხადებს ცომაია.