...ის ქართული პოლიტიკის პელეა. ყოველ შემთხვევაში, კოალიცია “ქართულ ოცნებაში” შემავალმა პარტიების ლიდერებმა პირად საუბარში ერთი-ორჯერ, თურმე, ასე მიმართეს... პელე იქით იყოს და, ფაქტია: პოლიტიკურ ასპარეზზე ბიძინა ივანიშვილის გამოჩენის შემდეგ, მედიამ და, საერთოდ, საზოგადოებამ არაერთი პოლიტიკოსის მიმართ ინტერესი დაკარგა და, შესაბამისად, პოლიტიკურ რინგზე ორი მთავარი ფიგურა _ “ნაცმოძრაობა” და “ქართულ ოცნება” დარჩა. ერთადერთი, ან თითქმის ერთადერთი ფიგურა, ვინც ამ მოცემულობაში საზოგადოების ყურადღებას ინარჩუნებს, “ქართული დასის” ლიდერი, ოპოზიციონერი დეპუტატი ჯონდი ბაღათურიაა, რომელიც ოქტომრბის არჩევნებში საბურთალოს მაჟორიტარობისთვის იბრძოლებს...       
 
_ ჯონდი, ამბობ, ქართული პოლიტიკური სპექტრი დაბნეულიაო. ჰოდა, ისიც გეცოდინება, ამ დაბნეულობის საბაბ-მიზეზი რა არის...
_ დაბნეულობას ნაწილს ვატყობ...

_ შენც დაბნეული ხარ?
_ არა... რთული პოლიტიკური პროცესები მიმდინარეობს, თუმცა სააკაშვილმა ისეთი საინფორმაციო ველი შექმნა, რომ ჩანდა, არჩევნების წინ დაძაბულობა იქნებოდა და ამისთვის პოლიტიკოსები, წესით, მზად უნდა ყოფილიყვნენ.

_ “დაძაბულობაში” რას გულისხმობ?
_ რას და, _ დესტაბილიზაციის მოლოდინს.

_ “დესტაბილიზაციის მოლოდინი” ქუჩის არეულობას ნიშნავს?
_ მარჩიელობას არ დავიწყებ, მაგრამ დესტაბილიზაციის ერთ-ერთი წინაპირობა ხალხის ქუჩაში გამოსვლაა, რაც არც სასურველია და არც გვინდა, მაგრამ შეიძლება, ისე აღმოჩნდეს, რომ ეს კანონისა და სიმართლის დაცვის ერთადერთი გზა იყოს.

_ სხვათა შორის, “ნაციონალებთან” დაახლოებულ ანალიტიკოსთა თქმით, ოპოზიციის ერთი ნაწილი, კერძოდ, “ოცნება” არჩევნების გაყალბებაზე მიზანმიმართულად ლაპარაკობს და ამით არჩევნების შემდეგ ქუჩაში გამოსვლისთვის ფონს ქმნის... ამ ვერსიას შენც იზიარებ?
_ სინამდვილეში, ყველაფერი პირიქითაა _ დესტაბილიზაციის შექმნას “ნაცმოძრაობა” და “შტატიანი პროვოკატორი” სააკაშვილი ცდილობენ. ჩვენ კი, სტაბილურობა გვინდა. 7 ნოემბერსა და 26 მაისს გაუვიდა და ამიტომ, ხელისუფლება თავს ქუჩის მოედანზე უფრო კომფორტულად გრძნობს და ფიქრობს, რომ პროტესტს კიდევ დაახშობს, ანუ “ნაცმოძრაობას” არჩევნების ეშინია.

_ ესე იგი, საუბარი იქითკენ მიგყავს, რომ მმართველი გუნდი არჩევნების ჩაშლას ცდილობს?
_ ვანო, იცი, რა არის? _ ხელისუფლებას უნდა, რომ არჩევნებამდე ძალის დემონსტრირება მოახდინოს, რადგან არჩევნებში საპროტესტო ელექტორატმა მონაწილეობა არ მიიღოს და არჩევნები თავისი სატელიტი ოპოზიციური ელექტორატით გააყალბოს.

_ სხვათა შორის, ზოგიერთი “მეოცნებე” ამბობს, რომ ხელისუფლების წარმომადგენლები, განსაკუთრებით, რეგიონებში უკიდურესად აგრესიულად აღარ იქცევიან და დავალების შესრულებისას თვითშემოქმედებას აღარ იჩენენ...
_ აბა, ორი თავი ვის აქვს?! პროვოკატორი პირადად პრეზიდენტია _ შეუძლია, თავის მომხრეებს უთხრას, ქვა ისროლეთო... კარალეთში ქვების სროლა სწორედ მიშას დავალებით მოხდა!

_ ჯონდი, რა ამის პასუხია და, დღევანდელი მოცემულობით, ორი პოლიტიკური ვერტიკალი არსებობს _ მმართველი გუნდი და “ოცნება”. ამასთან, ისიც აღსანიშნავია, რომ მას შემდეგ, რაც პოლიტიკურ სარბიელზე ბიძინა ივანიშვილი გამოჩნდა, ბევრი პოლიტიკოსი, რბილად რომ ვთქვა, საზოგადოებისთვის უინტერესო გახდა, რასაც შენზე ვერ ვიტყვი. ეს როგორ მოახერხე?
_ “ქართულმა დასმა”, ღვთის წყალობით, მართლაც, მოახერხა, რომ თავისი სახე და დამოუკიდებლობა შეენარჩუნებინა. ვანო, მოდი, პირდაპირ ვიტყვი: ჩვენი, ანუ “ქართული დასის” ყველა ინიციატივა კრეატიულობით გამოირჩევა.

_ მე თუ მკითხავ, რამდენიმე თვის წინ პარლამენტში პრეზიდენტისთვის კომპრომანტების აფრიალებაც ერთგვარი კრეატიულობა იყო, რამაც შენი პერსონისადმი მედიისა და საზოგადოების ინტერესი გაზარდა...
_ ამ, ასე ვთქვათ, ინციდენტმაც აშკარად იმუშავა, თუმცა პარლამენტში სხვა ინციდენტებიც იყო, რომლებმაც საზოგადოების ნდობა განაპირობეს.

_ მოკლედ, იმის თქმა გინდა, რომ ხალხი გენდობა?
_ დიახ, ხალხისგან ნდობას ვგრძნობ და ამ ნდობას არაფერში გავცვლი, რადგან ეს ნდობა მხოლოდ მე, როგორც პოლიტიკოსს კი არა, ხალხსაც სჭირდება! საერთოდ, ნდობის მოპოვებისთვის შრომაა აუცილებელი...

_ ჯონდი, იყო დრო, როცა ქართულ პოლიტიკაში გავლენიან ფიგურად არ ითვლებოდი, თუმცა ჩემი აზრით, როგორც პოლიტიკოსი, გაიზარდე...
_ დიდი მადლობა...

_ თავის დროზე, ანუ მაშინ, როცა პარლამენტში მისულ პრეზიდენტ სააკაშვილ მკვახედ ელაპარაკე, “ნაციონალებმა” თქვეს, ჯონდი ივანიშვილთან “კასტინგს გადისო”. როგორც ჩანს, ეს “კასტინგი” ვერ “გაიარე”, რამეთუ კოალიციის მიღმა აღმოჩნდი. მეტიც, “ოცნებამ” საბურთალოზე კონკურენტი “ჩაგისვა”... რა ხდება?
_ “ნაციონალები” გაკოტრებულები არიან და იმ სიმართლის, რაც პრეზიდენტის პარლამენტში სტუმრობისას ვთქვი, განმარტებას ცდილობდნენ და კასტინგის თემაც იმიტომ მოიგონეს, რომ ამ ინციდენტის მნიშვნელობა დაემცროთ, თუმცა კასტინგზე უავტორიტეტო “ტიპები” _ წიკლაური, მინაშვილი და გაბაშვილი ლაპარაკობდნენ. ამიტომ, ამან არ იმუშავა.

_ თუმცა, ჯონდი, ისიც ფაქტია, რომ თავდაპირველად, ანუ როცა ივანიშვილი პოლიტიკურ ასპარეზზე გამოჩნდა, თითქმის ყველა, ვინც ხელისუფლებას უპირისპირდებოდა, “შუშის სასახლეს” ესტუმრა... სხვათა შორის, “ოპოზიციური ბულდოზერის” შექმნაზე ლაპარაკობდი, მაგრამ როგორც ჩანს, “ბულდოზერის იდეა” ჩავარდა...
_ იმის თქმა, ჩავარდა თუ არა, ნაადრევია...

_ რაღა ნაადრევია, როცა შენ დ “მეოცნებე” “რესპუბლიკელი” დავით უსუფაშვილი საბურთალოს მაჟორიტარობის კანდიდატები ხართ...
_ “ქართულ ოცნებასთან” კარგა ხანია, ვთანამშრომლობ და ამ თანამშრომლობით კმაყოფილი ვარ...

_ თუმცა, ბიძინა ივანიშვილი, როგორც იტყვიან, ტეტ-ა-ტეტ დღემდე არ შეგხვედრია...
_ ვანო, ვინ გითხრა, რომ არ შემხვედრია? რამდენჯერმე მქონდა საშუალება, რომ ბიძინა ივანიშვილთან მელაპარაკა.

_ ერთი-ერთზე ისაუბრეთ?
_ ასეთი შემთხვევაც იყო. ძალიან გონიერი კაცი ჩანს და აზრი დამთავრებული არ მქონდა, ვატყობდი, რომ ხვდებოდა, თუ რისი თქმა მინდოდა, თუმცა კოალიციის სხვა ლიდერებთანაც მაქვს ურთიერთობა.

_ კი ბატონო, მაგრამ ყველაფერ ამის მიუხედავად, “ქართული დასი” კოალიციის მიღმაა და ეს მაშინ, როცა “ოცენაბში” ადგილი, მაგალითად, არცთუ რეიტინგული კობა დავითაშვილისთვის მოინახა...
_ ერთადერთი, ასე ვთქვათ, გაუგებრობა საბურთალოს მაჟორიტარობის საკითხმა გამოიწვია. ვანო, გასაგებია, რომ შეკითხვები გაქვს...

_ კოალიციაში შენს წინააღმდეგ ინტრიგები არსებობს?
_ მთავარი, რაც ვიცი და რასაც ვხედავ, ისაა, რომ ოპოზიციის შიგნით კონკურენცია, მინიმუმ, მაჟორიტარულ ოლქებში მაინც არ შეიძლება. ვხედავ, რომ ამას მეორე მხარეც აცნობიერებს. ამიტომ, თავს აბსოლუტურად მშვიდად ვგრძნობ და ვფიქრობ, მაჟორიტარულ ოლქებში კონკურენტები არ ვიქნებით.

_ ნათქვამია, კაცი იმედით ცოცხლობსო, მაგრამ ისიც ფაქტია, რომ კოალიციამ საბურთალოს მაჟორიტარობის კანდიდატად დავით უსუფაშვილი მას შემდეგ დაასახელა, როცა უკვე ცნობილი იყო, რომ ამ მაჟორიტარულ ოლქში ბრძოლას შენ აპირებ...
_ ამ საკითხზე ვმსჯელობთ... ვანო, გულახდილად ერთსაც გეტყვი: პრესაში გამოქვეყნებული რამე კომენტარი ვინმემ სხვანაირად რომ არ აღიქვას, შევთანხმდით, რომ ამ საკითხზე მორატორიუმი გამოვაცხადეთ და ვფიქრობ, ეს სწორი გადაწყვეტილებაა. ერთი ცალსახაა: “ოცნება” დიდი გაერთიანებაა, მის ლიდერს მაღალი რეიტინგი აქვს და სრულიად გასაგებია, რომ “ოცნებას” პროპრორციულის გარდა, მაჟორიტარულ არჩევნებში გამარჯვების ამბიციაც აქვს, თუმცა ისიც აღსანიშნავია, რომ კოალიციამ და მისმა ლიდერმა იციან, რომ ოპოზიციის შიგნით განხეთქილება დაუშვებელია!

_ ეს “დიპლომატიური ენა” გასაგებია, მაგრამ ჯონდი, პირდაპირ მიპასუხე: ივანიშვილს არ ჰკითხე, თუ რატომ არ დაგპატიჟა “ოცნებაში”?
_ ვანო, ამ შეკითხვის დასმა არ დამჭირვებია. არ მინდა, ჩამოვთვალო, მაგრამ ბევრ წინადადებას განვიხილავთ.

_ შენთან დაკავშირებით?
_ თანამშრომლობის ფორმატთან დაკავშირებით.

_ ეს წინადადებები ივანიშვილისგან მოდის?
_ კი... არსებობს “ოცნების” რამდენიმე და, ასევე, რამენიმე “ქართული დასის” წინადადება და არ ვფიქრობ, რომ შეთანხმება ვერმიღწევადია. ასეა თუ ისე, ჩვენ ვთანამშრომლობთ და ეს კარგია, რადგან ამ თანამშრომლობას ოპოზიციისთვის დიდი მნიშვნელობა აქვს.

_ რატომ?
_ იმიტომ, რომ იქ, სადაც ოპოზიციის ორი მაჟორიტარი იქნება, “ნაცმოძრაობის” მაჟორიტარობის კანდიდატის მოგების შანსი ას პროცენტამდე გაიზრდება.

_ სხვათა შორის, ახლა გამახსენდა: საბურთალოს მაჟორიტარობისთვის 2003 წელსაც იბრძოდი და მაშინ შენი კონკურენტი გივი თარგამაძე იყო, რომელიც იმხანად მრისხანე ოპოზიციონერად ითვლებოდა. ჯონდი, 2003 წელს გივი თარგამაძემ რეალურად მოგიგო თუ არჩევნები მის სასარგებლოდ გაყალბდა?
_ დღეს 2003 წლისგან დიამეტრალურად განსხვავებული სიტუაციაა. სხვათა შორის, მაშინ გივი თარგამაძეს ისე გაუჭირდა, რომ “ნაცმოძრაობა” და ავთო ჯორბენაძე, ანუ ხელისუფლება ერთად მოქმედებდნენ.

_ ესე იგი, მაშინ რეალურად შენ მოიგე?
_ ასე ვერ ვიტყვი, მაგრამ გივი თარგამაძეს დაეხმარნენ... ვანო, გახსოვს, მაშინ “მოქკავშირმა” ბლოკი რომ შექმნა და ამ ბლოკს ხალხმა “უნიტაზი” დაარქვა? ჰოდა, ამ ბლოკ “უნიტაზის” ლიდერი ავთო ჯორბენაძე იყო, რომელმაც მიხეილ სააკაშვილთან ფარულად მოილაპარაკა და შეთანხმდნენ, რომ სხვა ოლქების მსგავსად, ჩემს წინააღმდეგაც უნდა ემუშავათ. ეს ინფორმაცია ბლოკის იმ წევრმა მომაწოდა, ვინც ამ გარიგებას არ ეთანხმებოდა.

_ ჩვენში დარჩეს და, 2003 წელს იმჟამინდელ ხელისუფლებას კომპრომანტებს გივი თარგამაძე უფრიალებდა, დღეს კი, “ნაციონალების” მამხილებელ მასალებს შენ ამზეურებ. საერთოდ, მგონია, რომ ერთადერთი ოპოზიციონერი ხარ, რომელიც, როგორც იტყვიან, დოკუმეტებით ლაპარაკობს. ეს შენი სტრატეგიაა? აქვე შეგეკითხები: თუკი ქვეყანაში ტერორი მძვინვარებს, არ გეშინია, რომ “ნაციონალების” მამხილებელი მასალების გამომზეურება ძვირი დაგიჯდეს?
_ ჯერ ერთი, ეს სტრატეგია კი არა, ტაქტიკაა, ანუ როცა რაღაცას ამბობ, მტკიცებულებაც უნდა წარმოადგინო. სხვათა შორის, მტკიცებულებების წარმოდგენა ნდობას მხოლოდ მომხრეებში კი არა, მოწინააღმდეგეებშიც აჩენს. როცა რაღაცას ვამბობ, პარლამენტის სხდომათა დარბაზში დეპუტატების რეაქციას ვაკვირდები და ვხვდები, მათ იციან, რომ მართალს ვამბობ. საერთოდ, სიმართლეს დიდი ძალა აქვს! ამიტომ, ვიდრე რამეს ვიტყვი, ვემზადები და ვცდილობ, ისეთი დოკუმენტები და არგუმენტები მქონდეს, რომლებიც ქვას გახეთქავენ!
მეორეც, რაც შეეხება შიშს, ვანო, იცი, რა არის? _ ამაზე არ მიფიქრია. ადამიანი საქმეს მთელი გულით უნდა აკეთებდეს და მხოლოდ პოზიტიურ შედეგებზე ფიქრობდეს.

_ ჯონდი, ჯერ არ დაუყადაღებიხარ?
_ დასაყადაღებელი არაფერი მაქვს...

_ სიტყვამ მოიტანა და, ვინ აფინანსებს “ქართულ დასს”?
_ ერთი თეთრის შემოწირულობა არ გვაქვს...

_ აბა, პარტია რითი არსებობს? ისეთი “ფეშენ” კაბინეტი გაქვს, მეგონა, რომელიმე ევროპელი პოლიტიკოსის სამუშაო ოთახში მოვხვდი...
_ კარგი გემოვნება მაქვს...

_ გემოვნებას არც მე ვუჩივი, მაგრამ ფული არ მაქვს...
_ “ქართული დასის” სახელმწიფოსგან 7 ათას 200 ლარს იღებს... ვცდილობ, დამოუკიდებლობა და თავისუფლება შევინარჩუნო. სხვათა შორის, ვერც ერთი ბიზნესმენი ვერ დავარწმუნე, რომ შემოწირულობა საშიში არ იქნება. საერთოდ, დაფინანსების ორი წყარო არსებობს _ ხელისუფლება და ქვეყნის გარედან შემოსული თანხა, მაგრამ ორივე წყარო უკანონოა.

_ “ქვეყნის გარედან შემოსულ თანხაში” რუსულ ფულს გულისხმობ?
_ ფული სხვა ქვეყნიდან არ შემოდის...

_ და “ქვეყნის გარედან” ფულს რომელი პოლიტიკური ძალა იღებს?
_ პროკურორი ხომ არ ვარ, რომ ეს ვიცოდე?

_ ისე, ჯონდი, ვიღაცები ამბობენ, რუსეთიდან ფული ეკლესიის გავლით შემოდისო...
_ ეს სიცრუეა, რომელსაც თუთბერიძე და ასეთები ავრცელებნ. ისე, მინდა, გითხრა, რომ თუთბერიძე და ბოკერია ოპოზიციაშიც გვყავს!

_ მოკლედ, ჯონდი, საარჩევნო კამპანიის ჩატარებას ზემოხსენებული 7 ათასი ლარით აპირებ?
_ ვცდილობ, რომ ფინანსური რესურსები მოვიძიო.

_ როგორ?
_ არ ვიცი, გაჭრის თუ არა, მაგრამ “ქართული დასი” მალე დაიწყებს კამპანიას და ფულს ხალხში შევაგროვებთ.

_ სპეციალურ საბანკო ანგარიშს გახსნი, სადაც ხალხი “ქართულ დასს” ფულს გადაურიცხავს თუ ქუჩაში ყულაბებს დადგამ?
_ დაახლოებით, ასე იქნება... ეს კამპანია მხოლოდ ფინანსური კი არა, პიარის თვალსაზირისითაც მნიშვნელოვანი იქნება.

_ იქნებ, ივანიშვილმა ამის მერე მაინც დაგაფინანსოს...
_ როცა დაფინანსების წყარი ჩნდება, ამ წყაროზე, სავსებით სამართლიანად, რა თქმა უნდა, დამოკიდებული ხდები. “ქართულ დასს” კი უნდა, რომ ხალხზე იყოს დამოკიდებული, ანუ პოლიტიკა ხალხმა შეგვიკვეთოს. სხვათა შორის, ჩვენს საარჩევნო სუბიექტს, ალბათ, ასე დავარქმევთ _ “ჯონდი ბაღათურია _ “ქართული დასი”. მოკლედ, არ ვიცი, რა გამოვა, მაგრამ შევცდები, რომ “ქართული დასის” დამფინანსებელი ხალხი იყოს. ვფიქრობ, ისეთი ცოტა არ იქნება, რომელიც შეიძლება, ღარიბია, მაგრამ “ქართულ დასს” ლარს მაინც შესწირავს. საერთოდ, მომხრე ვარ, რომ იმ რესურსებით უნდა იბრძოლო, რაც გაქვს _ თუკი ბრძოლაში ტყვიები გაგითავდება, თოფი კი არ უნდა გადააგდო, არამედ, უნდა შემოატრიალო და ბრძოლა კონდახით გააგრძელო. ფულის შეგროვების ეს კამპანია ერთგვარი ტესტიც იქნება _ თუკი ხალხი გადაწყვეტს, რომ “ქართული დასი” დააფინანსოს, ესე იგი, არჩევნებში ხმასაც მოგვცემს და ამ კამპანიით კონკურენტების წინაშე მორალურ უპირატესობასაც მოვიპოვებთ, რომ ხალხის პარტია ვართ...

_ უდავოდ, საინტერესო იდეა, რომელიც ერთგვარი სოციოლოგიური გამოკითხვაც იქნება... ჯონდი, რა ამის პასუხია და, სულ მინდოდა, მეკითხა და მავიწყდებოდა: მმკ-სთან რა გაკავშირებს?
_ მმკ რა არის?

_ “მართლმადიდებელ მშობელთა კავშირი”...
_ “მართლმადიდებელ მშობელთა კავშირის” ბევრი წევრი ჩემი მეგობარია...

_ ანუ, ეს კავშირი შენი შექმნილ-დაფუძნებული არაა?
_ არა... ეს მრევლის კავშირია, რომელსაც თავისი სამართლიანი პოზიცია აქვს და სადაც ბევრი ჩემი ეკლესიის მრევლია.

_ ისე, ბოლო დროს ბათუმში აქტიურობდი და მეგონა, რომ ბათუმის მაჟორიტარობას დააპირებდი...
_ “ქართულიდ დასი” ქვეყნის ყველა კუთხეში აქტიურობს. ჩვენი მთავარი პრობლემა ფინანსებია, რაც საწვავისა და ბუკლეტბისთვის გვჭირდება. თუკი ჩვენმა ზემოხსენებულმა კამპანიამ გაამართლა, ან რომელიმე ბიზნესმენი “ნამუსზე ავარდა” და თანხა შემოგვწირა, ეს ჩვენთვის ახალი ენერგია იქნება.

_ ...ჯონდი, რა მოგცა პარლამენტში ოთხწლიანმა მოღვაწეობამ და, როგორც დეპუტატმა, რა მიეცი ქართულ პარლამენტარიზმს?
_ გამოვიმუშავე საპარლამენტო ბრძოლის ტაქტიკა, თან პარლამენტის ტრიბუნა ძალიან მნიშვნელოვანია. რაც შეეხება იმას, თუ რა მივეცი პარლამენტს, მივეცი არაერთი მნიშვნელოვანი საკანონმდებლო ინიციატივა. სხვათა შორის, საკანონმდებლო ინიციატივას მანამ არ ვარეგისტრუირებდი, ვიდრე ხალხს არ გავაცნობდი.

_ თავის დროზე, როცა გაერთიანებული ოპოზიციის რამდენიმე წარმომადგენელი, ანუ შენ, გია თორთლაძე, გია ცაგარეიშვილი, დიმიტრი ლორთქიფანიძე და პაატა დავიათაი პარლამენტში შეხვედით, ითქვა, რომ ხელისუფლებას გაურიგდით. ჯონდი, როგორ ფიქრობ, დრომ ეს ეჭვი გააბათილა?
_ ამას დავით გამყრელიძე და მამუკა კაციტაძე ამბობდნენ და ხედავთ, ისინი დღეს სადაც არიან. ღვთისა და ხალხის წინაშე შემიძლია, ხმამაღლა ვთქვა, რომ ამ ოთხი წლის განმავლობაში სახელმწიფოს წინააღმდეგ ერთი ნაბიჯიც არ გადამიდგას და არც ხელისუფლებასთან გარიგება დამიდვია!

_ ჯონდი, ბოლოს და ბოლოს მითხარი, ბიძინა ივანიშვილმა რა შემოგთავაზა?
_ ხომ გითხარი? _ რამდენიმე საკითხს განვიხილავთ და სჯობს, საზოგადოებას მიღებული გადაწყვეტიელბა შევატყობინო. თუკი შეთანხმება ვერ მოხერხდა, მაინც ყველაფერს გავაკეთებ, რომ ოპოზიციის შიგნით კონკურენცია არ იყოს.

_ ისე, როგრო შეატყვე, ივანიშვილს, როგორც პოლიტიკოსი, ესიმპათიურები?
_ ჩვენი ურთიერთობა ურთიერთპატივისცემაზეა დამყარებული...

_ ჯონდი, იცი, რა ხდება “ნაცმოძრაობაში”?
_ ფუსტრაცია დაწყებულია, ანუ პოლიტიკურ თუ პირად მომავალზე ხელისუფლების ბევრი წარმომადგენელი უკვე დაფიქრდა, თუმცა “ნაცმოძრაობაში” რღვევა არ არის _ ატყობენ, რომ რაღაც “ყანყალებს”, მაგრამ ასეთი ყანყალი 2007 წელსაც იყო და 2008-შიც. 2008 წელს ხელისუფლება ზანზარებდა და ცდილობდა, რომ ოპოზიციასთან ურთიერთობა დაერეგულირებინა. ახლა კი, ამის მცდელობას ვერ ვხედავ.

_ ანუ, სააკაშვილს ივანიშვილის არ ეშინია?
_ არ მგონია, რომ არ ეშინოდეს, მაგრამ არ უნდა წარმოვიდგინოთ, რომ მიშას ჩემოდნები აქვს ჩალაგებული. ის, თავის ბანდასთან ერთად, ვა-ბანკზე მიდის და ცდილობს, რომ ძალაუფლება შეინარჩუნოს... თუკი არჩევნები გაყალბდა და რომელიმე ოპოზიციური პარტია ამ გაყალბებული არჩევნების აღიარებას და მილოცვას დააპირებს, ხალხი ხელისუფლებას კი არა, ჯერ ამ პარტიას გადაუვლის!

_ ჯონდი, როგორ ფიქრობ, ხალხს ბიძინა უნდა?
_ ხალხს ბიძინაც უნდა და ჯონდიც!

_ ბოლოს, ჯონდი, ისიც მითხარი, ბუნებით მეოცნებე ხარ თუ პრაგმატიკოსი?
_ პრაგმატიკოსი, თუმცა რომანტიკაც მიყვარს...