„მინდა თქვენი ეთერის საშუალებით, მთელ საქართველოს გავაგებინოთ, რომ სააკაშვილმა არჩევნებამდე ერთი თვით ადრე, მთელი პანკისის ხეობა, მუსლიმანები გამოგვიწვია. მინდა მთელმა საქართველომ გაიგოს, რომ რამდენიმე დღის წინ, მომხდარი შეტაკების დროს, დაღესტნელები კი არა, პანკისში მცხოვრები 11 ახალგაზრდა დაიღუპა. ჩვენ ამას სააკაშვილს არ შევარჩენთ. გამოგვიწვია არა? ზუსტად კადაფის მსგავსად დავმარხავთ, არ ვაპატიებთ. ხომ გამოგვიწვია, ხომ მოახდინა ეს შეტაკება? არ შევარჩენთ. მთელმა საქართველომ მინდა გაიგოს, მუსლიმანები მაგან გამოგვიწვია. ჩვენ ვიწყებთ ომს, არ შევარჩენთ“, - ასეთი განცხადება 31 აგვისტოს საღამოს სტუდია „ობიექტივის“ ეთერში უცნობმა ქალბატონმა გააკეთა, რომელმაც პირდაპირ ეთერში დარეკა.

გავრცელებული ინფორმაციით, საქართველო-რუსეთის საზღვართან, დაღესტნის მონაკვეთზე ლოპოტას ხეობაში შს სამინისტროს მიერ განხორციელებული დევნის ოპერაციის შედეგად, სპეცოპერაციის დროს დაღუპული 11 ახალგაზრდა დაღესტნელები კი არა, პანკისელი ქისტები იყვნენ. პანკისის ხეობის ადგილობრივი მაცხოვრებლების განცხადებით, ლაფანყურის სპეცოპერაციის დროს, ლიკვიდირებული ე. წ. „ბოევიკები“ პანკისის ხეობაში მცხოვრები 19-20 წლის ახალგაზრდა ბიჭები არიან. ერთ-ერთი ვერსიით, ისინი ვაჰაბიტები იყვნენ და დაღესტნის გავლით, სირიაში გადასვლას და ამბოხებულთა მხარეს ბრძოლას აპირებდნენ.

დღესვე გავრცელდა ინფორმაცია, რომ სოფელ დუისში 6 საფლავია გათხრილი და ადგილობრივები მათთვის გვამების გადაცემას ელოდებიან.

შინაგან საქმეთა სამინისტრო ამ ინფორმაციას კატეგორიულად უარყოფს და აცხადებს, რომ სპეცოპერაციის დროს ლიკვიდირებული 11 ადამიანიდან არც ერთი არ არის საქართველოს მოქალაქე.

"ლოპოტაში ჩატარებული სპეცოპერაციის რიგი საკითხები ძიების პროცესშია. დანამდვილებით შეგვიძლია გითხრათ, რომ ჩვენს მიერ ლიკვიდირებული 11 (თერთმეტი) ადამიანიდან არც ერთი არ არის საქართველოს მოქალაქე. თუმცა ნებისმიერი ქვეყნის მოქალაქე, რომელიც გადაადგილდება საქართველოს ტერიტორიაზე შეიარაღებული, იტაცებს ადამიანებს, აჰყავს მძევლები, არ ემორჩილება პოლიციის კანონიერ მოთხოვნებს, მძევლების გათავისუფლების ოპერაციის დროს კლავს შინაგან საქმეთა და თავდაცვის სამინისტროს ოფიცრებს - ასეთ შემთხვევაში სახელმწიფოს რეაქცია მათ მიმართ იქნება ისეთი, როგორიც იყო და მომავალშიც თუ ანალოგიურ ფაქტს ექნება ადგილი, საქართველოს ხელისუფლება ანალოგიურად იმოქმედებს. გამომდინარე იქიდან, რომ საქართველოში მცხოვრები ყველა ადამიანის უსაფრთხოება უნდა იყოს დაცული და უზრუნველყოფილი", - განაცხადა შინაგან საქმეთა მინისტრის მოადგილემ შოთა ხიზანიშვილმა.

მიუხედავად ამ განცხადებისა, ცნობილი ხდება იმ ადამიანების ვინაობა, რომლებიც აღნიშნული სპეც-ოპერაციის დროს დაიღუპნენ. ექსპერტი კავკასიის საკითხებში მამუკა არეშიძე კი შინაგან საქმეთა სამინისტროს მიერ გავრცელებულ განცხადებას ცინიკურს უწოდებს და ამბობს, რომ მნიშვნელობა არ აქვს, ეს ადამიანები საქართველოს მოქალაქეები არიან თუ არა, რადგან საქართველოში ბევრი ადამიანი ცხოვრობს, რომელიც ჩვენი ქვეყნის მოქალაქე არ არის. For.ge მამუკა არეშიძეს ესაუბრა.

მამუკა არეშიძე: „შინაგან საქმეთა სამინისტრო აცხადებს, რომ ლოპოტას ხეობაში დახოცილი ადამიანები საქართველოს მოქალაქეები არ არიან. მე ვთლი, რომ ეს ცინიკური განცხადებაა, რადგან ბევრია საქართველოში მცხოვრები ადამიანი, რომელიც ჩვენი ქვეყნის მოქალაქე არ არის, მაგრამ საქართველოს მკვიდრია და აქ არის დაბადებული და გაზრდილი. ის სამი ახალგაზრდა, რომელიც დანამდვილებით ვიცი, რომ ამ ოპერაციისას დაიღუპა, პანკისში დაბადებულები და გაზრდილები არიან და ისიც ვიცი, რომ გარკვეული პერიოდის წინ ჩამოვიდნენ ავსტრიიდან. ესენი არიან ბაჰაუდი ბაღაკაშვილი, ბაჰაუდი ალდამოვი და ასლან გუმაშვილი, სოფელ დუისიდან, ხოლო მეოთხე, სავარაუდოდ, არის მუთოშვილი, სოფელ ჯოყოლოდან. დანარჩენი გარდაცვლილების ეროვნება არ ვიცი, თუ არ ვცდები, ერთი ინგუშია და ორი ჩეჩენი.

არიან თუ არა ეს ადამიანები საქართველოს მოქალაქეები, ამას არავითარი მნიშვნელობა არ აქვს, რადგან ისინი ასე მარტივად ვერ მოხვდებოდნენ საქართველოში  და ასე მარტივად ახმეტიდან თელავისკენ კბილებამდე შეიარაღებულები ვერ გადაადგილდებოდნენ. თუ ეს ასე მარტივად მოხდა და თუ ისინი ასე დამოუკიდებლად გადაადგილდებოდნენ, მაშინ საქართველოში საერთოდ არანაირი უსაფრთხოების სისტემა არ გვქონია.

თავად ხელისუფლებამ ოფიციალური განცხადებებით ხაზი გაუსვა იმას, რომ ეს ადამიანები კარგად იყვნენ შეიარაღებულები და ნაღმტყორცნებიც კი ჰქონდათ. თუ ეს ამბავი ხელისუფლებასთან ალიანსში მოხდა, მაშინ მთლად უბედურებაში ვყოფილვართ გახვეულები. ჯერ-ჯერობით ეს ყველაფერი დგინდება და შესწავლის თემაა. საბოლოო რეზულტატი ასეთია: საქართველოს შვილებმა - ქართველებმა და ქისტებმა - ერთმანეთი დახოცეს. რის გამო და როგორ მოხდა ეს ამბავი, ვიმეორებ, ეს ჯერ დგინდება და გვყავს 10 მიცვალებული.

გუშინ სტუდია „ობიექტივში“ დარეკა ქალბატონმა და სწორედ მან თქვა, რომ გარდაცვლილები პანკისელები იყვნენ

- ჩვენ ვიცოდით ეს ამბავი, მაგრამ არ ვიცოდით სახელები და გვარები. სწორედ დღეს დილით დავადგინეთ მათი ვინაობა.

არსებობს ინფორმაცია, რომ ეს ადამიანები სირიაში გადასვლას და ამბოხებულთა მხარეს ბრძოლას აპირებდნენ. თუ ასეა, როგორ ფიქრობთ, როგორ მოხვდნენ ისინი ლოპოტას ხეობაში?

- არ მაქვს ინფორმაცია და ჯერ ამაზე საუბარი არ შემიძლია. თქვენ გინდათ ჩემგან ვერსიები მოისმინოთ. შემიძლია ზოგადად ორ ვერსიაზე ვისაუბრო. პირველი ვერსია არის ის, რომ ეს ადამიანები დამოუკიდებლად გადაადგილდებოდნენ და ვიმეორებ: მაშინ არანაირი უსაფრთხოების სისტემაზე საუბარიც არ შეიძლება და ხელისუფლება ტყუილად ტრაბახობს.

მეორე ვერსია არის ის, რომ ხელისუფლებას რაღაც ჩანაფიქრი ჰქონდა და ეს ხალხი ერთი ადგილიდან მეორეში მან გადაადგილა. მაშინ ეს მეორე უბედურებაა. რაც შეეხება კითხვას, სირიაში ბრძოლას აპირებდნენ თუ არა, ერთ-ერთი მათგანი, ბაღაკაშვილი, რომლის ოჯახსაც მე ვიცნობ, ახალგაზრდა იყო, 22 წლის და ხშირ შემთხვევაში ახალგაზრდა კაცებს აქვთ ხოლმე სურვილი, რომ სადღაც წავიდნენ საბრძოლველად და ვიღაცას დაეხმარნონ. ჩემთვის ამაში გასაკვირი არაფერია. მხოლოდ ის შემიძლია გითხრათ, რაც ვიცი, სამივე ავსტრიიდან ჩამოვიდა.

ის ქალბატონი, რომელმაც „ობიექტივის“ეთერში დარეკა, შურისძიებით იმუქრებოდა და ამბობდა, რომ საქართველოს ხელისუფლებამ ქისტები გამოიწვია. შეიძლება ეს ინცინდენტი ქართველებსა და ქისტებს შორის ურთიერთობის დაძაბვის საფუძველი გახდეს?

- ქალბატონის განცხადებაში მუქარა იყო საქართველოს ხელისუფლების მიმართ. ქისტები ისეთი კატეგორიის ხალხია, რომ თავისიანს უსამართლოდ არ დააჩაგვრინებენ. აქედან გამომდინარე, შეგვიძლია ვივარაუდოთ, კერძოდ, მე არ ვთვლი, რომ ეს მუქარა ხელშესახებია და რამე უბედურება მოხდება, მაგრამ, ყოველ შემთხვევაში, ადამიანები რომ გულგახეთქილები არიან და მთელი ხეობა რომ გლოვობს, ეს ფაქტია, ოღონდ რისი გულისთვის მოხდა ეს ყველაფერი, ეს ვერ გავიგე. სწორედ ეს კითხვა ჩნდება - რისი გულისთვის?

რამდენადაც ცნობილია, მიცვალებულთა გვამები პანკისელებისთვის ჯერ არ გადაუციათ. თქვენ რა ინფორმაცია მაქვთ ამასთან დაკავშირებით?

- დიახ, რამდენადაც ვიცი, ჯერ გვამები არ გადაუციათ. მუსულმანური წესია, რომ მზის ჩასვლამდე მიცვალებულები უნდა დაიკრძალონ. ეს ყველაფერი ისედაც უკვე ამდენი ხანი გაგრძელდა, ეს ამბავი გუშინწინ მოხდა, ბოლოს და ბოლოს, ამას წერტილი უნდა დაესვას. თუ ხელისუფლება ამ ამბავში ცამდე მართლია, მაშინ გაუგებარია, მიცვალებულებს ოჯახის წევრებს რატომ არ გადასცემს. აქაც კითხვის ნიშნები ჩნდება. ხელისუფლება ახერხებს, რომ ნებისმიერი ნაბიჯი, რომელსაც გადადგამს, ყოველთვის კითხვის ნიშანთან არის დაკავშირებული. არ ვიცი, ალბათ ამას განსაკუთრებული ნიჭი სჭირდება.