„თბილისი პრაიდმა“ ჩვენი საზოგადოების მოთმინების ფიალა აავსო. ადამიანებმა გამოსავლის ძიებაზე დაიწყეს ფიქრი, როგორ შეაჩერონ ეს პროცესი, რომელიც ყოველნაირად აკნინებს ქართულ ღირებულებებს. ალბათ, შემთხვევითი არც ისაა, რომ ლგბტ თემმა „თბილისი პრაიდს“ რატომღაც „ღირსების მარში“ უწოდა და ამ სახელწოდებაშიც ჩადო ჩვენი საზოგადოების გაღიზიანების სურვილი, რომლისთვისაც ღირსება სულაც არ ასოცირდება ლგბტ-ეობასთან.

ლგბტ პირთა საქციელის მოწინააღმდეგენი აცხადებენ, რომ უახლოეს ხანში ხელმოწერების შეგროვებას დაიწყებენ, რათა აიკრძალოს ჰომოსექსუალიზმის პროპაგანდა საქართველოში. გურამ ფალავანდიშვილი ლგბტ პროპაგანდის წინააღმდეგ ოქტომბერში აქციებსაც აანონსებს.

მოახერხებს თუ არა ჩვენი საზოგადოება, შეაჩეროს ლგბტ-ეების საჯარო გამოსვლები და არგუმენტად გამოიყენოს, რომ ამ თემის პროპაგანდით ჩვენი ხალხის მართლმადიდებლური გრძნობები ილახება?

პოლიტოლოგი სოსო ცინცაძე ჩვენთან საუბრისას აცხადებს, რომ მისთვის აბსოლუტურად მიუღებელია ლგბტ პრაიდი, მისი ასაკიდან, განვლილი ცხოვრების წესიდან, მშობლების ისტორიიდან და წინაპრებიდან გამომდინარე. თუმცა სოსო ცინცაძე დიდი გულისტკივილით იმასაც აცნობიერებს, რომ ჩვენს საზოგადოებას ლგბტ პირებთან ბრძოლა უკვე წაგებული აქვს, ვინაიდან ლგბტ-ეებმა უკვე გაიმარჯვეს ევროპაში, ამერიკაში.

„ერთადერთი, კარგი იქნება, თუკი მოვახერხებთ, როგორმე გავახანგრძლივოთ ის პერიოდი, სანამ ჩვენს საზოგადოებას უშუალოდ არ შეეხება დაკანონებული ერთსქესიანი ქორწინებები. ნუთუ დაგავიწყდათ, რომ საქართველოს პარლამენტის წევრი ქალბატონი, დღეს რომ გამოდის და პირველი პროტესტანტია, თავის დროზე აცხადებდა, ჩვენც უნდა მივბაძოთ საფრანგეთს, რადგან საფრანგეთმა დააკანონა ერთსქესიანი ქორწინებებიო. ამავე ქალბატონმა ერთხელ საჯაროდ ისიც განაცხადა, ილია მეორეს ერთი ადგილი გამოვუყოთ პარლამენტშიო. ჩვენ 3-მილიონიანი ქვეყანა ვართ, ამერიკა 300-მილიონიანია, რუსეთი-150 მილიონიანი, ამერიკა და რუსეთი ლგბტ-ეებსაც გაუძლებს, ბანდიტებსაც, კორუმპირებულებსაც, რადგან ორივე ქვეყანა დიდი და მდიდარია, მაგრამ ჩვენ ძალიან პატარა და ღარიბი ქვეყანა ვართ და რასაც აიტანს ამერიკის დემოკრატია, ან რუსეთის იმპერიული ძალა, საქართველო ამას ვერ აიტანს. დღეს ჩვენი მთავარი პრობლემა დემოგრაფიაა. გეები და ლესბოსელები ბავშვებს არ აჩენენ.

ვერ ვიტყვი, ამ დღეებში ლევან ვასაძის სტრატეგია სწორი იყო თუ არა. ვასაძის შეცდომა ის იყო, რომ მას უფრო სხვა პოზიციებიდან უნდა შეეტია ლგბტ-ეებისთვის, ვიდრე ჯვრითა და მართლმადიდებლობით. ჯობდა, ლევან ვასაძეს დემოგრაფიაზე გადაეტანა აქცენტი, რადგან ხვალ-ზეგ შეიძლება საქართველოს თავისი სუვერენიტეტის დასაცავად მეომრები დასჭირდეს. „ლესბიანკა“ ვერასდროს იქნებოდა მაია წყნეთელი, ეს მისი სახელის შეურაცხყოფა იქნებოდა, ან გიორგი სააკაძე ვერასდროს იქნებოდა ასეთი გადახვევების მქონე“, - აცხადებს სოსო ცინცაძე.

მისივე განმარტებით, ჩვენ რომ ვიყოთ დღეს კატარის და აბუ-დაბის მსგავსი მდიდარი ქვეყანა, ფეხებზე დავიკიდებდით, რას იტყოდა ჩვენს შესახებ თუნდაც „ემნისტი ინტენეიშენალი“. მაგრამ ჩვენი ქვეყანა ხელგაწვდილია ევროპისკენ, ამერიკისკენ, ამიტომ არ ჩანს ისეთი გზა, რომ ევროპას ზურგი შევაქციოთ.

„საქართველოს კანონმდებლობა ვერ აუკრძალავს ლგბტ პირებს საჯაროდ გამოსვლას, რადგან ხელად შეწყდება ის დახმარება, კაპიკებს რომ გვიგდებს ევროპა და ამერიკა. რუსეთიც ამას ელოდება და ერთი ერთზე დაგვიპირისპირდება. ამიტომ ეს ომი წინასწარ წაგებული გვაქვს. თანაც, ჩვენი საზოგადოება გულგრილია, ჩვენი ხალხი არ ფიქრობს მომავალ თაობაზე, აგერ, სოციალურ ქსელებში იმასაც წერენ, დიდი ამბავი, ჩაატარონ ლგბტ-ებმა პრაიდიო. მე რომ ვუყურებ ამ ახალგაზრდა ბიჭებს, ამ გეებს, ესენი ჯარში წავლენ? „გირჩს“ რა აქვს სატრაბახო, განა სამარცხვინო არ არის, არარსებულ რელიგიაში ჩაეწერნენ ახალგაზრდები, რომ ჯარში არ წასულიყვნენ. კი, ჩვენი არმია შეიძლება არ არის დღეს იმ დონის, როგორც უნდა იყოს, მაგრამ ჯარში არავინ წავიდეს? ამ საზოგადოებამ, ლგბტ ჰქვია, თუ რაც ჰქვია, ლევან ვასაძის ძეგლი უნდა დადგას თავის ოფისში, რადგან ხვალ და ზეგ ამ უკანალგალამაზებული ბიჭებისთვის ევროპისა და ამერიკის ფონდების გრანტები გაათმაგდება იმ მოტივით, რომ თურმე საქართველოში ლგბტ-ეებს დევიან“.

სოსო ცინცაძის აზრით, რომელ ღირსების მარშზეა საუბარი, როცა ბოლო დღეებში კარგად გამოჩნდა, რა არის ღირსება. ასობით ბავშვი შიმშილობს და ჩვენს სახალხო დამცველს ამაზე ხმა არ ამოუღია, სამაგიეროდ, გეების დამცველია. თუ ადრე ნარკომანებს იცავდა, ახლა გეებს იცავს და არც კი აინტერესებს, რომ სხვისი შვილები გაჭირვებაში ცხოვრობენ.

შერიგებისა და სამოქალაქო თანასწორობის საკითხებში ყოფილი სახელმწიფო მინისტრი, ექსპერტი კონფლიქტების საკითხებში პაატა ზაქარეიშვილი ჩვენთან საუბარში აცხადებს, რომ ლგბტ-ეებს საჯარო გამოსვლებს ვერ ავუკრძალავთ, რადგან კონსტიტუციაში პირდაპირ წერია, რომ საქართველოს მოქალაქეები თანასწორნი არიან და ამ მხრივ არანაირი გამონაკლისი არ არის დაშვებული.

„გულახდილად გეტყვით, მე არ მაინტერესებს ლგბტ საზოგადოება, არც მათი ინტერესები მაინტერესებს, მაგრამ მე მაინტერესებს კონსტიტუცია. ისინი საქართველოს მოქალაქეები არიან და მათ იცავს კონსტიტუცია. ვინ უყვართ, ვინ არ უყვართ, ვისთან სძინავთ, ვისთან იღვიძებენ, არავის საქმე არ არის. ყოველ მოქალაქეს უფლება აქვს, გამოხატოს თავისი აზრი, რადგან სიტყვის თავისუფლება აქვს გარანტირებული, ასევე, შეკრებისა და მანიფესტაციის თავისუფლება“, - აღნიშნა პაატა ზაქარეიშვილმა.