ქურთული დაჯგუფებები სირიიდან ამერიკული ჯარის გასვლას ღალატად მიიჩნევენ. ამის შესახებ BBC წერს.

გამოცემის ინფორმაციით, ერთ-ერთი დაჯგუფების ლიდერმა ამ მოულოდნელ გადაწყვეტილებას „ზურგში დანის ჩარტყმა“ უწოდა.

აქამდე ქურთული შენაერთები სირიაში აშშ-ის მთავარი მოკავშირე იყო. ისინი ამერიკელებს „ისლამურ სახელმწიფოსთან“ ბრძოლაში ეხმარებოდნენ. თუმცა თურქეთი ამ დაჯგუფებებს ტერორისტებად მიიჩნევს და მათ წინააღმდეგ სამხედრო ოპერაციის განხორციელებას აპირებს.

თავის მხრივ, აშშ-ის პრეზიდენტმა დონალდ ტრამპმა მიღებული გადაწყვეტილება Twitter-ის გვერდზე განმარტა. „დროა გამოვეთიშოთ ამ სასაცილო, დაუსრულებელ ომებს და ჩვენი ჯარისკაცები სახლში დავაბრუნოთ. იქ ვიბრძოლებთ, სადაც ეს ჩვენთვის სასარგებლო იქნება და მხოლოდ გამარჯვებისთვის“, - დაწერა ტრამპმა.

თურქეთის პრეზიდენტმა სირიაში ანტიტერორისტული ოპერაციის ჩატარების შესახებ 5 ოქტომბერს განაცხადა. შემდეგ კი საზღვართან დამატებითი ძალები და სამხედრო ტექნიკა გაგზავნა. ამერიკის შეერთებულმა შტატებმა სირიის ჩრდილო-აღმოსავლეთ ნაწილიდან ჯარის გაყვანა დღეს დაიწყო. ასე ვაშინგტონი თურქეთს დაგეგმილი სამხედრო ოპერაციისთვის გზას უთავისუფლებს.