„დიდი სახლის პატარა დიასახლისი“ თავის ამპლუაშია. სალომე ზურაბიშვილი ფუფუნების ნივთებით ილამაზებს განწყობას და ათონელის რეზიდენციის მოწყობითაა გატაცებული. თავის დროზე ზვიად გამსახურდიას „მერსედესის“ მანქანა გახდა ოპოზიციის სალაპარაკო. იმ პერიოდში ერთი ბიზნესმენი გამოესარჩლა პრეზიდენტ გამსახურდიას, ხალხო, რა გიკვირთ, მე მყავს მერსედესი და პრეზიდენტს არ ჰყავდესო?! თუმცა პრეზიდენტ ზურაბიშვილის თვალსაწიერი გაცილებით უფრო კრეატიულია - ანტიკვარული ავეჯი, ირანული ფერწერული ტილოები, რუსეთის საიმპერატორო ქარხანაში დამზადებული ჭაღი...

შესყიდულ ნივთებს შორის არც ერთი ქართული წარმომავლობის არ არის. ყველაფერ ამ სიამოვნებისთვის სარეზერვო ფონდიდან გამოიყო 2 800 000 ლარი. სულ დაიხარჯა 2 174 783 ლარი, საიდანაც 1 199 558 ლარი მოხმარდა ანტიკვარული ავეჯისა და ინტერიერის აქსესუარების შეძენას, 255 000 ლარი გაიხარჯა მათ რესტავრაციაზე, ხოლო 720 225 ლარი-თანამედროვე ავეჯის, სანათი საშუალებებისა და ფარდების შესყიდვაზე.

„თავისუფლების განვითარების ინსტიტუტის“ კვლევის თანახმად, ეროვნული მუზეუმის სამუშაო ჯგუფმა ორ დღეში ადგილზე შეისწავლა 58 ანტიკვარული ნივთი და მათი ვიზუალური დათვალიერებით განსაზღვრა მათი შესყიდვის მიზანშეწონილობა. კომისიის თანხმობით შესყიდულია ანტიკვარული ნივთები: 10 გარნიტური/სამეული, 7 ჭაღი, 5 მაგიდა, ბუხრის 3 საათი, 3 სარკე, 3 შანდალი, 2 ხალიჩა და სხვა. ათონელის რეზიდენციისთვის შესყიდულ ანტიკვარულ ნივთებს შორის ყველაზე ძვირადღირებულია რუსეთის საიმპერატორო ქარხანაში დამზადებული მე-19 საუკუნის ჭაღი-59 ათასი აშშ დოლარი. ოთხ ანტიკვარულ ჭაღში ჯამში 133 410 აშშ დოლარია გადახდილი. 8500 აშშ დოლარად შესყიდულია შვიდი ირანული ფერწერული ტილო, 4310 აშშ დოლარად-ირანული მამლის ფიგურების წყვილი, შუა აზიური ორი ხალიჩა - თითოეულის საწყისი ფასი 5000-დან 7000 დოლარამდე, 3 ბუხრის საათი-თითოეულის ფასი 7000-დან 18 000 დოლარამდე.

რაც შეეხება თანამედროვე ნივთებს, შესყიდული 17 თანამედროვე ჭაღიდან თითოეულის ფასი 1900-დან 6000 ლარამდეა, 38 ტორშერიდან თითოეულის ფასი 300-დან 4000 ლარამდეა და სხვა.

პრეზიდენტ ზურაბიშვილის ლტოლვა ძვირადიღირებული ნივთებისადმი რატომ ასცდა ქართულ რეალობას და ხომ არ დარჩა იგი მდიდარი საფრანგეთის ეიფორიაში?!

ხელოვნებათმცოდნე გოგი ხოშტარია For.ge-სთან საუბრისას აცხადებს, რომ პრეზიდენტის სამარცხვინო საქციელი ახია მათზე, ვინც თავი მოიკლა და ლამის ძალით დაგვისვა ეს ქალბატონი პრეზიდენტად.

„ქვეყანაში, სადაც 70 ათასი ბავშვი შიმშილობს, 2 მილიონზე მეტის დახარჯვა რეზიდენციის ოთახების მოსაწყობად, ყოვლად გაუგონარია. მით უმეტეს, ზურაბიშვილმა შეიწყალა ის, ვინც არ უნდა შეეწყალებინა და არ იწყალებს მას, ვინც შესაწყალებელია. ბოლოს და ბოლოს, პრეზიდენტი იყო ზვიად გამსახურდია, „მერსედესი“ ჩამოყვანაო, ენანებოდათ ზვიად გამსახურდიასთვის. ყველა ძაღლი თუ მამაძაღლი დღეს „მერსედესით“ გადაადგილდება და ერთი ბრონირებული მერსედესი არ ეკუთვნოდა ზვიად გამსახურდიას? რას მიკეთებს ახლანდელი პრეზიდენტი? ბევრ ქვეყანაში ვარ ნამყოფი, ასეთი რამის უფლებას თავის თავს აძლევს მხოლოდ ეკონომიკურად ფეხზე ძლიერად მდგომი და განვითარებული ქვეყანა. ამას არ აკეთებენ მათხოვარი ქვეყნები, ჩვენ კი ვართ მათხოვრები, დასავლეთიდან გრანტები და დახმარება რომ არ მოდიოდეს, შიმშილით მოვკვდებოდით“,-აცხადებს გოგი ხოშტარია და იხსენებს, რომ ასეთი ფუფუნების საგნები მას უნახავს ინგლისის დედოფალთან, ასევე, ერმიტაჟში სამეფო ძვირფასეულობის სახით.

ხელოვნებათმცოდნე აცხადებს, რომ ამას წინათ ჰოლანდიაში იმყოფებოდა და ჰოლანდიის მეფის სახლი იხილა ჰააგაში, ტყეში. ეს არ ყოფილა მთლად ქოხი, მაგრამ პატარა 2-სართულიანი სახლი იყო და ამ ნაგებობაზე უკეთესი სახლები წყნეთში აქვთ ჩვენს მილიონერებს. ეს ყველაფერი ძალიან სადა და ლამაზი იყო. ჰოლანდია ასჯერ ჩვენზე მდიდარი ქვეყანაა, ჩვენი პრეზიდენტის სასახლე კი ხუთჯერ დიდია, ვიდრე ჰოლანდიის მეფის სახლი.

„ზურაბიშვილს იმდენი გემოვნება არ აქვს, რომ უბრალო სასახლე მოეწყო, რაც მიესადაგებოდა ჩვენს ქვეყანას, ჩვენი ხალხის მდგომარეობას. ეს ყველაფერი გულის ამრევია“.

პოლიტოლოგი სოსო ცინცაძე მიიჩნევს, რომ ამ თანხად, ანუ 2 800 000 ლარად თვითონ პრეზიდენტი არ ღირს. ავეჯი კი არა, თავად პრეზიდენტი ზურაბიშვილი რომ გავიტანოთ აუქციონზე, ამ თანხას არავინ გაიღებს მისთვის. ამასთან, არავინ იცის, ამ თანხის მიღმა კიდევ რამდენი ხარჯებია, რასაც ეს ქალბატონი ფლანგავს უცხოეთსა და საქართველოში.

„წელიწადში, ალბათ, 300 დღე უცხოეთშია და რაში ხარჯავს თანხებს, არავინ იცის. თუ გნებავთ, მორალური პრინციპით ავიღოთ, სააკაშვილზე უბრალოდ მაინც ხომ უნდა ეცხოვრა? კი ბატონო, ზურაბიშვილი არ ედრება ივანიშვილს, რომელსაც თავისი ფული აქვს და ღმერთმა მისცეს, თავისი ფულით გინდა სულაც ოქროს უნიტაზებს დაიდგამს, მაგრამ ზურაბიშვილი სახელმწიფო ბიუჯეტიდან ფლანგავს ამ თანხებს. რა აუცილებელი იყო ათონელის რეზიდენციაში ავეჯის შეცვლა?! იმ შენობაში მილიონჯერ ვარ ნამყოფი, ბოლოს იქ ნატოს მისია იყო და ძალიან ნორმალური, მშვენიერი ავეჯი იდგა“, - აცხადებს სოსო ცინცაძე For.ge-სთან საუბრისას.

პოლიტოლოგის განმარტებით, ზურაბიშვილს ათონელის რეზიდენციაში არც ყოველდღიური მიღებები აქვს, არც ამერიკის პრეზიდენტი და მსოფლიოს დიდი ვარსკვლავები, ცნობილი პოლიტიკოსები, გრანდები აკითხავენ და, ამდენად, გასაკვირია, რად უნდა ასეთი ფუფუნება? შესაბამისად, თუ ახლა პრობლემაა ასეთი ძვირადღირებული ნივთების შეძენა, მოგვიანებით უკვე პრობლემად იქცევა ამ ნივთების გაყიდვა.

„არ ვიცი, მომავალში ვინ მოვა მთავრობაში, მაგრამ, უბრალოდ, აუქციონზე გაყიდიან მაგ ავეჯს ნახევარ ფასად. თუ ის არის პრობლემა, რომ სააკაშვილმა ამხელა სასახლე აიშენა და არ იციან, რა უყონ ამ სასახლეს, მერე პრობლემა იქნება, ზურაბიშვილის ამ ავეჯსა და ჭაღებს რა უყონ. თანაც, მისი გემოვნება ბევრს არც მოეწონება“.